Ko Te Ako Takitokotahi—Ko He Faʼahi Ke Tou Tokakaga Kiai
1 Ko te ʼu faʼahi fea ʼaē ʼe nātou uga tatou ke tou tokakaga ki ai? ʼE tonu ke tou tokakaga mālohi ʼo fakatuputupu pea mo taupau maʼu he felogoi lelei mo Sehova. Ko te ako takitokotahi ʼe ko he koga maʼuhiga moʼo fakatuputupu ʼo te taʼi felogoi ʼaia. Ia ʼaho nei, tokosiʼi ia tatou ʼe nātou maʼu he ʼu fealagia ke nātou fakaʼaogaʼi he ʼu temi loaloaga moʼo metitasio pea mo ako takitokotahi. Kae, kapau ʼe mole tou lau tuʼumaʼu te Folafola ʼa te ʼAtua, ʼe feala ke tou vaivai ʼo mole feala ai hatatou mālohi moʼo tekeʼi ʼo te fakakaukau ʼa te mālama pea mo tana ʼu holi fakasino.
2 Tou Holi Mālohi Ki Te Folafola: ʼI te temi neʼe tou kamata ako ai te ʼu fakatuʼutuʼu ʼa te ʼAtua, e lagi neʼe tou loto ke lahi age tatatou mālama. Kae, ʼi te hili ʼo he kiʼi temi, kua lagi siʼisiʼi leva tatatou fia fai ki te meʼa kai fakalaumālie. E lagi ʼaoga ke tou “holi mālohi” ki te meʼa kai fakalaumālie. (1 Pe. 2:2) ʼE lava feafeaʼi koa hatatou fakatuputupu te faʼahiga loto ʼaia?
3 Ko te magoni ʼo te meʼa kai ʼaē ʼe tou leleiʼia ʼaupito ʼe ina fakatupu ia tatou he fia kai, koteʼuhi ʼe lave lelei kia tatou. Ko he ʼu temi nounou ʼaē ʼe tou fai ai tatatou ako takitokotahi, ʼe feala ke tatau tona lave kia tatou ʼi te faʼahi fakalaumālie. Ko tatatou maʼu ʼo he koga veliveli ʼo te ʼu meʼa kai fakalaumālie e lagi ʼe fakatupu ai hatatou ʼuakai ki he ʼu moʼoni ʼe loloto. Ko te loto fiafia ʼaē ʼe haʼu mai te mālama ʼo te Tohi-Tapu, ʼe feala ke ina fakaloto mālohiʼi tatou ke loloto tatatou ako te Folafola ʼa Sehova.
4 Koutou Fai He Polokalama ʼo ʼUhiga Mo Te Gāue ʼAē ʼe Lelei Age Kia Koutou: Ko ʼihi ʼe nātou fakatuʼutuʼu ke nātou fai tanatou ako takitokotahi ʼi te afiafi, kae ko ʼihi ʼe nātou leleiʼia tona fai fakanounou kae nātou fai tuʼumaʼu. Kapau ʼe koutou fakatokagaʼi ʼe lelei age takotou fai ʼi te uhu, ʼe feala hakotou fakatuʼutuʼu ke fai takotou ako ʼi muʼa ʼo takotou ʼinu kafe. Kapau ʼe koutou leleiʼia te afiafi, ʼe feala hakotou fakatuʼutuʼu ke fai takotou ako ia muʼa ʼo takotou momoe. Tatau aipe pe koteā takotou fakatuʼutuʼu, ko te meʼa tāfito ke koutou fai tuʼumaʼu takotou ako takitokotahi pea ke koutou mulimuli ki te polokalama ʼaē ʼe ʼaoga kia koutou.
5 Mokā fakaloto mālohiʼi tatou ke lahi age tatatou ako takitokotahi, e lagi ʼe tou ʼui fakavilivili anai kua katoa tatatou polokalama. Kae, ʼe ʼaoga ke tou agatonu ʼo ʼuhiga mo te temi ʼaē ʼe tou fakaʼaogaʼi. ʼE lahi koa te temi ʼe tou fakaʼaogaʼi ʼi te ʼaho fuli moʼo sioʼi ʼo te ʼu polokalama ʼaē ʼi te televisio? ʼE tou lotolelei koa ʼo sakilifisioʼi he ʼu meʼa ʼe tou loto kiai? Ko he sivi fakalelei ʼo te temi ʼaē ʼe tou fakaʼaogaʼi, ʼe ʼasi ai anai ʼi te ʼaho fuli te ʼu temi ʼe feala ke tou fakaʼaogaʼi moʼo fai ʼo tatatou ako takitokotahi.—Ef. 5:15, 16.
6 Ko te ako ʼo te Folafola ʼa te ʼAtua ʼe ʼaoga ke tou tokakaga kiai. Ko tatatou faiga ki he tahi age meʼa ʼi te temi ʼaē ʼe fai ai tatatou ako takitokotahi ʼe siʼisiʼi anai te ʼu tapuakina ʼe tou maʼu. Kapau ʼe tou māhani ʼi te fai ʼo tatatou ako mo kai ʼi te temi pe ʼaia, pe ko te fakalogo ki te lātio, peʼe ko te sioʼi ʼo te televisio, ʼe mole feala ke ʼalu tatatou fakakaukau ʼi te meʼa ʼaē ʼe tou ako. (1 Tim. 4:15) Koia ʼe ʼaoga ke tou fakamamaʼo mai te ʼu fakafiafia.—Vakaʼi te tohi Manuel pour l’École, ʼi te ʼu pasina 32 ki te 33.
7 Ko te ako pea mo te maʼuliʼi ʼo te ʼu tokoni ʼo te Tohi-Tapu ʼi te ʼaho fuli ʼe maʼuhiga, heʼe tou maʼu ai te taki ʼa Sehova. Koutou fakatuʼutuʼu ke lave ʼi tokotou loto te ʼu moʼoni ʼaē ʼe tuʼu ʼi te ʼu tohi. Koutou fakaʼaogaʼi te ʼu faigamālie fuli, tatau aipe peʼe nounou tokotou temi, ke feala hakotou lau, mo koutou toe vakaʼi, peʼe koutou metitasio ki te ʼu meʼa fakalaumālie.—Teu. 6:6-8; Kol. 1:9, 10.