“ ʼE Koutou ʼIloʼi Pe Koʼe ʼe ʼAu Toe Fakaliliu Mai Takotou Paʼaga?”
‘NEʼE ʼaoga ʼaupito kia ʼau he paʼaga,’ neʼe ko te fakaʼamu ʼaia ʼa Nana, ko te faʼe ʼe ʼi ai tana ʼu tamaliki tagata e toko tolu ʼe nātou nonofo ʼi Kaspi ʼi te Lepupilika ʼo Géorgie. ʼI te tahi uhu neʼe hoko moʼoni tana fakaʼamu ʼaē ke ina maʼu hana paʼaga. Neʼe ina maʼu te paʼaga ʼo ōvi ki te fale polisi, ko te 300 lari (ko te 20 afe). Neʼe mole ʼi ai he tahi ʼi te ʼu tafaʼaki. Neʼe ko he toe paʼaga. ʼI tona fakahagatonu, neʼe mole heʼeki sio ia Nana ki he falā 100 ʼi te paʼaga lari ʼi te ʼu taʼu e nima kua hili, talu pe te liliu ʼo te lari ko te paʼaga ʼo te fenua. ʼE hoki maʼu he paʼaga feiā e te hahaʼi fakatau koloā ʼo te fenua mokā hoki nātou gāue lolotoga ni ʼu taʼu.
Neʼe fakakaukau fēnei ia Nana: ‘Koteā te ʼaoga ke ʼau maʼu te paʼaga ʼaenī kae ʼe ʼau maumauʼi anai taku tui, mo taku manavasiʼi ki te ʼAtua, pea mo toku maʼuli fakalaumālie?’ Neʼe kua ina maʼuliʼi te ʼu kalitate faka Kilisitiano ʼaia, pea neʼe kua hoko kia ia te ʼu fakataga mālohi pea mo tona ʼu tā ʼuhi ko tana tui.
ʼI tana ʼalu ki te fale polisi, neʼe maʼu e Nana ia te ʼu tagata polisi e toko nima ʼe hage ʼe nātou fekumiʼaki he meʼa. Neʼe mahino kia ia ʼe nātou kumi te paʼaga, pea neʼe fakaōvi age kia nātou pea mo ʼui fēnei age: “ ʼE ʼi ai he meʼa ʼe koutou kumi?”
Neʼe nātou tali age: “ ʼE mātou kumi te paʼaga.”
“Ko te fia?”
“Ko te tolugeau lari!”
Neʼe ina ʼui fēnei age kia nātou: “Neʼe ʼau maʼu takotou paʼaga.” Pea neʼe ina fehuʼi age kia nātou: “ ʼE koutou ʼiloʼi pe koʼe ʼe ʼau toe fakaliliu mai takotou paʼaga?” Neʼe mole nātou ʼiloʼi tona tupuʼaga.
Neʼe ina toe ʼui fēnei age kia nātou: “Koteʼuhi ko ʼau ko te Fakamoʼoni ʼa Sehova. Kanapaula neʼe mole ko ʼau ko he Fakamoʼoni ʼa Sehova, ʼe mole ʼau fakaliliu mai takotou paʼaga.”
Ko te polisi pule ʼaē neʼe puli tana paʼaga, neʼe ina fakatoʼo age kia Nana te 20 lari moʼo fakamālo age ki tana agatonu.
Neʼe mafola vave te hisitolia ʼi te tisitilike katoa ʼo Kaspi. ʼI te ʼaho ake, neʼe ʼui fēnei age kia Nana e te fafine gāue menasi ʼi te fale polisi: “ ʼE taupau tuʼumaʼu takotou ʼu tohi e [te pule] ʼi tona pilō. ʼI te temi nei, ʼe lagi kua ina leleiʼia age.” Neʼe ʼui fēnei age e te tahi tagata polisi: “Kanapaula ko te hahaʼi neʼe ko te kau Fakamoʼoni ʼa Sehova fuli, kanaʼauala ʼe mole ʼi ai he tahi ʼe ina fai he aga ʼe kovi.”