Tou Fai Te ʼu ʼAʼahi Pea Mo Te ʼu Ako Tohi-Tapu ʼAki Te ʼu Kaupepa Lalahi
1 Ko te ʼu kaupepa lalahi ʼe lelei ʼaupito moʼo kamata ʼaki he ʼu ako Tohi-Tapu. ʼI ʼihi temi ʼe faigafua age ki he tahi hana tali ke ina ako te Tohi-Tapu ʼaki he kaupepa. Pea tahi ʼaē, ko te kaupepa Logo Tahi Moʼo Fai ʼo Te Finegalo ʼo Te ʼAtua neʼe fakatuʼutuʼu moʼo fakahū ʼo te kau ako Tohi-Tapu ki te kautahi moʼoni e tahi ʼa te ʼAtua. ʼAki te tokoni ʼaē ʼe tou foaki kia nātou, ʼe feala anai ke nātou tokagaʼi “koʼeni te ala” ʼaē ʼe tonu ke nātou mulimuli kiai.—Is. 30:21.
2 Kapau neʼe koutou fakaʼaogaʼi te kaupepa “Logo Tahi Moʼo Fai ʼo Te Finegalo ʼo Te ʼAtua,” ʼe feala ke hoko atu takotou palalau ʼo koutou ʼui fēnei:
◼ “Neʼe ʼau manatuʼi koe pea mo tatā fai palalau ʼaē neʼe tā fai. Neʼe tā palalau ʼo ʼuhiga mo te fakapapau ʼaē ʼe tou maʼu ʼi te Tohi-Tapu, ʼaē ko te lotu pe e tahi ʼaē ka ina fakatahitahiʼi anai te hahaʼi fuli ʼi te tokalelei ʼi te kele. E lagi feala ke tou feʼuiʼaki peʼe lava feafeaʼi anai te hoko ʼo te faʼahi ʼaia, koteā tau manatu?” Koutou tuku ke fai atu hana tali. ʼE feala ke koutou fakamatalatala te lua paki pea mo te tolu paki ʼaē ʼe tuʼu ʼi te pasina 4 ʼo te kaupepa, ʼo koutou fakaʼaogaʼi te ʼu vaega ohage ko Senesi 22:18. Koutou faka maʼuhigaʼi te ʼu fakapapau ʼo te Puleʼaga. Koutou fakahā age ko te ʼu akonaki ʼa Sesu neʼe fakatafito ki te Puleʼaga ʼaia, pea mo te ʼu meʼa ʼaē ka foaki mai anai e te Puleʼaga ʼaia ki te malamanei. Koutou fai he fakatuʼutuʼu ke koutou toe liliu mai ʼo palalau mo ia ʼo ʼuhiga mo te faʼahi ʼaia.
3 Kapau neʼe koutou tuku te kaupepa “Puleaga,” peʼe ko te kaupepa Mauli Heegata Ite Kele, ʼe feala ke koutou ʼui age fēnei:
◼ “ ʼI taku haʼu talu mai ai, neʼe tā vakaʼi te ʼu tapuakina ʼaē ʼe tou maʼu anai ʼi te takitaki ʼo te Puleʼaga ʼa te ʼAtua. [Koutou fakahā te puani ʼaē neʼe koutou talanoa kiai.] Ko te kaupepa ʼaē neʼe ʼau tuku atu ʼe ina fakahā te tahi fihifihia ʼe pulihi ʼosi anai. Ko te fihifihia ʼaia ko te . . .” Koutou fili he puani ʼe ʼaoga ʼi te kaupepa pea koutou faiga ke kamata ai he ako Tohi-Tapu.
4 Kapau ʼe koutou fai he ako Tohi-Tapu, ʼe koutou maʼu koa he kiʼi temi moʼo vakaʼi ʼo te kaupepa “Logo Tahi Moʼo Fai ʼo Te Finegalo ʼo Te ʼAtua”? Koutou mulimuli ki te ʼu manatu ʼaenī:
◼ ʼE mulimuli te tuputupu ʼo te kau ako ʼo te Tohi-Tapu ki tanatou loto fakafetaʼi ʼo ʼuhiga mo te kautahi ʼa Sehova. Koia, ʼe kau ki totatou ʼu maʼua faka Kilisitiano, te takitaki ʼo te hahaʼi ʼaē ʼe nātou ako Tohi-Tapu ke nātou hū ki te kautahi ʼa te ʼAtua. Ko te kaupepa Te Kau Fakamoʼoni ʼa Sehova—Logo Tahi Moʼo Fai ʼo Te Finegalo ʼo Te ʼAtua ʼi Te Malamanei, ʼe ina foaki mai he fakatuʼutuʼu lelei moʼo fai ʼo te faʼahi ʼaia. ʼE ʼi ai koa he kaupepa feiā ʼa ia ʼaē ʼe ako mo koutou? Kapau ʼe mole ʼi ai hana kaupepa feiā, koutou faigaʼi ke ina maʼu hana kaupepa. Koutou fakaloto mālohiʼi ia ia ke ina lau te kaupepa, pea koutou fakamahino age ki ai ʼe koutou vakaʼi fakanounou anai he koga ʼo te kaupepa ʼaia ʼi te vāhaʼa fuli ʼaē ʼe fai ai te ako.
5 Ko te alatike ʼo te ʼu pasina 14 pea mo te 15 ʼo te kaupepa Logo Tahi Moʼo Fai ʼo Te Finegalo ʼo Te ʼAtua, neʼe fakatuʼutuʼu moʼo fakatupu ʼo he loto fakafetaʼi ʼo ʼuhiga mo te ʼu fono ʼo te kokelekasio. He koʼe ʼe mole koutou fai pe he palakalafe e tahi peʼe lua ʼi te vāhaʼa? Koutou fakahā age ko te ʼu fono fuli ʼe nātou akoʼi tatou pea ʼe ʼi ai te ʼu akonaki ʼe nātou tali ki te ʼu faʼahiga meʼa ʼaē ʼe ʼaoga kia tatou. Koutou tokoni kia ia ʼaē ʼe ako ke mahino kia ia ʼe feala ke tuputupu ʼi te faʼahi fakalaumālie, mo kapau ʼe kau ki “tatatou [ʼu] fakatahi.” (Hep. 10:24, 25) ʼAki he loto fiafia tou fakaloto mālohiʼi ia ia ke haʼu ʼo fakatahitahi mo tatou ʼi te Fale ʼo te Puleʼaga. ʼE ina fakatokagaʼi anai ʼi ai te logo tahi pea mo te ʼofa ʼaē ʼe maʼu e te hahaʼi ʼa Sehova.—Pes. 133:1; Soane 13:35.
6 Kapau ʼe tou fakaʼaogaʼi te ʼu kaupepa moʼo kamata ʼaki he ʼu ako Tohi-Tapu foʼou, ʼe feala anai ke mahino ki te tokolahi peʼe ʼifea te moʼoni. Tahi ʼaē meʼa, tou manatuʼi ʼo vakaʼi tuʼumaʼu te ʼu puani ʼo te kaupepa Logo Tahi Moʼo Fai ʼo Te Finegalo ʼo Te ʼAtua. Tou taki ia nātou ʼaē ʼe ako Tohi-Tapu ke nātou ʼōmai ki te kautahi ʼa Sehova pea ke nātou mulimuli kia Sehova ʼo nātou ʼui fēnei: “Koʼeni te ala.”