“Ko He Meʼa ʼe ū Kae ʼe Fakatupu Tuʼutāmaki”
ʼE FAKAHĀ e te sivi ʼo ʼuhiga mo nātou ʼaē ʼe nātou mamata ki te ʼu polokalama olotinatea ʼo te ʼu felāveʼi fakasino heʼeʼaoga, ʼe teitei ko te toko 200 000 ʼo te hahaʼi lalahi ʼaē ʼe nātou fakaʼaogaʼi te Internet ʼe nātou fai te potu ʼaia. Ko he kaugamālie ʼaupito ʼe nātou fakahoko ʼonatou ʼu holi fakasino ʼaki te Internet. ʼE ʼui fēnei e te Tōketā ko Al Cooper, ko te tōketā ʼo te ʼu mahaki ʼulu pea neʼe ina takitaki te sivi ʼaia: “ ʼO ʼuhiga mo te fakatupu tuʼutāmaki ʼo te faʼahi ʼaia ki te maʼuli ʼo te hahaʼi, ʼaē ʼe mafola kae ʼe ū, tokosiʼi te hahaʼi ʼe nātou faka ʼuhigaʼi feiā peʼe nātou meʼa noaʼi te faʼahi ʼaia ohage ko he meʼa ʼe fakatupu tuʼutāmaki.”
Ko ai tāfito ʼaē ʼe higa ki te potu ʼaia? ʼE ʼui fēnei e te Tōketā ko Cooper, “ko nātou ʼaē ʼe mole kei feala hanatou fai he ʼu felāveʼi fakasino, peʼe faka tuʼakoi ʼi tonatou maʼuli, pea fokifā pe kua nātou maʼu he faigamālie lahi ʼaupito” ʼi te Internet.
Kae tokolahi ia nātou ʼaē ʼe nātou mamata ki te ʼu polokalama ʼaia ʼi te Internet ʼe nātou ʼui ʼe mole kovi ia. Kae ʼe moʼoni koa te ʼui ʼaia? Ohage pe ko he tagata toloke ʼe lesili tuputupu tana māhani mo te toloke, ʼo feiā mo te hahaʼi tokolahi ʼe nātou fia sio tuʼumaʼu ki te ʼu felāveʼi fakasino fakalialia, ʼe nātou faigaʼi anai ke nātou fakalahilahi tonatou “vaega” ki te potu ʼaia moʼo fakafimālieʼi tonatou ʼu holi. Koia, kia nātou ʼaia ʼe feala pe ke haʼele kovi tanatou gāue, ʼo feiā mo tanatou ʼu felogoi mo tonatou ʼu ʼohoana!
Kae kia nātou ʼaē ʼe nātou fia fakafiafia te ʼAtua, ʼe ʼi ai te tupuʼaga mālohi ʼo tanatou mole fia mamata ki te ʼu polokalama ʼaia ʼi te Internet. ʼE fakatokaga fēnei e te Folafola ʼa te ʼAtua: “Koutou fakamate te ʼu koga ʼo tokotou sino ʼaē ʼi te kele, ʼo ʼuhiga mo te folonikasio, mo te aga heʼemaʼa, mo te manako ki te ʼu felāveʼi fakasino, mo te holi ki te meʼa ʼaē ʼe kovi, mo te mānumānu, ʼaē ʼe ko he tauhi tamapua. ʼE hoko mai te hāūhāū ʼo te ʼAtua ʼuhi ko te ʼu meʼa ʼaia.” (Kolose 3:5, 6, MN ) Moʼo ‘fakamate te ʼu koga ʼo tona sino’ ʼo ʼuhiga mo te manako ki te ʼu felāveʼi fakasino heʼemaʼa, ʼe ʼaoga ki te tagata ke ina maʼu he ʼofa lahi kia Sehova ʼAtua. (Pesalemo 97:10) Kapau ʼe ina logoʼi ʼe holi ki te meʼa fakatupu tuʼutāmaki ʼaia, pea ʼe lagi tonu anai ke ina fakamālohi tona ʼofa kia Sehova ʼo ako te Folafola ʼa te ʼAtua, te Tohi-Tapu. Ko te fakatahi lelei mo te kau Fakamoʼoni ʼa Sehova ʼi te Fale ʼo Te Puleʼaga, ʼe feala ke tokoni ki te tagata ʼaia ke ina fakamālohi tona loto ʼaē ke ina fakafiafia te ʼAtua.