Ke Fakamalohiʼi Pea Mo Puipui e Sehova Tokotou Maʼuli Fakataumatuʼa

1, 2. (1) He koʼe neʼe mole kei maʼu e te toko 24 000 kau Iselaele ia tonatou fakapale taulekaleka? (2) He koʼe ʼe maʼuhiga ia te fakamatala ʼaeni kia tatou?

ʼI MUʼA pe ʼo te hu ʼo te puleʼaga ʼo Iselaele ki te Kele ʼo Te Fakapapau, neʼe fai e te toko lauʼi hogofulu afe tagata ia he ʼu felaveʼi fakasino heʼe ʼaoga mo “te u taahine o Moape.” Koia neʼe mamate ai ia te toko 24 000 kau Iselaele. Neʼe kua fualoa ia tanatou atalitali pea neʼe kua natou vave maʼu pe ia tonatou tofiʼa. Kaʼe neʼe natou to ki te fakahala ʼo te ʼu felaveʼi fakasino heʼe ʼaoga, koia ʼae neʼe mole kei natou maʼu ai tonatou fakapale taulekaleka. ʼI meʼa fakaʼofaʼofa foki.—Numelo 25:1-5, 9.

² Neʼe tohi ia te faʼifaʼitaki fakaʼofaʼofa ʼaia “ko totatou akoi, ia tatou aeni kua kaku mai ki te fakaosi” ʼo te tuʼu ʼo te ʼu faʼahiga meʼa ʼaeni. (1 Kolinito 10:6-11) ʼE tou maʼuʼuli nei ʼi te fakaʼosi ʼo “te u aho fakamuli,” pea kua tou ʼamanaki hu ki te malama foʼou. (2 Timoteo 3:1; 2 Petelo 3:13) Kaʼe ko ʼihi kau atolasio ʼa Sehova, neʼe natou meʼa noaʼi te ʼu lekula ʼo ʼuhiga mo te aga ʼae ʼe tonu ke fai, pea neʼe natou to ki te fakahala ʼo te ʼu felaveʼi fakasino heʼe ʼaoga. ʼI te temi nei, ʼe natou tau mo te ʼu fua kovi ʼo ʼanatou aga. Pea kapau ʼe mole natou loto fakahemala, ʼe mole feala anai ke natou maʼuʼuli ʼo heʼe gata ʼi te Palatiso ʼi te kele.

3. He koʼe ʼe ʼaoga ia te takitaki mo te puipui ʼa Sehova ki te ʼu taumatuʼa? (Vakaʼi te ʼuluaki pāki.)

³ ʼE ʼaoga ki te ʼu taumatuʼa ia te takitaki pea mo te puipui ʼa Sehova ke natou haofaki ia tonatou maʼuli fakataumatuʼa, koteʼuhi ʼe holi fakavale ia te malama ki te ʼu felaveʼi fakasino. (Lau ia Pesalemo 127:1.) ʼI te alatike ʼaeni, ʼe tou talanoa anai pe lava puipui feafeaʼi e he taumatuʼa ia tonā maʼuli fakataumatuʼa. ʼE tonu ke nā puipui ʼonā loto, mo fakaovi ki te ʼAtua, mo kofuʼi te ʼuluagaaga foʼou, mo felogoʼi lelei pea mo nā fefakahokoʼaki te maʼua ʼo te maʼuli fakataumatuʼa.

KOTOU PUIPUI TOKOTOU LOTO

4. He koʼe neʼe fia fai e ʼihi Kilisitiano ia he aga heʼe ʼaoga?

⁴ ʼE feala feafeaʼi ki he Kilisitiano ke ina fia fai ia he aga heʼe ʼaoga? ʼI te agamahani, ʼe kamata ʼaki te ʼu mata. Neʼe fakamahino fenei e Sesu: “Ko ae e sio ki he fafine i he sio manumanu, kua tono ia ia mo te fafine aena i tona loto.” (Mateo 5:27, 28; 2 Petelo 2:14) Tokolahi ʼae neʼe natou fakahoko te ʼu aga heʼe ʼaoga, neʼe natou meʼa noaʼi te ʼu lekula ʼo ʼuhiga mo te aga ʼae ʼe tonu ke fai, ʼaki tanatou sioʼi ia te ʼu ʼata pea mo lau ia te ʼu tohi ʼe ʼasi ai te ʼu felaveʼi fakasino heʼe ʼaoga, peʼe natou sioʼi he ʼu meʼa fakalialia ʼi te Neti. Ko ʼihi neʼe natou sioʼi te ʼu kiʼi gaoʼi peʼe ko te ʼu polokalama televisio ʼae ʼe fakaha ai te ʼu aga heʼe ʼaoga. Pea ko ʼihi neʼe natou fale meʼe, pe neʼe natou mamata ki he ʼu tagata peʼe ki he ʼu fafine ʼe natou huʼi ʼonatou mutuʼi meʼa, pe neʼe natou olo ki he ʼu koga meʼa ʼe fai ai kia natou he ʼu fakaholoholo heʼe ʼaoga.

5. He koʼe ʼe ʼaoga ke tou puipui ia totatou loto?

⁵ Neʼe to ʼihi ki te fakahala, koteʼuhi neʼe natou kumi ia te ʼofa ʼo he tahi ʼi tuʼa atu ʼo tonatou ʼohoana. ʼE tou maʼuʼuli ʼi he malama ʼe mole lotololomi ai te hahaʼi pea ʼe natou fiafia ʼi te ʼu aga heʼe ʼaoga fuli pe. Pea ko totatou loto ʼe kakā mo kovi, koia ʼae ʼe faigafua ai hatatou manako ki he tahi ʼe mole ko tokita ʼohoana. (Lau ia Selemia 17:9, 10.) Neʼe ui fenei e Sesu: “ ʼE haʼu mai te loto te ʼu fakakaukau kovi, te ʼu fakapo, te ʼu tono, te ʼu faiaga.”—Mateo 15:19, MN.

6, 7. (1) Kotea ʼae ʼe feala ke hoko mo kapau ʼe tuputupu he ʼu holi ʼe kovi ʼi totatou loto? (2) ʼE lava feafeaʼi ke mole tou agahala kia Sehova?

⁶ Ka tuputupu he ʼu holi ʼe kovi ʼi te loto ʼo he foʼi toko lua ʼe nā femanakoʼaki, ʼe feala ai ke nā kamata faipalalau ki he ʼu faʼahi ʼe mole tonu ke nā palalau ki ai, gata pe ki tonā ʼu ʼohoana. Ki muli age, kua lahi ʼanā takuʼaki ʼae ke nā felaveʼi ai. Pea kua nā felaveʼi tuʼumaʼu pe, ʼo nā ui ʼe ko he faihala. ʼI te kua malohi ʼo tanā feʼofaʼofani, kua faigataʼa kia naua ia tanā fai te meʼa ʼae ʼe lelei. Pea ʼi te lahi ʼo ʼanā felogoʼi, kua faigataʼa tanā mavete, logo ai pe la ʼe nā iloʼi ʼe kovi te meʼa ʼae ʼe nā fai.—Taaga Lea 7:21, 22.

⁷ Pea kua galo kia naua ia te ʼu lekula ʼa Sehova ʼo ʼuhiga mo te aga ʼae ʼe tonu ke fai, ʼuhi ko te ʼu holi kovi ʼae ʼe nā maʼu mo ʼanā faipalalau ʼae ʼe mole lelei, ʼo nā fetapikiʼaki ai, mo feʼumaʼaki, mo fealaalaʼaki pea mo nā fefafaʼaki. Kaʼe ko te ʼu meʼa ʼaia ʼe nā fai, ʼe tonu pe ke nā fakahoko mo tonā ʼu ʼohoana. “Kua taki . . . mo fakaholoholoi” natou e tonatou holi totonu. Pea moka malohi ia te holi, ʼe nā fai ai he ʼu felaveʼi fakasino heʼe ʼaoga. (Sakopo 1:14, 15) ʼE fakaʼofaʼofa ia te aluʼaga ʼaia, koteʼuhi neʼe feala pe ke mole nā agahala, mo ka na pau la neʼe nā tuku ke fakamalohiʼi e Sehova ia tanā fakaʼapaʼapa ʼae ki te maʼuli fakataumatuʼa. Kaʼe ʼe lava fakaha feafeaʼi e he tahi ia te taʼi fakaʼapaʼapa ʼaia?

TOU HAGA FAKAOVI KI TE ʼATUA

8. Ko tatatou fakakaumeʼa ʼae mo Sehova, ʼe ina puipui feafeaʼi tatou mai te ʼu aga heʼe ʼaoga?

⁸ Lau ia Pesalemo 97:10. Ko tatatou fakakaumeʼa ʼae mo Sehova, ʼe feala ke ina puipui tatou mai te ʼu aga heʼe ʼaoga. Moka tou ako ʼo ʼuhiga mo ʼona kalitate fakatalakitupua, ʼe tou faiga ke tou “liliu ko te u faifaitaki o te Atua, ohage ko he u fanau ofaina; pea [tou] haele i te ofa.” Koia ʼe tou maʼu ai anai te malohi moʼo tekeʼi ia “te feauaki, mo te u mea uli fuli.” (Efeso 5:1-4) Pea ʼe gaue malohi ia te ʼu taumatuʼa ʼae ʼe natou mahino “e fakamaaui anai e te Atua ia natou e feauaki mo tono,” ke natou feagatonuʼaki.—Hepeleo 13:4.

9. (1) Neʼe lava nofo agatonu feafeaʼi ia Sosefo, logo la tona fakahalaʼi e te ʼohoana ʼo tona pule? (2) Kotea te ako ʼe feala ke tou taʼofi mai te faʼifaʼitaki ʼa Sosefo?

⁹ Ko ʼihi Kilisitiano, neʼe natou meʼa noaʼi te ʼu lekula ʼo ʼuhiga mo te aga ʼae ʼe tonu ke fai. Neʼe natou fakaʼaogaʼi tonatou temi mo ʼonatou kaugā gaue ʼae ʼe mole ko he kau Fakamoʼoni ʼi te ʼosi ʼo tonatou temi gaue. Neʼe toe fakahalaʼi ʼihi lolotoga tonatou temi gaue. Pea ko te aluʼaga ʼaia ʼae neʼe hoko ki te tupulaga ko Sosefo. Lolotoga tana gaue, neʼe ina iloʼi neʼe fia fai te ʼohoana ʼo tona pule kia ia. ʼI te ʼaho fuli, neʼe faigaʼi e te fafine ʼaia ke ina fakahalaʼi ia ia ke nā fai he ʼu felaveʼi fakasino heʼe ʼaoga. Ki muli age, “nee too leva e te fafine ia Sosefo i tona kofu, o ui kia ia: Momoe mo au!” Kaʼe neʼe fakafisi ki ai ia Sosefo pea neʼe hola. Neʼe maʼu feafeaʼi e Sosefo ia he malohi ke nofo agatonu ai? Koteʼuhi neʼe fakapapau ke ina puipui ia tana fakakaumeʼa ʼae mo te ʼAtua. Kua puli tana gaue pea neʼe pilisoniʼi, kaʼe neʼe tapuakinaʼi ia ia e Sehova. (Senesi 39:1-12; 41:38-43) Koia tatau aipe pe tou gaue, peʼe ko he faʼahi ʼe tou ʼi ai, ʼe ʼaoga ke tou tekeʼi te ʼu aluʼaga ʼae ʼe feala ai ke tou to ki te fakahala.

TOU KOFUʼI TE ʼULUAGAAGA FOʼOU

10. ʼE tokoni feafeaʼi te ʼuluagaaga foʼou ki te puipui ʼo he maʼuli fakataumatuʼa?

¹⁰ Ko te ʼuluagaaga foʼou ʼae “neʼe fakatupu ʼo mulimuli ki te finegalo ʼo te ʼAtua ʼi he faitotonu pea mo he agatonu moʼoni,” ʼe ina puipui anai ia he taumatuʼa ke ʼaua tanā fai ia he ʼu felaveʼi fakasino heʼe ʼaoga. (Efeso 4:24, MN) Moka tou kofuʼi ia te ʼuluagaaga foʼou, ʼe tou “tamatei” ai ʼotatou kogasino ʼaki tatatou tauʼi ia “te feauaki, mo te agafakalialia, mo te u holifakavale, mo te u holikovi, pea mo te manumanu.” (Lau ia Kolose 3:5, 6.) ʼI heni, ko te kupu “tamatei,” ko tona fakaʼuhiga, ʼe tonu ke tou faiga malohi ke tou tauʼi ia te ʼu holi heʼe ʼaoga. ʼE tou tekeʼi ai anai ia meʼa fuli ʼae ʼe feala ke tou maʼu ai he ʼu holi fakasino heʼemaʼa. (Sopo 31:1) Pea moka tou maʼuliʼi ia te ʼu lekula ʼa te ʼAtua, ʼe tou ako ai ke tou fehiʼa “ki te kovi” pea mo tou pipiki fakamalohi “ki te lelei.”—Loma 12:2, 9.

11. ʼE tologa feafeaʼi ia he maʼuli fakataumatuʼa ʼaki te ʼuluagaaga foʼou?

¹¹ Ka tou kofuʼi ia te ʼuluagaaga foʼou, ʼe tou faʼifaʼitakiʼi ai te ʼu kalitate ʼo Sehova. (Kolose 3:10) Pea moka fefakahaʼaki e he taumatuʼa ia “te manavaofa, mo te agalelei, mo te fakamalalo, mo te agavaivai, pea mo te kataki,” ʼe tologa ai anai tonā maʼuli fakataumatuʼa pea ʼe tapuakinaʼi anai naua e Sehova. (Kolose 3:12) ʼE nā toe logotahi foki moka ʼe nā tuku ke ‘pule i ʼonā loto te tokalelei o Kilisito.’ (Kolose 3:15) Pea ʼi tanā ‘feʼofamamahiʼaki,’ ʼe nā fetokagaʼaki ai anai pea mo fefakaʼapaʼapaʼaki.—Loma 12:10.

12. ʼI takotou manatu, kotea ia te ʼu kalitate ʼae ʼe maʼuhiga ke fiafia ai he maʼuli fakataumatuʼa?

¹² Neʼe fehuʼi ki he taumatuʼa pe kotea te ʼu kalitate ʼae neʼe tokoni age kia naua ke fiafia ai ia tonā maʼuli fakataumatuʼa. Neʼe ui fenei e te tagata ʼohoana ko Sid: “Ko te kalitate tafitō ʼae neʼe ma gaueʼi tuʼumaʼu, ʼe ko te ʼofa. Pea neʼe toe maʼuhiga foki kia maua ia te agamalu.” Neʼe manatu tahi ia tona ʼohoana ʼae ko Sonja mo ia, pea neʼe ina ui fenei: “ ʼE mahino ia, ko te agalelei ʼe ko he kalitate maʼuhiga. Pea neʼe ma toe faigaʼi ke ma fefakahaʼaki ia te agavaivai, logo la ʼe mole ko he meʼa ʼe faigafua tuʼumaʼu.”

KE KOTOU FELOGOʼI LELEI

13. Kotea ʼae ʼe ʼaoga ke tologa ai ia he maʼuli fakataumatuʼa, pea kotea tona tupuʼaga?

¹³ Ke feala hatatou taupau ke tologa ia totatou maʼuli fakataumatuʼa, ʼe lelei ke tou palalau ʼaki he agalelei ki totatou ʼohoana. Kaʼe meʼa fakaʼofaʼofa foki, he ʼe ko ʼihi taumatuʼa ʼe mole natou fepalalauʼaki mo he agafakaʼapaʼapa ohage ko tanatou fai mo te kau matapule, peʼe ko ʼanatou manu. ʼE feala ke vaivai mamalie ia te ʼu felogoʼi ʼa he taumatuʼa moka ʼe maʼu ʼi tonā maʼuli fakataumatuʼa ia “te lotokovi fuli pe, te ita fuape, mo te hauhau fuape, mo te vaake fuape” mo te lea kovi fuli pe. (Efeso 4:31) Pea ko te fatufatu mo te ʼu palalau manukinuki, ʼe ina maumauʼi anai he maʼuli fakataumatuʼa. Koia ʼe ʼaoga ke fakamalohiʼi e te ʼu taumatuʼa ʼanatou felogoʼi, ʼo natou fepalalauʼaki ʼaki te agalelei, mo te loto tokaga pea mo te manavaʼofa.—Efeso 4:32.

14. Kotea ʼae ʼe mole tonu ke tou fai?

¹⁴ ʼE ui ʼi te Tohi-Tapu, ʼe ʼi ai he “temi moʼo fakalogologo” ai. (Ekelesiasi 3:7, MN) ʼE mole fakaʼuhiga leva ke tuku ia tatatou palalau ki totatou ʼohoana, koteʼuhi ʼe maʼuhiga ia te faipalalau ki te fiafia ʼo te maʼuli fakataumatuʼa. ʼE ui fenei e te fafine ʼohoana ʼi Siamani: “ ʼI te ʼu aluʼaga ʼaia, ʼe feala ke lotomamahi ia tokotou hoa moka ʼe kotou nofo fakalogologo.” Pea ʼe ina toe ui fenei: “ ʼE mole faigafua tuʼumaʼu ia takita nofo fakalogologo ʼi he aluʼaga fakatupu ita. Kaʼe ʼe mole lelei hakita fakaha tokita ita ke kita logo fimalie ai. ʼOsi ʼaia, ʼe kotou fai he ʼu palalau ʼe mole kotou fakakaukauʼi, peʼe kotou fai he meʼa ʼe fakatupu lavea ki tokotou hoa, ʼo ʼaʼasili age ai ia tona kovi.” ʼE mole fakatokatoka e he taumatuʼa ʼonā fihifihia ʼaki hanā feleʼolalahiʼaki peʼe ʼaki hanā fefakaheheguʼaki. Kaʼe ʼe fakamalohiʼi e te ʼu taumatuʼa ia tonatou maʼuli fakataumatuʼa moka natou fakatokatoka fakavilivili ʼonatou tokakovi, pea ke mole natou ke ai.

15. ʼE lava fakamalohiʼi feafeaʼi e he ʼu felogoʼi lelei ia he maʼuli fakataumatuʼa?

¹⁵ ʼE feala ke kotou fakamalohiʼi tokotou maʼuli fakataumatuʼa, mo kapau ʼe kotou toʼo he temi ke kotou fevaevaeʼaki ʼakotou manatu pea mo te ʼu meʼa ʼae ʼe kotou logoʼi. ʼE maʼuhiga ia takotou faʼahiga fakaha ia he manatu, pea ʼe toe maʼuhiga mo te manatu ʼae ʼe kotou fakaha. Koia maʼia ʼi te ʼu aluʼaga faigataʼa, kotou faiga malohi ke kotou fakaʼaogaʼi he ʼu palalau ʼe lave lelei pea mo kotou fai ʼaki he agalelei. Pea ʼe faigafua age anai ki tokotou ʼohoana hana fagono atu. (Lau ia Kolose 4:6.) ʼE feala ke fakamalohiʼi e he taumatuʼa tonā maʼuli fakataumatuʼa ʼaki tanā felogoʼi lelei, ʼo nā fefoakiʼaki he ʼu palalau ʼe fakalotomalohi pea mo ʼaoga.—Efeso 4:29.

TOU FAKAHOKO TE MAʼUA FAKATAUMATUʼA

16, 17. He koʼe ʼe ʼaoga ia te fetokagaʼaki ʼi te ʼu meʼa ʼae ʼi te loto, pea mo te faʼahi ʼo te ʼu felaveʼi fakasino?

¹⁶ ʼE toe feala ke tologa ia he maʼuli fakataumatuʼa, mo kapau ʼe fakamuʼamuʼa e te ʼu taumatuʼa ia te ʼu meʼa ʼae ʼe ʼaoga ki ʼonatou ʼohoana. (Filipe 2:3, 4) Ko te ʼu tagata mo fafine ʼohoana, ʼe ʼaoga ke natou fetokagaʼaki ʼi te ʼu meʼa ʼae ʼi ʼonatou loto pea mo te faʼahi ʼo te ʼu felaveʼi fakasino.—Lau ia 1 Kolinito 7:3, 4.

¹⁷ Kaʼe meʼa fakaʼofaʼofa, he ʼe ko ʼihi tagata peʼe fafine ʼohoana ʼe mole natou fakaha tonatou ʼofa, peʼe mole natou fai ni felaveʼi fakasino mo tonatou ʼohoana. Pea ʼe ui e ʼihi hahaʼi tagata kapau ʼe natou agalelei ki ʼonatou ʼohoana, ʼe fakaʼuhiga leva ʼe natou vaivai. Kaʼe ʼe ui fenei ʼi te Tohi-Tapu: “Pea ko koutou, ʼu tagata ʼohoana, kotou faiga ke kotou lotomahino ki ʼokotou ʼohoana.” (1 Petelo 3:7, Parole vivante) ʼE ʼaoga ke mahino ia he tagata ʼohoana, ʼe mole gata ʼaki pe te maʼua fakataumatuʼa ʼi te ʼu felaveʼi fakasino. ʼE ʼaoga ke ʼofa pea mo agaʼofa ʼi te temi fuli. Pea ʼe mahino ia, ʼe loto lelei anai tona ʼohoana ke nā fai he ʼu felaveʼi fakasino. Moka ʼe nā fakaha ia te ʼofa mo te agaʼofa, ʼe faigafua age ai anai hanā fetokagaʼaki ʼi te ʼu meʼa ʼae ʼi ʼonā loto pea mo te faʼahi fakasino.

18. ʼE lava feafeaʼi ki he taumatuʼa ke nā fakamalohiʼi ʼanā felogoʼi?

¹⁸ ʼE moʼoni, ʼe mole he takuʼaki ke tou heʼe agatonu ai ki totatou ʼohoana. Kaʼe kapau ʼe mole agalelei ia he tagata peʼe ko he fafine ʼohoana, ʼe feala ai ki tona ʼohoana ke ina kumi ia te ʼofa ʼo he tahi kehe pea mo nā fai he ʼu felaveʼi fakasino. (Taaga Lea 5:18; Ekelesiasi 9:9) Koia ʼae neʼe tokoniʼi fenei ai te ʼu taumatuʼa ʼi te Tohi-Tapu: “Ke aua naa kolua fefakafisiaki ia kolua, gata pe mo kapau kua kolua loto tahi ki ai i he kii temi veliveli.” Kotea tona tupuʼaga? “Koteuhi naa fakahalai kolua e Satana i takolua mole kei faa tataofi.” (1 Kolinito 7:5) ʼE ko he meʼa fakaʼofaʼofa anai ki he taumatuʼa moka nā tuku ia Satana ke ina fakaʼaogaʼi tanā “mole kei faa tataofi,” pea ke tupu ʼaki ai he tono ʼa he tahi ia naua. ʼAki te foaki ʼo te maʼua fakataumatuʼa, ʼe mole tahi kumi pe e te taumatuʼa “te mea e aoga kia ia totonu, kae ki te mea e aoga kia natou ake ae.” ʼE nā fai te faʼahi ʼaia, koteʼuhi ʼe nā feʼofaʼofani, kaʼe ʼe mole ko he maʼua. Ka fefakahaʼaki e he taumatuʼa ia tonā ʼofa ʼi te faʼahi ʼo te ʼu felaveʼi fakasino, ʼe nā fakamalohiʼi ai ʼanā felogoʼi.—1 Kolinito 10:24.

KOTOU HAGA FAKAMALOHIʼI TOKOTOU MAʼULI FAKATAUMATUʼA

19. Kotea ʼae ʼe tonu ke tou fakatotonu malohi ke tou fai, pea kotea tona tupuʼaga?

¹⁹ Kua tou vave hu pe ki te malama foʼou. ʼI meʼa fakalotomamahi leva mo kapau ʼe tou to ki ʼotatou holi kovi, ohage ko te toko 24 000 kau Iselaele ʼi te toafa ʼo Moape. Hili te fakamatala ʼo te meʼa neʼe hoko, ʼe fakatokaga fenei mai ʼi te Tohi-Tapu: “Ko ae e manatu e tuu ia i oluga, ke tokoga ia naa higa.” (1 Kolinito 10:12) Moʼo fakamalohiʼi ia totatou maʼuli fakataumatuʼa, ʼe tonu ke tou nonofo agatonu kia Sehova pea mo totatou ʼohoana. (Mateo 19:5, 6) Koia ʼe maʼuhiga ai ʼi te temi nei ke tou “faiga ke mau [mai tatou] e [tou] maa mo hee mele i te tokalelei.”—2 Petelo 3:13, 14.