He Koʼē ʼe Lahi Te ʼu ʼOhoana ʼe Mole Lelei Tonatou Maʼuli Fakataumātuʼa

“Neʼe fakaovi te kau Faliseo kiā te ia ko hanatou fia ʼahiʼahiʼi ia ia, pea ʼui maʼa nātou kiā te ia: ‘ ʼE gafua koa ki he tagata ke māvete mo tona ʼohoana ʼi he faʼahiga meʼa pē?’ ”—Mateo 19:3.

KO ʼIHI ʼi te temi ʼo Sesu neʼe natou feʼekeʼaki peʼe feala, peʼe tonu ke tologa te nonofo ʼa he taumātuʼa. Pea kiā nātou ʼaia, neʼe ʼui fēnei e Sesu: “Neʼe mole heʼeki kotou lau ko ia ʼaē neʼe ina fakatupu ia nāua, ʼi te kamataʼaga neʼe ina fakatupu ia nāua ʼe tagata pea mo fafine, pea neʼe ina ʼui fēnei: ‘Koia ko te tagata ʼe mavae anai mai tana tamai pea mo tana faʼē pea ʼe pipiki anai ki tona ʼohoana, pea ʼe nā liliu anai ko te kakano pē e tahi’? ʼO mole kei nā toko lua ai, kae ko te kakano pē e tahi. Koia, ko te meʼa ʼaē neʼe fakatahiʼi e te ʼAtua ʼi te ʼakau toho e tahi, ke ʼaua naʼa veteki e te tagata!”a (Mateo 19:4-6) ʼE mahino ia, ʼe loto ia te ʼAtua ke tologa te ʼu nofo ʼohoana.

ʼE lahi te ʼu fenua iā ʼaho nei, ʼe ko te toko 40 ki te teau peʼe laka atu ʼi te ʼu ʼohoana fuli ʼo te temi ʼaenī, ʼe kua natou ‘tahi nofo’ ʼo iku ai mo hanatou māvete. ʼE kei ʼaoga koa ʼi temi nei ia te tokoni ʼa te Tohi-Tapu ki te ʼu taumātuʼa ʼaē ʼe mole lelei tonatou ʼu maʼuli? ʼE kovi koa tonatou maʼuli fakataumātuʼa he neʼe mole lelei te fakatuʼutuʼu ʼohoana?

Tou vakaʼi age muʼa te faʼifaʼitaki ʼaenī: Ko te ʼu taumātuʼa e toko lua ʼe nā totogi lualua te faʼahiga motokā ʼe tatau ʼosi pē. Ko te tahi taumātuʼa ʼe nā tokaga fakalelei ki tanā motokā pea mo taki fakapotopoto. Pea ʼe mole maumau tanā motokā. Ki te taumātuʼa ʼaē, ʼe mole maʼu pē lā honā temi ke nā fakamaʼa tanā motokā, pea ʼe nā taki gaholo. Pea ko te motokā ʼaia neʼe maumau pea liʼaki fēia. Ko ai ʼaē neʼe tupu ai te maumau ʼo te motokā, ʼe ko te motokā peʼe ko nāua ʼaē ʼa nāua te motokā? ʼE hā lelei mai, neʼe ko te hala pē ia ʼa nāua te motokā.

ʼO toe fēia, ʼi te mole lelei ʼo te nofo ʼohoana ʼa te tokolahi, ʼe mole tonu leva ke tukugākoviʼi te fakatuʼutuʼu ʼohoana. ʼE hā lelei te hala ʼo te manatu ʼaia, heʼe lauʼi miliona te ʼu taumātuʼa ʼe lelei pē tonatou maʼuli. ʼE fakatupu e te ʼu taki taumatuʼa ʼaia te fiafia pea mo te fakapotopoto ʼi te ʼu fāmili, pea mo te ʼu hahaʼi ʼaē ʼe felogoi tahi mo nātou. Kae ohagē pē ko he motokā, ke tologa te nofo ʼohoana, ʼe tonu ke tōkakaga te ʼu taumātuʼa pea mo puipui fakalelei tonatou maʼuli fakataumātuʼa.

Kapau ʼe mole heʼeki faʼa fualoa takotou kua ʼohoana peʼe lagi kua fuafualoa atu, ʼe tokoni atu anai te Tohi-Tapu ki takotou puipui pea mo lagalaga tokotou maʼuli fakataumātuʼa. ʼI te ʼu pāsina ʼaē kā hoa mai, ʼe talanoa ai anai ki te maʼuli ʼo ʼihi taumātuʼa.

[Nota]