ʼE Totonu ʼi Te Faʼahi Fakatōketā

“Pe nee mole au tohi kia koe ni tokoni mo ni fakakaukau, ke ako ai kia koe ni akonaki totonu mo ni palalau mooni, o tupu ke ke tali aki ni palalau mooni?”—TAAGA LEA 22:20, 21.

HE KO’Ē ʼE MAKEHE IA TE TOHI-TAPU? Neʼe lahi ia te ʼu manatu ʼe mole tuha mo te falala pea mo fakatupu tuʼutāmaki neʼe talanoa kiai ia te ʼu tohi ʼāfea neʼe fakatonutonuʼi e te ʼu tōketā ʼo te temi nei. Māʼia mo te temi ʼaenī, ʼe toe fakafoʼou e te ʼu tagata faitohi ia te ʼu manatu ʼo ʼanatou tohi ʼuhi ko te ʼu maʼu foʼou kua fai ʼi te temi nei. Kae ko te Tohi-Tapu ʼe haʼu ia mai te Tupuʼaga pea ko tana Folafola ʼe tuʼu ia “o heegata.”—1 Petelo 1:25.

HE FAʼIFAʼITAKI: Neʼe fakatotonu ʼi te Lao ʼaē neʼe foaki kiā Moisese ki te kau Iselaele ke natou ʼolo ki te tuʼa meʼa ʼi tuʼa atu “o te nofoaga.” (Tetelonome 23:12, 13) Kapau neʼe lave ia he Iselaele ki he sino peʼe ki he manu kua mate, pea neʼe maʼua ia ke fakamaʼa ia ia ʼi te vai. (Levitiko 11:27, 28; Numelo 19:14-16) Neʼe feala ke liliu mai he tagata neʼe kilia mai tana nofo kehe mo kapau neʼe fai kiai he vakaʼi mahaki ʼe fakamoʼoni ai kua mole tona mahaki naʼa pikisia ai he tahi.—Levitiko 13:1-8.

TE ʼU MAʼU MAI TE ʼU TŌKETĀ ʼO TE TEMI NEI: Ko he fale mamaʼo ʼe maʼa, mo te fanofano pea mo te tuku keheʼi ʼo he tahi ʼe mahaki ʼe ko he puleʼaki lelei moʼo tauʼi ʼo te mahaki. Kapau ʼe mole maʼu he ʼu lātelina peʼe ko he ʼu fale mamaʼo, pea koʼenī te fakalotomālohi ʼa te Centre américain d’épidémiologie: “ ʼE tonu ke tanu ia te faifekau ʼa he tahi pea mo vaha iā meta e 30 mai he matapuna vai.” ʼE fakatokagaʼi e te Organisation mondiale de la santé, kapau ʼe maʼu ʼi te ʼu fenua ia he ʼu fale mamaʼo ʼe maʼa, pea ʼe siʼisiʼi anai ia te mahaki ʼaē ko te liligi. Iā taʼu e 200 ki muʼa atu, neʼe tokagaʼi e te ʼu tōketā ʼuhi ko tanatou mole fanofano ʼi te hili ʼo tanatou fāfā ki he mate neʼe māhahaki ai ia te hahaʼi. ʼE toe ʼui e te Centre américain d’épidémiologie ʼo ʼuhiga mo te fanofano “ ʼe ko te puleʼaki pē ʼaia moʼo tāʼofi ia te feʼaveʼaki ʼo te ʼu mahaki.” Kae ʼe feafeaʼi ki te tuku keheʼi ʼo he tahi ʼe kilia peʼe ko he tahi age mahaki? Heʼeki faʼa fualoa, neʼe tala fēnei ʼi te sulunale (Saudi Medical Journal): “Mokā kamata mafola ia he taʼi mahaki, pea ko te tuku keheʼi ʼo te kau mahaki ʼe ko te puleʼaki lelei moʼo tāʼofi ia tana mafola.”

KOTEĀ TAKOTOU MANATU? ʼE ʼi ai koa he tahi age tohi taputapu ʼāfea ʼe totonu ʼi te faʼahi fakatōketā, peʼe gata pē ia ki te Tohi-Tapu?

[Fakamatala ʼo te pāsina 6]

“ ʼE feala pē ke tou punamaʼuli pea mo fakamoʼoni ki te lelei ʼo te ʼu tokoni ʼo ʼuhiga mo te aga maʼa ʼi te temi ʼo te Lao ʼa Moisese.”—MANUAL OF TROPICAL MEDICINE, BY DRS. ALDO CASTELLANI AND ALBERT J. CHALMERS