“E Au Fakatahi Mo Koutou”

“Ko te tokolahi ʼe natou ʼolo anai ʼi hē mo hē, pea ko te ʼatamai mālama moʼoni ʼe mahu anai.”—TAN. 12:4, MN.

KOTEĀ TAKOTOU TALI?

ʼI totatou temi, neʼe lava maʼu feafeaʼi e te hahaʼi “te ʼatamai mālama moʼoni”?

Neʼe liliu feafeaʼi ʼo “tokolahi” ia nātou ʼaē neʼe natou tali te moʼoni?

Neʼe feafeaʼi te “mahu” ʼo te ʼatamai mālama totonu?

1, 2. (1) ʼE tou ʼiloʼi feafeaʼi ʼe fakatahi Sesu mo tātou ʼi te temi nei pea mo te kā haʼu? (2) Ohagē ko tona tohi iā Taniela 12:4, MN, koteā ʼaē kā hoko mokā ako fakalelei anai e ʼihi ia te Tohi-Tapu?

KOTOU fakakaukauʼi age muʼa ʼe kua kotou ʼi te Palatiso. ʼI te ʼaho fuli, ʼe kotou ʼaʼala ake ai ʼaki he loto fiafia pea mo kotou fakaʼamu ke kamata lā takotou gāue. ʼE mole he koga ʼo tokotou sino ʼe mamahi. ʼE mole kei kotou mahaki. Kua lelei age takotou sio, mo takotou logo, mo takotou mamanu ki he meʼa, mo takotou logoʼi te ʼu meʼa ʼaē ʼe kotou fāfā kiai pea mo te kano lelei ʼo te meʼa kai. ʼE kotou mālohi ʼosi, mo kotou fiafia ʼi takotou gāue, mo lahi ʼakotou kaumeʼa, pea ʼe mole kei kotou toe tuʼania ki he meʼa. ʼE feala hakotou maʼu te ʼu lelei ʼaia ʼi te temi ʼaē kā puleʼi ai e te Puleʼaga ʼo te ʼAtua ia te kele. Ko totatou Hau ko Sesu Kilisito, ʼe ina foaki anai te ʼu lelei fuli ʼaia ki te mālamanei pea mo tokaga ke natou ʼiloʼi fuli ia Sehova.

² ʼI te temi ʼaia, ko te ʼAtua pea mo tona ʼAlo ʼe nā tokoni anai ki te kau agatonu ke natou akoʼi te hahaʼi ʼo ʼuhiga mo Sehova. Kae ʼi tona fakahagatonu, ʼi te temi fuli pē neʼe tokoni Sehova pea mo Sesu ki te kau Kilisitiano agatonu ke natou akoʼi te hahaʼi. ʼI muʼa ʼo tana hake ʼaē ki selō, neʼe ʼui fēnei e Sesu ki ʼana tisipulo: “E au fakatahi mo koutou.” Koia talu mai ai ʼe kei hoko atu pē tana tokoni kiā nātou. (Lau ia Mateo 28:19, 20.) Ke mālohi tatatou tui ki te fakapapau ʼaia ʼa Sesu, tou vakaʼi ia te lea fakapolofetā neʼe tohi e Taniela ʼi tana nofo ʼi Papilone, kua hili kiai taʼu e 2 500. Neʼe ina tohi fēnei ʼo ʼuhiga mo totatou temi: “Ko te tokolahi ʼe natou ʼolo anai ʼi hē mo hē, pea ko te ʼatamai mālama moʼoni ʼe mahu anai.” (Tan. 12:4, MN) Kua tou mahino ʼi te temi nei, ko te ʼui ʼaē ko te tokolahi ʼe natou “ ʼolo anai ʼi he mo he,” ko tona fakaʼuhiga ʼe natou ako fakalelei anai te Tohi-Tapu, pea ʼe natou maʼu anai te tapuakina taulekaleka ʼaē ko te ʼatamai mālama moʼoni, peʼe totonu, ʼo te Folafola ʼa te ʼAtua. ʼE toe ʼui e te lea fakapolofetā ʼaia ko “te ʼatamai mālama moʼoni ʼe mahu anai.” Ko tona fakaʼuhiga, ko nātou ʼaē kā natou maʼu te ʼatamai mālama ʼaia, ʼe natou fakamoʼoni anai kiai pea mo akoʼi leva te ʼu moʼoni ʼaia ki te hahaʼi. Pea ʼe feala anai ki te hahaʼi ʼi te ʼu potu fuli ʼo te kele ke natou ʼiloʼi ia te ʼu moʼoni ʼaia. Tou vakaʼi pe neʼe hoko feafeaʼi ia te lea fakapolofetā ʼaia. ʼE mālohi ai anai tatatou tui ʼaē ʼe fakatahi Sesu mo ʼana tisipulo ʼi te temi nei pea ʼe fakahoko anai e Sehova ʼana fakapapau fuli ʼo ʼuhiga mo te kā haʼu.

ʼE MAʼU E TE KAU KILISITIANO MOʼONI “TE ʼATAMAI MĀLAMA MOʼONI”

3. Koteā ʼaē neʼe hoko ʼi te ʼosi mate ʼa te kau ʼapositolo?

³ Ohagē ko tona fakakikite e te ʼapositolo ko Paulo, ko te aposetasia, peʼe ko te fakafisi ki te maʼuli Fakakilisitiano, neʼe kamata ʼi te ʼosi mate ʼa te kau ʼapositolo pea mo mafola fakavilivili ohagē ko he afi. (Gaue 20:28-30; 2 Tes. 2:1-3) Lolotoga ni taʼu e lauʼi teau, māʼiapē lā mo te hahaʼi ʼaē neʼe natou ʼui ko he kau Kilisitiano neʼe mole natou maʼu “te ʼatamai mālama moʼoni.” Neʼe ʼui e te kau takitaki lotu neʼe natou tui ki te Tohi-Tapu, kae neʼe natou akoʼi ki te hahaʼi “te u akonaki a te u temonio,” ʼaē ko he ʼu loi neʼe pātapāta ki te ʼAtua. (1 Tim. 4:1) Koia lā ʼaē neʼe mole ʼiloʼi ai e te tokolahi te moʼoni ʼo ʼuhiga mo te ʼAtua. Kae neʼe akoʼi age kiā nātou te ʼu loi, ohagē lā ko te ʼAtua ʼe ko he Tahitolu Tapu, ʼe maʼuli tuputupua te nefesi, pea ʼe tutu ʼihi ʼo heʼegata ʼi te ʼifeli.

4. Iā taʼu e 40 ʼi muʼa ʼo te kamata ʼo “te u aho fakamuli,” neʼe kamata kumi feafeaʼi e te kau Kilisitiano tokosiʼi ia te moʼoni ʼi te Tohi-Tapu?

⁴ Kae neʼe hoko te ʼu fetogi iā taʼu e 40 ʼi muʼa ʼo te kamata ʼo “te u aho fakamuli.” ʼI te kolo ko Pennsylvanie, ʼi Amelika, ko te kau Kilisitiano moʼoni tokosiʼi neʼe natou fakatahitahi moʼo ako fakalelei ia te Tohi-Tapu pea mo kumi ia te ʼatamai mālama moʼoni. (2 Tim. 3:1) Neʼe natou toʼo te higoa ʼaē ko Te Kau Ako ʼo Te Tohi-Tapu. Neʼe natou agavaivai pea mo fia fakahoko moʼoni ia te finegalo ʼo te ʼAtua. Neʼe mole ko te “kau poto mo te kau atamai” ʼaē neʼe ʼui e Sesu ʼe mole feafeala ke natou maʼu “te ʼatamai mālama moʼoni.” (Mat. 11:25) Ko Te Kau Ako ʼo Te Tohi-Tapu neʼe natou lau fakalelei te Tohi-Tapu, mo fai palalau kiai, mo metitāsio kiai pea mo natou faikole ke tokoni age te ʼAtua kiā nātou. Neʼe natou fakatatau te ʼu vaega ʼo te Tohi-Tapu pea mo ako te ʼu tohi ʼa te hahaʼi ʼaē neʼe natou kumi te moʼoni ʼi te Tohi-Tapu. ʼAki pē te temi, neʼe ʼiloʼi e Te Kau Ako ʼo te Tohi-Tapu te ʼu moʼoni ʼaē neʼe mole mahino kiai te hahaʼi tokolahi lolotoga ni taʼu e lauʼi teau.

5. He koʼē neʼe tā e Te Kau Ako ʼo Te Tohi-Tapu ia te ʼu kiʼi pepa lotu ʼaia?

⁵ Neʼe fiafia lahi Te Kau Ako ʼo Te Tohi-Tapu ʼi te ʼu meʼa ʼaē neʼe natou mahino kiai, kae neʼe mole natou liliu ai ʼo fiameʼalahi. Neʼe mahino kiā nātou neʼe tuʼu tuʼumaʼu pē te ʼu moʼoni ʼaia ʼi te Tohi-Tapu. Koia neʼe mole natou tala ai ki te hahaʼi neʼe natou maʼu he ʼu manatu foʼou. (1 Ko. 8:1) Kae neʼe natou tā te ʼu kiʼi pepa lotu kehekehe ʼe palalau ki te teolosia ʼo te temi muʼa (The Old Theology) moʼo tokoni ki te hahaʼi ke natou ako te ʼu moʼoni ʼi te Tohi-Tapu. ʼAki te ʼu ʼuluaki kiʼi pepa lotu ʼaia, neʼe tokoni ai ki te hahaʼi ke natou ako te Tohi-Tapu, ke feala ai hanatou liʼaki “te ʼu akonaki hala fuli ʼa te tagata” pea mo tali te ʼu akonaki moʼoni ʼa Sesu mo te kau ʼapositolo, peʼe ko “te teolosia ʼo te temi muʼa.”—The Old Theology, N° 1, ʼApelili 1889, pāsina 32.

6, 7. (1) Talu mai taʼu e teau tupu, koteā te ʼu moʼoni kua mahino kiai te kau Fakamoʼoni ʼa Sehova? (2) Ko te ʼu moʼoni fea kua kotou ʼiloʼi ʼe tupu ai takotou fiafia?

⁶ Talu mai taʼu e teau tupu, kua lahi te ʼu moʼoni fakatalakitupua kua mahino kiai te kau Fakamoʼoni ʼa Sehova.a Kā tou ako te ʼu moʼoni ʼaia, ʼe mole tou mālama pē ki he ʼu fakamatalatala. Kae ʼe tou ako he ʼu manatu fakafiafia ʼe hikihiki ai totatou maʼuli. ʼE tou fiafia ʼi tatatou maʼu te ʼu moʼoni ʼaia pea mo tou maʼu ai he ʼamanaki ki te kā haʼu. ʼE tokoni mai ke tou ʼiloʼi ia Sehova, totatou ʼAtua ʼofa pea mo mahino ki tona finegalo. ʼE fakamahino e te ʼu moʼoni ʼaia pe ko ai ia Sesu, mo te tupuʼaga ʼo tana haʼu ki te kele ʼo mate, pea koteā ʼaē ʼe ina fai ʼi te temi nei. ʼE tokoni mai te ʼu moʼoni maʼuhiga ʼaia ke tou mahino pe koʼē ʼe tuku e te ʼAtua ke hoholo atu te agakovi, pe koʼē ʼe tou mamate, pe tonu ke feafeaʼi ʼatatou faikole, pea mo feafeaʼi hatatou fiafia moʼoni.

⁷ Kua feala hatatou mahino ʼi te temi nei ki te ʼu lea fakapolofetā neʼe “taofi fakafufu” lolotoga he temi loaloaga, pea ʼe hoko ʼi te temi fakaʼosi ʼaenī. (Tan. 12:9) ʼE lahi te ʼu lea fakapolofetā ʼe tou maʼu ʼi te ʼu Evaselio pea mo te tohi ʼo Apokalipisi. Ohagē lā, ʼe tokoni mai Sehova ke tou ʼiloʼi te ʼu meʼa ʼaē neʼe hoko ʼi selō, neʼe mole feala hatatou sio kiai. Kua tou ʼiloʼi kua fakanofo hau Sesu, neʼe hoko te tau ʼi selō, pea neʼe lī ifo Satana ki te kele. (Apk. 12:7-12) ʼE toe tokoni mai te ʼAtua ke tou mahino ki te ʼu meʼa ʼe feala hatatou sio kiai. Kua tou mahino pe koʼē ʼe ʼi ai te tau, mo te mafuike, mo te mahaki, mo te hoge, pea he koʼē ʼe fai e te hahaʼi he ʼu meʼa ʼe kovi ʼo liliu ai totatou temi ko “he u temi faigataa.”—2 Tim. 3:1-5; Luka 21:10, 11.

8. Ko ai ʼaē neʼe ina fakafealagia mai ke tou mahino ki te moʼoni?

⁸ Neʼe ʼui fēnei e Sesu ki ʼana tisipulo: “Manuia te u mata e sio ki te u mea e kotou sio ki ai! Koteuhi e au ui atu kia koutou nee kaugamalie te u polofeta mo te u hau nee natou fakaamuamu ke sio ki te u mea e kotou sio ki ai, kae nee mole natou sio ki ai, pe ke natou logo ki te u mea e kotou logo ki ai, kae nee mole natou logo ki ai.” (Luka 10:23, 24) ʼE tou fiafia mo tātou iā ʼaho nei. ʼE ko Sehova ʼAtua ʼaē neʼe ina fakafealagia mai ke tou “sio” mo “logo,” peʼe ke tou mahino ki te moʼoni. ʼE lahi totatou loto fakafetaʼi ki tana fakaʼaogaʼi ia tona laumālie māʼoniʼoni, “te Palakeleto,” moʼo tokoni mai ke tou mahino kātoa ki te moʼoni! (Lau ia Soane 16:7, 13.) ʼE tonu ke mole galo kiā tātou ʼe maʼuhiga ʼaupitō te moʼoni pea ʼe tonu ke tou tokoni ki te hahaʼi ke natou ʼiloʼi te moʼoni ʼaia.

“TOKOLAHI” ʼE NATOU MAʼU “TE ʼATAMAI MĀLAMA MOʼONI”

9. Koteā te fakaafe neʼe fai ʼi Te Tule Leʼo Fakapilitānia ʼo ʼApelili 1881?

⁹ ʼI Te Tule Leʼo Fakapilitānia ʼo ʼApelili 1881, hili teitei taʼu e lua ʼi te ʼosi kamata tā ʼo te nusipepa ʼaia, neʼe ʼi ai te ʼalatike ko tona kupu tāfito “ ʼE Kumi Te ʼu Kaugā Fai Fakamafola e Toko 1 000.” ʼI te ʼalatike ʼaia, neʼe fakaafe nātou ʼaē neʼe feala hanatou foaki te vaelua ʼo tonatou temi peʼe laka age ki te fai fakamafola, ke natou liliu ko he kau fai fakamafola temi kātoa, peʼe ko he ʼu pioniē. Neʼe kole age kiā nātou ʼaia ke natou ʼolo ki te ʼu potu fuli pē ʼo kumi te kau Kilisitiano moʼoni ʼaē ʼe ʼoʼofa ki te ʼAtua kae mole heʼeki natou maʼu te ʼatamai mālama totonu, pea mo akoʼi kiā nātou te moʼoni ʼo ʼuhiga mo te ʼAtua pea mo te Tohi-Tapu.

10. Koteā ʼaē neʼe fia fai e te tokolahi ʼi tanatou ʼosi lau te fakaafe ʼaē ke maʼu he ʼu kaugā fai fakamafola e toko 1 000?

¹⁰ Neʼe fakaafe e Te Kau Ako ʼo Te Tohi-Tapu te hahaʼi ke natou fai fakamafola, he neʼe natou mahino ko te kau Kilisitiano moʼoni ʼe tonu ke natou fakamafola te logo lelei. ʼI te temi ʼaia, neʼe teitei pē ko te toko teau neʼe kau ki te ʼu fono ʼa Te Kau Ako ʼo Te Tohi-Tapu, koia neʼe mole natou ʼamanaki ʼe tali anai e te tokolahi te fakaafe ʼaia. Kae tokolahi neʼe natou lau he kiʼi pepa lotu peʼe ko he nusipepa, ʼo natou ʼiloʼi ai ko te moʼoni, pea neʼe natou fia tokoni ki te hahaʼi. Ohagē lā, ʼi te taʼu 1882, ko te tagata ʼo te kolo ʼo Lonitoni, ʼi Pilitānia, neʼe ina lau Te Tule Leʼo pea mo te kiʼi kaupepa ʼo Te Kau Ako ʼo Te Tohi-Tapu, pea neʼe ina tohi fēnei: “Fakalelei siʼi ʼokotou loto, kae ke kotou fakahā mai pe koteā ʼaē ʼe tonu ke au fakamafola pea mo tona faʼahiga fai, ke au fai ai te gāue lelei ʼaē ʼe loto e te ʼAtua ke fakahoko.”

11, 12. (1) Neʼe koteā te fakatuʼutuʼu ʼa te kau pioniē? (2) Neʼe fakatuʼu feafeaʼi e te kau pioniē he ʼu kōkelekāsio foʼou?

¹¹ ʼI te taʼu 1885, neʼe teitei ko te toko 300 kau pioniē. Neʼe hagē pē tanatou fakatuʼutuʼu ko tātou iā ʼaho nei, ʼaē ko te fai ʼo he ʼu tisipulo ʼa Sesu Kilisito. Kae ko tona faʼahiga fai neʼe kehekehe ia mo tātou. ʼI te agamāhani, ʼe tou ako te Tohi-Tapu mo he tahi lolotoga he temi. Pea ʼe tou fakaafe leva ia ia ke kau ki te ʼu fono ʼo te kōkelekāsio. Kae ʼi te temi muʼa, neʼe ako fakatahi te kau pioniē mo te kiʼi kūtuga. Neʼe natou tufa te ʼu tohi pea natou fakaafe te hahaʼi ʼaē neʼe fia logo ke natou fakatahi ke natou ako te Tohi-Tapu. Neʼe fakatuʼu ai e te kau pioniē te ʼu kōkelekāsio foʼou, neʼe higoa ko te ʼu kalasi.

¹² Ohagē lā, ʼi te taʼu 1907, neʼe kumi e te kau pioniē ʼi he kolo ia nātou ʼaē neʼe kua natou maʼu te ʼu tohi LʼAurore du Millénium.b Pea neʼe fakaafe nātou e te kau pioniē ki te fono ʼi te ʼAhotapu neʼe fai ʼi te loto fale ʼo he tahi neʼe fia logo. ʼI te ʼAhotapu ʼaho kātoa ʼaia, neʼe fai e he pioniē he akonaki neʼe talanoa ki te fakatuʼutuʼu ʼa te ʼAtua ʼo ʼuhiga mo te mālamanei. Pea ʼi te ʼAhotapu ʼaē neʼe hoa kiai, neʼe ina fakalotomālohiʼi nātou ʼaē neʼe kau kiai ke natou fakatahi tuʼumaʼu. ʼI te taʼu 1911, neʼe fetogi e te ʼu tehina ia te faʼahiga fai ʼo he ʼu tisipulo. Ko te toko nimagofulu-ma-valu ʼu tehina neʼe natou folau ʼi te ʼu potu kehekehe ʼo Amelika mo Kanata ʼo fai he ʼu akonaki. Neʼe natou tohi te ʼu higoa pea mo te ʼu tuʼasila ʼo nātou ʼaē neʼe natou fia logo mo kau ki te ʼu fono ʼaia. Pea neʼe natou fakatuʼutuʼu he ʼu kūtuga ʼi te ʼu hahaʼi ʼaia neʼe fia logo, ke natou fakatahi ʼi he ʼu loto fale. Neʼe natou fakatuʼu ai he ʼu kōkelekāsio foʼou. ʼI te taʼu 1914, neʼe ko kōkelekāsio e 1 200 ʼa Te Kau Ako ʼo Te Tohi-Tapu ʼi te kele kātoa.

13. ʼO ʼuhiga mo te gāue fai fakamafola, koteā ʼaē ʼe fakaofoofo kiā koutou?

¹³ Iā ʼaho nei, ʼe teitei pē ko kōkelekāsio e 109 400 ʼi te kele kātoa, pea ʼe teitei pē ko te ʼu tehina mo tuagaʼane e toko 895 800 ʼe natou pioniē. Ko te teitei toko valu miliona hahaʼi iā ʼaho nei kua natou tali “te ʼatamai mālama moʼoni” pea mo natou maʼuliʼi. (Lau ia Esaia 60:22.)c ʼE fakaofoofo ia te tuputupu ʼaia, he neʼe fakakikite e Sesu ʼe fehiʼa anai he hahaʼi tokolahi ki ʼana tisipulo. Neʼe ina ʼui ʼe fakatagaʼi anai nātou e te hahaʼi, mo pilisoniʼi nātou, pea mo matehi nātou. (Luka 21:12-17) Logolā te faiga ʼa Satana, mo ʼana kau temonio pea mo te hahaʼi tokolahi ke natou fakagata te gāue fai fakamafola, kae ʼe hoko atu pē te fai ʼa te hahaʼi ʼa Sehova ni tisipulo pea mo natou sio ai ki te ʼu fua taulekaleka. ʼE natou fai fakamafola nei ʼi “te malamanei katoa,” mai te ʼu potu vevela ki te ʼu potu momoko, ʼi te ʼu moʼuga, ʼi te ʼu toafa, ʼi te ʼu kolo lalahi, pea ʼi te ʼu koga meʼa ʼaē ʼe tokosiʼi ai te hahaʼi. (Mat. 24:14) Neʼe natou lava fakahoko te gāue ʼaia ʼaki pē te tokoni ʼa Sehova.

“ ʼE MAHU” TE ʼATAMAI MĀLAMA MOʼONI

14. ʼE mahu feafeaʼi ia te ʼatamai mālama moʼoni ʼaki ʼatatou tohi?

¹⁴ ʼE mahu te ʼatamai mālama moʼoni heʼe kua tokolahi nātou ʼaē ʼe natou fakamafola te logo lelei. ʼE toe mahu foki ʼuhi ko te ʼu tohi pea mo te ʼu nusipepa. ʼI Sūlio 1879, neʼe tā e Te Kau Ako ʼo Te Tohi-Tapu te ʼuluaki nusipepa ʼo Te Tule Leʼo. ʼI te temi ʼaia, ko tona higoa neʼe ko Te Tule Leʼo ʼo Sione, ʼe Ina Tala Te ʼi Henī ʼa Kilisito (Zion’s Watch Tower and Herald of Christ’s Presence). Neʼe lue e Te Kau Ako ʼo Te Tohi-Tapu te fale tā tohi moʼo tā ai nusipepa e 6 000 ʼo te ʼuluaki Tule Leʼo ʼaia ʼi te fakapilitānia. Neʼe hinoʼi te tehina ko Charles Taze Russell, ʼaē neʼe taʼu 27, ko ia ʼaē kā ina fakagafua te tā ʼo te ʼu nusipepa, pea mo te tahi age ʼu tehina fotufotuʼa e toko nima ke natou tohi tuʼumaʼu te ʼu ʼalatike ʼo Te Tule Leʼo. Iā ʼaho nei, ko Tule Leʼo e 42 182 000 ʼe tā iā lea e 195. ʼE ko te nusipepa ʼaia ʼaē ʼe lahi ʼaupitō tona tufa ʼi te kele kātoa, pea hoa kiai te nusipepa ʼaē ko te Réveillez-vous ! ʼE tou tā ia Réveillez-vous ! e 41 042 000 iā lea e 84. Pea ʼe teitei pē ko tohi pea mo Tohi-Tapu e 100 miliona ʼaē ʼe tā ʼi te taʼu fuli.

15. ʼE tou maʼu maifea te falā moʼo tā ʼaki ʼatatou tohi?

¹⁵ ʼE tou maʼu te falā moʼo fakahoko te gāue ʼaia mai te ʼu meʼa ʼofa neʼe foaki ʼaki he lotolelei. (Lau ia Mateo 10:8.) ʼE ʼofolele ai te hahaʼi ʼaē ʼe gāue ʼi te ʼu fale tā tohi, heʼe natou ʼiloʼi ʼe totogi kovi te ʼu masini, mo te pepa, mo te vai tohi pea mo te tahi ʼu meʼa gāue. ʼE ʼui e te tehina ʼaē ʼe kau iā nātou ʼaē ʼe natou toʼo te ʼu meʼa gāue ki te ʼu fale tā tohi ʼo te ʼu Petele, kā ʼaʼahi te Petele e te hahaʼi ʼaē ʼe ʼi ai ʼanatou matani gāue, ʼe natou punamaʼuli ʼi te ʼu gāue ʼaē ʼe feala ke fai ʼaki te ʼu meʼa ʼofa ʼaia. ʼE natou punamaʼuli ʼi tatatou lava totogi te ʼu masini ʼaia ʼaē ʼe tā ai te ʼatu tohi. Pea ʼe natou toe punamaʼuli ʼi tanatou sio ki he kau Petelite tūpulaga pea mo fiafia ʼi te gāue.

ʼE FONU ANAI TE KELE ʼI TE ʼATAMAI MĀLAMA ʼO TE ʼATUA

16. He koʼē neʼe loto e Sehova ke mahu “te ʼatamai mālama moʼoni”?

¹⁶ ʼE mahu “te ʼatamai mālama moʼoni” he neʼe loto e Sehova ke hoko te faʼahi ʼaenī: “Ke fakamauli te tagata fuli, pea ke natou kaku ki te iloi katoa o te mooni.” (1 Tim. 2:3, 4) ʼE loto e Sehova ke ʼiloʼi e te hahaʼi te moʼoni ke feala ai hana tali tanatou tauhi pea mo tapuakina nātou. ʼAki te gāue fai fakamafola, ʼe ina tānaki te kau fakanofo agatonu. ʼE ina toe tānaki mo he toe hahaʼi tokolahi, mai “te u puleaga fuli, mo te u faahiga fuli, mo te u hahai fuli, mo te u lea fuli,” ʼaē ʼe natou maʼu te ʼamanaki ke natou māʼuʼuli ʼo heʼegata ʼi te kele.—Apk. 7:9.

17. Koteā ʼaē ʼe hā ʼi te tuputupu ʼo te kau ʼatolasio moʼoni?

¹⁷ Iā taʼu e 130 neʼe tuputupu te kau ʼatolasio moʼoni ʼi te ʼu potu fuli ʼo te kele. ʼE hā lelei ʼi te tuputupu ʼaia, ko te ʼAtua pea mo Sesu Kilisito ʼaē kua fakanofo Hau, neʼe nā fakatahi tuʼumaʼu mo te ʼu kaugana ʼa Sehova ʼi te kele, ʼo nā takitaki, mo puipui, mo fakatuʼutuʼu tanatou gāue pea mo akoʼi nātou. Neʼe fakahoko e Sehova tana fakapapau ʼaē ke tokoni ki te tokolahi ke natou maʼu te moʼoni ʼi totatou temi, koia ʼe feala ai hatatou falala ʼe ina fakahoko anai ʼana fakapapau ʼo ʼuhiga mo te kā haʼu. “E fonu anai te kele katoa i te iloilo [peʼe ko te ʼatamai mālama ʼo ʼuhiga mo Sehova], o hage ko te fonu o te takele o te tai i te u vai ae e natou uufi ia ia.” (Esa. 11:9) Kotou fakakaukauʼi age muʼa te ʼu lelei anai kā maʼu e te mālamanei ʼi te temi ʼaia!

[ʼU nota]

[Paki ʼo te pāsina 14]

Ko Te Kau Ako ʼo Te Tohi-Tapu neʼe ko he hahaʼi agavaivai neʼe loto moʼoni ke natou fakahoko te finegalo ʼo te ʼAtua

[Paki ʼo te pāsina 15]

ʼE maʼuhiga kiā Sehova ʼakotou faiga moʼo fakamafola “te ʼatamai mālama moʼoni” ʼo te ʼAtua