Ko Te Fakakikite ʼo Totatou Kā Haʼu Kua Ovi Mai

ʼI TANA talanoa ʼo ʼuhiga mo te kā haʼu ʼo te tagata pea mo te kele, neʼe tohi fēnei e te ʼapositolo ko Petelo: “Ohagē ko tana fakapapau mai [e te ʼAtua], ʼe tou talitali ki te ʼu lagi foʼou pea mo te kele foʼou ʼaē ʼe tonu ke nofo ai te faitotonu.” (2 Petelo 3:13) Ko te fakapapau ʼo ʼuhiga mo “te ʼu lagi foʼou pea mo te kele foʼou” neʼe ʼuluaki foaki mai e te polofetā ko Isaia. (Isaia 65:17; 66:22) ʼAki tana talanoa ki te lea fakapolofetā ʼaia, neʼe fakahā e Petelo neʼe mole heʼeki hoko kātoa ʼi tona temi.

Ki muli age, ʼi te taʼu 96 ʼo totatou temi, ʼe fakapipiki tahi ʼi te tohi ʼo Fakahā ʼe fakatahiʼi e te ʼapositolo ko Soane ia “te kele foʼou” ki te ʼu tapuakina ʼaē ʼe foaki mai e te Puleʼaga ʼo te ʼAtua. (Fakahā 21:1-4) Ko te ʼu palalau ʼa Sesu ʼo fēia mo te ʼapositolo ko Paulo ʼo ʼuhiga mo te ʼu ʼaluʼaga ʼo te mālamanei ʼi muʼa ʼo te hoko mai ʼo te Puleʼaga ʼo te ʼAtua ʼe lolotoga hoko nei. Koia lā ʼaē ʼe feala ai ke tou fakaʼatalitali heʼe kua vave pē ia te haga ʼo te Puleʼaga ʼo fakatuʼu ia te mālama foʼou. ʼE feafeaʼi anai ia te mālama foʼou? ʼE fakahā mai kiā tātou ʼi te Tohi-Tapu ʼi te tohi ʼo Isaia.

Te ʼu Tapuakina ʼi Te Mālama Foʼou

Ko Te Tokalelei ʼi Te Mālamanei Kātoa Pea Mo Te Logotahi ʼi Te Tauhi. “ ʼE tonu anai ke natou tuki tanatou ʼu heletā ke liliu ko he ʼu huo laga kele pea mo tanatou ʼu tao ke liliu ko he ʼu pipi moʼo pakimaga. Pea ʼe mole hiki anai he heletā e he fenua ki he tahi fenua, pea ʼe mole natou toe ako anai te tau.”—Isaia 2:2-4.

ʼE Tokalelei Anai Ia Te Tagata Pea Mo Te ʼu Manu. “Ko te lupo ʼe nofo fakatemi anai mo te ʼakeno tagata, pea ko te leopa ʼe takoto fakatahi anai mo te ʼuhiʼi tao, pea ko te ʼuhiʼi pipi, pea mo te laione mui, pea mo te manu ʼaē neʼe fafaga lelei, ʼe natou fakatahi fuli anai; pea ʼe takitaki anai nātou e te kiʼi tamasiʼi tagata. Pea ko te pipi fafine mo te uluso fafine ʼe kakai fakatahi anai; ʼe tākokoto fakatahi anai tanā ʼu kiʼi ʼuhi. Pea māʼia mo te laione ʼe ina kai anai te mouku ohagē ko te vītulo. . . . ʼE mole fai anai he meʼa ʼe kovi pea ʼe mole fakatupu anai he maumau ʼi toku moʼuga māʼoniʼoni kātoa, heʼe fonu moʼoni anai te kele ʼi te ʼatamai mālama ʼo ʼuhiga mo Sehova ohagē ko te ʼuʼufi ʼo te tai e te ʼu vai.”—Isaia 11:6-9.

ʼE Mahu Anai Ia Te Meʼa Kai Maʼa Te Hahaʼi Fuli. “ ʼE fai anai e Sehova ʼo te ʼatu kautau maʼa te hahaʼi fuli, ʼi te moʼuga ʼaia, he kātoaga meʼa kai neʼe loloʼi lelei, he kātoaga ʼo he ʼu vino kua tuku ke toka tona veveli, he ʼu meʼa kai neʼe loloʼi lelei pea ʼe fonu ʼi te gako, mo te vino kua tuku ke toka tona veveli pe neʼe fakaoʼo.”—Isaia 25:6.

ʼE Pulihi Anai Ia Te Mate. “[Ko te ʼAtua] ʼe ina fakaʼauha moʼoni anai te mate ʼo talu ai, pea ʼe mahino papau ia, ko te Tuʼi ʼAliki ko Sehova ʼe ina holoholoʼi anai te ʼu loʼimata ʼi te ʼu fofoga fuli pē. Pea ʼe ina toʼo anai te lainoa ʼa tana hahaʼi ʼi te kele kātoa, he neʼe ʼui totonu e Sehova.”—Isaia 25:8.

ʼE Fakatuʼuake Anai Ia Te Kau Mate. “ ʼE māʼuʼuli anai tau kau mate. Ko haku mate—ʼe natou tutuʼuake anai. Kotou ʼaʼala pea mo kalaga fakafiafia, . . . ʼe toe fakatuʼuake anai e te kele māʼia mo nātou ʼaē ʼe mole natou mālolohi ʼi te mate.”—Isaia 26:19.

Ko Te Mēsia ʼe Ko He Tuʼi Fakamāu Faitotonu. “ ʼE mole ina fakamāuʼi anai ʼaki te meʼa ʼaē neʼe hā ki ʼona mata, pea ʼe mole ina fai anai tana fakatonutonu ʼaki pē te meʼa ʼaē neʼe fagono kiai ʼona taliga. Pea ʼe ina fakamāuʼi moʼoni anai ia nātou liliki ʼaki te faitotonu, pea ʼe ina fakatonutonuʼi anai ʼaki te faitotonu ke fua lelei ki te kau agavaivai ʼo te kele.”—Isaia 11:3, 4.

ʼE Fakamālōlō Anai Ia Te Kau Kivi Pea Mo Te Kau Tuli. “ ʼE ava ai anai te ʼu mata ʼo te kau kivi, pea ʼe ava ai anai te ʼu taliga ʼo te kau tuli.”—Isaia 35:5.

ʼE Mahu Anai Ia Te Kele Toafa. “ ʼE fiafia anai te toafa pea mo te potu fenua ʼaē ʼe kele toafa, pea ʼe fiafia anai te potu lāvaki pea ʼe fisi anai ohagē ko te safalani. ʼE mahino papau ia, ʼe mātala anai pea ʼe fonu anai ʼi te fiafia pea mo he ʼu kalaga fakafiafia.”—Isaia 35:1, 2.

Te Kele Foʼou. “ ʼE au fakatupu te ʼu lagi foʼou [te Puleʼaga foʼou ʼi te lagi] pea mo te kele foʼou [te sōsiete fakatagata foʼou ʼo te kau faitotonu]; pea ʼe mole tou toe manatuʼi anai te ʼu meʼa ʼāfea, pea ko te ʼu meʼa ʼaia ʼe mole toe hake anai ki te loto. Kae ke kotou fakafiafia ʼaupitō, pea mo loto fiafia ʼo talu ai ʼi te ʼu meʼa ʼaē ʼe au fakatupu. . . . ʼE mahino papau ia, [ko te hahaʼi ʼaē neʼe fakapapauʼi ki ai e te ʼAtua ia te mālama foʼou] ʼe natou laga anai ni ʼu fale pea ʼe natou nofoʼi anai; pea ʼe mahino papau ia ʼe natou tō anai he ʼu fuʼu vite pea mo natou kai anai tonatou ʼu fua. ʼE mole natou laga anai ke nofoʼi e he tahi kehe; pea ʼe mole natou tō anai ke kai e he tahi kehe. Heʼe hagē anai te ʼu ʼaho ʼo taku hahaʼi ko te ʼu ʼaho ʼo he fuʼu ʼakau; pea ko taku hahaʼi ʼaē neʼe au fili, ʼe natou fakaʼaogaʼi kātoa anai te gāue ʼo tonatou ʼu nima. ʼE mole natou kinakina noa anai, pea ʼe mole natou fānaunau anai moʼo fakatupu maveuveu; koteʼuhi ko nātou ko te hako ʼaē ʼe fakatahi ʼaki te kau tapuakina ʼa Sehova, pea mo tanatou ʼu fānau ʼo fakatahi mo nātou. Pea ʼe hoko moʼoni anai te faʼahi ʼaenī, ʼi muʼa ʼo tanatou pāui ʼe au tali age anai; ʼi tanatou kei lolotoga pāui ʼe au tali age anai; ʼi tanatou kei lolotoga palalau ʼe au logo tonu anai.” “ ‘Ohagē pē ko te lagi foʼou pea mo te kele foʼou ʼaē ʼe au fai, ʼe nā tuʼu ʼi ʼoku muʼa, ʼe tuʼu fēia anai tokotou hōloga pea mo tokotou higoa,’ ko te tala ʼaia ʼa Sehova.”—Isaia 65:17-25; 66:22.

Te Fakakikite ʼo He Kā Haʼu Fakaofoofo

ʼE mole gata pē ki te tohi ʼo Isaia ʼi te Tohi-Tapu ʼe ina fakakikite ia te ʼu tapuakina ʼi te kā haʼu. ʼE lahi ʼi te Tohi-Tapu ia te ʼu lea fakapolofetā ʼe talanoa ki te ʼu meʼa taulekaleka ʼa te ʼAtua ʼaē kā fakahoko anai e tona Puleʼaga ʼaki ia Kilisito.a ʼE kotou fia maʼuli anai koa ʼi he ʼu faʼahiga ʼaluʼaga ʼi te palatiso? ʼE kotou fealagia! Kotou faiga ke kotou ʼiloʼi ia te ʼu meʼa ʼaē ʼe akoʼi moʼoni mai ʼi te Tohi-Tapu ʼo ʼuhiga mo te ʼu fakatuʼutuʼu taulekaleka ʼa te ʼAtua ki te kā haʼu, pea ʼe feala ke kotou mahino ai ʼe kotou lava kau kiā nātou ʼaia. ʼE fiafia anai ia te kau Fakamoʼoni ʼa Sehova ʼi hanatou tokoni atu kiā koutou.

[Nota]

[Paki ʼo te pasina 8]

ʼE tokalelei anai ia te tagata pea mo te manu

[Paki ʼo te pasina 9]

ʼE toe māʼuʼuli anai ia te kau mate

[Paki ʼo te pasina 10]

ʼE liliu anai te kele kātoa ko he palatiso