Te ʼu Lelei ʼe Kotou Maʼu ʼi Te Lau ʼo Te Tohi-Tapu

1-3. Kotea te ʼu lelei ʼe tou maʼu mai tatatou lau te Tohi-Tapu pea mo tou maʼuliʼi?

NEʼE ui fenei e te tuagaʼane kua finematuʼa: “ ʼI te uhu fuli ʼe au fakafetaʼi kia Sehova ʼi tana tokoni mai ke au mahino ki te Tohi-Tapu.” Tatau aipe pe kua ina lau tuʼa 40 tupu ia te Tohi-Tapu, kaʼe ʼe kei ina lau pe. Neʼe tohi e te tuagaʼane kei finemui, ko tana lau te Tohi-Tapu neʼe tokoni kia ia ke ina iloʼi ko Sehova ʼe maʼuli moʼoni pea mo felogoʼi lelei mo ia. Neʼe ina ui fenei: “Neʼe heʼeki au fiafia feia ʼi toku maʼuli!”

² Neʼe akoʼi mai e te apositolo ko Petelo ʼe ʼaoga ke tou ʼoʼofa ki te moʼoni ʼo te Folafola ʼa te ʼAtua. (1 Pet. 2:2) Moka tou ako te Tohi-Tapu mo tou maʼuliʼi, ʼe feala ai ke tou maʼu he leʼo ʼo loto ʼe maʼa pea ke ʼi ai he ʼuhiga ʼo totatou maʼuli. ʼE toe feala ai ke tou fakakaumeʼa lelei mo natou ʼae ʼe ʼoʼofa pea mo tauhi ki te ʼAtua moʼoni. ʼE ko te ʼu tupuʼaga lelei ʼaia ke tou “fakafiafia i te lao a te Atua.” (Loma 7:22) Kotea te tahi ʼu lelei ʼe tou maʼu mai tatatou ako te Tohi-Tapu?

³ Kapau ʼe lahi te ʼu faʼahi ʼae ʼe kotou ako ʼo ʼuhiga mo Sehova mo tona ʼAlo, pea ʼe toe lahi ai anai tokotou ʼofa kia naua pea mo te hahaʼi. ʼAki takotou ako te Tohi-Tapu, ʼe kotou toe iloʼi ai peʼe haofaki feafeaʼi anai e te ʼAtua te kau faitotonu ʼi te temi ʼae ka ina fakaʼauha ai te kau agakovi. ʼE kotou maʼu mo he logo lelei ke kotou tala ki te hahaʼi ʼi takotou minisitelio. Pea ʼe feala ke kotou falala ʼe tokoni atu anai ia Sehova moka kotou ako ki ʼihi te ʼu meʼa ʼae neʼe kotou ako.

KOTOU LAU TE TOHI-TAPU PEA MO FAKAKAUKAU KI AI

4. Kotea te fakaʼuhiga ʼo te “metitasio” peʼe ko te lau leʼo veliveli ʼo te Tohi-Tapu?

⁴ ʼE loto e Sehova ke tou toʼo he temi ke tou fakakaukau pea mo mahino ki te ʼu faʼahi ʼae ʼe tou lau ʼi te Tohi-Tapu. Neʼe ina ui fenei kia Sosue: “Ke aua naa mamao mai tou gutu te tohi aeni o te lao; kae ke ke metitasio ki ai [pe ke lau leʼo veliveli] i te aho mo te pouli.” (Sos. 1:8; Pes. 1:2) Ko tona fakaʼuhiga koa ʼe tonu ke tou lau leʼo lahi peʼe leʼo veliveli te Tohi-Tapu katoa? Kailoa ia. Ko tona fakaʼuhiga ke kotou lau mamalie ke feala ai hakotou fakakaukauʼi te ʼu manatu ʼae ʼe kotou lau. ʼE tokoni atu anai te faʼahi ʼaia ke kotou tokagaʼi te ʼu vaega ʼae ʼe ʼaoga pea mo fakalotomalohi kia koutou. Moka kotou maʼu he manatu peʼe ko he fakamatala fakalotomalohi, pea kotou lau mamalie, lagi feala pe hakotou lau leʼo veliveli te ʼu kupu. ʼE feala ke malave moʼoni ai te ʼu manatu ʼae ʼe kotou lau ki tokotou loto. He ko ʼe ʼe maʼuhiga ke kotou fai te faʼahi ʼaia? Koteʼuhi kapau ʼe kotou mahino lelei ki te ʼu tokoni ʼa te ʼAtua, pea ʼe kotou fia maʼuliʼi anai.

5-7. Kotou tuku mai he ʼu faʼifaʼitaki ʼe ha ai ko te lau mamalie mo fakalelei ʼo te Folafola ʼa te ʼAtua ʼe feala ke tokoni atu ke kotou (1) fakalogo ki te ʼu lao ʼa te ʼAtua; (2) palalau lelei ki ʼihi; (3) falala kia Sehova maʼia ʼi te ʼu temi faigataʼa.

⁵ Moka tou lau te ʼu tohi ʼo te Tohi-Tapu ʼae ʼe faigataʼa kia tatou tatatou mahino ki ai, pea ʼe lagi ʼaoga ke tou lau mamalie pea mo fakalelei, ke feala ai hatatou fakakaukauʼi te ʼu manatu ʼae ʼe tou lau. Ohage la, ko he tehina tupulaga ʼe ina lau fakalelei te tohi ʼo Oseo. Pea ʼi te kapite 4, ʼi tana ʼosi lau te vaega 11 ki te 13 ʼe ʼai leva tana kiʼi tuʼu moʼo fakakaukau ki ai. (Lau ia Oseo 4:11-13.) He ko ʼe neʼe ina tokagaʼi te ʼu vaega ʼaia? He mole faʼa fualoa ki ai, neʼe fakaneke ia ia ʼi te fale ako ke ina fai he ʼu aga heʼe ʼaoga. Kaʼe ʼi tana fakakaukau ki te ʼu vaega ʼaia, ʼe manatu fenei: “ ʼE sio Sehova ki te ʼu aga ʼe kovi ʼae ʼe fai e te hahaʼi maʼia pe natou to tokotahi. ʼE mole au fia fakamamahiʼi ia ia.” ʼE fai e te tehina te tonu ʼae ke tokaga ʼo fakalogo ki te ʼu lao ʼa Sehova ʼo ʼuhiga mo te aga ʼae ʼe tonu ke fai.

⁶ ʼI te lua faʼifaʼitaki ʼaeni, ko he tuagaʼane ʼe ina lau fakalelei te tohi ʼo Soele pea ʼe aʼu leva ki te kapite 2, vaega 13. (Lau ia Soele 2:13.) ʼAki te vaega ʼaia, ʼe mahino leva kia ia ʼe tonu ke ina faʼifaʼitakiʼi ia Sehova, koteʼuhi “e agalelei ia ia mo manavaofa, e kataki fualoa ia ia mo fonu i te agalelei.” ʼE ina fai te tonu ʼae ke ina fai he ʼu fetogi koteʼuhi ʼi ʼihi temi ʼe ina fai te ʼu palalau fakatupu mamahi mo fakaita ki tona ʼohoana pea mo ʼihi atu.

⁷ ʼI te tolu faʼifaʼitaki ʼaeni, ko he tehina kua ʼohoana mo maʼu fanau. ʼE mole kei gaue pea ʼe tuʼania peʼe feafeaʼi anai hana taupau tona famili. ʼE ina lau fakalelei te tohi ʼo Naume. Ia Naume 1:7, ʼe ina lau ai ko Sehova ʼe ina iloʼi natou ʼae ʼe falala kia te ia pea ʼe ina puipui anai natou “i te aho o te mamahi.” ʼE tokoni te vaega ʼaia ki te tehina ke mahino ko Sehova ʼe ʼofa kia ia mo tona famili, pea ʼi te temi leva ʼaia ʼe mole kei tuʼania fau. Pea ʼe ina lau fakalelei ia Naume 2:1. (Lau.) ʼE mahino kia ia ʼe feala hana fakaha tana falala ʼae kia Sehova ʼaki tana fakamafola te logo lelei, maʼia ʼi te ʼu temi faigataʼa. Koia ʼe ina haga kumi pe anai hana gaue, kaʼe ʼe ina fakaʼaoga lahi anai tona temi ʼi te vahaʼa ki te faifakamafola.

8. Kotou fakamatala fakanounou he faʼahi neʼe kotou ako ʼi takotou lau te Tohi-Tapu.

⁸ Ko te ʼu manatu ʼaoga ʼae neʼe hoki tou talanoa ki ai, ʼe maʼu ʼi te ʼu tohi ʼo te Tohi-Tapu ʼae ʼe faigataʼa ki ʼihi tanatou mahino ki ai. Kaʼe moka kotou maʼu ni vaega fakalotomalohi ʼi te ʼu tohi ʼaia, pea ʼe kotou fia hoko atu anai takotou lautohi. ʼE feala ke tou maʼu ai he lotofimalie mo te poto. ʼE toe feia mo te ʼu tohi fuli ʼo te Tohi-Tapu. Ko te Folafola ʼa te ʼAtua ʼe hage ko he lameni ʼe tanu loloto ai ia he ʼu taimane. Koia lolotoga takotou lau ia te Tohi-Tapu katoa, kotou faiga ke kotou maʼu te ʼu “taimane” ʼaia, ʼae ko te takitaki ʼa te ʼAtua pea mo te fakalotofimalie ʼae ʼe maʼu ai!

KOTOU FAIGA MALOHI KE KOTOU MAHINO KI TE ʼU MANATU ʼAE ʼE KOTOU LAU

9. Kotea ʼae ʼe feala ke tou fai ke tou mahino lelei age ki te Tohi-Tapu?

⁹ ʼE maʼuhiga ke kotou lau ia te Tohi-Tapu ʼi te ʼaho fuli. Kaʼe ʼe tonu foki ke kotou mahino ki te ʼu manatu ʼae ʼe kotou lau. Koia kotou fai he ʼu fekumi ʼi ʼatatou tohi ke kotou maʼu he ʼu fakamahino ʼo ʼuhiga mo te hahaʼi, mo te ʼu koga meʼa pea mo te ʼu aluʼaga ʼae ʼe talanoa ki ai ʼi takotou lautohi. Kapau ʼe mole kotou faʼa iloʼi peʼe feafeaʼi hakotou maʼuliʼi he faʼahi ʼe kotou lau ʼi te Tohi-Tapu, pea ʼe feala ke kotou kole tokoni ki he tagata ʼafeā peʼe ki he tehina peʼe ko he tuagaʼane ʼe malohi ʼi te faʼahi fakalaumalie. ʼI te temi muʼa, neʼe ʼi ai te Kilisitiano neʼe ʼaoga ki ai he tokoni ke mahino lelei age ki te moʼoni. Neʼe ko Apolosio.

10, 11. (1) Ko ai ʼae neʼe tokoni kia Apolosio ke lelei age tana fakamafola te logo lelei? (2) Kotea te ako ʼe feala ke tou taʼofi mai te faʼifaʼitaki ʼo Apolosio? (Vakaʼi te fakamatala ʼae ʼe ʼatakai, “ ʼE Kotou Akoʼi Koa Te ʼu Fakamahino Foʼou Ki ʼIhi?”)

¹⁰ Ko Apolosio neʼe ko he Kilisitiano Sutea neʼe ina iloʼi lelei te Tohi-Tapu pea mo faʼafai ʼi te faifakamafola. ʼE ui ʼi te tohi ʼo Gaue neʼe faifakamafola ʼo ʼuhiga mo Sesu. Kaʼe neʼe mole iloʼi e Apolosio neʼe akoʼi e Sesu ki ʼana tisipulo he manatu foʼou ʼo ʼuhiga mo te papitema. Ko te taumatuʼa Kilisitiano ko Pelesila mo Akilasi neʼe nā logo ki te faiakonaki ʼa Apolosio ʼi Efeso, pea neʼe “na toe fakahinohino lelei leva kia ia te ala totonu o te Atua.” (Gaue 18:24-26) Neʼe ʼaoga feafeaʼi te faʼahi ʼaia kia Apolosio?

¹¹ Neʼe hoko atu te faifakamafola ʼa Apolosio ʼi te temi ʼae neʼe alu ai ki Akaia. Neʼe ina fakaʼaogaʼi te Tohi-Tapu moʼo fakamoʼoni ia muʼa ʼo te hahaʼi neʼe faihala te kau Sutea pea ko Sesu neʼe ko Kilisito. Neʼe tokoni kia natou ʼae neʼe tui ki te logo lelei. (Gaue 18:27, 28) ʼI tana kua mahino leva ki te fakaʼuhiga ʼo te papitema Fakakilisitiano, neʼe “aoga lahi” ia ia kia natou ʼae neʼe foʼofoʼou ke natou tuputupu ʼi te moʼoni. Kotea te ako ʼe feala ke tou taʼofi mai ai? ʼE feala ke tou faʼifaʼitakiʼi ia Apolosio ʼaki tatatou faiga malohi ke tou mahino ki te ʼu manatu ʼae ʼe tou lau ʼi te Tohi-Tapu. Kaʼe ʼe tonu foki ke tou tali ʼaki he agavaivai mo he loto fakafetaʼi te ʼu tokoni ʼaoga ʼae ʼe foaki mai ke lelei age tatatou faʼahiga faiako.

KOTOU FAKAʼAOGAʼI TE ʼU MEʼA ʼAE ʼE KOTOU AKO MOʼO TOKONI KI ʼIHI

12, 13. ʼE tou lava fakaʼaogaʼi lelei feafeaʼi te Tohi-Tapu moʼo tokoni ki he tahi ʼe ina ako te Tohi-Tapu ke tuputupu?

¹² Ohage ko Pelesila, mo Akilasi pea mo Apolosio, ʼe feala mo tatou ke tou tokoni ki ʼihi. ʼE kotou feafeaʼi anai moka kotou tokoni ki he tahi ʼe fia logo ki te logo lelei ke ina fai he ʼu fetogi ʼi tona maʼuli ke feala hana tuputupu ʼi te moʼoni? Pe ʼi tokotou ʼuhiga tagata ʼafeā, kotea ʼe kotou logoʼi moka fakamalō atu he Kilisitiano koteʼuhi neʼe kotou foaki ki ai he ʼu tokoni mai te Tohi-Tapu ʼi te temi ʼae neʼe tau ai mo he faigataʼaʼia? ʼE mahino ia ʼe tou fiafia moʼoni ʼi tatatou fakaʼaogaʼi ia te Tohi-Tapu moʼo tokoni ki ʼihi ke natou fai he ʼu fetogi ʼi tonatou maʼuli.a ʼE feafeaʼi hakotou lava fai te faʼahi ʼaia?

¹³ ʼI te temi ʼo Elia, tokolahi te kau Iselaele neʼe mole heʼeki natou filifili peʼe natou mulimuli anai ʼi te tauhi moʼoni peʼe ʼi te tauhi hala. Ko te faʼahi ʼae neʼe ui e Elia ki te kau Iselaele ʼaia ʼe feala ke tokoni ki he tahi ʼe ina ako te Tohi-Tapu kaʼe heʼeki ina fai te tonu ʼae ke tauhi kia Sehova. (Lau ia 1 Hau 18:21.) Pe ko he tahi ʼe fia logo ki te logo lelei ʼe lagi mataku naʼa valokiʼi ia ia e ʼona kaumeʼa peʼe ko tona famili ʼuhi ko tana ako te Tohi-Tapu. ʼE feala ke kotou tokoni ki ai ke ina fai te tonu ʼae ke tauhi kia Sehova ʼaki takotou fakaʼaogaʼi te ʼu palalau ʼae ia Esaia 51:12, 13.—Lau.

14. Kotea ʼae ka tokoni atu anai ke kotou manatuʼi te ʼu vaega Tohi-Tapu ke feala ai hakotou tokoni ki ʼihi?

¹⁴ ʼE lahi te ʼu manatu ʼi te Tohi-Tapu ʼe feala ke ina fakalotomalohiʼi, fakatonutonu peʼe fakamalohi tatou. Kaʼe ʼe lagi kotou feʼekeʼaki peʼe feafeaʼi anai hakotou iloʼi te ʼu vaega ʼae ʼe tonu ke kotou fakaʼaogaʼi ʼi te temi ʼae ʼe ʼaoga ai kia kotou. Kotou lau te Tohi-Tapu ʼi te ʼaho fuli, pea mo metitasio ki ai. ʼE kotou liliu ai anai ʼo iloʼi lelei age ia te Tohi-Tapu, pea ʼe feala kia Sehova ke ina fakaʼaogaʼi tona laumalie maʼoniʼoni moʼo tokoni atu ke kotou manatuʼi te ʼu faʼahi ʼae neʼe kotou lau.—Mko. 13:11; lau ia Soane 14:26.

15. Kotea ʼae ka tokoni atu anai ke kotou mahino lelei age ki te Folafola ʼa te ʼAtua?

¹⁵ Ohage ko te Hau ko Salomone, kotou kole kia Sehova ke ina foaki atu te poto. ʼE ʼaoga kia koutou ia te poto moʼo fakahoko takotou minisitelio pea mo ʼakotou gaue ʼi te kokelekasio. (2 Klk. 1:7-10) Kotou faʼifaʼitakiʼi te kau polofeta, ʼo kotou fai fakalelei ni fekumi ʼi te Folafola ʼa te ʼAtua. ʼE tokoni atu anai te faʼahi ʼaia ke kotou iloʼi te moʼoni ʼo ʼuhiga mo Sehova pea mo tona finegalo. (1 Pet. 1:10-12) Ko te apositolo ko Paulo neʼe ina ui kia Timoteo ke ina ako “te u folafola o te tui pea mo te akonaki lelei.” (1 Tim. 4:6) Kapau ʼe kotou haga ako te Tohi-Tapu, pea ʼe kotou mahino lelei age anai ki ai mo kotou iloʼi anai tona fakaʼaogaʼi moʼo tokoni ki ʼihi. Pea ʼe toe malohi age ai anai mo takotou tui.

KO TE LAU ʼO TE TOHI-TAPU ʼE INA PUIPUI TATOU

16. (1) Neʼe ʼaoga feafeaʼi ki te kau Pelea tanatou lau te Tohi-Tapu ʼi te ʼaho fuli? (2) He ko ʼe ʼe maʼuhiga kia tatou ke tou lau te Tohi-Tapu ʼi te ʼaho fuli?

¹⁶ Ko te kau Sutea ʼae neʼe maʼuʼuli ʼi te kolo ko Pelea neʼe natou lau fakalelei te Tohi-Tapu ʼi te ʼaho fuli. ʼI te faifakamafola ʼae ʼa Paulo kia natou, neʼe natou fakatatau te ʼu faʼahi ʼae neʼe ina ui pea mo te ʼu faʼahi ʼae neʼe natou iloʼi mai te Tohi-Tapu. Neʼe kauga malie leva natou ʼae “nee tui” he neʼe natou mahino ai neʼe moʼoni te faiakonaki ʼa Paulo. (Gaue 17:10-12) Ko te ako ʼe feala ke tou taʼofi mai ai ʼe ko te lau ʼo te Tohi-Tapu ʼi te ʼaho fuli ʼe lava tokoni mai ke malohi tatatou tui ʼae kia Sehova. ʼE tonu ke malohi tatatou tui mo kapau ʼe tou fia maʼuʼuli ʼi te malama foʼou ʼo te ʼAtua.—Hep. 11:1.

17, 18. (1) ʼE lava puipui feafeaʼi totatou loto e he tui malohi pea mo he ʼofa lahi? (2) ʼE puipui feafeaʼi tatou e te falala?

¹⁷ Neʼe fakamahino e Paulo ʼe ʼaoga kia tatou ia te tui, mo te ʼofa pea mo te falala. Neʼe ina ui fenei: “Kia tatou, ae e tou kau ki te aho, tou fakapotopoto, o tou kofu te kofu tau o te tui mo te ofa, pea tou too te puloga tau o te falala o te fakamauli.” (1 Tes. 5:8) Ko te kofu tau ʼe ko he kofu ukamea ʼe tui e he tagata solia moʼo puipui tona mafu. ʼI hona aluʼaga fakata ʼe toe ʼaoga ke puipui totatou loto. Kapau ʼe tui malohi he Kilisitiano ki te ʼu fakapapau ʼa te ʼAtua pea mo ʼofa lahi kia te ia mo ʼihi atu, ʼe ina puipui ai tona loto. ʼE faiga malohi anai ke ina maʼu tuʼumaʼu te ʼofa ʼo te ʼAtua.

¹⁸ Neʼe toe talanoa ia Paulo ki he puloga tau fakata ʼe ʼaoga ke tou ʼai. ʼE fakaʼuhiga ki “te falala o te fakamauli.” ʼI te temi muʼa, neʼe fakaʼaogaʼi e te kau solia te puloga tau moʼo puipui tonatou ʼulu. Moka tou falala malohi ki te fealagia ʼae ʼa Sehova ke ina haofaki tatou, pea ʼe puipui ai ʼatatou manatu. Kapau ʼe malohi tatatou falala pea ʼe feala ai ke tou tekeʼi te kau aposeta, ia natou ʼae ʼe fakafisi ki te maʼuli Fakakilisitiano, pea mo ʼanatou palalau kovi, ʼae ʼe feala ke mafola fakavilivili ʼi te kokelekasio ohage he mahaki. (2 Tim. 2:16-19) ʼE toe feala foki ʼaki tatatou falala ke tou maʼu te malohi ʼae ke mole tou fai he aga ʼe kovi.

ʼE TOKONI MAI ANAI TATATOU LAU TE TOHI-TAPU KE TOU HAO ʼI TE ʼU ʼAHO FAKAMULI

19, 20. He ko ʼe ʼe tou loto fakafetaʼi lahi ʼo ʼuhiga mo te Folafola ʼa te ʼAtua? ʼE feafeaʼi hatatou fakaha totatou loto fakafetaʼi ʼaia? (Vakaʼi te fakamatala ʼae ʼe ʼatakai, “[ʼE] Foaki Mai e Sehova Te Meʼa Pe ʼAe ʼe ʼAoga Kia Au.”)

¹⁹ Kua tau ovi pe te fakaʼosi ʼo te malama ʼaeni, koia ʼae ʼe tonu ai ke lahi age tatatou falala ki te Folafola ʼa Sehova. Ko te ʼu tokoni ʼae ʼe tou maʼu ai ʼe tokoni mai ke tou fakagata ʼatatou agamahani kovi pea ke tou tauʼi totatou holi ʼae ki te agahala. ʼE toe fakalotofimalie pea mo fakalotomalohiʼi tatou ke tou katakiʼi he ʼu ʼahiʼahi ʼe feala ke tou tau mo ia ʼuhi ko Satana mo tona malama. Ko te ʼu fakatotonu ʼi te Folafola ʼa Sehova ʼe tokoni mai anai ke tou nonofo ʼi te ala ʼo te maʼuli.

²⁰ ʼE ko te finegalo ʼo te ʼAtua “ke fakamauli te tagata fuli.” ʼE kau ai ʼana kaugana fuli pea mo natou ʼae ʼe fia logo moka tou faifakamafola pea mo akoʼi kia natou ia te logo lelei. Kaʼe ko natou ʼae ʼe fia hao ʼi te fakaʼosi ʼo te malama ʼaeni, ʼe tonu “ke natou kaku ki te iloi katoa o te mooni.” (1 Tim. 2:4) Koia ʼe tonu ke tou lau te Tohi-Tapu pea mo maʼuliʼi ʼana fakatotonu mo kapau ʼe tou fia hao ʼi te ʼu ʼaho fakamuli. Ko tatatou lau te Tohi-Tapu ʼi te ʼaho fuli ʼe ha ai totatou loto fakafetaʼi lahi ʼae ʼo ʼuhiga mo te Folafola ʼa Sehova.—Soa. 17:17.