Te ʼu Fehuʼi ʼa Te Kau Lautohi

ʼE feala koa hatatou ʼiloʼi papau peʼe ko lea fakapolofetā ʼe fia ʼo ʼuhiga mo te Mēsia ʼe tou maʼu ʼi te Koga Tohi-Tapu Fakahepeleo?

ʼAki he sivisivi lelei ʼo te Koga Tohi-Tapu Fakahepeleo, ʼe feala ai ke tou mahino ʼe lahi te ʼu lea fakapolofetā neʼe fakahoko e Sesu Kilisito. Ko te ʼu lea fakapolofetā ʼaia neʼe natou fakahā peʼe ko te fāmili fea ʼaē neʼe tonu ke tupu ai te Mēsia, mo te temi ʼaē neʼe tonu ke hā ai, mo tana ʼu gāue, mo te aga ʼa te hahaʼi kiā te ia, pea mo te gāue ʼaē neʼe tuku age e Sehova ke ina fai. Ko te fakatahiʼi ʼo te ʼu lea fakapolofetā fuli ʼaia ʼaē kā tokoni mai ke tou mahino ai ko Sesu te Mēsia. Kae ʼe ʼaoga ke tou tōkakaga mo kapau ʼe tou faigaʼi ke tou ʼiloʼi papau peʼe ko lea fakapolofetā ʼe fia ʼe tou maʼu ʼi te Koga Tohi-Tapu Fakahepeleo.

ʼE mole manatu tahi te hahaʼi ki te ʼu lea fakapolofetā ʼo ʼuhiga mo te Mēsia. ʼI tana tohi The Life and Times of Jesus the Messiah (Te Maʼuli Pea Mo Te Temi ʼo Sesu Te Mēsia) neʼe ʼui e Alfred Edersheim, ko te ʼu tohi fakalapi ʼāfea neʼe fakatuʼu ai he lisi ʼo te ʼu vaega Fakatohi-tapu e 456 ʼo te Koga Tohi-Tapu Fakahepeleo ʼe fakaʼuhiga ki te Mēsia, logolā ʼe lahi te ʼu lea fakapolofetā ʼe mole talanoa fakahagatonu ia ki te Mēsia. Ko he vakavakaʼi fakalelei ʼo te ʼu vaega Tohi-Tapu ʼaia e 456 ʼe lagaʼi ai te ʼu fehuʼi ʼo ʼuhiga mo ʼihi ʼi te ʼu vaega ʼaia, peʼe ko he ʼu lea fakapolofetā ʼo ʼuhiga mo Sesu Kilisito. Ohagē lā, neʼe ʼui e Edersheim neʼe fakaʼuhiga e te kau Sutea ia Senesi 8:11 ki te Mēsia. Neʼe natou ʼui ko “te lau oliveto ʼaē neʼe ʼi te gutu ʼo te lupe, neʼe toʼo ia mai te Moʼuga ʼo te Mēsia.” Neʼe toe talanoa te tagata faitohi ʼaia kiā Ekesote 12:42. ʼI tana fakamatala ʼaē ʼo ʼuhiga mo te mahino hala ʼa te kau Sutea ki te vaega ʼaia, neʼe ina tohi fēnei: “Ohagē pē ko te mavae ʼaē ʼa Moisese ʼi te toafa, ʼo toe fēia pē anai mo te mavae ʼa te Mēsia mai Loma.” ʼE mahino papau, ko te tokolahi ʼo te hahaʼi sivi Tohi-Tapu mo ʼihi atu, neʼe faigataʼa hanatou maʼu he pikipikiga ʼa Sesu Kilisito mo te ʼu vaega Fakatohi-tapu ʼaia e lua mo tanatou ʼu fakamahino hala.

Kapau ʼe tou tōkakaga pē tātou ki te ʼu lea fakapolofetā ʼaē neʼe fakahoko tonu e Sesu Kilisito, pea ʼe faigataʼa anai hatatou ʼiloʼi papau te lahi ʼo te ʼu lea fakapolofetā. Ohagē lā, iā Isaia kāpite 53, ʼe lahi te ʼu agaaga fakapolofetā ʼo ʼuhiga mo te Mēsia. ʼE fakakikite fēnei iā Isaia 53:2-7: “Neʼe mole hona sino faʼa maʼuhiga. . . . Neʼe fehiʼaʼinaʼi pea mo liʼakina e te hahaʼi. . . . Neʼe ina fua totatou ʼu mahaki. . . . Neʼe hukiʼi ʼuhi ko ʼatatou talagataʼa. . . . Ohagē ko he ʼakeno neʼe taki ki te tāmateʼiʼaga manu.” ʼO ʼuhiga mo te ʼu vaega ʼaia iā Isaia kāpite 53, ʼe tonu koa ke tou ʼui ʼe ko he lea fakapolofetā pē ʼaia e tahi ʼo ʼuhiga mo te Mēsia, peʼe tonu koa ke tou ʼui ko te ʼu agaaga kehekehe ʼaia ʼo ʼuhiga mo te Mēsia ʼe ko he ʼu lea fakapolofetā takitahi pē ia?

Tou toe vakaʼi atu muʼa ia Isaia 11:1, ʼaē ʼe tou lau fēnei ai: “ ʼE haʼu moʼoni anai he huli mai te tāfito ʼa Sese, pea ko he muko ʼe haʼu mai tona ʼu aka ʼe fua anai.” ʼE toe fai te lea fakapolofetā ʼaia ʼi te vaega 10, ʼo toe tatau aipē mo tona ʼu kupu. ʼE tonu koa ke tou ʼui ko te ʼu vaega ʼaia e lua ʼe ko he ʼu lea fakapolofetā kehekehe, peʼe ko he lea fakapolofetā pē e tahi? Ko te ʼu tonu ʼaē kā tou fai anai ʼo ʼuhiga mo Isaia kāpite 53 pea mo Isaia kāpite 11 ʼe ina fetogi anai te lahi ʼo te ʼu lea fakapolofetā ʼo ʼuhiga mo te Mēsia.

ʼE mole maʼuhiga hatatou ʼiloʼi papau peʼe ko lea fakapolofetā ʼe fia ʼo te Mēsia ʼaē ʼe tou maʼu ʼi te Koga Tohi-Tapu Fakahepeleo. ʼE feala ke tou maʼu ʼi tatatou ʼu tohi he ʼu lisi ʼe tuʼu ai he ʼu lea fakapolofetā ʼo ʼuhiga mo Sesu pea mo tonatou fakahoko.a ʼE feala ke tou fakaʼaogaʼi ia te ʼu lisi ʼaia ʼi tatatou ako takitokotahi pea mo tatatou ako fakafāmili, pea ʼi tatatou gāue fai fakamafola. Ko te ʼu lisi ʼaia ʼe feala ke ina fakamālohi tatatou tui ʼaē ko folafola fuli pē ʼe puʼaki mai te gutu ʼo Sehova ʼe hoko tuʼumaʼu ia.

[Nota]