ʼE Malave Koa Te ʼu Mālohi Agakovi Ki Te Hahaʼi?
“ ʼE mole kei maʼu he holaʼaga ʼo te malamanei, ohage neʼe māpunuʼi e he ʼu mālohi fakapulipuli ia te ʼu hūʼaga fuli.”—Jean-Claude Souléry, ʼe gāue ʼi te sulunale.
‘ ʼI te manatu ʼa te hahaʼi vaivavai, ʼe hage kia nātou ʼe ʼi ai he mālohi agakovi ʼe ina puleʼi ia nātou.’—Josef Barton, ko te tagata fai hisitolia.
ʼI TE meʼa fakamataku ʼaē neʼe hoko ʼi te ʼaho 11 ʼo Sepetepeli 2001, tokolahi te hahaʼi neʼe nātou fakakaukauʼi ki te agamālohi ʼaia. ʼI tana tohi ʼi te nusipepa ʼo te Financial Times ʼi Pilitania, neʼe ʼui fēnei e Michael Prowse: “ ʼE mole fai anai he aga kovi feiā e he manu peʼe mole feala pe la ke ina fai he aga feiā.” Neʼe ʼui e te sulunale ʼo te New York Times, neʼe mole ko he kiʼi meʼa noa te fakatuʼutuʼu ʼo te ʼohofi ʼaia, pea “ ʼe maʼuhiga ke tou tokagaʼi te fehiʼa lahi ʼaē neʼe maʼu e te hahaʼi ʼaē neʼe nātou fakahoko te faʼahi ʼaia. ʼE ko he fehiʼa ia ʼe mole tatau mo te fehiʼa ʼaē ʼe maʼu e te hahaʼi ʼi te ʼu temi tau, ko he fehiʼa neʼe lahi ʼaupito age ia, pea ʼe mole ʼalutahi mo he lekula.”
Ko te ʼu hahaʼi lotu kehekehe ʼe nātou manatu ʼe lagi hoko te ʼu meʼa ʼaia ʼuhi ko te ʼu laumālie kovi. Ko te tagata gāue koloā ʼo Sarajevo, neʼe ina fakamatala te ʼu meʼa fakalialia ʼaē neʼe sio kiai ʼo ʼuhiga mo te fefehiʼaʼaki ʼa te ʼu lanu kehekehe ʼi Bosnie, pea neʼe ina ʼui fēnei: “Hili te tau ʼi Bosnie ʼaē neʼe hoko ʼi te taʼu katoa, kua ʼau faka tui ʼe hoko te ʼu meʼa fuli ʼaia ʼuhi ko Satana. ʼE ko he agakovi ʼaupito.”
Neʼe fehuʼi age ki te tagata fai hisitolia ko Jean Delumeau peʼe tui ki te Tevolo, pea neʼe ina tali fēnei: “ ʼE ʼau tui papau ki te mālohi ʼo te agakovi heʼe ʼau sio ki te ʼu meʼa ʼaē ʼe hoko—pea mo te ʼu meʼa ʼaē neʼe hoko—talu mai taku tupu: te Lua Tau Faka Malamanei ʼaē neʼe mamate ai te hahaʼi e toko 40 miliona tupu, mo Auschwitz pea mo te ʼu lotoʼā ʼaē neʼe matehi ai te hahaʼi, mo te tāmateʼi ʼo te hahaʼi ʼo te tahi ʼu lanu ʼi Kamopotia, mo te puleʼaga ʼo Ceaucescu ʼaē neʼe ina matehi te tokolahi, pea mo te gaohi koviʼi ʼo te hahaʼi e te tahi ʼu puleʼaga ʼi te ʼu fenua kehekehe . . . ʼE lahi te tahi ʼu meʼa fakalialia neʼe fai. Koia ʼe ʼau tui ai ʼe tonu tatatou fakahigoaʼi te ʼu aga ʼaia ko he ʼu ‘aga ʼa te Tevolo.’ Mole ko he Tevolo mo tona ʼu tala e lua pea mo he ʼu vaʼe manu, kae ko te Tevolo, ʼe ko te laumālie pea mo te mālohi ʼo te kovi ʼaē ʼe ina fai tana ʼu gāue ʼi te malamanei.”
Ohage ko Jean Delumeau, tokolahi te hahaʼi ʼe nātou ʼui ʼe ko he ʼu ‘aga ʼa te Tevolo’ te ʼu meʼa fakalialia ʼaē ʼe hoko ʼi te sosiete ʼo totatou temi, ʼi te ʼu famili pea mo te malamanei katoa. Kae koteā koa te faka ʼuhiga ʼo te faʼahi ʼaia? Ko te ʼu aga fakalialia ʼa te tagata, ʼe tupu koa ʼuhi ko he ʼu mālohi agakovi ʼe mole tou lava ʼiloʼi, peʼe ʼi ai moʼoni koa he ʼu mālohi agakovi ʼe nātou fakaneke te hahaʼi ke nātou fai he ʼu fai fakapō ʼe fakalialia age ia ʼi te agakovi ʼa te tagata? ʼE fakalogo koa te ʼu gāue ʼa te ʼu mālohi ʼaia ki te ʼaliki ʼo te kovi—ia Satana te Tevolo?
[Haʼuʼaga ʼo te paki pasina 3]
Children: U.S. Coast Guard photo