Tou Haʼele Ohagē Ko He ʼu Hahaʼi Popoto
1 ʼI te temi ʼaē neʼe kole ai e Sesu ki te ʼu tagata e toko fā ke natou liliu ko hana ʼu tisipulo, neʼe mole natou fakatuatuai, kae ‘neʼe natou mulimuli atu aipē iā te ia.’ (Mat. 4:18-22) ʼO toe fēia aipē mo Saulo ʼo Talesi, ʼi te temi ʼaē neʼe tafoki ai pea mo toe ava ai tona ʼu mata, neʼe mole fakatuatuai kae “ ʼi te temi pē ʼaia neʼe fai faka mafola ai ʼo ʼuhiga mo Sesu ʼi te ʼu sinakoka.” (Gāue 9:20) ʼE haga ʼalu aipē ia te temi ki muʼa, pea ko te temi ʼaē ʼe fakalaka, ʼe puli ai ʼo talu ai. Koia ʼaē ʼe maʼuhiga ai kiā tātou ke tou ‘haʼele ohagē ko he ʼu hahaʼi popoto’ ʼo ʼuhiga mo te fakaʼaogaʼi ʼo totatou temi.—Efe. 5:15, 16.
2 Te ʼu Meʼa ʼAē ʼe Hoko Fakafokifā: Ko te ʼu faigamālie ʼaē ʼe tou maʼu ʼi te temi nei moʼo tauhi kiā Sehova, ʼe lagi mole tou toe maʼu anai ʼi he tahi age temi. (Sake 4:14) ʼE hoko kiā tātou fuli ia “te ʼu meʼa fakafokifā.” (Tnk. 9:11) Tahi ʼaē meʼa, ʼe tou liliu fuli ʼo mātutuʼa, pea ʼi te tuʼu ʼaenī, ʼe mole feala ke tou hao mai “te ʼu ʼaho faigataʼa” ʼo te vaivai matuʼa ʼaē ʼe ina fakatuʼakoi ai tatatou tauhi ʼaē kiā Sehova. (Tnk. 12:1) Koia, ʼe mole ko he aga fakapotopoto hatatou fakatuatuai te foaki ʼo totatou maʼuli ki te ʼAtua, peʼe tou fakatalitali ki he ʼu ʼaluʼaga ʼe lelei age ke feala ai hatatou lagolago mālohi ki te minisitelio. (Luka 9:59-62) Ko Apalahamo neʼe loto tokalelei ʼi te ʼu taʼu fakaʼosi ʼo tona maʼuli, ʼo mate “kua mātuʼa pea mo fiafia” he neʼe ina fakaʼaogaʼi fakapotopoto tona maʼuli, ʼo ina foaki kātoa moʼo tauhi kiā Sehova.—Sen. 25:8.
3 Kua Nounou Te Temi: ʼO fēia mo tātou, ʼe tou fia fakaʼaogaʼi fakapotopoto totatou temi heʼe “kua nounou te temi.” (1 Ko. 7:29-31) Kua ovi mai te temi ʼaē kā fakaʼauha ai ia te tuʼu ʼāfea ʼaenī. ʼE mole toe ʼi ai anai he ʼu faigamālie ke tou kau ki te tātānaki lahi ʼo te hahaʼi ʼaē ʼe hagē ko ni ʼu ovi, ʼi te lolotoga ʼo “te taʼukai ʼo te kele.” (Fakh. 14:15) ʼE tonu ke tou tōkakaga ke mole tou tuku ia te ʼu tuʼania ʼo te maʼuli pea mo te ʼu fakafiafia ke natou kaihaʼa ai totatou temi, ʼaē ʼe lelei age tona fakaʼaogaʼi ʼi te minisitelio. (Luka 21:34, 35) ʼE tou fiafia anai mokā tou toe manatuʼi ia te temi muʼa, heʼe tou ʼiloʼi neʼe tou gāue mālohi ki te tānaki ʼo te taʼukai!
4 ʼE tonu ke tou nonofo tōkakaga tuʼumaʼu, ke feala hatatou tali ia te ʼu pilivilēsio gāue fakafiafia ʼaē ʼe feala ke foaki mai. Tou faiga mālohi ke tou tauhi kiā Sehova “ ʼi te temi ʼaē ʼe kei feala ai ke tou ʼui: ‘ ʼI te ʼaho nei.’ ” (Hep. 3:13) Kapau ʼe tou fai fēia, ʼe tou fakahā moʼoni anai ʼe tou popoto, heʼe “ko ʼaē ʼe ina fai ia te finegalo ʼo te ʼAtua ʼe nofo maʼu ia ʼo talu ai.”—1 Soa. 2:17.