Polokalama ʼo Te Fono Gāue

Vāhaʼa ʼo te ʼaho 13 ʼo ʼOketopeli

Katiko 215

10 min: Te ʼu logo. Fakaloto mālohiʼi te kokelekasio ke nātou toe vakaʼi tanatou ʼu nota, ʼo fakaʼaogaʼi te ʼu fehuʼi ʼaē ʼi te pasina 1, moʼo teuteuʼi te fai palalau ʼo ʼuhiga mo te polokalama ʼo te Fakatahi ʼaē ko tona kupu tāfito “Koutou Faka Kolōlia Ki Te ʼAtua.” ʼE fai anai te fai palalau ʼaia ʼi te Fono Gāue ʼo te vāhaʼa ʼaenī ka haʼu. ʼAki te ʼu manatu ʼo te pasina 8, fai he ʼu faʼifaʼitaki e lua moʼo fakahā te tufa ʼo Te Tule Leʼo ʼo te ʼaho 15 ʼo ʼOketopeli pea mo te Réveillez-vous ! ʼo te ʼaho 22 ʼo ʼOketopeli. ʼI te ʼu faʼifaʼitaki ʼaia ʼe tonu ke tufa lualua te ʼu nusipepa, tatau aipe peʼe ko te nusipepa e tahi ʼaē ʼe fakahā. ʼI he faʼifaʼitaki, fakahā peʼe feafeaʼi te fai ʼo he ʼaʼahi moʼo foaki te ʼu nusipepa foʼou. Teuteuʼi te ʼaʼahi ʼo fakahā ki te tagata peʼe ki te fafine ʼi Te Tule Leʼo te talanoa “ ʼI Te Nusipepa Ka Hoko Mai.”​—Vakaʼi Te Minisitelio ʼo Te Puleʼaga ʼo ʼOketopeli 1998, ʼi te pasina 8, te ʼu palakalafe 7 ki te 8.

20 min: “Tou ‘Tauhi Kia Sehova ʼAki Te Loto Fiafia.’ ”a (Koutou ʼaumai ki te fai palalau te pepa ʼaē ʼe ʼalutahi mo Te Minisitelio ʼo Te Puleʼaga ʼo Sanualio 2002.) ʼI te ʼosi vakaʼi ʼo te palakalafe 4, koutou fakahā ʼe tou tufa anai te kaupepa lahi Fakamaʼua pea mo te tohi Te ʼAtamai Mālama, ʼi te māhina ʼo Novepeli. Vakaʼi fakanounou te ʼu palalau ʼaē ʼe feala ke tou fai ʼe tuʼu ʼi te pepa ʼe ʼalutahi mo Te Minisitelio ʼo Te Puleʼaga ʼo Sanualio 2002. Pea fai he faʼifaʼitaki moʼo fakahā te tufa. Fakaloto mālohi te kokelekasio ke nātou teuteuʼi lelei te fai faka mafola.

15 min: Te ʼu Lelei ʼAē ʼe Tou Maʼu ʼi Tatatou Fai He ʼu Ako Tohi-Tapu. Ko he akonaki pea mo he fai palalau. Fakamatala he ʼu faʼifaʼitaki neʼe tou lau ʼi tatatou ʼu nusipepa, ʼo ʼuhiga mo he ʼu ako Tohi-Tapu neʼe tuputupu. (w00 1/3 p. 6; yb98 pp. 55-​60) Kole ki te kokelekasio ke nātou fakamatala te ako ʼe feala ke tou tāʼofi mai te ʼu faʼifaʼitaki ʼaia, pea mo te ʼu lelei ʼe tou maʼu ʼi tatatou fai he ʼu ako Tohi-Tapu.

Katiko 172 pea mo te faikole fakaʼosi.

Vāhaʼa ʼo te ʼaho 20 ʼo ʼOketopeli

Katiko 86

5 min: Te ʼu logo.

40 min: “Ko Te ʼu Fakatahi Faka Tisitilike Pea Mo Faka Malamanei ʼe Nātou Uga Tatou Ke Tou Faka Kolōlia Ki Te ʼAtua!” ʼE fai e he tagata ʼāfea. Hili te ʼu ʼuluaki palalau ʼi he minuta tahi, fai palalau mo te kokelekasio ʼo ʼuhiga mo te polokalama ʼo te fakatahi ʼo fakaʼaogaʼi te ʼu fehuʼi ʼi te alatike. Fakatuʼutuʼu te temi ke feala ke vakaʼi te ʼu fehuʼi fuli, lagi fai pe he tali e tahi ʼi ʼihi fehuʼi. ʼE mole feala ke lau te ʼu vaega fuli ʼi te temi ʼaē neʼe tuku mai; ʼe feala ai ke fakakau te ʼu vaega ʼaia ki te ʼu tali ʼaē kua teuteuʼi kiai. ʼE tonu ke fakahā ʼi te ʼu tali te ʼu fua lelei ʼo te maʼuliʼi ʼo te ʼu meʼa ʼaē neʼe tou ako.

Katiko 74 pea mo te faikole fakaʼosi.

Vāhaʼa ʼo te ʼaho 27 ʼo ʼOketopeli

Katiko 64

12 min: Te ʼu logo. Lau ʼo te falā. Fakamanatuʼi ke ʼaumai te ʼu kiʼi pepa tānaki gāue ʼo te māhina ʼo ʼOketopeli. Fakaloto mālohiʼi te kokelekasio ke nātou vakaʼi tanatou ʼu nota ʼo te polokalama ʼo te fakatahi ʼaho tahi ʼi te taʼu gāue ʼaenī kua hili, moʼo teuteuʼi te Fono Gāue ʼo te vāhaʼa ka haʼu. ʼAki te ʼu manatu ʼi te pasina 8, fai he ʼu faʼifaʼitaki e lua moʼo fakahā peʼe feafeaʼi hatatou tufa Te Tule Leʼo ʼo te ʼaho 1 ʼo Novepeli pea mo te Réveillez-vous ! ʼo te ʼaho 8 ʼo Novepeli. ʼI te ʼu faʼifaʼitaki ʼaia, ʼe tonu ke tufa lualua te ʼu nusipepa, tatau aipe peʼe ko te nusipepa e tahi ʼaē ʼe fakahā. ʼI he faʼifaʼitaki, ʼe fakahā ai anai peʼe koteā tatatou tali mokā ʼui fēnei mai: “ ʼE mole ʼau loto ʼau kiai.”​—Vakaʼi te kaupepa Te ʼu Tokoni Ki Te ʼu Fai Palalau Faka Tohi-Tapu, ʼi te pasina 11.

20 min: Tou Fakaʼaogaʼi Te Heletā ʼo Te Laumālie. (Ef. 6:​17) Fai palalau mo te kokelekasio ʼo fakatafito ki te tohi École du ministère, ʼi te pasina 143 ki te 144. Fakaafe te kokelekasio ke nātou fai he ʼu tali ki te ʼu fehuʼi ʼaenī: (1) He koʼe ʼe tou fakaʼaogaʼi te Tohi-Tapu moʼo tali ki te ʼu fehuʼi? (2) ʼAki te higoa ʼaē ko te kau Fakamoʼoni ʼa Sehova, koteā ʼaē ʼe fakahā ai ʼo ʼuhiga mo tatou? (3) Koteā te faʼifaʼitaki ʼaē neʼe tuku mai e Sesu, pea ʼe tou lava mulimuli feafeaʼi ki ai? (4) ʼI totatou telituale, koteā te ʼu faʼahiga fai ʼe lelei moʼo fakahā te manatu ʼo te Tohi-Tapu? (5) He koʼe ʼe lelei age ke tou lau fakahagatonu te Tohi-Tapu ʼi te ʼu lakaga fuli pe ʼaē ʼe feala ai? (6) ʼE lava fakaloto mālohiʼi feafeaʼi e te kau tagata ʼāfea te fakaʼaogaʼi lelei ʼo te Tohi-Tapu? Teuteuʼi lelei he faʼifaʼitaki ʼe fakatafito ki te gāue ʼaē ʼe tuʼu ʼi te lalo pasina 144, ʼe fakaʼaogaʼi ai e he fai faka mafola faiva he vaega e tahi moʼo tali ki he fehuʼi. Fakaloto mālohi te kokelekasio ke nātou fakaʼaogaʼi te Tohi-Tapu ʼi te temi fuli pe ʼaē ʼe nātou fai faka mafola ai.

13 min: Te ʼu meʼa neʼe hoko ʼi te telituale. Fakaafe te kokelekasio ke nātou fakamatala he ʼu meʼa neʼe hoko ʼi tanatou kau ki te fakatahi faka tisitilike, peʼe ko te fai fagonogono faigamālie ʼi te fale gāue, ʼi te faleako, peʼe ʼi he tahi faʼahi.

Katiko 52 pea mo te faikole fakaʼosi.

Vāhaʼa ʼo te ʼaho 3 ʼo Novepeli

Katiko 30

5 min: Te ʼu logo. Fakahā te ʼu fakatuʼutuʼu ki te fai faka mafola ʼi te ʼaho mālōlō ʼo te ʼaho 11 ʼo Novepeli.

15 min: Ko he akonaki ʼe ʼaoga ki te kokelekasio.

25 min: Koutou Fonu ʼi Te ʼu Gāue Matalelei. (1 Tim. 6:​18) ʼAki te ʼu fehuʼi ʼaenī, ʼe fai palalau he tagata ʼāfea mo te kokelekasio ʼo ʼuhiga mo te polokalama ʼo te fakatahi ʼaho makehe ʼaē neʼe fai ʼi te taʼu ʼaenī kua hili. Fakaafe te kokelekasio ke nātou fakamatala pe neʼe nātou lava maʼuliʼi feafeaʼi te ʼu meʼa ʼaē neʼe nātou ako. (ʼE feala ke teuteuʼi fakatomuʼa ʼihi ki te faʼahi ʼaia.) Fakahā lelei te ʼu koga ʼaenī ʼo te polokalama: (1) “Ko He ʼu Gāue Matalelei ʼe Maʼu Ai He Tapuakina Lahi.” (Tnk. 2:​11) He koʼe ʼe faiga te ʼu kaugana ʼa te ʼAtua ki te ʼu gāue lelei ʼaē ʼe fakahā ʼi te Folafola ʼa te ʼAtua, kae mole nātou faiga ki te ʼu gāue vaʼiganoa ʼo te mālama ʼaenī? (2) “Koutou Koloaʼia Kia Mata ʼo Te ʼAtua.” (Mat. 6:​20) Neʼe feafeaʼi ki ʼihi hanatou ‘tānaki he ʼu koloā ʼi te lagi,’ pea neʼe koteā te ʼu lelei neʼe nātou maʼu ai? (3) “Koutou Fakalahi Tokotou Minisitelio ʼo Koutou Fai Hakotou Ako Tohi-Tapu.” (Notre ministère, ʼi te pasina 91) Koteā ʼaē ʼe feala ke tokoni mai ke tou kamata pea mo fai he ako Tohi-Tapu? (4) “Ko He ʼu Gāue Matalelei ʼi Te Temi ʼo Te Taʼukai.” (Mat. 13:37-​39) Koteā te faʼifaʼitaki neʼe tuku mai e te ʼu ʼuluaki Kilisitiano ʼo ʼuhiga mo te ʼu gāue lelei, pea neʼe mafola feafeaʼi te gāue ʼo te Puleʼaga ia ʼaho nei? (5) “Ke Faka Kolōlia Ia Sehova ʼAki Takotou ʼu Gāue Matalelei.” (Mat. 5:​14-​16) Neʼe ‘fakamū feafeaʼi e ʼihi tonatou mālama’? (6) “Ko He Kau Tūpulaga ʼe Tāu Ke Vikiʼi, ʼUhi Ko Tanatou ʼu Gāue Matalelei Moʼo Fakavikiviki Ia Sehova.” (Pes. 148:12, 13) ʼE fakavikiviki feafeaʼi ia Sehova e te kau tūpulaga Kilisitiano ʼo totatou silikosikilipisio? (7) “Tou Haga Fakatupu He ʼu Gāue Matalelei, Pea Mo Tou Utu Te ʼu Tapuakina ʼa Sehova.” (Taag. 10:22) ʼI tatatou maʼumaʼua ʼi te ʼu gāue lelei, koteā te ʼu lelei ʼe feala ke tou maʼu takitokotahi, mo totatou famili, mo te kokelekasio, pea mo te kautahi faka malamanei?

Katiko 180 pea mo te faikole fakaʼosi.

[Kiʼi nota]