Ko Te Lotu Fea ʼe Tonu Anai Ke Koutou Fili?
‘KO TE ʼu lotu ʼe ko he ʼu ala kehekehe ʼe fakatau pe ki he meʼa e tahi. Pea ko te ʼAtua pe e tahi, kaeā koa la?’ ʼE maʼu te manatu ʼaia e te tokolahi, heʼe nātou ʼui logola ʼe maʼuhiga ke kita kau ki he lotu, kae ʼe mole lauʼia peʼe ko te lotu fea.
ʼE hage ʼe moʼoni te palalau ʼaia, koteʼuhi ko te ʼAtua pe e tahi, te Māfimāfi. (Isaia 44:6; Soane 17:3; 1 Kolonito 8:5, 6) Kae ʼe tou tokagaʼi te ʼu kehekehe ʼo te ʼu lotu ʼaē ʼe nātou lau ʼe nātou tauhi ki te ʼAtua moʼoni, ohage ko tanatou ʼu akonaki, mo tanatou ʼu faiako, pea mo tanatou ʼu lekula. ʼE lahi fau te ʼu kehekehe ʼo te ʼu lotu, koia ʼaē ʼe faigataʼa ai ki ʼihi hahaʼi ke nātou mahino pea mo nātou tali te ʼu meʼa ʼaē ʼe akoʼi pea mo tui kiai te ʼu lotu ʼaia.
Tahi ʼaē meʼa, neʼe ʼui fēnei e Sesu: “Ko te ʼAtua ʼe ko te Laumālie, pea ko nātou ʼaē ʼe atolasio kia te ia, ʼe tonu ke nātou atolasio kia te ia ʼaki te laumālie pea mo te moʼoni.” (Soane 4:24, MN ) Ko te atolasio ki te ʼAtua ʼaki te moʼoni ʼe ʼalutahi koa mo he ʼu manatu ʼe mole felogoi tahi ʼo ʼuhiga mo te ʼAtua, mo tana ʼu fakatuʼutuʼu, pea mo te faʼahiga atolasio ʼaē ʼe ina fakamaʼua? ʼE ko he manatu fakapotopoto koa te ʼui ʼaē ʼe mole maʼuhiga ki te ʼAtua Māfimāfi ia te faʼahiga tauhi ʼaē ʼe fai age kia ia?
Te Kau Kilisitiano Moʼoni ʼo Te ʼUluaki Sēkulō Pea Mo Te Temi Nei
ʼI ʼihi temi, neʼe kehekehe te ʼu manatu ʼa te kau Kilisitiano ʼo te ʼuluaki sēkulō ʼo ʼuhiga mo he ʼu faʼahiga ʼaluʼaga. Ohage la, ʼi te palalau ʼa Paulo kia nātou ʼi Kolonito, neʼe ina ʼui fēnei: “Oku tehina, nee fakaha mai kia te au e te hahai o Koloe o uhiga mo koutou, e i ai he u fihi ia koutou. Pea e au tala atu te mea aeni, koteuhi e tahi lau e koutou: ‘Ko au a Paulo’, ‘Ko au a Apolose’, ‘Ko au a [“sefasi,” MN ]’, ‘Ko au a Kilisito.’ ”—1 Kolonito 1:11, 12.
Neʼe ʼui koa e Paulo ʼe mole faʼa maʼuhiga te kehekehe ʼaia? Neʼe tonu koa ke nātou tahi fai pe te meʼa ʼaē neʼe nātou loloto kiai ke feala hanatou maʼu te maʼuli? Kailoa ia! Neʼe tokoni fēnei e Paulo: “E au kole atu kia koutou, u tehina, i te huafa o totatou Aliki ko Sesu Kilisito, ke koutou mau fuli he lea e tahipe, naʼa i ai he u mavetevete ia koutou, pea koutou fautahi i te manatu mo te fakakaukau.”—1 Kolonito 1:10.
ʼE moʼoni ia, ʼe mole feala ke fakakinauʼi te hahaʼi ke nātou maʼu he logo tahi ʼi te tui. ʼE hoki feala pe ke manatu tahi mokā ʼe tahi kumikumi fakalelei. Koia, ke feala hatatou maʼu te logo tahi ʼaē neʼe palalau kiai ia Paulo, ʼe maʼuhiga hakita ako te Tohi-Tapu takitokotahi pea mo maʼuliʼi fakalelei te ʼu meʼa ʼaē ʼe kita ako. ʼE feala koa ke maʼu he logo tahi feiā? Ohage pe ko te meʼa neʼe kua tou palalau kiai, talu mai fualoa ko te ʼAtua neʼe tokaga ki tana hahaʼi. ʼE feala koa hatatou ʼiloʼi te hahaʼi ʼaia ia ʼaho nei?
Te Fua Lelei ʼo Takita Fakatahi Mo Te Hahaʼi ʼAē ʼe Leleiʼia e Te ʼAtua
ʼI te tahi lakaga neʼe fehuʼi fēnei e te tagata fai pesalemo ko Tavite: “Ê Sehova, ko ai anai ka fakaafe ki tou falelā? Ko ai anai ka nofo ʼi tou moʼuga taputapu?” ʼE mahino ia ʼe ko he fehuʼi ʼe lelei ke tou fakakaukauʼi. Neʼe fakahā e Tavite tona tali: “Ko ia ʼaē ʼe haʼele agatonu pea mo ina maʼuliʼi te faitotonu, pea mo maʼu te moʼoni ʼi tona loto.” (Pesalemo 15:1, 2) Ko he mahino lelei ki te Tohi-Tapu ʼe ina faka fealagia mai anai ke kita ʼiloʼi te lotu ʼaē ʼe ina muliʼi te ʼu fakamaʼua ʼaia ʼa te ʼAtua. Pea ʼaki takita fakatahi mo te kūtuga ʼaia, ʼe kita ʼiloʼi ai anai he fakatahi mo he hahaʼi ʼe felagolagoʼaki, pea mo tauhi ki te ʼAtua ʼi te logo tahi pea “ ʼaki te laumālie pea mo te moʼoni.”
Neʼe fakahā e te kau Fakamoʼoni ʼa Sehova, ʼe feala ke maʼu he felogoi tahi ʼi te tui pea mo he gāue fakatahi ʼi he mālama ʼe maveuveu ʼi te temi nei. ʼI te kau Fakamoʼoni ʼa Sehova, ʼe ʼi ai te ʼu hahaʼi neʼe kau ki muʼa atu ki te ʼu lotu kehekehe pea mo te ʼu lanu kehekehe. Ko ʼihi ia nātou neʼe mole nātou tui ki te ʼAtua pea ko ʼihi neʼe nātou fakafihiʼi te ʼu meʼa fuli. Pea ʼe ʼi ai ʼihi neʼe mole faʼa tokaga ki te lotu. ʼI te temi nei, ko te ʼu hahaʼi ʼaia neʼe kau ʼi te ʼu lotu kehekehe, mo te ʼu agaʼi fenua kehekehe, mo te ʼu manatu kehekehe, kua nātou maʼu te logo tahi faka lotu ʼe mole maʼu ʼi te mālama ʼaenī.
ʼE fakatafito te logo tahi ʼaia ki te Folafola ʼa te ʼAtua, te Tohi-Tapu. ʼIo, ʼe ʼiloʼi e te kau Fakamoʼoni ʼa Sehova ʼe mole feala ke nātou fakakinauʼi te hahaʼi ke nātou fai he ʼu meʼa ʼe mole nātou loloto kai. Kae ʼe nātou tali te pilivilesio ʼaē ke nātou fakaloto mālohiʼi niʼihi ke nātou ako te Tohi-Tapu ke feala ai hanatou filifili te lotu ʼaē ka nātou kau kiai. Kapau ʼe nātou fai feiā, pea ʼe feala anai ki te tokolahi ke nātou maʼu te ʼu tapuakina ʼaē ʼe haʼu mai te atolasio ki te ʼAtua “ ʼaki te laumālie pea mo te moʼoni.”
Ia ʼaho nei, ʼe feala ke mālohi tokita kākāʼi ʼaki ni ʼu manatu hala. Koia, ʼe maʼuhiga ai ke kita filifili he ʼu fakakaugā lelei. ʼE ʼui e te Tohi-Tapu “ko ʼaē ʼe haʼele mo te kau poto ʼe liliu anai ia ʼo poto” pea “ko te u fakakauga ae e kovi, e ina maumauʼi te u aga e lelei.” (Tāʼaga Lea 13:20; 1 Kolonito 15:33) ʼE puipui kita mokā kita fakatahi mo te kau atolasio moʼoni ʼa te ʼAtua. Koia, ʼe fakamanatu fēnei mai e te Tohi-Tapu: “Tou fetokagaʼaki ke tou uga ia tatou ki te ʼofa pea mo te ʼu gāue matalelei, ʼo mole tou tuku tatatou ʼu fakatahi, ohage ko te agamāhani ʼa ʼihi, kae ke tou fefakaloto mālohiʼaki, tāfito la he kua koutou sio ki te fakaōviōvi mai ʼo te ʼaho.” (Hepeleo 10:24, 25, MN ) ʼE mahino ia ʼe ko he meʼa lelei mokā ʼe fetokoniʼaki ni ʼu kaumeʼa moʼoni ʼaki te ʼofa, he ʼu tēhina mo he ʼu tuagaʼane fakalaumālie, moʼo fakahoko tonatou ʼu maʼua ia muʼa ʼo te ʼAtua!
ʼE fakamoʼoni kiai ia Ottmar. Neʼe lahilahi ake ʼi te famili Katolika ʼi Siamani, pea neʼe mole kei ʼalu leva ʼo misa. ʼE ina fakamahino fēnei: “ ʼI te ʼu temi fuli ʼaē neʼe ʼau misa ai, neʼe mole ʼi ai hona ʼuhiga kia ʼau.” Kae neʼe haga falala aipe ia Ottmar ki te ʼAtua. Pea neʼe felāveʼi mo te kau Fakamoʼoni ʼa Sehova pea neʼe ina ʼiloʼi papau ko nātou ko te ʼu kaugana moʼoni ʼa te ʼAtua. Neʼe ina ʼiloʼi te maʼuhiga ʼaē ke fakatahi mo nātou. ʼI te temi nei ʼe ina ʼui fēnei: “ ʼE ʼau gāue mālohi ʼi te kautahi faka malamanei, pea ʼe fīmālie toku loto pea mo taku fakakaukau. ʼE tokoniʼi māmālie ʼau ke ʼau maʼu te ʼatamai mālama totonu ʼo te Tohi-Tapu. ʼE ko he meʼa maʼuhiga ʼaupito kia ʼau.”
Ko He Fakaafe Kia Nātou ʼAē ʼe Nātou Kumi Te ʼAtua
Ko te hahaʼi ʼaē ʼe nātou felogoi tahi ʼi tanatou gāue, ʼe feala ke nātou fakahoko he gāue ʼe lelei age ia nātou ʼaē ʼe nātou gāue takitokotahi. Ohage la, neʼe fēnei te ʼu fakatotonu ʼa Sesu ʼi muʼa ʼo tana mavae: “[Koia] koutou ʼolo pea ke koutou fai ni ʼu tisipulo ʼi te hahaʼi ʼo te ʼu fenua fuli pe, ʼo papitemaʼi ia nātou ʼi te huafa ʼo te Tāmai pea mo te ʼAlo pea mo te laumālie maʼoniʼoni, ʼo koutou ako ia nātou ke nātou mulimuli ki te ʼu meʼa fuli pe ʼaē neʼe ʼau fakatotonu atu kia koutou. Pea koʼeni, ʼe ʼau nofo mo koutou ʼi te ʼaho fuli pe, ʼo kaku ki te fakaʼosi ʼo te tuʼu ʼo te ʼu faʼahiga meʼa ʼaenī.” (Mateo 28:19, 20, MN ) ʼE lava fakahoko fakalelei feafeaʼi te gāue ʼaia mo kapau ʼe mole ʼi ai he takitaki peʼe ko he fakatuʼutuʼu? ʼE lava feafeaʼi ki he tahi ke fakalogo ki te fakatotonu faka Tohi-Tapu ʼaia mo kapau ʼe faiga ke gāue tokotahi ki te ʼAtua?
ʼI te taʼu kua hili, ko te kau Fakamoʼoni ʼa Sehova neʼe nātou tufa ʼi te malamanei katoa te ʼu tohi faka Tohi-Tapu, mo te ʼu kaupepa liliki, mo te ʼu kaupepa lalahi e 91 933 280, pea mo te ʼu nusipepa e 697 603 247, ʼo fakaaʼu te logo ʼo te Folafola ʼa te ʼAtua ki te ʼu miliona hahaʼi ʼi te ʼu fenua e 235. ʼE ko he fakamoʼoni ʼaia ʼo te logo tahi, mokā fai fakatahi he gāue!
ʼO mole gata pe ki tanatou tufa te ʼu tohi faka Tohi-Tapu, ko te kau Fakamoʼoni ʼa Sehova ʼe nātou fai te ʼu ako Tohi-Tapu moʼo tokoni ki te hahaʼi ke nātou maʼu he mahino loloto ʼo te meʼa ʼaē ʼe fakamaʼua mai e te ʼAtua. ʼI te taʼu kua hili, ʼe fakafuafua ko ako Tohi-Tapu e 5 726 509 neʼe fai ʼi te vāhaʼa fuli e te hahaʼi takitokotahi peʼe fai fakatahi. Neʼe tokoni te ako Tohi-Tapu ʼaia ki te ʼu lauʼi miliona hahaʼi ke nātou maʼu he fakatafito mālohi moʼo filifili te lotu ʼaē ke nātou kau kiai. ʼE mātou fakaafe atu koutou ke koutou ako te ʼu lekula ʼa te ʼAtua ʼaē ʼe ina fakahā mai ʼi te Tohi-Tapu. Pea ʼe feala ai leva ke koutou filifili te lotu ʼaē ʼe koutou fia kau kiai.—Efeso 4:13; Filipe 1:9; 1 Timoteo 6:20; 2 Petelo 3:18.
Kapau ʼe koutou fia fakafiafia te ʼAtua, ʼe maʼuhiga ke koutou kau ki he lotu—kae ʼe mole ko he faʼahiga lotu pe. ʼE tonu ke koutou fili he lotu ʼe fakatafito ki te ʼatamai mālama totonu ʼo te Tohi-Tapu, kae ʼaua naʼa koutou hoko fili feiā pe peʼe koutou mulimuli ki te manatu ʼa he tahi. (Tāʼaga Lea 16:25) Koutou ako te ʼu fakamaʼua ʼo te lotu moʼoni. Koutou fakatatau mo te meʼa ʼaē ʼe koutou tui kiai. Pea hoki koutou filifili leva.—Teutalonome 30:19.
[Paki ʼo te pasina 7]
ʼE logo tahi te kau Fakamoʼoni ʼa Sehova ʼi he mālama ʼe felogoi kehekehe