Te ʼu Tonu

◼ Te tufa ʼo te māhina ʼo Sānualio: Te Tohi ʼo Te ʼu Hisitolia Faka Tohi-Tapu. Peʼe feala ke koutou tufa te tohi Fakafalani Écoute le grand Enseignant. Kapau ʼe ʼui atu e he tahi ʼe mole hana fānau, pea koutou tuku age te kaupepa lahi Fakamaʼua. Koutou faiga tāfito ke koutou kamata he ʼu ako Tohi-Tapu ʼaki te kaupepa lahi ʼaia. Fepualio: ʼE feala ke tufa te tohi Te Lea Faka Polofeta ʼa Taniela. Malesio: Fakahā te tohi Te ʼAtamai Mālama, pea tou faiga tāfito ke tou kamata he ʼu ako Tohi-Tapu. ʼApelili: Te Tule Leʼo pea mo te Réveillez-vous ! Ka koutou ʼaʼahi te hahaʼi ʼaē ʼe fia logo, koutou ʼaʼahi mo nātou ʼaē neʼe ʼōmai ki te ʼAho Fakamanatu, peʼe ko te tahi ʼu fakatahi faka teokalatike, kae ʼe mole ʼōmai putuputu ki tatatou kokelekasio, pea koutou faiga ke koutou tufa te tohi Atolasio Ki Te ʼAtua. ʼE tou faiga anai ke tou kamata he ako Tohi-Tapu, tāfito mo te hahaʼi kua nātou ako ia te tohi ʼAtamai Mālama pea mo te kaupepa Fakamaʼua.

◼ ʼO kamata mai Fepualio ʼo kaku ki te ʼaho 6 ʼo Malesio, ʼe fai anai e te ʼu taupau ʼo te ʼu kokelekasio ia te akonaki foʼou ʼaenī ki te kaugamālie: “Tou Aga Fakapotopoto ʼi He Mālama Aga Fakavale.”

◼ ʼE tonu ki te ʼu kokelekasio ke nātou fai he ʼu fakatuʼutuʼu ʼo ʼuhiga mo te ʼAho Fakamanatu ʼo te taʼu ʼaenī, ʼaē ka fai ʼi te Felianima ʼaho 24 ʼo Malesio ʼi te ʼosi tō ʼo te laʼā. Logope la ʼe feala ke kamata te akonaki ʼi muʼa ʼo te tō ʼo te laʼā, kae ko te vino pea mo te pane ʼe tonu anai ke feʼāveʼaki ʼi te ʼosi tō ʼo te laʼā. Koutou vakaʼi fakalelei peʼe ko te temi fea ʼaē ka tō ai te laʼā ʼi te koga meʼa ʼaē ʼe koutou nonofo ai. ʼE lelei pe ke fai e te kokelekasio takitokotahi ia tona ʼAho Fakamanatu. Kae ʼi ʼihi temi ʼe lagi faigataʼa ia te faʼahi ʼaia. Ko te ʼu Fale ʼo Te Puleʼaga ʼaē ʼe fakatahi ai te ʼu kokelekasio kehekehe ʼi te agamāhani ʼe lagi tonu anai ke nātou fakaʼaogaʼi he tahi ʼu fale ʼi te afiafi ʼaia. Kapau ʼe feala, pea ʼe lelei ke vaha ia minuta e 40 te ʼu fono kehekehe ʼaē ʼe fai, ke maʼu ai he temi feʼauga kiā tatou fuli ke tou fakaʼaogaʼi lelei te toʼotoʼoga ʼaia. ʼE tonu anai ke vakaʼi fakalelei te ʼu fihifihia ʼaē ʼe feala ke hoko ʼi te feʼaluʼaki ʼaē ʼa te ʼu motokā, mo te taulaga motokā pea mo te ʼaumai ʼaē ʼo te hahaʼi. ʼE vakaʼi anai e te ʼu tagata ʼāfea pe koteā te ʼu fakatuʼutuʼu ʼaē ʼe lelei ki te kokelekasio.