Te ʼu Fehuʼi ʼa Te Kau Lautohi

Ko te kai ʼo te ʼu pane ʼo te fakafofoga e Tavite mo tana kau tagata, ʼe fakahā ʼaki ai koa ʼe feala he maumauʼi te lao ʼa te ʼAtua mokā hoko he ʼu faigataʼaʼia, pea ʼe mole hoko anai he tūʼā?—1 Samuele 21:1-6.

Ia Levitike 24:5-9, ko te ʼu pane ʼo te fakafofoga ʼaē neʼe fetogi ʼi te Sāpato fuli, neʼe gata pe ko te kau pelepitelo neʼe feala ke nātou kai. Neʼe fakatuʼakoi pe ki te kau pelepitelo te fakaʼaogaʼi ʼo te ʼu pane ʼaia, koteʼuhi neʼe ko he ʼu pane taputapu pea neʼe ko he meʼa kai ʼa te ʼu tagata ʼaē neʼe fakaʼaogaʼi ki te tauhi kiā Sehova—ia te kau pelepitelo. Ko te foaki ʼo te ʼu pane ʼaia ki he ʼu tagata gāue kele peʼe fakaʼaogaʼi e nātou ʼi hanatou pe fia kakai feiā neʼe kovi ʼaupito. Kae neʼe mole ko he agahala ʼa te pelepitelo ko Ahimeleke ʼi tana foaki te ʼu pane ʼo te fakafofoga ke kai e Tavite pea mo tana kau tagata.

ʼE ʼiloga ia neʼe fakahoko e Tavite ia te gāue makehe neʼe fakatotonu age e te Hau ko Saulo. Neʼe fia kakai ia Tavite mo tana kau tagata. Neʼe fakafuafua e Ahimeleke ko te kau tagata ʼaia neʼe nātou maʼa ʼo mulimuli ki te toʼotoʼoga faka lotu. Logola ko tanatou kai ia te ʼu pane ʼo te fakafofoga neʼe mole ʼalutahi mo te lao, kae neʼe ʼalutahi te faʼahi ʼaia mo te fakatuʼutuʼu ʼaē neʼe tonu ke fakaʼaogaʼi tāfito kiai te pane ʼo te fakafofoga. ʼI tana fakafuafua ʼaia, neʼe fai e Ahimeleke te meʼa neʼe mole fai māhani ʼi te lao. Neʼe fakaʼaogaʼi e Sesu Kilisito ia te meʼa ʼaia neʼe hoko moʼo fakaʼasi lelei ia te mole lelei ʼo te mulimuli faka fefeka fau ki te lao ʼo te Sāpato ʼaē neʼe fakamaʼua kiai e te fakamahino ʼa te kau Faliseo.—Mateo 12:1-8.

Kae ko te meʼa ʼaia neʼe hoko mo Tavite ʼe mole faka ʼuhiga ʼaki ai ʼe feala he maumauʼi ʼo te lao ʼa te ʼAtua mokā hoko mai he ʼu faigataʼaʼia. Ohage la neʼe ʼi ai te ʼaluʼaga ʼe teitei tatau, neʼe hoko ki te kau tagata tau Iselaele ʼaē neʼe nātou tauʼi te kau Filisitini. Neʼe ʼui fēnei e te Hau ko Saulo: “Malaʼia te tagata ʼaē ʼe ina kai anai he moʼi pane ʼi muʼa ʼo te afiafi, ʼi muʼa o taku lagavaka ki ʼoku fili!” ʼE ʼui fēnei ʼi te Tohi-Tapu: “Neʼe nātou hoko atu tanatou tā te kau Filisitini ʼi te ʼaho ʼaia.” Neʼe kua gāʼegagaʼe te kau solia ʼi te tau pea mo nātou pakupāpaku, ‘neʼe nātou matehi te ʼu ōvi, mo te ʼu pipi pea mo te pipi mui, pea nātou kai mo tona toto.” (1 Samuele 14:24, 31-33) Neʼe nātou agahala kiā Sehova ʼi tanatou maumauʼi tana lao ʼo ʼuhiga mo te toto. Neʼe mole ʼalutahi te meʼa ʼaē neʼe nātou fai mo te fakatuʼutu tāfito ʼo te fakaʼaogaʼi ʼo te toto, ʼaē ko te “fai fakalelei” ki te ʼu agahala. (Levitike 17:10-12; Senesi 9:3, 4) ʼI tana manavaʼofa, neʼe tali e Sehova ia te ʼu sākilifisio makehe neʼe fai maʼa nātou ʼaē neʼe agahala.—1 Samuele 14:34, 35.

ʼE fakamaʼua mai e Sehova ke tou fakalogo ki tana ʼu lao ʼi te ʼaluʼaga fuli. Neʼe ʼui fēnei e te ʼapositolo ko Soane: “Ko te ofa aeni o te Atua: ke tou taupau tana u fekau.”—1 Soane 5:3.

[Paki ʼo te pasina 30]

Ko te ʼu pane foʼou ʼo te fakafofoga neʼe tuku ʼi te loto Tapenakulo ʼi te Sāpato fuli