Te Mēsia! Ia Ia ʼAē Neʼe Fekauʼi Mai e Te ʼAtua Moʼo Haofaki Ia Te Mālamanei
“Ohagē pē ko te mate ʼa te hahaʼi fuli iā Atama, ʼo toe fēia pē, ʼe toe māʼuʼuli anai te hahaʼi fuli iā Kilisito.”—1 KO. 15:22.
1, 2. (a) Koteā ʼaē neʼe fai e Atelea pea mo Filipo ʼi tanā felāveʼi ʼaē mo Sesu? (b) He koʼē ʼe tou ʼui kua lahi age te ʼu fakamoʼoni kua tou maʼu ʼo ʼuhiga mo Sesu ko te Mēsia, ʼi te temi ʼaē ʼo te kau Kilisitiano ʼo te ʼuluaki sēkulō?
“KUA mā maʼu te Mēsia,” ko te ʼui ʼaia ʼa Atelea ki tona tehina ko Petelo, ʼi tana kua tui papau ʼaē ko Sesu ʼo Nasaleti ʼe ko te Tagata Fakanofo ʼa te ʼAtua. Neʼe tui mo Filipo pea neʼe ina kumi tona kaumeʼa ko Natanaele, ʼo ina ʼui fēnei age: “Kua matou maʼu ia ia ʼaē neʼe faitohi ia Moisese ʼo ʼuhiga mo ia ʼi te Lao, pea mo te kau Polofetā, ko Sesu foha ʼo Sosefo, mai Nasaleti.”—Soa. 1:40, 41, 45.
2 ʼE kotou tui papau koa mo koutou ko Sesu ʼe ko te Mēsia ʼaē neʼe fakapapauʼi mai, te ‘Tupuʼaga tāfito ʼo te haofaki’? (Hep. 2:10) Ko te ʼu tisipulo ʼa Sesu ʼo te ʼuluaki sēkulō neʼe kua ʼi ai tanatou ʼu fakamoʼoni ko Sesu ʼe ko te Mēsia. Kae iā ʼaho nei, kua lahi age ia te ʼu fakamoʼoni kua tou maʼu ʼo ʼuhiga mo te faʼahi ʼaia. Talu mai te tupu ake ʼo Sesu ʼo aʼu ki tona fakatuʼuake, ko te Folafola ʼa te ʼAtua ʼe ina fakahā fakalelei mai neʼe ko ia ko Kilisito. (Lau ia Soane 20:30, 31.) ʼE toe fakahā mai ʼi te Tohi-Tapu, mai te lagi ʼe hoko atu pē anai e Sesu ia tana ʼu gāue ʼi tona ʼuhiga Mēsia. (Soa. 6:40; lau ia 1 Kolonito 15:22.) ʼO mulimuli pē ki te ʼu meʼa kua kotou ako mai te Tohi-Tapu, ʼe feala pē mo koutou, ke kotou ʼui ʼi te temi nei kua kotou “maʼu te Mēsia.” Kae tou vakaʼi age muʼa, pe neʼe feafeaʼi he fakamoʼoni ʼa te ʼu ʼuluaki tisipulo ʼaia neʼe kua natou maʼu ia te Mēsia.
Neʼe Fakahā Māmālie Ia Te “Meʼa Fakalilo Taputapu” ʼo ʼUhiga Mo Te Mēsia
3, 4. (a) Neʼe lava maʼu feafeaʼi e te ʼu tisipulo ʼo te ʼuluaki sēkulō ia “te Mēsia”? (b) He koʼē ʼe kotou ʼui anai ʼe gata pē kiā Sesu neʼe feala ke ina fakahoko ia te ʼu lea fakapolofetā fuli ʼo ʼuhiga mo te Mēsia?
3 He koʼē neʼe feala ke ʼui fakahagatonu e te ʼu tisipulo ʼa Sesu ʼo te ʼuluaki sēkulō neʼe ko ia te Mēsia? ʼAki te ʼu polofetā, neʼe fakahā māmālie e Sehova ia te ʼu fakaʼiloga ʼo ʼuhiga mo te haʼu ʼaē ʼa te Mēsia. Neʼe fakatatau e te tagata sivi Tohi-Tapu ia te ʼaluʼaga ʼaia ki he fakatahiʼi ʼo he fakatātā neʼe faʼu ʼaki he ʼu maka kehekehe. Kotou fakakaukauʼi age muʼa, ko he ʼu tagata e tokolahi neʼe mole heʼeki natou felāveʼi, neʼe natou tahi ʼaumai ki te koga fale ia te ʼu koga kehekehe ʼo te fakatātā maka ʼaia. Kapau ʼe fakatahiʼi te ʼu koga fuli ʼaia ke faʼu ʼaki he fakatātā, ʼe kotou ʼui pē anai neʼe lagi ʼi ai he tahi neʼe ina fasifasiʼi te fakatātā ʼaia pea neʼe ina momoli leva ia te ʼu koga kehekehe ʼaia ki te ʼu tagata ʼaē neʼe tou talanoa ki ai. Ohagē pē ko te ʼu koga kehekehe ʼaia ʼo te fakatātā, ko te ʼu lea fakapolofetā fuli ʼo ʼuhiga mo te Mēsia, ʼe ina foaki anai he ʼu fakamahino maʼuhiga ʼo ʼuhiga mo te Mēsia.
4 ʼE feala ʼapē ki he tagata e tahi ke ina hoʼi fakahoko fakafuanoa pē ia te ʼu lea fakapolofetā fuli ʼo ʼuhiga mo te Mēsia? Neʼe ʼui e te tagata fai kumi, ʼe faigataʼa ʼaupitō ia hata fakakaukauʼi age neʼe hoʼi fakahoko fakafuanoa pē e he tagata noa ia te ʼu lea fakapolofetā fuli ʼaia ʼo ʼuhiga mo te Mēsia, pea ʼi tona fakahagatonu ‘ ʼe mole pē feafeala ia.’ “Ko Sesu, pea neʼe gata pē mo ia ʼi te temi fuli neʼe tāu ke ina fakahoko te ʼu lea fakapolofetā ʼaia.”
5, 6. (a) ʼE hoko feafeaʼi anai ia te fakamāu ʼaē ʼo Satana? (b) Neʼe fakahā māmālie feafeaʼi e te ʼAtua ia te hōloga ʼaē ʼe hifo mai ai anai ia te “hako” ʼaē neʼe fakapapauʼi mai?
5 Ko te puani tāfito ʼo te ʼu lea fakapolofetā ʼo ʼuhiga mo te Mēsia, ʼe ko te “meʼa fakalilo taputapu” mo tona ʼu tuʼuga koga maʼuhiga. (Kol. 1:26, 27; Sen. 3:15) Neʼe kau ʼi te meʼa fakalilo taputapu ʼaia ia te fakamāu ʼo Satana te Tēvolo, ia “te gata olisinale,” ʼaē neʼe ina tuku te mālamanei ki te agahala pea mo te mate. (Fakh. 12:9) ʼE fakahoko feafeaʼi anai ia te fakamāu ʼaia? Neʼe fakakikite e Sehova ʼe fānauʼi anai e te “fafine” ia te “hako” ʼaē kā ina maumauʼi anai te ʼulu ʼo Satana. Ko te “hako” ʼaē neʼe fakakikite ʼe ina maumauʼi anai te ʼulu ʼo te gata, ʼo ina fakagata ai te tupuʼaga ʼo te agatuʼu, mo te mahaki, pea mo te mate. Kae ʼaki te fakagafua ʼa te ʼAtua, ʼe feala anai kiā Satana ke ina fai he lavea fakatātā ki te “hako” ʼo te fafine.
6 Neʼe fakahā māmālie e Sehova, pe ko ai anai ia te “hako” ʼaē neʼe fakapapauʼi mai. Neʼe fakapapau fēnei e te ʼAtua kiā Apalahamo: “ ʼAki tou hākoga ʼe tapuakina moʼoni ai anai te ʼatu puleʼaga fuli pē ʼo te kele.” (Sen. 22:18) Neʼe fakakikite e Moisese ʼe liliu anai ia Ia ʼaia, ʼe ko “he polofetā” ʼe lahi age anai ia iā Moisese. (Teu. 18:18, 19) Neʼe fakapapauʼi age kiā Tavite, pea ki muli age neʼe toe fakamoʼoni kiai ia te kau polofetā, ko te Mēsia ʼaia ʼe hifo mai anai mai tona hōloga, pea ʼe ina maʼu anai te hekaʼaga fakahau ʼo Tavite, ʼo talu ai.—2 Sam. 7:12, 16; Sel. 23:5, 6.
Te ʼu Fakamoʼoni Ko Sesu ʼe Ko Te Mēsia
7. Neʼe feafeaʼi te haʼu ʼaē ʼa Sesu mai te “ ʼohoana” ʼo te ʼAtua?
7 Neʼe fekauʼi mai e te ʼAtua ia tona ʼAlo, tana ʼuluaki fakatupu, mai Tana kautahi ʼi selō ʼaē ʼe fakatatau ki hona ʼohoana, ʼe ko ia te “hako” ʼaē neʼe fakapapauʼi mai. Neʼe tonu ai ki te ʼAlo ʼulu tokotahi ʼo te ʼAtua ke ina “meʼa noaʼi ia ia totonu” ʼo ʼuhiga mo tona maʼuli ʼaē ʼi selō pea ke hifo mai ʼo tupu tagata ʼi te kele. (Filp. 2:5-7; Soa. 1:14) ʼAki te ‘puipui’ ʼaē ʼo Malia e te laumālie māʼoniʼoni neʼe ko he fakamoʼoni ʼaia, ko te tamasiʼi ʼaē kā fānauʼi anai, “ ʼe fakahigoaʼi anai ʼe māʼoniʼoni, ʼAlo ʼo te ʼAtua.”—Luka 1:35.
8. Neʼe fakahoko feafeaʼi e Sesu ia te lea fakapolofetā ʼo ʼuhiga mo te Mēsia ʼi te temi ʼaē neʼe ʼalu ai ke papitemaʼi ʼi te vai?
8 Neʼe fakahā mai e te ʼu lea fakapolofetā ʼo ʼuhiga mo te Mēsia, peʼe tupu anai ʼifea pea ʼi te temi fea. Pea neʼe tupu ia Sesu ʼi Petelehemi ohagē pē ko tona fakakikite mai. (Mik. 5:2) ʼI te ʼuluaki sēkulō, neʼe lahi te ʼu fakaʼamu ʼa te kau Sutea ki te Mēsia. ʼI tanatou manatu ʼaē kua haʼu te Mēsia, ko ʼihi neʼe natou feʼekeʼaki fēnei ʼo ʼuhiga mo Soane Patita: “ ʼE ko ia ʼapē koa ia Kilisito?” Kae neʼe tali fēnei age e Soane: “ ʼE haʼu ia ia ʼaē ʼe mālohi age iā te au.” (Luka 3:15, 16) ʼI tana ʼalu ʼaē kiā Soane ʼi te fakaʼosi ʼo te taʼu 29 ʼo totatou temi, ke papitemaʼi ia ia ʼi tona taʼu 30, neʼe fakahā e Sesu totonu ko Ia te Mēsia ʼi tona temi totonu. (Tan. 9:25) Neʼe kamata ai leva e Sesu ia tana minisitelio neʼe lahi ai tana ʼu gāue neʼe ina fai, ʼo ina ʼui fēnei: “Ko te temi ʼaē neʼe fakakatofa kua iku, pea ko te puleʼaga ʼo te ʼAtua kua fakaovi mai.”—Mko 1:14, 15.
9. Logolā tanatou mole heʼeki mahino kātoa kiā meʼa fuli, kae koteā ʼaē neʼe tui papau kiai te ʼu tisipulo ʼa Sesu?
9 Kae ko te ʼu fakaʼamu ʼa te kau Sutea neʼe ʼaoga ke fakatonutonuʼi. Logolā neʼe tuha ke vikiʼi e te hahaʼi ia Sesu ko te Hau, kae ʼi te temi ʼaia neʼe mole natou mahino kātoa ko tana ʼafio ʼe hoki hoko anai ia ʼi te kā haʼu pea ʼe pule mai anai ia mai te lagi. (Soa. 12:12-16; 16:12, 13; Gāue 2:32-36) Kae ʼi te temi ʼaē neʼe fehuʼi fēnei ai e Sesu: “ ʼE kotou ʼui ko ai ia au?” Pea neʼe tali atu aipē e Petelo fēnei: “Ko koe ko Kilisito, te ʼAlo ʼo te ʼAtua maʼuli.” (Mat. 16:13-16) Neʼe toe tali fēia pē e Petelo ʼi te temi ʼaē neʼe situʼa ai ia te tokolahi mai iā te ia he neʼe natou tūkia ʼi tana ʼu palalau ʼaē neʼe ina fai.—Lau ia Soane 6:68, 69.
Tou Fakalogo Ki Te Mēsia
10. He koʼē neʼe fakahā lelei e Sehova ia te ʼaoga ʼaē ke tou fakalogo ki tona ʼAlo?
10 ʼI te lagi, ko te ʼAlo ʼulu tokotahi ʼo te ʼAtua neʼe ko he laumālie mālohi ʼaupitō. ʼI te kele, ko Sesu neʼe ko “te fakafofoga ʼa te Tamai.” (Soa. 16:27, 28) Neʼe ina ʼui fēnei: “Ko te ʼu meʼa ʼaē ʼe au akonaki ʼe mole ʼaʼaku ia, kae ʼe ʼa ia ʼaē neʼe ina fekauʼi mai au.” (Soa. 7:16) Moʼo fakamoʼoni ko Sesu ʼaē neʼe fakanofo ko te Mēsia ʼi te temi ʼaē neʼe hā ai ʼi tona kolōlia, neʼe fakatotonu fēnei e Sehova: “Kotou fakalogo kiā te ia.” (Luka 9:35) ʼEī, tou fakalogo ki te Tagata ʼaē neʼe Fakanofo e te ʼAtua. Ko he faʼahi ʼe fakamaʼua ke tou tui pea mo fai he ʼu gāue ʼe lelei: ʼe maʼuhiga tāfito ke leleiʼia tātou e te ʼAtua pea mo tou maʼu ia te maʼuli heʼegata.—Soa. 3:16, 35, 36.
11, 12. (a) Ko te ʼu tupuʼaga fea ʼaē neʼe mole tali ai e te kau Sutea ʼo te ʼuluaki sēkulō ia Sesu ko te Mēsia? (b) Ko ai ʼaē neʼe tui kiā Sesu?
11 Logolā te fakahā ʼaē e Sesu ia te ʼu fakamoʼoni fakatalakitupua neʼe ko ia te Mēsia, kae tokolahi te kau Sutea ʼo te ʼuluaki sēkulō neʼe mole natou tali ia ia ko te Mēsia. Koteā tona tupuʼaga? Koteʼuhi neʼe lahi ia tanatou ʼu manatu hala ʼo ʼuhiga mo te Mēsia, heʼe ʼi tanatou ia manatu ʼe ko ia anai ʼe ko he mēsia fakapolitike ʼe ina fakaʼāteaina anai nātou mai te pule mālohi ʼa te kau Loma. (Lau ia Soane 12:34.) Koia, neʼe mole feala hanatou tali ia te Mēsia ʼaē kā ina fakahoko ia te ʼu fakakikite ʼaē ʼe manukinuki anai, mo fehiʼaʼinaʼi e te hahaʼi, pea ʼe tonu ke fakamamahiʼi pea ke tau mo ia te mahaki, pea fakaʼosi leva ke matehi. (Isa. 53:3, 5) Māʼiapē lā mo ʼihi ʼi te ʼu tisipulo agatonu ʼa Sesu neʼe natou lotomamahi ʼi tana mole fakaʼāteaina nātou ʼi te faʼahi fakapolitike. Kae neʼe natou nonofo agatonu aipē, pea ʼaki te temi, neʼe foaki age kiā nātou te ʼatamai mālama totonu ʼo ʼuhiga mo te ʼu faʼahi fuli ʼaia.—Luka 24:21.
12 Ko te tahi tupuʼaga ʼo te mole tali e te hahaʼi ia Sesu ko te Mēsia, neʼe ko tana ʼu faiakonaki, he neʼe faigataʼa ʼaupitō kiā nātou hanatou tali. Ko te hū ki te Puleʼaga ʼe ina fakamaʼua ai ke natou ‘fakafisi kiā nātou totonu,’ ke natou “kai” te kakano ʼo Sesu pea mo ʼinu tona taʼataʼa, ke ‘toe tupu ake,’ pea ke “mole natou kau ʼi te mālamanei.” (Mko. 8:34; Soa. 3:3; 6:53; 17:14, 16) Ko te hahaʼi fiatuʼu, pea mo maʼu koloa, pea mo te kau mālualoi, kiā nātou ʼaia neʼe faigataʼa fau hanatou fakalogo ki te ʼu lēkula ʼaia. Kae ko te kau Sutea agavaivai neʼe natou tali ia Sesu ko te Mēsia, ohagē ko tona ʼui e ʼihi Samalitana: “Ko te tagata nei, ʼe ko te fakamaʼuli moʼoni ʼo te mālamanei.”—Soa. 4:25, 26, 41, 42; 7:31.
13. Neʼe hoko feafeaʼi kiā Sesu ia te lavea fakatātā ʼo te muliʼi vaʼe?
13 Neʼe fakakikite e Sesu, ʼe fakatūʼā anai ia ia e te kau pelepitelō pule pea mo tutuki ia ia ki te pou e te kau Senitile, kae ʼi te tolu ʼaho, ʼe toe fakatuʼuake anai ia. (Mat. 20:17-19) Ko tana fakahā ʼaē iā muʼa ʼo te Sanetualio neʼe ko ia “ia Kilisito te ʼAlo ʼo te ʼAtua,” neʼe fakaʼuhiga ko hana fasituʼu. (Mat. 26:63-66) Neʼe mole maʼu e Pilato ‘he meʼa iā Sesu ʼe fakamoʼoni ai ke matehi,’ kae ʼuhi he neʼe toe tukugākoviʼi e te kau Sutea ʼe ina fakatupu maveuveu, neʼe ‘tuku age ai leva e Pilato ia Sesu ke natou fai ia te meʼa ʼaē ʼe natou loto kiai.’ (Luka 23:13-15, 25) Koia, neʼe natou “fakafisi” ai kiā te ia pea mo natou fai he puleʼaki ke matehi “te Fakafofoga Tāfito ʼo Te Maʼuli,” logolā te ʼu fakamoʼoni ʼaē neʼe hā lelei ai ko ia ʼaē neʼe fekauʼi mai e te ʼAtua. (Gāue 3:13-15) Neʼe “toʼo” ia te Mēsia ohagē pē ko tona fakakikite mai, pea neʼe tutuki ia ki te pou ʼi te ʼAho ʼo Te Pāsikate ʼo te taʼu 33 ʼo totatou temi. (Tan. 9:26, 27; Gāue 2:22, 23) ʼAki tona mate fakamataku ʼaia, neʼe lavea ai te “muliʼi vaʼe” ohagē ko tona fakakikite ʼaē iā Senesi 3:15.
He Koʼē Neʼe Tonu Ke Mate Ia Te Mēsia?
14, 15. (a) Koteā te ʼu ʼaluʼaga e lua ʼaē neʼe fakagafua ai e Sehova ke mate ia Sesu? (b) Koteā ʼaē neʼe fai e Sesu ʼi tona ʼosi fakatuʼuake?
14 Neʼe tali e Sehova ke matehi ia Sesu, ʼuhi ko ʼaluʼaga maʼuhiga e lua. ʼUluaki, ko te nofo agatonu ʼa Sesu ʼo aʼu ki tona mate, neʼe ina fakatokatoka te faʼahi maʼuhiga ʼo te “meʼa fakalilo taputapu.” Neʼe ina fakahā lelei ia te ikuʼaga ʼaē ʼe feala ke aʼu kiai ia he tagata haohaoa moʼo taupau ia tana ‘pipiki ki te ʼAtua’ pea mo lagolago ki te pule faʼitaliha ʼa te ʼAtua logolā ia te ʼu ʼahiʼahi faigataʼa ʼaē ʼe feala ke fakahoko e Satana. (1 Tim. 3:16) Lua, ohagē ko tona ʼui e Sesu: “Ko te Foha ʼo te tagata, neʼe . . . haʼu . . . ke ina tauhi pea mo ina foaki tona nefesi moʼo totogi ʼaki ʼo te tokolahi.” (Mat. 20:28) Ko te ‘totogi ʼaia ʼe tatau’ neʼe ina totogi ʼaki te tūʼā ʼo te agahala ʼaē neʼe tuku holo mai e Atama ki tona hōloga, pea ʼaki te totogi ʼaia kua feala ai ke maʼu ia te maʼuli heʼegata e te hahaʼi fuli ʼaē ʼe natou tali ia Sesu, ia ia ʼaē neʼe fakaʼaogaʼi e te ʼAtua moʼo foaki mai ia te maʼuli kiā tātou.—1 Tim. 2:5, 6.
15 Hili ʼaho e tolu ki tona tuku ʼaē ʼi te faitoka, neʼe toe fakatuʼuake ia Kilisito, pea lolotoga ʼaho e fāgofulu neʼe ʼasi ki tana ʼu tisipulo, ʼo ina fakamoʼoni ai tana kua toe maʼuli ake pea mo ina toe foaki age ʼihi fakatotonu. (Gāue 1:3-5) Hili ʼaia pea neʼe hake ki selō iā muʼa ʼo Sehova moʼo foaki kiā Sehova te maʼuhiga ʼo tona sākilifisio pea mo fakatalitali ai ki te temi ʼaē kā kamata ai tana pule Fakamēsia. Lolotoga te temi ʼaia, neʼe lahi tana ʼu gāue neʼe ina fai.
Neʼe Ina Fakaʼosi Tana Gāue ʼi Tona ʼUhiga Mēsia
16, 17. Kotou fakamatala ia te gāue ʼa Sesu ʼi tona ʼuhiga Mēsia ʼi tana ʼosi hake ki selō.
16 Lolotoga te ʼu sēkulō pea talu mai tona fakatuʼuake, ʼe tokaga fakalelei ia Sesu ki te ʼu gāue ʼo te kōkelekāsio Fakakilisitiano ʼaē ʼe pule kiai ʼi tona ʼuhiga Hau. (Kol. 1:13) ʼI tona temi totonu, ʼe ina fakahoko anai tana gāue ʼi tona tuʼulaga Hau ʼi te Puleʼaga ʼo te ʼAtua. Ko te ʼu lea fakapolofetā ʼo te Tohi-Tapu pea mo te ʼu meʼa ʼaē ʼe hoko ʼi te mālamanei, ʼe natou fakamoʼoni ko tana ʼi henī ʼi tona ʼuhiga Hau neʼe kamata ʼi te taʼu 1914, pea neʼe kamata ai mo “te fakaʼosi ʼo te tuʼu ʼo te ʼu faʼahiga meʼa ʼaenī.” (Mat. 24:3; Fakh. 11:15) Mole faʼa fualoa kiai, pea neʼe ina taki ia te kau ʼāselo māʼoniʼoni ke natou kapu mai te lagi ia Satana pea mo tana kau temonio.—Fakh. 12:7-10.
17 Ko te gāue fai fakamafola pea mo te faiako ʼaē neʼe kamata e Sesu ʼi te taʼu 29 ʼo totatou temi ʼe kua fakaovi ki tona fakaʼosi. Kua vave pē anai tana fakamāu ia te hahaʼi fuli ʼe māʼuʼuli. ʼE ina ʼui ai anai ki te kau ovi ʼaē neʼe natou tali ia ia ʼaē neʼe fakaʼaogaʼi e Sehova moʼo haofaki nātou, ke natou “maʼu te puleʼaga ʼaē neʼe teuteuʼi maʼa [nātou] talu mai te kamataʼaga ʼo te mālamanei.” (Mat. 25:31-34, 41) Ko nātou ʼaē ʼe mole natou tali ia Sesu ko te Hau, ʼe fakaʼauha anai nātou ʼi te temi ʼaē kā taki ai e Sesu ia te kautau ʼo te lagi ke natou matehi ia te kau agakovi fuli. ʼOsi leva, pea haʼi anai e Sesu ia Satana pea mo lī ia ia mo tana kau temonio ki “te vanu.”—Fakh. 19:11-14; 20:1-3.
18, 19. Koteā ʼaē kā fai anai e Sesu moʼo fakahoko ia tana gāue ʼi tona ʼuhiga Mēsia, ʼo ina foaki ai teā ki te hahaʼi fakalogo?
18 Lolotoga te ʼAfio ʼa Kilisito Iā Taʼu e Afe, ʼe fakahoko kātoa anai e Sesu ia tona ʼu higoa fakatuʼulaga, ohagē ko “Fai Tokoni Taulekaleka, ʼAtua Mālohi, Tamai Heʼegata, ʼAliki ʼo te Tokalelei.” (Isa. 9:6, 7) ʼAki te takitaki ʼo tona Puleʼaga ʼe liliu anai te hahaʼi ʼo maʼuli haohaoa, ʼo kau ai mo nātou ʼaē kā ina fakatuʼuake mai te mate. (Soa. 5:26-29) Ko te Mēsia ʼe ina takitaki anai te hahaʼi ʼaē ʼe natou lotolelei ki te “u matapuna vai ʼo te maʼuli,” ʼo ina fakafealagia ai ki te hahaʼi fakalogo ke natou maʼu ia he ʼu felōgoi lelei mo Sehova. (Lau ia Fakahā 7:16, 17.) ʼI te kua hili leva ʼo te ʼahiʼahi fakaʼosi, ko te kau agatuʼu fuli, ʼo kau ai mo Satana mo tana kau temonio, ʼe “lī [anai nātou] ki te ʼano ʼo te afi,” ko te tataʼo ʼaia ʼo te ʼulu ʼo te “gata” ke mate ʼosi.—Fakh. 20:10.
19 ʼE ko he fakahoko taulekaleka pea mo kātoa e Sesu ia tana gāue ʼi tona ʼuhiga Mēsia! ʼE fonu kātoa anai ʼi te palatiso ia te hahaʼi neʼe kua totogi, ʼe natou māʼuʼuli anai ʼo heʼegata, pea ʼe natou haohaoa pea mo fiafia. Ko te huafa taputapu ʼo Sehova kua fakamaʼa kātoa mai te ʼu laukovi fuli, pea kua toe fakamoʼoni kātoa ia te faitotonu ʼo tana pule faʼitaliha. ʼE ko he kā haʼu taulekaleka kā maʼu anai e nātou fuli ʼaē ʼe fakalogo ki te Fakanofo ʼa te ʼAtua!
Kua Kotou Maʼu Koa Ia Te Mēsia?
20, 21. Koteā te ʼu tupuʼaga ʼaē ʼe tonu ai ke kotou fakamafola te Mēsia ki niʼihi?
20 Talu mai te taʼu 1914, kua tou māʼuʼuli nei ʼi te temi ʼo te parousia ʼa Kilisito, peʼe ko tana ʼi henī. Logolā ia te fakapulipuli ʼo tana ʼi henī ʼi tona ʼuhiga Hau ʼi te Puleʼaga ʼo te ʼAtua, kae ʼe hā lelei ʼaki te ʼu lea fakapolofetā ʼaē kua hoko. (Fakh. 6:2-8) Ohagē pē ko te kau Sutea ʼo te ʼuluaki sēkulō, tokolahi te hahaʼi iā ʼaho nei ʼe mole natou mahino ki te kua ʼi henī ʼa te Mēsia. Mo nātou foki ʼe natou loto ki he mēsia ʼe kau ki he ʼu meʼa fakapolitike peʼe ko he tahi ʼe ina fakahoko anai tana ʼu gāue ʼaki te kau takitaki politike ʼo te mālamanei. Kae kiā koutou ia, kua kotou mahino koutou ko Sesu kua ʼafio ʼi tona ʼuhiga Hau ʼi te Puleʼaga ʼo te ʼAtua. ʼE mole kotou fiafia koa lā ʼi takotou mahino ki te faʼahi ʼaia? Ohagē pē ko te ʼu tisipulo ʼo te ʼuluaki sēkulō, ʼe uga kotou ke kotou kalaga fēnei: “Kua mā maʼu ia te Mēsia.”
21 Iā ʼaho nei, kā kotou palalau ʼo ʼuhiga mo te moʼoni, ʼe kotou fakamaʼuhigaʼi koa te gāue ʼa Sesu ʼi tona ʼuhiga Mēsia? ʼI takotou fai ia te faʼahi ʼaia, ʼe kotou hikihiki ai anai tokotou loto fakafetaʼi ki te ʼu meʼa ʼaē kua ina fai maʼa koutou, mo ʼaē ʼe ina lolotoga fai, pea mo ʼaē kā ina fai anai. Ohagē ko Atelea pea mo Filipo, ʼe lagi kua kotou palalau ʼo ʼuhiga mo te Mēsia ki tokotou ʼu kāiga pea mo tokotou ʼu kaumeʼa. He koʼē ʼe mole kotou toe fakamafola kiā nātou ʼaki he lotomālohi pea mo fakahā age kiā nātou ko Sesu Kilisito ʼe ko ia moʼoni te Mēsia ʼaē neʼe fakapapauʼi mai, ko ia ʼaē neʼe fakaʼaogaʼi e te ʼAtua moʼo foaki mai ia te maʼuli?
ʼE Feala Koa Hakotou Fakamahino?
• Neʼe lava maʼu feafeaʼi e te ʼu tisipulo ʼo te ʼuluaki sēkulō ia te Mēsia?
• Koteā ia te ʼu tupuʼaga tāfito e lua ʼaē neʼe tonu ai ke mate ia Sesu?
• Koteā ʼaē kā toe fai anai e Sesu moʼo fakahoko tana gāue ʼi tona ʼuhiga Mēsia?
[Paki ʼo te pasina 21]
Neʼe lava feafeaʼi ki te hahaʼi ʼo te ʼuluaki sēkulō hanatou ʼiloʼi ko Sesu neʼe ko te Mēsia ʼaē neʼe fakapapauʼi mai?
[Paki ʼo te pasina 23]
Kā kotou palalau ki niʼihi, ʼe kotou fakamaʼuhigaʼi koa te gāue ʼaē neʼe fai e Sesu ʼi tona ʼuhiga Mēsia?