Ko Te Kau Fai Faka Mafola ʼo Te Puleʼaga
ʼE Tali Te Logo Lelei ʼi Lettonie
ʼE FAKAHĀ lelei mai e te Tohi-Tapu ko te finegalo ʼo te ʼAtua “ke fakamauli te tagata fuape, pea ke natou kaku ki te iloi o te mooni.” (1 Timoteo 2:4) Ko nātou ʼaē ʼi te ʼu taʼu ki muʼa atu neʼe mole nātou fia logo ki te logo lelei, kua nātou fakalogo kiai ʼi te temi nei! ʼI Lettonie, ohage pe ko te tahi ʼu potu ʼi te malamanei, ko te hahaʼi ʼe nātou taʼu kehekehe pea ʼe kehekehe tonatou faʼahiga maʼuli, kua nātou tali te logo, ohage ko tona fakahā e te ʼu faʼifaʼitaki ʼaenī:
• ʼI Rēzekne, ʼi te potu esite ʼo Lettonie, neʼe fakalavelave e te faʼe pea mo tana taʼahine ki te fafine ke ina fakahā age te faʼahi ʼe nā fia ʼolo kiai. ʼI te ʼosi fakahā age te faʼahi ʼaia e te fafine, ʼaē neʼe ko te Fakamoʼoni ʼa Sehova, neʼe ina fakaafe nāua ki te fono ʼa te kau Fakamoʼoni.
Mai tona ʼaluʼaga ʼaē neʼe tauhi lotu te faʼe pea mo tana taʼahine, koia neʼe nā ʼolo ai ki te fono. ʼI te ala, neʼe nā fakatuʼutuʼu kapau ʼe nā logo ki he meʼa ʼe kovi ʼi te fono ʼaia, pea ʼe nā mavae anai mai ai. Kae neʼe mole nā fia mavae he neʼe nā leleiʼia ʼaupito te fono. Neʼe nā tali ke fai hanā ako Tohi-Tapu, pea neʼe nā kamata kau tuʼumaʼu ai ki te ʼu fono. Ia māhina pe e tolu, neʼe nā fakahā ʼe nā fia fai faka mafola pea mo papitema.
• ʼI te kolo ʼi te potu uesite ʼo Lettonie, neʼe felāveʼi te tēhina mo te fafine ko Anna, ʼe taʼu 85, neʼe ina fia logo ki te logo lelei pea neʼe ina tali tana ako Tohi-Tapu. Ko tana taʼahine pea mo ʼihi ʼo tona famili neʼe nātou fakafeagai mālohi kia ia. Kae neʼe mole tuku e Anna ki te faʼahi ʼaia pea mo tana kua finematuʼa pea mo mahamahaki ke tuku ai tana haga ako ia te Tohi-Tapu.
ʼI te tahi ʼaho, neʼe fakahā age e Anna ki tana taʼahine ʼe ʼamanaki papitema. Neʼe tali fēnei e tana taʼahine: “Kapau ʼe ke papitema, pea ʼe ʼau ʼave anai koe ki te fale ʼo te hahaʼi vaivavai.” Kae neʼe mole lotovaivai Anna ʼi tona fakamatakuʼi ʼaia. ʼUhi ko tona kua vaivai, neʼe papitema Anna ʼi tona ʼapi.
Koteā ʼaē neʼe fai e te taʼahine ʼa Anna? Neʼe fetogi tana aga pea neʼe ina teuteuʼi te meʼa kai lelei maʼa tana faʼe ʼi tana ʼosi papitema. Pea neʼe ina fehuʼi fēnei age ki tana faʼe: “Kua ke logo feafeaʼi nei ʼi tau ʼosi papitema?” Koteā te tali ʼa Anna? “Kua ʼau hage ko he kiʼi tamasiʼi neʼe hoki tupu ake!”
• ʼI Tesepeli 1998, neʼe felāveʼi te ʼu Fakamoʼoni e toko lua mo te ofisie letelete ʼo te kautau ʼo te Union Soviétique ʼāfea. Neʼe tui te tagata ʼaia ki te Tupuʼaga, koia neʼe ina tali ai tana ako Tohi-Tapu, pea neʼe toe ako mo tona ʼohoana ki muli age. Neʼe nā tuputupu vave ʼi te faʼahi fakalaumālie pea mole fualoa pea nā liliu ko he ʼu kaugā fagona. ʼI te temi māfana ʼaē neʼe hoa kiai, neʼe papitema ai te ofisie ʼāfea ʼaia. Ko te ʼofa lahi ʼa te taumatuʼa ʼaia ki te ʼu meʼa fakalaumālie neʼe ko he fakaloto mālohi ki te kokelekasio katoa. Tahi ʼaē meʼa, neʼe nā kau ki te gaohi ʼo te fale ke liliu ko he Fale ʼo te Puleʼaga matalelei.