ʼE Koutou Mahino Koa Ki Te ʼOfa ʼo Te ʼAtua?
NEʼE fakamatalatala e te tagata ko Sopo ia te ʼuhiga agahala ʼo te tagata ʼaki tana ʼu palalau ʼaenī: “Ko te tagata, ʼaē neʼe tupu mai te fafine, ʼe nounou tona maʼuli pea ʼe fonu ʼi te lotohoha. Neʼe tupu ake ia ohage ko he fisiʼi teu pea ʼe tuʼusi; pea ʼe hola ohage ko te malumalu pea ʼe mole hoko atu tona maʼuli.” (Sopo 14:1, 2) Ko te maʼuli, ohage ko te maʼuli ʼo Sopo, neʼe fonu ʼi te hoha pea mo te lotomamahi. Neʼe kua hoko koa he meʼa feiā kia koutou?
Logope te ʼu faigataʼaʼia pea mo te ʼu fihifihia fuli ʼaē ʼe lagi tau mo tatou, kae ʼe ʼi ai te ʼamanaki moʼoni ʼe fakatafito ki te manavaʼofa pea mo te ʼofa ʼo te ʼAtua. ʼUluaki, neʼe foaki e tatatou Tāmai manavaʼofa ʼi selo ia te sakilifisio faitotogi moʼo totogi ʼo te hahaʼi mai tonatou ʼuhiga agahala. Ia Soane 3:16, 17, neʼe ʼui fēnei e Sesu Kilisito: “Nee ofa lahi te Atua ki te malama-nei, ko te tupuaga aia o tana foaki mai tona Alo Ulutokotahi, ke aua naa mate ia natou fuape e tui kia te ia, kae ke natou maù te mauli heegata. He nee mole fekauʼi mai e te Atua tona Alo [ia Sesu] ki te malama-nei ke ina fakamau te malamanei, kae ke fakamauli te malama-nei aki iaʼia.”
Tou tokagaʼi foki mo te faʼahiga aga ʼa te ʼAtua kia tatou ʼaē ko te ʼu hahaʼi agahala. Neʼe tala fēnei e te ʼapositolo ko Paulo: “Nee ina fakatupu aki he tokotahi te puleaga fuape mo fakanofo natou i te fuga kelekele katoa, nee ina fakatuu te u vaega o te tau mo fakatuakoi te u nofoaga o te tagata. Koteuhi, ke natou kumi te Atua, naa e fealape ke natou logoi iaʼia, pea e natou mau leva, logope, e mole mamao ia maia tatou takitahi.” (Gaue 17:26, 27) Koutou fakakaukauʼi age muʼa! Logope ko tatou ko te ʼu hahaʼi agahala, kae ʼe kei tou lava taupau aipe he ʼu felogoi lelei mo totatou Tupuʼaga ʼofa, ko Sehova ʼAtua.
Koia, ʼaki he loto falala, ʼe tou maʼu he ʼamanaki ki te ka haʼu, heʼe mahino kia tatou ʼe tokaga te ʼAtua kia tatou pea neʼe ina fai te fakatuʼutuʼu ʼofa ke fua lelei kia tatou ʼo heʼegata. (1 Petelo 5:7; 2 Petelo 3:13) Koia, kua mahino kia tatou ʼe lahi te ʼu meʼa ʼe tonu ke tou ako ʼo ʼuhiga mo totatou ʼAtua ʼofa ʼaki tana Folafola, ia te Tohi-Tapu.