Te ʼu Fehuʼi ʼa Te Kau Lautohi

Koteā te tokoni faka Tohi-Tapu ʼe tou maʼu ʼo ʼuhiga mo te akoʼi ʼo he tamasiʼi e he tahi ʼi te ʼu mātuʼa ʼe ko he Fakamoʼoni ʼa Sehova?

Ko te ʼu pelesepeto faka Tohi-Tapu e lua ʼe ina tuku mai he takitaki ʼo ʼuhiga mo te akoʼi ʼo he tamasiʼi e he Fakamoʼoni, ka ko tona ʼohoana ʼe mole ko he Fakamoʼoni. Koʼeni te ʼuluaki pelesepeto: “ ʼE tonu ke mātou fakalogo ki te ʼAtua, ohage ko he fakalogo ki he pule, ʼi he fakalogo ia ki te tagata.” (Gaue 5:29, MN ) Koʼeni te lua pelesepeto: “Ko te tagata ʼohoana ʼe pule ki te fafine ohage ko te pule ʼa Kilisito ki te kokelekasio.” (Efeso 5:23, MN ) Ko te lua pelesepeto ʼe mole faka ʼuhiga pe ki te ʼu fafine ʼaē ko tonatou ʼohoana ʼe ko te Fakamoʼoni, kae ʼe toe ʼaoga pe foki ki te ʼu fafine ʼaē ko tonatou ʼohoana ʼe mole ko he Fakamoʼoni. (1 Petelo 3:1) E feafeaʼi ki he Fakamoʼoni hana fakafuafua lelei te ʼu pelesepeto ʼaia mokā ina akoʼi tana fānau?

Kapau ko te tagata ʼe ko he Fakamoʼoni ʼa Sehova, pea ʼe ko tona maʼua ke ina foaki te ʼu meʼa fakalaumālie pea mo te ʼu meʼa fakasino ʼaē ʼe ʼaoga ki tona famili. (1 Timoteo 5:8) Logope ko te faʼe ʼaē ʼe mole ko he Fakamoʼoni ʼe lahi te temi ʼe nofo ai mo tana fānau, kae ʼe tonu ki te tāmai ʼaē ko te Fakamoʼoni, ke ina fai he ako fakalaumālie ki tana fānau ʼi te loto fale pea mo ʼave nātou ki te ʼu fono faka Kilisitiano, heʼe feala ai ke nātou maʼu he ako ʼo ʼuhiga mo te aga ʼaē ʼe tonu ke fai pea mo fakatahi mo he ʼu fakakaugā lelei.

E feafeaʼi mo kapau ko te fafine ʼaē ʼe mole ko he Fakamoʼoni ʼe lotomālohi ke ina ʼave tana fānau ki te fale ʼaē ʼe fai ai tana ʼu fono peʼe ina akoʼi nātou ki tana lotu? ʼE lagi fakagafua age ki ai e te lao ʼo te fenua ke ina fai te faʼahi ʼaia. Kapau ʼe fia fai e te fānau ki te faʼahiga tauhi ʼaia, ʼe fakalogo leva ia ki te faʼahiga faiako fakalaumālie ʼa te tāmai. ʼI te lalahi ake ʼa te fānau, ʼe tonu ki tanatou ako faka Tohi-Tapu ʼaē neʼe fai age e tanatou tāmai ke tokoni kia nātou ke nātou muliʼi ia te moʼoni ʼo te Folafola ʼa te ʼAtua. Ko he meʼa fakafiafia ki te tagata ʼaē ko te Fakamoʼoni mokā sio ki tana fānau ʼe nātou filifili ia te moʼoni!

Kapau ko te faʼe ʼe ko he Fakamoʼoni ʼa Sehova, pea ʼe tonu ke fakaʼapaʼapa ki te pelesepeto ʼo te tuʼulaga pule, logola hana tuʼania ki te maʼuli heʼegata ʼo tana fānau. (1 Kolonito 11:3) ʼE lahi te ʼu faʼifaʼitaki, ʼe mole fakafisi te tagata ʼaē ʼe mole ko he Fakamoʼoni ke fai e tona ʼohoana ʼaē ʼe ko te Fakamoʼoni he ako ki tana fānau ʼo ʼuhiga mo te aga ʼaē ʼe tonu ke fai pea mo he ako fakalaumālie, ʼaē ʼe toe lava maʼu pe foki ʼi te ʼu fono ʼa te hahaʼi ʼa Sehova. ʼE feala ki te fafine ke tokoni ki tona ʼohoana ʼaē ʼe mole ko he Fakamoʼoni ke sio ki te ʼu fua lelei ʼo te ako ʼaoga ʼaē ʼe maʼu e te fānau ʼi te kautahi ʼa Sehova. ʼE ina lava faka maʼuhigaʼi fakapotopoto ia te lelei ʼo te akoʼi ki tanā fānau te ʼu pelesepeto ʼo te Tohi-Tapu ʼo ʼuhiga mo te aga ʼaē ʼe tonu ke fai, tāfito la ʼi he mālama ʼe ina meʼa noaʼi te aga ʼaē ʼe tonu ke fai.

Kae ʼe feala pe ki te tagata ʼaē ʼe mole ko he Fakamoʼoni ke ina fakamālohiʼi tana fānau ke nātou mulimuli ki tana lotu, pea mo ʼave nātou ki te ʼu koga meʼa ʼe fai ai tana tauhi pea mo fakahoko age kia nātou he ako ʼo tana lotu. Peʼe feala pe ke fakafeagai te tagata ki te ʼu lotu fuli pea mole ina tali ke fai he ako faka lotu ki tana fānau. ʼI tona ʼuhiga pule ʼo te famili, ʼe ko ia tāfito ʼaē ʼe ina fai te ʼu tonu ki te famili.a

Logope ʼe fakaʼapaʼapa ki te tuʼulaga pule ʼo tona ʼohoana, kae ʼi tona ʼuhiga Kilisitiano, ʼe tonu ke manatuʼi e te fafine ʼaē ko te Fakamoʼoni ia te aga ʼa te ʼu ʼapositolo ko Petelo mo Soane, ʼaē neʼe nā ʼui fēnei: “Kia mātou, ʼe mole feala ke tuku tamatou palalau ki te ʼu meʼa ʼaē neʼe mātou sisio kiai pea mo fagono kiai.” (Gaue 4:19, 20, MN ) ʼO ʼuhiga mo te maʼuli fakalaumālie ʼo te fānau, ʼe maʼu anai e te faʼe ʼaē ko te Fakamoʼoni he ʼu faigamālie moʼo tuku he takitaki kia nātou. Ko tona maʼua ia muʼa ʼo Sehova ke ina akoʼi ki te hahaʼi te ʼu meʼa ʼaē kua ina ʼiloʼi ʼe moʼoni, pea ʼe tonu ke ina akoʼi mo tana fānau. (Tāʼaga Lea 1:8; Mateo 28:19, 20) Kae koteā he puleʼaki ki te fafine Fakamoʼoni ʼaē ʼe tau mo te fihifihia ʼaia?

Ohage la ko tana tui ki te ʼAtua. ʼE lagi mole lava fakahoko he ako Tohi-Tapu ʼa te fānau e te fafine ʼaē ko te Fakamoʼoni, koteʼuhi neʼe lagi tapuʼi age e tona ʼohoana. ʼE tonu koa ke mole palalau te fafine ki tanā fānau ʼo ʼuhiga mo Sehova ʼuhi ko te tapu ʼaia? Kailoa. ʼE hā anai ʼi tana ʼu palalau mo tana aga ia tana tui ki te Tupuʼaga. ʼE lagi fai anai he ʼu fehuʼi e tana fānau ki te faʼahi ʼaia. Kapau ʼe ina lava maʼuliʼi te lotu ʼaē ʼe loto kiai, ʼo kau ai tana fakahā tana tui ki te Tupuʼaga, pea ʼe mahino ʼe feala hana palalau ki tana lotu ki tana fānau. Tatau aipe peʼe mole ina lava fai he ako Tohi-Tapu mo tana fānau peʼe ko te ʼave tuʼumaʼu ʼo nātou ki te ʼu fono, kae ʼe ina lava fakahā age kia nātou ia te ʼatamai mālama ʼo ʼuhiga mo Sehova ʼAtua.—Teutalonome 6:7.

ʼO ʼuhiga mo te felogoi ʼo ia ʼaē ko te Fakamoʼoni mo tona hoa ʼaē ʼe mole ko he Fakamoʼoni, neʼe tohi fēnei e te ʼapositolo ko Paulo: “Ko te tagata ʼohoana ʼaē ʼe mole tui ʼe maʼoniʼoni ia ʼuhi ko tona ʼohoana, pea ko te fafine ʼohoana ʼaē ʼe mole tui ʼe maʼoniʼoni ia ʼuhi ko te tēhina; kanaʼauala neʼe heʼemaʼa moʼoni takotou fānau, kae ʼi te temi ʼaenī kua nātou maʼoniʼoni.” (1 Kolonito 7:14, MN ) Maʼa Sehova, ko te felogoi faka taumatuʼa ʼe maʼoniʼoni ʼuhi ko te ʼohoana ʼaē ʼe tui, pea ko te fānau ʼe faka ʼuhiga ʼe nātou maʼoniʼoni ia mata ʼo Sehova. Ko te fafine ʼaē ʼe ko te Fakamoʼoni ʼe ina faigaʼi anai ʼi tona fealagia katoa ke tokoni ki tana fānau ke nātou mahino ki te moʼoni, pea mo falala katoa kia Sehova ʼo ʼuhiga mo te ʼu faʼahi ʼaia.

ʼAki te lalahi ake ʼo te fānau, ʼe tonu ai leva ke nātou filifili mai te ako ʼo tanatou ʼu mātuʼa peʼe ko te faʼahi fea ʼaē ʼe nātou fia muliʼi. ʼE lagi nātou filifili anai ke nātou muliʼi te ʼu palalau ʼaenī ʼa Sesu: “Ko ʼaē ʼe lahi ake tona ʼofa ki tana tāmai pe ki tana faʼe ia te ʼau ʼe mole tāu ia mo ʼau.” (Mateo 10:37, MN ) ʼE toe fai te fakatotonu ʼaenī ki te fānau: “ ʼU fānau, koutou fakalogo ki takotou ʼu mātuʼa ʼi te fakatahi mo te ʼAliki.” (Efeso 6:1, MN ) Tokolahi te kau tūpulaga ʼe nātou fakatotonu ke nātou ‘fakalogo ki te ʼAtua ohage ko honatou pule’ ʼi hanatou fakalogo ki he tahi ʼi te ʼu mātuʼa ʼe mole ko he Fakamoʼoni, logola te ʼu faigataʼa ʼaē ʼe feala ke tupu ʼaki te faʼe peʼe ko te tāmai ʼaia. ʼE ko he fakapale ia ki te tāmai peʼe ko te faʼe ʼaē ʼe ko te Fakamoʼoni, hana sio ki tana fānau ʼe nātou fakatotonu ke nātou tauhi kia Sehova logola te ʼu fakafeagai!

[Kiʼi nota]