ʼE Maʼu Ai He ʼu Hisitolia Moʼoni

“Nee au . . . kumikumi lelei te u mea fuli talu mai te kamataaga.”—LUKA 1:3.

HE KO’Ē ʼE MAKEHE IA TE TOHI-TAPU? Ko te ʼu fāgana ʼe ko he ʼu fakamatala mālie ʼe mole maʼu ai te ʼu higoa ʼo te ʼu koga meʼa, mo te temi pea mo te ʼu higoa ʼo te ʼu hahaʼi ʼiloa ʼi te hisitolia. Kae ʼe lahi ia te ʼu fakamatala ʼo te hisitolia ʼi te Tohi-Tapu ʼe feala ke fakatui ai te kau lautohi ki te “moʼoni tukupau ʼo [tana] folafola.”—Pesalemo 119:160, The Psalms for Today, neʼe tohi e R. K. Harrison.

HE FAʼIFAʼITAKI: ʼE ʼui ʼi te Tohi-Tapu, neʼe ʼave pōpula ia Sosakini te Hau ʼo Suta ki Papilone e Nepukatenesale te hau ʼo Papilone. Ki muli age, “nee toe lagai leva e Evile-Melotake, hau o Papilone, i te uluaki tau o tana hau, te foi ulu o Sosakini, hau o Suta, o fakamavae ia ia mai te pilisoni.” Pea tahi, “nee tokaga tuumau leva te hau ki te u mea ae nee aoga kia ia [ia Sosakini] i te aho taki tahi o tona mauli katoa.”—2 Hau 24:11, 15; 25:27-30.

TE ʼU MAʼU MAI TE HAHAʼI FEKUMI: Neʼe maʼu e te hahaʼi fekumi ʼi te ʼu toega ʼo te kolo ʼo Papilone, ia te tonu fakapuleʼaga neʼe tohi ki te ʼipu kele ʼi te temi hau ʼo Nepukatenesale 2. Neʼe tuʼu ai ia te lisi ʼo te ʼu tokoni neʼe foaki ki te kau pilisoni pea mo nātou ʼaē neʼe gāue ki te fāmili hau. ʼE toe maʼu ai ia te higoa ʼo “Yaukin [Sosakini]” ʼaē neʼe ko te “hau ʼo te fenua ʼo Yahud (Suta)” pea mo ʼaē ʼo tona fāmili. Kae ʼe feafeaʼi ʼo ʼuhiga mo ia ʼaē neʼe hoa mai kiā Nepukatenesale ia Evile-Melotake? ʼE tou lau fēnei ʼi te fakaʼiloga neʼe fai ki te ʼipu kele neʼe maʼu ovi ki te kolo ʼo Suse: “Fale hau ʼo Amil-Marduk [ia Evile-Melotake], Hau ʼo Papilone, foha ʼo Nepukatenesale, Hau ʼo Papilone.”

KOTEĀ TAKOTOU MANATU? ʼE ʼi ai koa he tahi age tohi lotu ʼāfea ʼe totonu pea mo moʼoni ʼi te ʼu fakamatala ʼi te hisitolia, peʼe gata pē ia ki te Tohi-Tapu?

[Fakamatala ʼo te pāsina 5]

“Ko te ʼu fakamatala ʼaē ʼe tou maʼu ʼi te Tohi-Tapu ʼo ʼuhiga mo te temi pea mo te koga meʼa neʼe hoko ai he ʼu ʼaluʼaga ʼe totonu pea ʼe tuha mo te falala ʼi he tahi age ʼu tohi ʼāfea.”—A SCIENTIFIC INVESTIGATION OF THE OLD TESTAMENT, BY ROBERT D. WILSON

[Paki ʼo te pāsina 5]

Te tonu ʼo te puleʼaga papilone ʼaē ʼe tuʼu ai te higoa ʼo Sosakini, te hau ʼo Suta

[Haʼuʼaga ʼo te paki ʼo te pāsina 5]