Faʼahi 1—Tou Maʼu He ʼu Lelei ʼi Te Ako ʼo Te Minisitelio Faka Teokalatike 1996
1 Kua koutou lau koa te ʼu tokoni ʼaē neʼe foaki atu ʼi te “Polokalama ʼo Te Ako ʼo Te Minisitelio Faka Teokalatike Ki Te Taʼu 1996”? Neʼe koutou tokagaʼi koa he ʼu fetogi? Ko te hisitolia fakaofoofo ʼo te kautahi ia ʼaho nei, ʼe lahi anai tona talanoaʼi ʼi te ʼu ʼuluaki akonaki. Lolotoga te taʼu ʼaenī, ʼe vakaʼi anai te ʼu pasina e 178 ʼo te tohi Les Témoins de Jéhovah: Prédicateurs du Royaume de Dieu. Mai tona ʼuhiga ʼaē ʼe mole ʼi ai anai he ʼu fehuʼi moʼo fakamanatu ʼi te fakaʼosi ʼo te ʼuluaki akonaki ʼaē ʼe fai ki te tohi Prédicateurs, koteā ʼaē ʼe feala ke tou fai moʼo vakaʼi fakalelei tatatou akonaki pea mo maʼu ai he ʼu lelei ʼaupito?—1 Tim. 4:16.
2 He koʼe ʼe mole tou taupau he temi ʼi te vāhaʼa fuli moʼo fakasiosioʼi te ʼu puani ʼaē ka vakaʼi ʼi te tohi Proclamateurs? Ko te ʼu ʼuluaki akonaki ʼaia ʼe tonu ke mālie pea mo fia logo kiai te hahaʼi. Pea ʼe tonu foki ki te ʼu ʼuluaki akonaki ʼaia ke nātou faka maʼuhigaʼi te ʼaoga ʼo te ʼu puani ʼaia, ʼo fakaʼaogaʼi moʼo fakaloloto te fakaʼapaʼapa ki te kautahi ʼa Sehova, pea mo tatatou loto fakafetaʼi ʼo ʼuhiga mo te ʼu pilivilesio ʼaē ʼe tou maʼu ʼi totatou ʼuhiga kaugana ʼa te ʼAtua. Kapau ko te famili takitokotahi ʼaē ʼe kau ki te fono ʼo te Ako ʼe ina ʼaumai te tohi Proclamateurs, ko te famili katoa ʼe feala ke nātou mulimuli fakalelei ki te akonaki ʼaia pea mo nātou maʼu te ʼu lelei mai te ʼu paki ʼo te tohi.
3 Te ʼu Akonaki ʼa Te Kau Ako: Mai Sanualio ki ʼApelili, ko te Akonaki n° 3 ʼe fakatafito anai ki te Sujets de conversation bibliques, pea ko Maio ki Tesepeli, ʼe fakatafito anai ki te tohi foʼou Te ʼAtamai Mālama. ʼE fai anai e he tuagaʼane. Kapau ʼe fakatafito ki te Sujets de conversation bibliques, pea ʼe tonu ke fai ohage ko he fai faka mafola ʼi te ʼu ʼapi peʼe ko te fagonogono faigamālie. Kapau ʼe fakatafito ki te tohi Te ʼAtamai Mālama, ʼe tonu ke fai ohage ko he ʼaʼahi peʼe ko he ako faka Tohi-Tapu. ʼE ʼaoga ʼaupito anai te faʼahi ʼaia, heʼe fakaʼaogaʼi tāfito anai te tohi Te ʼAtamai Mālama moʼo fai te ʼu ako faka Tohi-Tapu.
4 Kapau ko te fai palalau ʼe fai ohage ko he ako faka Tohi-Tapu, pea ʼe feala ke heheka te ʼu tuagaʼane. Koutou kamata te ako ʼaki he ʼu ʼuluaki palalau ʼe fai fakanounou, ʼosi ʼaia pea fai te ʼu fehuʼi ʼo te tohi. Ko ia ʼaē ʼe felogoi mo koutou ʼe tonu ke ina fai ohage ko he ako moʼoni. Ko te ʼu vaega ʼaē ʼe tuʼu ʼi te tohi ʼe feala ke kumi pea mo lau ʼi te Tohi-Tapu, mo kapau ʼe maʼu he temi. Ko te tuagaʼane ʼaē ka ina fai te fai palalau ʼaia ʼe tonu ke ina fakahā tona poto ʼi te fai ʼo te ako, ʼo ina lagaʼi he ʼu fehuʼi, pea mo ina faigaʼi ke fakakaukauʼi te ʼu vaega ʼaia e ia ʼaē ʼe ako.
5 Koteā ʼaē ʼe tonu ke fai mo kapau ʼe lahi fau te ʼu vaega ʼaē ʼe tonu ke lau ʼi he ʼu kiʼi minuta e nima? Koutou fili te ʼu vaega tāfito ʼaē ʼe nātou fakahā lelei te ʼu puani maʼuhiga. Kapau ʼe mole lahi te ʼu vaega, ko te ʼu puani maʼuhiga ʼo te kapite ʼe feala ke fakaloloto tona vakaʼi. ʼI ʼihi temi, ko he palakalafe peʼe ko he kupuʼi palalau ʼo te tohi, ʼe feala ke lau pea mo felogoi kiai.
6 Ko te talanoa ʼo “Te Sivi ʼo Tokotou ʼAtamai Mālama,” ʼaē ʼe maʼu ʼi te fakaʼosi ʼo te ʼu kapite fuli ʼo te tohi Te ʼAtamai Mālama, e lagi feala ke vakaʼi fakanounou e te kaugā fai faka mafola ʼaē ʼe ina fai tana fai palalau ki te palakalafe fakamuli ʼo te kapite. Ko te tahi ʼu talanoa ʼaē ʼe kau ki te ʼu palakalafe ʼaē neʼe hinoʼi atu, ʼe feala ke koutou palalau kiai mo kapau ʼe maʼu he temi. Kapau ko he talanoa ʼe tuʼu ʼi he ʼu fai palalau e lua, ko te tuagaʼane ʼaē ka ina fai te ʼuluaki fai palalau ʼe feala ke palalau kiai. Ko te ʼu paki ʼo te tohi ʼe feala ke koutou talanoa kiai mo kapau ʼe ʼalutahi mo te fai palalau.
7 Kapau ʼe tou fakaʼaogaʼi katoa te ako ʼaē ʼe tou maʼu mai te Ako ʼo Te Minisitelio Faka Teokalatike, ʼe tou ʼāsili faiva anai ʼi te “faka mafola ʼo te folafola,” ʼo tou fai te faʼahi ʼaia ʼi he ʼaluʼaga ʼe hā ai tatatou kua “fakapotopoto ʼi te faiakonaki.”—2 Tim. 4:2.