‘ ʼE Maʼuhiga Ohage Ko He Maka Lanu Kula’

NEʼE sio ia te ʼapositolo ko Soane ki te ʼafioʼaga faka kolōlia ʼi te lagi. Ko Ia ʼaē neʼe ʼafio ʼi te hekaʼaga hau neʼe ‘tatau tona agaaga mo te maka sasipa.’ Neʼe toe hage foki ko “he maka maʼugataʼa ʼe lanu kula.” (Apokalipesi 4⁠:​2, 3, MN ) Neʼe feafeaʼi te ʼu maka ʼaia?

Ko te ʼu maka ʼaia neʼe māina. ʼI te temi muʼa, ko te kupu faka Keleka ʼaē neʼe fakaliliu ʼaki te kupu “sasipa” neʼe fakaʼaogaʼi ki te ʼu maka e lanu kehekehe, ohage la ko te ʼu maka maʼugataʼa ʼaē ʼe māina. ʼI te tohi Word Pictures in the New Testament, ʼe ʼui ai e A. T. Robertson, ko te “maka sasipa” ʼo Apokalipesi 4⁠:3 “ ʼe mahino ia ʼe mole tatau mo te sasipa ʼo totatou temi.” Tahi ʼaē meʼa ʼi te tohi ʼo Apokalipesi, ʼe talanoa ia Soane ki muli age ki te kolo ʼi selo ko Selusalemi, ʼo ʼui maʼana: “Ko tona gigila, neʼe hage ko te gigila ʼo he maka maʼugataʼa ʼaupito, ohage ko he maka sasipa ʼe māina gigila ohage ko te kilisitale.” (Apokalipesi 21⁠:​10, 11, MN ) Neʼe lagi talanoa ia Soane ki te ʼu maka neʼe māina.

Ko ia ʼaē neʼe ʼafio ʼi te hekaʼaga hau ʼaē neʼe sio kiai ia Soane, ʼe ko Sehova, te ʼAtua faka kolōlia lahi ʼo te ʼatulaulau. ʼE ko ia tāfito ʼaē ʼe maʼa pea mo maʼoniʼoni. Pea ki te faʼahi ʼaia, neʼe tohi fēnei e te ʼapositolo ko Soane: “Ko te Atua e ko te malama, e mole mau he fakapouli o te u fakapouli ia te ia.” (1 Soane 1⁠:⁠5) Koia ʼaē neʼe uga ai e Soane tona ʼu kaumeʼa ʼi te tui ke nātou ‘fakamaʼa ia nātou ohage ko Sehova ʼaē ʼe maʼa.’​—⁠1 Soane 3⁠:⁠3.

Koteā ʼaē ʼe tonu ke tou fai ke faka ʼuhiga tatou e te ʼAtua ʼe tou maʼa? ʼE maʼuhiga ke tou haga tui ki te taʼataʼa ʼo Kilisito ʼaē neʼe liligi moʼo fakamolemole ʼatatou agahala. ʼE tonu ke tou toe “mauli i te malama,” ʼo tou ako tuʼumaʼu te Tohi-Tapu pea mo maʼuliʼi tana ʼu akonaki.​—⁠1 Soane 1⁠:⁠7.