Moka Hoko He Tuʼutamaki Fakanatula

“Ko te meʼa ʼae neʼe matou ʼuluaki logoʼi, neʼe ko te lotomamahi ʼaupito. Neʼe maumau fuli ʼamatou meʼa ʼuhi ko te pela pea mo te hake ʼo te vai.” —Ko Andrew, ʼi Sierra Leone.

“Hili te afā, neʼe matou toe liliu ki tomatou ʼapi kae neʼe kua maumau. Neʼe matou punamaʼuli ʼosi. Neʼe tuʼu tuli ai toku ʼofafine ʼo tagi mamahi.” —Ko David, ʼi te ʼu Îles Vierges.

MO KAPAU neʼe ke hao mai he tuʼutamaki fakanatula, ʼe ke mahino lelei ki te ʼu meʼa ʼae neʼe logoʼi e natou ʼae neʼe tau mo te ʼu malaʼia ʼaia: neʼe natou punamaʼuli mo lotohoha mo tuʼania pea neʼe mole kei lelei tanatou moe. Tokolahi neʼe natou taʼomia mo ogosia ʼo puli ai tonatou fia maʼuʼuli.

Kapau neʼe puli fuli ʼou koloa ʼuhi ko he tuʼutamaki fakanatula, lagi neʼe mole ke lava ʼutakiʼi te lotohoha mo te tuʼania, ʼo ke manatu ai, ʼe mole kei ʼi ai he ʼuhiga ʼo tou maʼuli. Kae ʼe fakamahino mai ʼi te Tohi-Tapu ko tou maʼuli ʼe maʼuhiga pea ʼe ʼi ai he tupuʼaga moʼoni ke ke ʼamanaki ki he ka haʼu taulekaleka.

ʼE FOAKI MAI ʼI TE TOHI-TAPU HE ʼAMANAKI

ʼE ui fenei ia Ekelesiasi 7:8: “E lelei age te ikuaga o he mea i tona kamataaga.” Hili he tuʼutamaki fakanatula, kua fakaʼofaʼofa te maʼuli. Kae kapau ʼe ke faʼa kataki ʼo ke toe faʼufaʼu tou maʼuli, ʼe feala anai ke ke maʼu he fimalie.

Neʼe fakakikite ʼi te Tohi-Tapu te temi ʼae “e mole anai toe logo . . . ki te logoaa o ni tagi pea mo te logoaa o ni kalaga.” (Esaia 65:19) ʼE hoko moʼoni anai te ʼu palalau ʼaia moka liliu te kele ko he palatiso he kua pule te Puleʼaga ʼo te ʼAtua. (Pesalemo 37:11, 29) ʼE mole kei hoko anai ʼi he temi he tuʼutamaki fakanatula. ʼE mole kei tou tau anai mo he ʼu mamahi kehekehe fakasino peʼe ʼi totatou loto, koteʼuhi ʼe fakapapau mai e te ʼAtua Mafimafi: “ ʼE mole tou toe manatuʼi anai te ʼu meʼa ʼafeā, pea ko te ʼu meʼa ʼaia ʼe mole toe hake anai ki te loto.”—Esaia 65:17, MN.

Fakakaukau age muʼa: Neʼe fakatuʼutuʼu e te Tupuʼaga ke ina “foaki atu he ka haʼu pea mo he ʼamanaki”—he maʼuli tokalelei moka ʼafio te Puleʼaga haohaoa ʼo te ʼAtua. (Selemia 29:11, MN) Pea ko te logo lelei ʼaia ʼe tokoni atu koa ke ke mahino ʼe ʼi ai he ʼuhiga ʼo tou maʼuli? Neʼe ui fenei e Sally ʼae neʼe tou talanoa ki ai ʼi te ʼuluaki alatike: “Ka ke fakakaukau ki te ʼu meʼa taulekaleka ʼae ka vave fakahoko e te Puleʼaga ʼo te ʼAtua, ʼe tokoni lahi atu anai ke ke ʼutakiʼi te ʼu faigataʼaʼia ʼae ʼe ke tau mo ia.”

ʼE matou fakaafe koe ke ke ako te ʼu fakapapau ʼae ka fakahoko anai e te Puleʼaga ʼo te ʼAtua ʼo ʼuhiga mo te tagata. ʼE ke tui papau ai, logo la te ʼahiʼahi ʼae ʼe ke tau mo ia, ʼe ʼi ai he ʼuhiga moʼoni ʼo tou maʼuli pea ʼe pulihi anai ʼo talu ai te ʼu tuʼutamaki fakanatula. Kae ʼi te temi nei, ʼe foaki mai ʼi te Tohi-Tapu he ʼu tokoni moʼo tauʼi ʼo te ʼu mamahi ʼaia. Tou vakaʼi te ʼu tokoni ʼaia.

He ʼu Vaega Fakatohi-tapu ʼe ʼAoga

Ke feʼauga tau moe.

“E lelei age te fonu o te nima e tahi mo te malolo, i te fonu o te u nima lua mo te gaue pea mo te tuli o te matagi.”—Ekelesiasi 4:6.

ʼE ui e te ʼu hahaʼi sivi ka hoko he malaʼia: “ ʼE feala ke ʼasili kovi age te lotohoha ʼo he tahi mo kapau ʼe mole moe feʼauga.” Koia, ʼe ko he aga fakapotopoto ke ke malolo lelei.

Fakaha te ʼu meʼa ʼae ʼi tou loto.

“E fakavaivaii e te tuania te loto o te tagata, kae e fakapelepelei ia e he palalau ofa.” —Taaga Lea 12:25.

Palalau ki he tahi ʼo tou famili peʼe ki he kaumeʼa ʼe ke falala moʼoni ki ai. ʼE fagono lelei anai kia koe mo ina foaki atu he ʼu palalau fakalotomalohi mo he tokoni ʼe ʼaoga.a

Fakakaukau ki te ka haʼu taulekaleka.

“ ʼO mulimuli ki tana fakapapau [ʼa te ʼAtua], ʼe tou fakaatalitali ki he lagi foʼou mo he kele foʼou, pea ʼe maʼu ai anai te faitotonu.” —2 Petelo 3:13.

a Kapau ʼe lotohoha tuʼumaʼu he kilisitiano, ʼe lagi ʼaoga anai ke alu ki te toketa.