ʼE Tonu Koa Ke Koutou Lotonoa?

TOKOLAHI te hahaʼi ʼe nātou ʼui anai ʼe ko he meʼa lelei hakita lotonoa, ʼe kita maʼuli fīmālie mo maʼuli fakatokatoka. Kae ʼe ʼi ai te tahi faʼahi ʼo te lotonoa. ʼE ʼui fēnei e te Tohi-Tapu: “Ko te lotonoa ʼa te kau vale ʼe ina maumauʼi anai ia nātou.” (Tāʼaga Lea 1:32) Koteā koa tona faka ʼuhiga?

Ko ʼihi Tohi-Tapu neʼe nātou fakaliliu te kupu faka Hepeleo ʼaki te ʼu kupu “fakaʼaoʼaoganoa” (American Standard Version), “maʼuli faka feʼauga” (The New American Bible), pea mo te “faka fīfīmālie.” (The New English Bible) ʼI tona faka ʼuhiga ʼaenī, ʼe fakapipiki te lotonoa ki te fakapikopiko, mo te fakaʼaoʼaoganoa pea mo te agavale.

ʼI te ʼuluaki sēkulō, ko te kau Kilisitiano ʼo te kokelekasio ʼo Laotisea neʼe mole nātou tokakaga ki tanatou ʼu tōtō ʼi te faʼahi fakalaumālie, koteʼuhi neʼe nātou lotonoa. ʼAki te faka fīfīmālie, neʼe nātou laupisi ʼo nātou ʼui “ ʼe mole kei ʼaoga he meʼa kia [mātou].” Neʼe fakatonutonuʼi nātou e Sesu Kilisito, ʼo ina fakatotonu age kia nātou ke nātou toe fakaʼala tanatou faiga faka Kilisitiano.—Apokalipesi 3:14-19, MN.

Neʼe maʼuli lotonoa te hahaʼi ʼo te temi ʼo Noe. Neʼe nātou maʼumaʼua ki te ʼu meʼa fakamālama ʼo te maʼuli, “neʼe nātou kakai pea mo ʼiʼinu, ko te hahaʼi tagata neʼe nātou ʼohoana pea ko te hahaʼi fafine neʼe foaki ke ʼohoanaʼi . . . , pea neʼe mole nātou fakatokagaʼi he meʼa ʼo aʼu ki te haʼu ʼa te tulivio pea neʼe ʼave fuli ai ia nātou.” Pea neʼe ʼui fēnei e Sesu: “ ʼE toe feiā pe anai mo te henī ʼo te Foha ʼo te tagata.”—Mateo 24:37-39, MN.

ʼE fakahā e te ʼu lea faka polofeta ʼo te Tohi-Tapu ʼaē kua hoko, ʼe tou lolotoga maʼuʼuli nei ʼi “te ʼi henī ʼo te Foha ʼo te tagata,” ia Sesu Kilisito. ʼOfa pe ke ʼaua naʼa tou lotonoa, ʼo fakaʼaoʼaoganoa, ʼo maʼuli faka feʼauga peʼe tou faka fīfīmālie.—Luka 21:29-36.