Koutou Tauʼi Te ʼu Meʼa ʼAē ʼe Gaohaʼa Ki Takotou Tuputupu!

KUA KOUTOU pase te vitesi, pea ʼe gugulu te motokā kae ʼe mole fia ʼalu ki muʼa. ʼE ko te masini ʼapē ʼaē ʼe haʼele kovi? Kailoa ia, ko te foʼi maka ʼe ina tāʼofi te foʼi teka muʼa. Ke haʼele ki muʼa te motokā, ʼe tonu ke toʼo kehe te foʼi maka.

ʼI he ʼaluʼaga tatau, ko ʼihi hahaʼi ʼe nātou ako te Tohi-Tapu mo te kau Fakamoʼoni ʼa Sehova, pea ʼe nātou felāveʼi mo te ʼu fihifihia ʼe feala ke gaohaʼa ki tanatou tuputupu ʼi te faʼahi fakalaumālie. Ohage la, neʼe fai e Sesu te fakatokaga ʼo ina ʼui ko te ʼu meʼa ohage “ko te hoha ki te tuʼu ʼo te ʼu faʼahiga meʼa ʼaenī pea mo te mālohi fakahala ʼo te ʼu koloā,” ʼe feala pe ke nā “taʼotaʼo te folafola” ʼo te moʼoni pea mo gaohaʼa ki te tuputupu.—Mateo 13:22, MN.

Ki ʼihi, ko te ʼu agamāhani peʼe ko he ʼu vaivaiʼaga kua tauʼaka ʼe nātou tāʼofi tanatou tuputupu. Neʼe leleiʼia e te tagata Saponia ko Yutaka te logo ʼo te Tohi-Tapu, kae ko tona fihifihia neʼe ko te gaoʼi paʼaga. Neʼe tuʼa lahi tana faiga ke ina tauʼi te aga ʼaia ʼe kovi kae neʼe mole ina lavaʼi. Neʼe lahi ʼaupito tona fua kovi kia ia, he neʼe ina pulihi ai tana toe falā lahi, mo ʼona ʼu ʼapi e tolu, mo te fakaʼapaʼapa ʼo tona famili, pea mo tona ʼuhiga ʼo ia totonu. ʼE feala koa hana toʼo kehe te meʼa fakatupu tūkia ʼaia, pea ke liliu ko he Kilisitiano?

Tou fakatokagaʼi age muʼa te fafine ʼe higoa ko Keiko. ʼAki te tokoni ʼa te Tohi-Tapu, neʼe lītuʼa ki te ʼu aga ʼe kovi ohage ko te tauhi tamapua, mo te ʼu felāveʼi fakasino heʼeʼaoga, pea mo te fai fakakikite. Kae ʼe fakamoʼoni fēnei mai e Keiko: “Ko toku fihifihia lahi neʼe ko te suluka. Neʼe kua tuʼa lahi taku faiga ke ʼau tuku kae neʼe mole ʼau lavaʼi.”

ʼE hage kia koutou ʼe koutou tau mo he fihifihia lahi ʼaupito ʼe ina tāʼofi takotou tuputupu. Logope he ʼaluʼaga ʼe hoko kia koutou, kae ke koutou ʼiloʼi papau ʼaki te tokoni ʼa te ʼAtua, ʼe feala pe hona toʼo.

Koutou manatuʼi te tokoni ʼa Sesu ʼaē neʼe ina fai ki tana kau tisipulo ʼi tanatou mole lava kapu te temonio mai te tagata neʼe mahaki moa. ʼI te ʼosi fakahoko e Sesu te fakamālōlō ʼo te mahaki ʼaē neʼe mole lavaʼi e tana kau tisipulo, neʼe ina ʼui fēnei age kia nātou: “Kapau ʼe koutou maʼu he tui ʼe fualahi ohage he tegaʼi sinapi, pea ʼe koutou ʼui age anai ki te moʼuga ʼaenī: ‘Hiki ia koe ʼi henī ki he atu,’ pea ʼe hiki anai ia, pea ʼe mole toe faigataʼa anai he meʼa kia koutou.” (Mateo 17:14-20; Maleko 9:17-29, MN ) Ei ko te fihifihia ʼaē ʼe hage kia tatou ko he toe moʼuga, ʼe ko he meʼa noa ia pea ʼe mole hona ʼuhiga ki totatou Tupuʼaga mālohi ʼaupito.—Senesi 18:14; Maleko 10:27.

Te ʼu Meʼa ʼe Gaohaʼa

ʼI muʼa ʼo takotou tauʼi takotou ʼu fihifihia, ʼe tonu ke koutou ʼiloʼi peʼe koteā te ʼu fihifihia ʼaia. E feafeaʼi hakotou lava fai te faʼahi ʼaia? ʼI ʼihi temi, ko he tahi ʼo te kokelekasio, lagi ko he tagata ʼāfea peʼe ko ia ʼaē ʼe ina fai takotou ako faka Tohi-Tapu, ʼe ina fakatokagaʼi atu he meʼa. ʼE mole tonu ke koutou līaki te taʼi tokoni ʼofa ʼaia, kae ʼaki te agavaivai ʼe tonu ke koutou “fakalogo ki te akonaki pea koutou liliu ʼo popoto.” (Tāʼaga Lea 8:33) ʼI te tahi ʼu lakaga, ʼaki takotou ako te Tohi-Tapu ʼe koutou mālama ai ki takotou ʼu vaivaiʼaga. Ei, ko te Folafola ʼa te ʼAtua ʼe ‘maʼuli pea ʼe gāue.’ (Hepeleo 4:12) Ko takotou lau te Tohi-Tapu pea mo te ʼu tohi faka Tohi-Tapu, ʼe ina fakaʼasi ki tuʼa takotou ʼu manatu loloto, te ʼu meʼa loloto ʼaē ʼe koutou logoʼi pea mo te ʼu meʼa loloto ʼe ina uga koutou. ʼE tokoni kia koutou ke koutou sivi ia koutou ʼo mulimuli ki te ʼu pelesepeto māʼoluga ʼa Sehova. ʼE ina fakahā pea mo fakaʼilo atu kia koutou te ʼu meʼa ʼaē ʼe gaohaʼa ki takotou tuputupu fakalaumālie.—Sakopo 1:23-25.

Ohage la, ko he tahi ʼe ina ako te Tohi-Tapu kae ko hana agamāhani te moemisi ki he ʼu felāveʼi fakasino heʼeʼaoga. Lagi maʼa ia ʼe mole ʼi ai he meʼa fakatupu tuʼutāmaki ki ai, ʼo ina fakafuafua ʼe mole ina fai he meʼa ʼe kovi. Lolotoga tana ako, ʼe ina tokagaʼi te ʼu palalau ia Sakopo 1:14, 15: “Ko te tagata fuape e fakahalai e tona loto holi, e ina toho pea mo ina fakamaùmaù ia. Pea ko te lotoholi moka fuafatu e ina fanaui mai te agahala, pea i te matuà a te agahala e ina fanaui mai te mate.” Kua sio nei kapau ʼe hoholo tana fai tana agamāhani ʼaia pea ʼe fakatupu tuʼutāmaki anai ki tana tuputupu! E feafeaʼi hana lava pulihi te meʼa ʼaia ʼe gaohaʼa?—Maleko 7:21-23.

Tou Tauʼi Te ʼu Fihifihia

Lagi ʼaki he tokoni ʼa he Kilisitiano kua fakapotopoto ʼi te faʼahi fakalaumālie, ʼe feala pe kia ia ʼaē ʼe ako ke ina fai he tahi ʼu kumi ʼi te Folafola ʼa te ʼAtua, ʼaki te Index des publications de la Société Watch Tower.a Ohage la, ʼi te kupu tāfito “pensée” (te manatu), ʼe maʼu te tuʼuga alatike ʼo ʼuhiga mo te tauʼi ʼo te ʼu holi fakatupu tuʼutāmaki. ʼE fakahāhā e te ʼu alatike ʼaia te koga tohi faka Tohi-Tapu ohage ko Filipe 4:8, ʼaē ʼe ʼui ai: “Ko meafuape e mooni, ko meafuape e fakaapaapaʼia, ko meafuape e tonu, ko meafuape e maa, ko meafuape e tuha mo te ofa, ko meafuape e lelei tona palalaui, kapau e ko he vilitute pea kapau e ko he mea e vikivikiʼia, koutou tokaga kia mea aia.” Ei, ʼe tonu ke fetogi te ʼu manatu heʼeʼaoga ʼaki he ʼu manatu ʼe maʼa pea mo lelei!

ʼE mahino ia, lolotoga tana kumi ko ia ʼaē ʼe ako ʼe ina maʼu anai he tahi ʼu pelesepeto faka Tohi-Tapu ke tokoni age ki ai ke ʼaua naʼa faka lēsili te fihifihia. Ohage la, ko te ʼu vaega ʼo Tāʼaga Lea 6:27 pea mo Mateo 5:28 ʼe nā fakatokaga mai ke ʼaua naʼa fafaga totatou ʼatamai ʼaki he ʼu meʼa ʼe ina fakaneke ai te holi ki te ʼu felāveʼi fakasino. Neʼe faikole fēnei te tagata fai pesalemo: “Leʼei kehe ʼoku mata ke ʼaua naʼa sio ki te meʼa ʼaē ʼe vaʼiganoa.” (Pesalemo 119:37) ʼE mahino ia, ʼe mole feʼauga te lau pe ʼo te ʼu koga tohi faka Tohi-Tapu ʼaia. ʼE ʼui fēnei e te tagata poto: “‘Ko te loto ʼo ia ʼaē ʼe faitotonu ʼe metitasio.” (Tāʼaga Lea 15:28) ʼAki tana metitasio ki te ʼuhiga ʼo te fakatotonu ʼa te ʼAtua pea mo te tupuʼaga ʼo tana fai te fakatotonu ʼaia, ʼe feala ai kia ia ʼaē ʼe ako ke loloto age hana mahino ki te poto pea mo te fakafuafua lelei ʼo te ʼu ala ʼa Sehova.

Moʼo fakaʼosi, ko ia ʼaē ʼe ina faigaʼi ke ina tauʼi tona fihifihia ʼaē ʼe tupu ai tana mole tuputupu, ʼe mole tonu ke ina tuʼania te kumi ʼo te tokoni ʼa Sehova. ʼE fakapotopoto te manatu feiā, koteʼuhi ʼe ʼiloʼi lelei e te ʼAtua te faʼu ʼo tatou, totatou ʼuhiga heʼe haohaoa, pea mo te faʼu ʼo tatou mai te efu. (Pesalemo 103:14) Ko te faikole tuʼumaʼu ki te ʼAtua ke tokoni mai, fakatahi kiai mo te ʼu faiga mālohi ke ʼaua naʼa tou toe fakagafua te ʼu moemisi ki he ʼu felāveʼi fakasino, ʼe iku anai ki he fua lelei ʼaupito—ko he leʼo ʼo loto ʼe maʼa pea mo maʼamaʼa.—Hepeleo 9:14.

ʼAua Naʼa Koutou Fakavaivai

Logope he faigataʼaʼia ʼe koutou lolotoga tauʼi, kae ke mahino kia koutou ʼi ʼihi temi ʼe tou tōtō ai. Ka hoko he meʼa feiā, ʼe mahino ia ʼe koutou lotomamahi. Kae ke koutou manatuʼi te ʼu palalau ʼa Kalate 6:9, MN: “ ʼAua naʼa tou fiu ʼi te fai ʼo te meʼa ʼaē ʼe lelei, heʼe tou utu anai ʼi tona temi totonu, mo kapau ʼe mole tou fiu.” Ko te ʼu tagata kaugana ʼa te ʼAtua ohage ko Tavite pea mo Petelo neʼe nā tau mo te ʼu hala fakaloto mamahi feiā. Kae neʼe mole nā tuku ʼaki feiā. ʼAki te agavaivai neʼe nā tali te tokoni, pea neʼe nā fetogi, pea mo nā fakamoʼoni ki tonā ʼuhiga tagata kaugana makehe ʼa te ʼAtua. (Tāʼaga Lea 24:16) Logope te ʼu hala ʼa Tavite, kae neʼe fakahigoaʼi ia ia e Sehova “ko he tagata e hagepe ko toku loto, e ina fakahoko anai toku finegalo.” (Gaue 13:22) ʼO feiā mo Petelo neʼe fakamolemole age tana ʼu hala pea neʼe liliu ko te pou ʼo te kokelekasio faka Kilisitiano.

Tokolahi te hahaʼi ʼi te temi nei neʼe nātou fiafia he neʼe nātou lava tauʼi te ʼu meʼa ʼaē neʼe fakatupu tūkia kia nātou. Ko Yutaka, ʼaē neʼe tou talanoa ki ai ʼi te kamata, neʼe ina tali ke fai hana ako faka Tohi-Tapu. ʼE ina fakamatala fēnei: “Ko te lagolago ʼa Sehova pea mo tana tapuakina taku ʼu faiga fuli, neʼe tokoni mai kia ʼau ke ʼau tauʼi te gaoʼi paʼaga. ʼE lahi toku fiafia ʼi taku sio ki te moʼoni ʼo te ʼu palalau ʼa Sesu—ʼi tana ʼui ʼaē ʼaki te tui, māʼia mo te ʼu ‘moʼuga’ ʼe feala hakita taʼaki.” ʼAki te temi neʼe liliu ia Yutaka ko te tagata faifekau faka minisitelio ʼo te kokelekasio.

Kae kua feafeaʼi kia Keiko, ʼaē neʼe faigataʼa te tuku ʼo tana suluka? Neʼe ʼui e te Fakamoʼoni ʼaē neʼe ina fai tana ako ke ina lau he ʼu alatike kehekehe ʼo te Réveillez-vous ! ʼo ʼuhiga mo te suluka. Neʼe tuku fakahāhā e Keiko te ʼu palalau ʼo 2 Kolonito 7:1 ʼi tana motokā moʼo fakamanatuʼi age ki ai ʼi te ʼaho fuli ke nofo maʼa kia mata ʼa Sehova. Kae neʼe mole ina lava līaki. ʼE fakamatala fēnei e Keiko: “Neʼe ʼau ʼita lahi kia ʼau totonu. Koia, neʼe ʼau kamata fehuʼi ai kia ʼau totonu pe koteā koa ʼaē neʼe ʼau loto kiai—pe neʼe ʼau fia tauhi kia Sehova peʼe ko Satana?” ʼI taku ʼosi fakatotonu ʼaē ko Sehova ʼaē neʼe ʼau fia tauhi ki ai, neʼe ʼau faikole fakamalotoloto ai ke tokoni mai.” ʼE ina ʼui fēnei: “Neʼe ʼau punamaʼuli, he neʼe ʼau lava tuku taku suluka pea neʼe mole faigataʼa ia. Ko te meʼa pe e tahi neʼe ʼau fakahemala ai, ko taku mole tuku tautonu.”

ʼE feala mo koutou ke koutou tauʼi te fihifihia ʼaē ʼe fakagaohaʼa ki takotou faiga ki muʼa. Kapau ʼe lahi takotou faiga ke koutou faka ʼalutahi takotou ʼu manatu, mo te ʼu meʼa ʼaē ʼe koutou loto kiai, mo te ʼu palalau pea mo takotou aga ki te ʼu pelesepeto ʼa te Tohi-Tapu, pea ʼe koutou maʼu anai he faka ʼuhiga ʼo koutou pea mo koutou loto falala anai. ʼE fakafimālie anai pea mo fakaloto mālohi anai ki tokotou ʼu tēhina pea mo tuagaʼane fakalaumālie, mokā koutou fakatahi anai mo nātou. Ko te potu maʼuhiga tāfito, ʼe koutou fakaloloto anai takotou ʼu felogoi mo Sehova ʼAtua. Neʼe ina fakapapau mai, ʼe ina ‘toʼo anai te ʼu meʼa fakatupu tūkia fuli mai te ala ʼo tana hahaʼi’ ke nātou hāo mai te pule ʼa Satana. (Isaia 57:14) Pea ʼe feala ke koutou ʼiloʼi papau, kapau ʼe koutou faiga ke koutou toʼo pea mo tauʼi te ʼu meʼa ʼe gaohaʼa ki takotou tuputupu fakalaumālie, ʼe lahi anai te tapuakina ʼo koutou e Sehova.

[Kiʼi nota]

[Paki ʼo te pasina 28]

Neʼe fakapapau e Sesu, ʼaki te tui ʼe feala hakita tauʼi he ʼu fihifihia ʼe hage ko he ʼu moʼuga

[Paki ʼo te pasina 30]

ʼAki tatatou lau te Tohi-Tapu, ʼe tou lotomālohi anai moʼo tauʼi te ʼu tōtō fakalaumālie