ʼE Maʼu ʼIfea Te Maʼuli Fīmālie?

ʼI te kiʼi kolo ʼi te Potu Uesite ʼo Afelika, ko te tūpulaga ko Josué ʼe tauʼinē ki tona famili pea mo tona ʼu kaumeʼa.a Pea haʼele ʼaia ki te kolo lahi mo ʼamanaki maʼu ai he fīmālie ʼi te faʼahi faka koloā. Kae mole faʼa fualoa ki tana tau ki te kolo, neʼe puli vave tana ʼu ʼamanaki ʼi tana mahino ʼaē neʼe mole fola te kolo ʼaki he ʼu piliki aulo.

ʼI TANA faigaʼi ke mulimuli ki te faʼahiga maʼuli ʼo te kolo, neʼe kamata lotomamahi ia Josué. Neʼe mole ʼamanaki ia ʼe feiā te maʼuli ʼi te kolo lahi. Lolotoga te temi ʼaia, neʼe kua hoha ia Josué ke toe liliu ʼo toe felāveʼi mo tona famili pea mo tana ʼu kaumeʼa ʼi te kiʼi kolo veliveli ʼaē neʼe mavae mai ai. Kae neʼe ina tuʼaniaʼi naʼa manukiʼi ia ia e te hahaʼi ʼo tona kolo. Koʼeni te meʼa ʼaē neʼe ina tuʼaniaʼi: ‘ ʼE nātou ʼui mai anai neʼe hala taku ʼu fakatuʼutuʼu, koteʼuhi neʼe mole ʼau lava maʼuli ʼi te kolo lahi.’

Neʼe lahi tana manatu ki tana ʼu mātuʼa ʼaē ka lotomamahi anai kia ia. Neʼe nātou falala kia ia ʼi te faʼahi ʼo te falā. ʼI tana faigaʼi ke ina fakamaʼamaʼa tana manatu ʼaia, neʼe ina fai te gāue neʼe meʼa noaʼi ai ia ia e te hahaʼi, ʼo gāue ʼaia ʼi te ʼu hola loaloaga, kae mole lahi te falā ʼaē neʼe ina maʼu ohage ko te meʼa ʼaē neʼe fakaʼamu kiai. Neʼe kua gaʼegaʼe ʼi te lahi fau ʼo tana gāue. Pea ʼaki te temi neʼe mole kei maʼu hona temi ki te ʼu gāue fakalaumālie, ʼaē neʼe maʼuhiga ʼaupito kia ia. ʼI tana mamaʼo mai tona famili pea mo tona ʼu kaumeʼa ʼāfea, neʼe maʼuli fakaʼofaʼofa pea mo maʼuli tokotahi. Ko te fīmālie ʼaē neʼe fakaʼamu kiai neʼe mole ina maʼu ʼi te kolo lahi.

Tatau aipe peʼe ko he ʼu fenua kehe pea mo he ʼu koga meʼa kehe, kae ko te meʼa fakaʼofaʼofa ʼaē neʼe hoko kia Josué ʼe tau hoko. Neʼe mole ʼalu ia Josué ki he tahi koga meʼa ʼuhi he neʼe manatu pe kia ia—kailoa, neʼe ʼalu he neʼe ina fia kumi te fīmālie. ʼI tana manatu ʼe maʼuli fīmālie anai ʼi te kolo lahi. ʼE moʼoni, ʼi ʼihi lakaga ʼe lagi loto anai e he tahi ke ina hikihiki tona maʼuli fakasino, kae ʼe mole ina maʼu ai anai te fīmālie moʼoni. Neʼe mole hoko te potu ʼaia kia Josué, ʼo feiā mo te hahaʼi tokolahi ʼaē ʼe nātou faiga ohage ko ia. ʼE lagaʼi mai ai te fehuʼi ʼaenī, ‘koteā koa te fīmālie?’

ʼE tahi ʼalu pe te faka ʼuhiga ʼo te fīmālie e te hahaʼi. ʼE ʼui fēnei e te tikisionalio, ko te fīmālie ʼe ko te “mole ʼi ai he tuʼutāmaki,” peʼe ko te “mole ʼi ai ʼo he tuʼania peʼe ko he hoha.” Tokolahi te hahaʼi ʼe nātou ʼiloʼi ʼe mole feala ʼi te temi nei ke tou ʼui ʼe “mole ʼi ai he tuʼutāmaki.” ʼE nātou fiafia mo kapau ʼe nātou logo fīmālie, tatau aipe pe koteā te ʼu ʼaluʼaga fakamataku ʼaē ʼe hoko ʼi ʼonatou tafa.

Kae e feafeaʼi kia koutou? ʼE koutou kumi kifea te fīmālie? ʼE hage koa ko te meʼa ʼaē neʼe manatu kiai ia Josué, ʼe maʼu ʼi he kolo lahi, kae mole maʼu ʼi he kolo veliveli? Peʼe maʼu te fīmālie ʼaia ʼaki te falā, tatau aipe peʼe kofea te koga meʼa ʼaē ʼe tou maʼu ai peʼe feafeaʼi tona maʼu? ʼE lagi maʼu ʼapē te fīmālie ʼi te maʼu tuʼulaga ʼi te faʼahi faka sosiale? Tatau aipe peʼe koteā takotou manatu ʼo ʼuhiga mo te fīmālie, kae ʼe fualoa anai koa te fīmālie ʼaia kia koutou pea mo tokotou famili?

Tou tokagaʼi age muʼa te ʼu faʼahi e tolu ʼe kumi kiai te fīmālie e te tokolahi—ko te koga meʼa; ko te falā; pea mo te maʼu tuʼulaga. ʼOsi ʼaia pea tou vakaʼi anai peʼe maʼu ʼifea te fīmālie moʼoni.

[Kiʼi nota]