Ko He Kautahi Faka Malamanei ʼe Fetokagaʼaki
ʼI TE potu fuli pe ʼe koutou sio kiai, ʼe koutou sio aipe ki te hahaʼi. Tokolahi ia nātou kua matutuʼa, pea ko ʼihi kua faigataʼa tanatou haʼele. ʼE ʼi ai te hahaʼi fafine faitatama pea mo he ʼu taumatuʼa mo ʼanatou ʼu tamaliki liliki. Ko te ʼu hahaʼi fuli ʼaia ʼe ko he ʼu hahaʼi neʼe feholaki mai tonatou fenua—te hahaʼi tagata mo te hahaʼi fafine pea mo te tamaliki—ʼuhi ko te tau ʼo tonatou fenua, peʼe ko he ʼu tuʼutāmaki, peʼe ko he tahi ʼatu ʼaluʼaga ʼaē neʼe nātou līaki ai ʼonatou ʼu ʼapi kae nātou kumi hāofaki ʼi te ʼu fenua tafaʼaki. Ko ʼihi kua tuʼa lahi tanatou mavae fakakinau ʼi ʼonatou ʼu nofoʼaga. Ka kamata he ʼu maveuveu ʼi te loto fenua peʼe ko he ʼu fakaʼiloga ʼo he tuʼutāmaki ka ʼamanaki hoko, ʼe nātou tānaki he ʼu meʼa ʼo te loto fale, pea mo nātou toʼo ʼanatou ʼu tamaliki kae nātou kumi he koga meʼa ke nātou feholaki kiai. Pea ka kua toe tokalelei, pea ʼe toe liliu mai te hahaʼi ʼaia neʼe feholaki ʼo nātou toe laga tonatou ʼu ʼapi, pea nātou toe kamata atu tonatou maʼuli.
Lolotoga te ʼu taʼu, neʼe fakagafua e te République Centrafricaine ke ʼolo age te hahaʼi ʼaē ʼe feholaki mai tonatou ʼu fenua. Mole heʼeki faʼa fualoa, ko te ʼu lauʼi afe hahaʼi, ʼo kau ai mo te tokolahi ʼo te kau Fakamoʼoni ʼa Sehova, neʼe tonu ke nātou feholaki mai te République démocratique du Congo ʼo ʼolo ke hāofaki nātou ʼi te République Centrafricaine.
Ko He ʼu Tēhina ʼe Nātou ’Ōmai ʼo Tokoni
Maʼa te kau Fakamoʼoni ʼi te République Centrafricaine, neʼe ko he pilivilesio pea mo he meʼa fakafiafia te fai ʼo he ʼu fakatuʼutuʼu moʼo tokoni kia nātou ʼaia ʼe tau mo te faigataʼaʼia. Neʼe teuteuʼi te ʼu nofoʼaga maʼa te ʼu tēhina Kilisitiano ʼaē ʼe tau mai. ʼI te kamata, neʼe maʼu te ʼu kogafale ʼi te ʼu ʼapi ʼo te ʼu tēhina, kae ʼi te fakaaʼu ke hahaʼi ʼaupito te kau feholaki, neʼe kua ʼaoga leva ke fai he tahi ʼu fakatuʼutuʼu. Neʼe fakaliliu ʼihi Fale ʼo Te Puleʼaga ko he ʼu fale moe. Ko te kau Fakamoʼoni ʼo te koga meʼa neʼe nātou fakapipiki he tahi ʼu hila, mo nātou ʼai te ʼu tuio, pea mo nātou kule he ʼu lauʼi simā ke fīmālie kia nātou ʼaē ka nonofo ai. Neʼe gāue fakatahi te kau feholaki mo te ʼu tēhina ʼo te nofoʼaga moʼo fakatuʼu te ʼu fale moe faka temi ʼaia. Neʼe fakatuʼutuʼu mo he polokalama katoa ʼo te ʼu fono faka Kilisitiano ʼi te lea faka Lingala, ke feala ki te hahaʼi ʼaia ke nātou maʼu te meʼa kai fakalaumālie ʼaē ʼe ina foaki te maʼuli. Ko te faifaitahi ʼo te kau Fakamoʼoni ʼo te koga meʼa pea mo te hahaʼi ʼaē neʼe tau mai ki tonatou fenua, neʼe fakamoʼoni ai ʼe ʼi ai te fale tautēhina faka malamanei.
Neʼe mole ʼōmai fakatahi tuʼumaʼu te ʼu famili ʼo te kau feholaki. ʼI ʼihi temi, neʼe hoki toe felāveʼi te ʼu famili ʼi te ʼu koga meʼa ʼaē neʼe nātou tau kiai. ʼI te ʼu Fale ʼo Te Puleʼaga, neʼe taupau te lisi ʼo te hahaʼi ʼaē neʼe tau haohaoa mai. Neʼe fai te ʼu fakatuʼutuʼu ke ʼiloʼi ia nātou ʼaē ʼe kei pupuli. Ko te filiale, ʼaē ʼe ina takitaki te gāue ʼa te kau Fakamoʼoni ʼa Sehova ʼi te fenua, neʼe ina vaevae motokā e tolu ʼi te ʼaho moʼo tokoni ki te kau Fakamoʼoni ʼaē ʼe kei ʼōmai ʼi te ala pea mo kumi ia nātou ʼaē kua lagi hēhē ʼi te ala. Neʼe fakaʼiloga lelei te ʼu motokā ʼaia he neʼe tohi ai te ʼu kupu ʼaenī “TE TULE LEʼO—Te Kau Fakamoʼoni ʼa Sehova.”
Koutou fakafuafua age te fiafia ʼo te ʼu kiʼi tamaliki e toko fitu neʼe nātou mavetevete mo ʼanatou ʼu mātuʼa ʼi tanatou sisio ki te motokā ʼa te kau Fakamoʼoni ʼa Sehova. Neʼe nātou foimo feleleʼi ki te motokā ʼo nātou fakahā ko nātou ko te kau Fakamoʼoni. Neʼe tokoni te ʼu tēhina ki tonatou fakaheka ki te motokā pea mo ʼave ia nātou ki he Fale ʼo Te Puleʼaga, ʼo hoki nātou fakatahi ai ki tonatou ʼu famili.
Koteā ʼaē neʼe ina faka fealagia ki te kau Kilisitiano fakamalotoloto ʼaia ke nātou gāue liuliuga ʼi te ʼu taʼi ʼaluʼaga feiā? ʼE nātou ʼiloʼi papau ʼe tou maʼuʼuli nei ʼi te ʼu ʼaho fakamuli ohage ko tona fakakikite ʼi te Tohi-Tapu.—2 Timoteo 3:1-5; Apokalipesi 6:3-8.
Koia, ʼe nātou ʼiloʼi kua vave fakagata e Sehova ʼAtua te ʼu tau, te loto fehiʼa, te agamālohi pea mo te ʼu fefihiʼaki. ʼE mole toe hoko anai te ʼu faigataʼaʼia ʼo te kau feholaki. ʼO fakatalitali ki te temi ʼaia, pea mo mulimuli ki te tokoni ʼa te ʼapositolo ko Paulo ia 1 Kolonito 12:14-26, ʼe faiga te kau Fakamoʼoni ʼa Sehova ke nātou fetokagaʼaki. Logope hanatou nofo mavetevete ʼuhi ko te ʼu vaitafe, peʼe ko te ʼu tuʼakoi, peʼe ko te lea, kae ʼe nātou fetokagaʼaki, ʼo nātou fai puleʼaki fakavilivili mokā faigataʼaʼia he tahi.—Sakopo 1:22-27.
[Mape ʼo te pasina 30]
(Vakaʼi te nusipepa)
AFRIQUE
République Centrafricaine
République démocratique du Congo
[Haʼuʼaga ʼo te paki]
Mountain High Maps® Copyright © 1997 Digital Wisdom, Inc.
[Paki ʼo te pasina 30]
Neʼe fakaliliu te ʼu Fale ʼo Te Puleʼaga e tolu ko he ʼu fale tali fagona
[Paki ʼo te pasina 31]
Neʼe foimo fakatuʼu te ʼu fale kuka
[Paki ʼo te pasina 31]
Neʼe kaugamālie ʼaupito te ʼōmai ʼa te kau feholaki
[Paki ʼo te pasina 31]
Ko te kiʼi tamasiʼi neʼe hoki tupu ake pe, pea kua kau ia ʼi te kau feholaki