Te Puleʼaki Ki He Maʼuli Tologa Pea Mo Fiafia
ʼE ʼUI e ʼihi ko te hahaʼi fuli ʼe nātou fia maʼuʼuli fualoa, kae ʼe mole he tahi ʼe fia matuʼa. Tokolahi te hahaʼi ʼe nātou aʼu ki te temi letelete ʼe nātou fia maʼu he temi ʼe lahi age maʼa nātou kae mole nātou loto ki he ʼu gāue. Kae ʼe nātou tuʼania naʼa mole nātou maʼu he meʼa ke nātou fai pea ke mole kei ʼi ai honatou ʼaoga. ʼE nātou toe tuʼania naʼa nātou nonofo tokotahi, naʼa mole nātou fiafia pea mo nātou mahahaki.
Koteā te puleʼaki ki he maʼuli fiafia? Ko he ʼu kaumeʼa lelei pea mo he famili ʼofa ʼe tokoni ki te kau tūpulaga pea mo te kau matutuʼa ke nātou maʼuʼuli fiafia. Kae ko te meʼa ʼaē ʼe maʼuhiga tāfito, ʼe mole ko te ʼu meʼa ʼaē ʼe lava fai e ʼihi moʼo fakafiafia te maʼuli ʼo he tahi kua matuʼa. ʼE maʼuhiga tāfito age te meʼa ʼaē ʼe lava fai e he tahi kua matuʼa maʼa te hahaʼi.
Ko te sivi loaloaga neʼe fai ki te toko 423 taumatuʼa kua matutuʼa neʼe ina fakahā ai ko “te tokoni ki te hahaʼi ʼe feala ke loaloa age ai tokita maʼuli.” Ko Stephanie Brown, ʼaē neʼe ina takitaki te sivi ʼaia, ʼe ina fakamahino fēnei: “ ʼE mole ko te ʼu meʼa ʼaē ʼe foaki mai e totatou ʼu kaumeʼa ʼaē ʼe fua lelei kia tatou, kae ko te meʼa ʼaē ʼe tou foaki.” ʼE feala ke tou tokoni ki te ʼu gāue ʼo te loto fale, peʼe ko te tokaga ki te fānau, peʼe ko te fai ʼo te ʼu fakatau, peʼe ko te feʼāveʼaki ʼo he tahi, peʼe ko te fakalogo ki he tahi ʼe fia palalau.
Kua hili kiai taʼu e 2 000, neʼe ʼui fēnei e Sesu Kilisito: “ ʼE lahi age te fiafia ʼi takita foaki, ʼi takita tali.” (Gaue 20:35, MN ) Ko te puleʼaki ki he maʼuli tologa pea mo fiafia ʼe mole ko he tuʼuga falā peʼe ko te ʼu faitoʼo ke mole matutuʼa peʼe mahaki. Kailoa ia, kae ko te haga fai ʼo he ʼu gāue pea mo foaki ki te hahaʼi tokita temi, tokita mālohi ke fakafiafia ai tonatou maʼuli.
Kae ʼe mole feʼauga te ʼu meʼa ʼaia moʼo hāofaki tatou mai te matuʼa, mo te mahaki, pea mo te mate. ʼE gata pe anai ki te Puleʼaga ʼo te ʼAtua ʼaē ka ina pulihi te ʼu meʼa ʼaia. ʼI tona pule, ʼe puli anai te mahaki pea ‘ ʼe puli anai mo te mate.’ (Apokalipesi 21:3, 4; Isaia 33:24) ʼI tona fakahagatonu, ko te hahaʼi fakalogo ʼe nātou maʼuʼuli anai ʼo heʼegata ʼi te fiafia ʼi te kele faka palatiso. (Luka 23:43) ʼE fiafia te kau Fakamoʼoni ʼa Sehova ʼi tanatou foaki ki te hahaʼi te puleʼaki ʼaē ʼe fakatafito ki te Tohi-Tapu ki he maʼuli tologa pea mo fiafia.