Ko Te Kau Fai Faka Mafola ʼo Te Puleʼaga

‘Fakalaka Mai ʼo Tokoni Kia Mātou’

ʼI TE māhina ʼo Sūlio taʼu 2000, neʼe fai ʼi Ositalalia, ʼi Siamani, pea mo Suisi te fakaafe ki te kau Fakamoʼoni ʼaē ʼe palalau faka Siamani ke nātou ʼolo ki Polivia. Koteā tona tupuʼaga? Koteʼuhi ko te kau Mennonites ʼaē ʼe palalau faka Siamani ʼi te ʼu nofoʼaga ʼaē ʼe mamaʼo ia kilometa e 300 mai Santa Cruz ʼo Polivia, neʼe nātou fakahā tanatou fia mahino ki te Tohi-Tapu.

ʼE teitei pe ko te toko 140 kau Fakamoʼoni neʼe nātou tali te pāui ʼaia. Ko ʼihi neʼe nātou ʼolo ʼo fai ni ʼu vāhaʼa, ko ʼihi neʼe taʼu katoa peʼe laka age. ʼI tanatou fai te faʼahi ʼaia, neʼe nātou maʼu te manatu ʼa te kau misionea ʼo te ʼuluaki sēkulō ʼaē neʼe nātou tokagaʼi te pāui ʼaenī: “Fakalaka mai ki Masetonia o tokoni mai kia matou.”​—Gaue 16:​9, 10.

Neʼe feafeaʼi koa te gāue ʼi te telituale ʼaia? ʼE ʼui fēnei e te tagata ʼāfea ʼo te kokelekasio ʼaia: “Ka tou ʼolo ki he nofoʼaga ʼi te ʼu nofoʼaga Mennonites e 43, ʼe tou ʼolo motokā ia hola e valu. Pea ʼe feala pe ke ʼaho fā mokā ʼe tou ʼolo ki te ʼu koga meʼa mamaʼo pea ʼe tou momoe ʼi ʼihi po ʼi te ʼu falelā. Kae ʼe ʼi ai tona ʼu fua lelei, heʼe fai te gāue ki te ʼu hahaʼi ʼe mole heʼeki nātou logo ki te logo lelei.”

ʼI te kamata, tokolahi te kau Mennonites neʼe mole nātou leleiʼia te ʼu ʼaʼahi ʼaia. Kae ko te ʼu faiga liuliuga neʼe tokoni kia nātou ke nātou mahino ki te tokoni ʼaē neʼe fai age e te kau Fakamoʼoni. Ohage la, neʼe ʼui e te tagata gāue kele neʼe ina lau te Réveillez-vous ! ʼi te taʼu katoa. Pea neʼe ina toe ʼui fēnei: “ ʼE ʼau ʼiloʼi ko te tokolahi ʼi henī ʼe mole nātou tali te ʼu meʼa ʼaē ʼe koutou ʼui age, kae ʼe ʼau tui ko te moʼoni ʼaenī.” ʼI te tahi nofoʼaga, neʼe ʼui fēnei e te tagata: “Ko ʼihi vāhaʼa fale ʼe nātou ʼui ko koutou ko te ʼu polofeta loi, pea ko ʼihi ʼe nātou ʼui ʼe koutou maʼu te moʼoni. Koia ʼe ʼau fia mahino ki te moʼoni.”

ʼI te temi nei, ʼe ʼi ai te kokelekasio lea faka Siamani ʼi Polivia, ko te toko 35 kau fai faka mafola, pea ko te toko 14 pionie katoa. ʼO aʼu mai ki te temi nei, kua liliu te toko 14 kau Mennonites ko te kau fai faka mafola, pea ko te tahi toko 9 ʼe nātou kau tuʼumaʼu ki te ʼu fono. ʼE ʼui fēnei e te matuʼa neʼe hoki papitema pe: “ ʼE mātou sio lelei ki te takitaki ʼa Sehova. Neʼe ina fekauʼi mai te ʼu tēhina mo te ʼu tuagaʼane kua faiva pea ʼe nātou palalau faka Siamani, ke ʼōmai ʼo tokoni mai kia mātou. ʼE mātou fakafetaʼi ʼaupito ki te fakatuʼutuʼu ʼaia.” Neʼe toe ʼui fēnei e te ʼofafine ʼo te tagata ʼaia, ʼe taʼu 17 pea kua papitema mo ia: “Neʼe mātou logoʼi te fiafia ʼo te ʼu tēhina mo tuagaʼane tūpulaga ʼaē neʼe ʼōmai ki henī. Tokolahi ia nātou ko te kau pionie, ʼe nātou fakaʼaogaʼi tonatou temi pea mo tanatou falā moʼo tokoni ki te hahaʼi. Neʼe ʼau fia fai feiā mo ʼau.”

ʼE mahino ia, ko nātou ʼaē neʼe nātou faiga ke nātou “fakalaka” moʼo tokoni neʼe nātou maʼu te fiafia pea mo te fīmālie lahi.