Ko Te Kautahi ʼa Sehova ʼe Haʼele Ki Muʼa
1 ʼE tau te malamanei mo te ʼu fihifihia, kae ko te kautahi ʼa Sehova ʼe haʼele fakafiafia ia ki muʼa. ʼE tou punamaʼuli ʼi te tuputupu ʼo te hahaʼi ʼaē ʼe nātou fakavikiviki ia Sehova, ʼo toe feiā foki ki te laga ʼo te ʼu fale foʼou ʼo te ʼu filiale, ʼaē ʼe ʼaoga ki te faka mafola ʼo te ʼu meʼa kehekehe ʼo te Puleʼaga. ʼAki te polofeta ko Isaia, neʼe fakahā e Sehova ʼe ina fakavaveʼi anai te tuputupu ʼo te kau atolasio moʼoni ʼi totatou temi, ʼo liliu anai ko he puleʼaga mālohi ʼi te kele. (Is. 60:22) Ko te tupu foʼou ʼo te hahaʼi fai faka mafola neʼe maʼu ʼi te taʼu 1995 ko te toko 5 199 895, ʼe ko he fakamoʼoni ʼaia ʼo te tapuakina ʼa Sehova. Ko he ʼu ʼamanaki fakafiafia ʼo ʼuhiga mo te temi ka haʼu ʼe hā ʼi te ʼu ako Tohi-Tapu e 4 865 060 ʼaē ʼe fai nei ʼi te malamanei.
2 ʼI Niu-Kaletonia, neʼe tou fiafia ʼi te taʼu ʼaenī he neʼe tou maʼu te tupu ko te 8 ki te teau, te lahi ʼo te hahaʼi fai faka mafola, pea ʼi Sūlio neʼe maʼu ai te 1 570 pea mo te ʼu ako Tohi-Tapu e 1 625 ʼi Sūnio.
3 ʼE mahino ia, ko Sehova ʼaē neʼe ina fakahoko te tuputupu ʼaia. Kae neʼe tou maʼu te pilivilesio ʼi totatou fakaʼaogaʼi ko tana ʼu kaugā gāue. (1 Ko. 3:5-9) Ko te kautahi ʼa Sehova ʼe ko te kautahi pe ʼaia e tahi ʼe ina fakahoko te maʼua ʼaē neʼe fakatotonu e Sesu ʼaē ko te: fai faka mafola, te akoʼi ʼo te hahaʼi, pea mo te fai ʼo te ʼu tisipulo, ko tona faka ʼuhiga ke nātou liliu ko he ʼu hahaʼi ʼe nātou faʼifaʼitaki moʼoni kia Sesu Kilisito.—Mat. 28:19, 20.
4 Ke feala he mafola ʼo te gāue fai faka mafola ʼaia, neʼe laga te ʼu Petele foʼou pea mo te ʼu fale tā tohi ʼi te ʼu potu kehekehe ʼo te kele. Ko te faʼahi ʼaia ʼe ina faka fealagia ai te fakaliliu pea mo te tā ʼo te ʼu tohi faka Tohi-Tapu. ʼI te temi ʼaenī, ko te ʼu filiale ʼe fāgofulu tupu ʼe nātou fakatuʼutuʼu tanatou polokalama laga fale. Ko ʼihi filiale ʼe toe faka laulahi, ko ʼihi ʼe toe laga moʼo faka fealagia te tā ʼo te ʼu tohi faka Tohi-Tapu pea mo faka fealagia te tufa fakalelei ʼo te ʼu meʼa fakalaumālie ʼe ʼaoga ki te hahaʼi ʼa te ʼAtua. Neʼe uga e Sehova te loto ʼo tana kau kaugana ke nātou foaki he ʼu meʼa ʼe ʼaoga ki te tuputupu ʼaia, logope la te ʼu “temi faigataʼa” ʼaē ʼe tau mo te malamanei katoa.
5 Ko te laga fale ʼi Niu-Kaletonia: Ko totatou filiale kua ina fakahoko te polokalama laga fale maʼuhiga, ʼe faka fealagia ai kia tatou ke tou maʼu hotatou Fale Fakatahi foʼou pea mo te ʼu fale foʼou ʼo ʼuhiga mo te filiale.
— Ko te fale fakatahi ʼo Normandie: Ko te laga fale foʼou ʼaia ʼe kau anai kiai te ʼu fale fono lalahi e tolu, ke feala ai te fakatahitahi ʼa te ʼu kokelekasio e 5 ʼo Niumea. Ko te fale fakatahi ʼaia ʼe tonu ke fakaʼosi pea mo fakaʼaogaʼi ʼi te fakaʼosi ʼo te taʼu ʼaenī. ʼE vaheʼi anai te ʼu fale ʼo te Puleʼaga e te ʼu pano ʼe nātou faka fealagia ke mole logoʼi te logoaʼa pea ko te ʼu pano ʼaia ʼe faigafua tona ʼai pea mo tona toe toʼo. Mokā hoko anai he fakatahi, pea ʼe toʼo anai te ʼu pano ʼaia, ʼo faka fealagia ai ki te ʼu fale ʼaia e tolu ke fakaʼaogaʼi ʼi te moʼi temi pe e tahi. Ko te faʼahiga faʼu ʼo te ʼu fakaheketālaʼa, ʼe faka fealagia anai ki ʼihi hahaʼi ke nātou nonofo ai ʼo mulimuli ki te fakatahi. ʼE feala anai ke fakatahitahi ai he toko 3 000 hahaʼi ki he fakatahi e tahi. Ko te taulaga motokā ʼe feʼauga noa anai ki te ʼu kokelekasio e tolu ʼaē ka nātou fakaʼaogaʼi te ʼu Fale ʼo te Puleʼaga, pea ʼi te ʼu fakatahi lalahi, ʼe lahi anai te ʼu faʼahi moʼo tau ʼo te ʼu motokā, ʼo feala ai anai ki te ʼu motokā fuli ke tau ʼi ai. ʼE fakatuʼutuʼu e te minisipalite ke ina fai he ala lahi ʼi muʼa pe ʼo totatou fale fakatahi, pea mo te ala ʼe magafa, ʼo faigafua ai te feʼaluʼaki ʼa te ʼu motokā ʼi te ala. Ko te fale fakatahi ʼe maʼu ai anai he tahi ʼu koga fale ke feala ai te fai ʼo he ʼu ako tohi ʼi te temi pe e tahi.
— Ko te Petele foʼou ʼo Normandie: ʼI te taʼu 1990, ʼi te kamata fakahaʼele ʼo te filiale ʼo Tikosi, neʼe ko te toko 1 100 kau fai faka mafola ʼi Niu-Kaletonia. Ia ʼaho nei kua tou teitei kaku ki te toko 1 600, pea ko te hahaʼi fai faka mafola faiva ko te 1 835 ʼi Niu-Kaletonia, ʼi Vanuatu, pea mo Uvea mo Futuna. Ka ʼe tou fakafuafua atu, pea tou fakatokagaʼi kua hoko te tuputupu ʼi te taʼu ʼaenī. Kae ʼe mole faʼu te ʼu fale foʼou ʼaia ʼuhi pe ko te meʼa ʼaia. ʼIo, lolotoga te ʼu taʼu ʼaia, neʼe lahi te tuputupu ʼo te ʼu gāue ʼo te filiale. Koteā koa te ʼu gāue ʼaia?
6 Te ʼu gāue ʼo totatou filiale: ʼI te ʼu gāue māhani ʼa te ʼu filiale ʼaē ko te fakatuʼutuʼu ʼo te ʼu kokelekasio, te ʼu ʼaʼahi ʼa te ʼu taupau feʼaluʼaki, te fakatuʼutuʼu ʼo te ʼu fakatahi faka tisitilike pea mo te ʼu fakatahi faka silikosikilipisio pea mo te ʼu gāue ʼaē ʼe pipiki tāfito ki te gāue fai faka mafola, ʼe ʼi ai te tahi ʼu meʼa ʼe tokaga kiai te filiale ʼo Niu-Kaletonia. Ko ʼihi ʼi te ʼu meʼa ʼaia ʼe tuʼu ʼi lalo:
— Te fai fakaliliu: Ko tatatou filiale ʼe ina fakaliliu te ʼu tohi ʼi te ʼu lea kehekehe, tāfito ʼi te lea faka Pisilama, Fakaʼuvea pea mo faka Lifu. Ko te ʼu nusipepa ʼo Te Tule Leʼo ʼe fakaliliu ʼi te lea faka Pisilama pea mo te lea Fakaʼuvea ʼo fai tuʼa lua ʼi te māhina, ʼo fakaliliu mai te lea Fakapilitānia, pea ʼe ʼi ai mo te Réveillez-vous! ʼi te lea faka Pisilama ʼe fai ʼi te hili ʼo māhina e tolu. Ko Te Minisitelio ʼo Te Puleʼaga ʼe fakaliliu ʼi te ʼu lea ʼaia e lua, kae ʼi te temi nei kua toe fakaliliu foki ʼi te lea faka Lifu. Pea tahi ʼaē, neʼe fakaliliu pea neʼe tā mo ʼihi tohi maʼuhiga ki te gāue fai faka mafola. ʼI te ʼu tohi ʼaia, ʼe kau ai te ʼu tohi Te tagata ʼaē ʼe lahi tokotahi ʼo te ʼu temi fuli pea mo te tohi Ko Te ʼAtamai Mālama ʼAē ʼe Ina Taki Ki Te Maʼuli Heʼegata. Neʼe fakaliliu foki mo te ʼu kaupepa ʼi te lea faka Uailou pea mo te lea faka Male. Ko te gāue fai fakaliliu ʼe ko he gāue lahi ʼe ʼaoga kiai he tokolahi ʼe fai fakaliliu pea mo sivisivi ʼi te ʼu lea ʼaia.
— Te gāue ʼaē ʼe ina teuteuʼi te ʼu pasina: Ko te gāue ʼaia ʼe tokaga ki te teuteuʼi ʼo te ʼu pasina ʼo te ʼu tohi ʼaē ʼe tonu ke tā: Te Tule Leʼo, te Réveillez-vous!, Te Minisitelio ʼo Te Puleʼaga, te ʼu tohi, te ʼu kaupepa, te ʼu pepa, pea mo te tahi ʼu meʼa. Kapau kua tokalelei te ʼu pasina, pea ʼe fakamomoli ki he tahi filiale ke ina tā te ʼu nusipepa peʼe ko te ʼu tohi ʼaia.
— Te fakamomoli ʼo te ʼu tohi: Ko te lahi ʼaupito ʼo te ʼu nusipepa pea mo ʼihi ʼu tohi, ʼe toe fakamaʼua foki he gāue lahi moʼo fakamomoli ʼo te ʼu tohi ʼaia ki te ʼu kokelekasio ʼaē kua kaugamālie ʼaupito.
— Te gāue ʼaoga ʼo te ʼu olotinatea: Ko te fakaʼaogaʼi ʼo te ʼu olotinatea kua liliu ia ko he faʼahi maʼuhiga moʼo fakahoko ʼo te ʼu gāue ʼi te ʼu filiale, koia ʼe ʼaoga tāfito ai te ʼu olotinatea ki te kau fai fakaliliu tohi, ko nātou fuli ʼaia ʼe nātou tahi maʼu tana olotinatea. Mai tona ʼaluʼaga ʼaē ʼe lahi te ʼu lea ʼe fakaliliu kiai te ʼu tohi e totatou filiale, koia ʼe ʼaoga ai te fakaʼaogaʼi ʼo te ʼu olotinatea. ʼE maʼuhiga ʼaupito ke vakaʼi tuʼumaʼu te ʼu olotinatea, pe kei haʼele lelei peʼe kailoa. ʼE tonu ke gaohi pea mo taupau fakalelei te ʼu olotinatea ʼaia pea mo te ʼu polokalama ʼaē ʼe fakaʼaogaʼi.
— Te gāue ʼaē ʼo ʼuhiga mo te faka felogoi mo te ʼu fale mahaki: Ko te gāue ʼaia ʼe faka felogoi tuʼumaʼu mo te komite ʼaē ʼe faka felogoi mo te ʼu fale mahaki ʼi Niu-Kaletonia, pea mo ʼihi ʼu filiale ʼi te malamanei ʼaē ʼe feala ke ʼave kiai ʼotatou ʼu tēhina mo tuagaʼane ke tafa ʼi ai. Ko te gāue ʼaia ʼe ina foaki tuʼumaʼu ki te komite ʼaē ʼe faka felogoi ki te fale mahaki, te ʼu alatike foʼou ʼo ʼuhiga mo te ʼu faitoʼo ʼaē ʼe feala ke tokoni ki totatou ʼu tēhina ke nātou tauʼi he mahaki faigataʼa e lagi tonu ke fakaʼaoga kiai te toto.
— Te tahi ʼu gāue ʼe ʼaoga: ʼUhi ʼe tokolahi te ʼu tēhina pea mo te ʼu tuagaʼane ʼe hū ki te Petele moʼo fai ʼo te ʼu gāue ʼaia, ʼe ʼaoga foki ke tokolahi he kau gāue moʼo fai ʼo te gāue fakasino ʼo te famili ʼo te Petele. ʼE ʼaoga niʼihi ki te fale fō, ki te fale kuka, ki te ʼōloto, ki te fai fakamaʼa, pea mo ʼihi age ʼu gāue ʼe ʼaoga ki te lelei ʼo te ʼu tēhina pea mo tuagaʼane e toko 15 ki te 20 ʼaē ʼe gāue nei ʼi te Petele. ʼI te temi nei, kua nātou taki toko tolu ʼi te koga fale e tahi, ka neʼe fai te ʼu koga fale ʼi te kamata ke nofoʼi pe e he toko lua. ʼE mole kei ʼi ai he lapalasi. ʼUhi ko te haʼele fakavilivili ʼa te kautahi ʼa Sehova ki muʼa, ʼe feala ke tou nofo ʼamanaki ʼe toe hoholo atu te tuputupu.
7 E feafeaʼi te foaki tokoni: Ohage pe ko te meʼa kua koutou sio kiai ʼi takotou ʼōmai ki te potu ʼaē ʼe laga ai te ʼu fale, kua haʼele ki muʼa te gāue. Kua vave ʼosi te fale fakatahi pea ʼe tonu anai ke fakaʼaogaʼi e he ʼu kokelekasio ʼi te fakaʼosi ʼo te taʼu ʼaenī. Ko te ʼu gāue ʼo ʼuhiga mo te Petele (te fale ʼaē ʼe tuʼu ki muli atu) kua kamata fai ʼi te temi nei, pea ʼe hoko atu kiai te laga ʼo te fale ʼaē ʼe tuʼu ai te ʼu pilō. Ko te fakaʼosi ʼo te ʼu gāue ʼe fakatuʼutuʼu ki te fakaʼosi ʼo te taʼu 1996. ʼE lava feafeaʼi hatatou kau ki te fakahoko ʼo te gāue lahi ʼaia?
8 ʼE lahi te meʼa ʼe feala ke tou fai moʼo fafaga pea mo fakatalitali ʼo te kau gāue. ʼI te ʼosi laga ʼo te fale ʼo te fakatahi, ʼe ʼi ai anai he potu ʼe fakaʼaogaʼi ke momoe ai te kau gāue. ʼE mātou fakamālo ki te ʼu famili ʼaē neʼe nātou tali lelei ke momoe te kau gāue ʼi tonatou ʼu ʼapi. ʼE mahino ia, ko te ʼu famili ʼaia neʼe nātou fai he ʼu sakilifisio, kae ʼe mātou ʼiloʼi papau ʼe nātou maʼu anai he ʼu tapuakina lahi ʼuhi ko tanatou tali kāiga. (Loma 12:13) Kapau ʼe ʼi ai niʼihi ʼu famili ʼe loto ke nātou tali he kau gāue ʼi tonatou ʼapi, ʼe mātou fakaafe atu koutou ke koutou fakahā mai te faʼahi ʼaia. Ko he tokoni lahi neʼe foaki ki te kau gāue, ʼaki te ʼu meʼa kai. Kapau ʼe koutou fia foaki he meʼa kai, e lagi lelei hakotou felogoi muʼa mo te kau takitaki ʼo te laga fale.
9 Ko nātou ʼaē ʼe nātou fia kau ki te kau gāue ʼi te ʼaho fuli, ʼo aʼu ki te fakaʼosi ʼo te laga fale, ʼe tonu ke nātou tohi he tahi pepa ko ʼona pasina e 4, pea ʼe feala ke nātou kole te ʼu pepa ʼaia ki te ʼu tagata ʼāfea ʼo te kokelekasio. Koutou manatuʼi ko takotou tohi te pepa ʼaia ʼe mole ʼui ai leva ʼe pāuiʼi koutou ki te laga fale, koteʼuhi ʼe tokolahi te ʼu tēhina pea mo tuagaʼane ʼe nātou foaki tonatou temi ki te gāue laga fale. ʼE mole mātou ʼui atu ke koutou tuku takotou ʼu gāue faka teokalatike, koteʼuhi ʼe koutou talitali ke pāuiʼi koutou ke koutou gāue ʼi te ʼaho fuli ʼi te laga fale, heʼe mole feala ke mātou ʼui papau atu peʼe pāuiʼi anai koutou.
10 ʼE mātou fia fakamālo kia nātou fuli ʼaē neʼe nātou foaki tonatou temi ʼo gāue ʼi te laga fale, tatau aipe pe neʼe nātou ʼōmai ʼi te ʼu ʼaho ʼaē neʼe fakaafe ai tonatou kokelekasio pe ko te ʼu ʼaho ʼaē neʼe nātou ʼōmai he neʼe kole age e te komite laga fale. ʼI tatatou fakaōvi ki te ʼu temi mālōlō, ʼe lagi loto anai ʼihi ke nātou foaki tonatou temi, pea ʼe ko he meʼa lelei anai kia nātou. Kapau ʼe koutou ʼōmai ʼo gāue mo tokotou kokelekasio, koutou ʼolo ʼo tohi tokotou higoa ʼi te tēhina ʼo tokotou kokelekasio ʼaē ʼe faka felogoi mo te gāue laga fale. Kapau ʼe koutou fia ʼōmai ʼo gāue ʼi he tahi age ʼaho, ʼe mātou fakaafe atu koutou ke koutou tohi he pepa ʼe faka fealagia ai hakotou ʼōmai ʼo gāue, tatau aipe peʼe koutou ʼōmai ʼo gāue ʼi te vāhaʼa e tahi pe ko vāhaʼa e lua, peʼe koutou gāue lolotoga ni ʼu ʼaho. Ke ʼaua naʼa galo ke koutou tohi fakalelei te temi ʼaē ʼe koutou ava ai, pea mo te ʼu gāue ʼe feala ke koutou fai. ʼE mātou fakamanatuʼi atu ʼe gata pe kia nātou ʼaē kua fai faka mafola, papitema peʼe kailoa, ʼe feala ke nātou ʼōmai ki te laga fale.
11 ʼE mahino ia ko te tuputupu ʼaia pea mo te laga fale ʼaia ʼe ʼaoga kiai he falā. Ko te kau Fakamoʼoni ʼa Sehova ʼe mole heʼeki nātou kole he falā, kae ko nātou ʼaē ʼe nātou fia foaki he falā moʼo fakahoko ʼo te ʼu meʼa ʼaē ʼe ʼaoga ki te Puleʼaga, ʼe feala ke nātou fai te faʼahi ʼaia, ʼo foaki tanatou ʼu meʼa ʼofa ki te kautahi ʼo te kau Fakamoʼoni ʼa Sehova, B.P. 787, Nouméa. ʼE fakaloto mālohiʼi tatou ke tou ʼiloʼi ko tatatou lagolago ʼaki tatatou paʼaga ki te tuputupu ʼo te tauhi maʼa, ʼe ko he fakahā ʼaia ʼo totatou ʼofa kia Sehova, ohage ko tona fakahā ia Tāʼaga Lea 3:9: “Faka maʼuhiga ia Sehova ʼaki tou ʼu koloā pea mo te ʼu ʼuluaki fua ʼo tou ʼu koloā fakakelekele fuli.”
12 Ko te hahaʼi ʼa Sehova neʼe ina maʼu te maʼua ʼaē ko te faka mafola ʼo te logo lelei ʼo te Puleʼaga ʼi te kele katoa, ia muʼa ʼo te hoko mai ʼo te ʼaho fakaʼosi. (Mat. 24:14) ʼE tou nofo ʼamanaki ke tou ʼiloʼi peʼe feafeaʼi anai te fakaʼaluʼalu e Sehova ia tana gāue, pea ʼe hoki tou ʼiloʼi anai te faʼahi ʼaia ʼi te temi ka haʼu. Kae ʼe feala ke tou falala, ko te kautahi ʼa Sehova, ʼe haʼele anai ia ki muʼa ʼo ina fakahoko te gāue ʼaē neʼe fakatotonu e Sehova ʼo ʼuhiga mo te temi fakaʼosi ʼaenī.
Ko te paki ʼaenī neʼe toho mai ʼoluga
Ko he faʼahiga sio katoa ki te laga fale
Ko te ʼai ʼo te ʼu kaupā ʼaē ʼe higoaʼi ko te ‘Tilt-up’