Te Polokalama Foʼou ʼo Te Fono ʼo Te Kōkelekāsio
1, 2. Koteā ia te ʼu fetogi ʼaē kā hoko anai ʼo kamata atu ʼi Sānualio 2009?
1 Lolotoga te vāhaʼa ʼo te ʼaho 21-27 ʼo ʼApelili 2008, ʼe ko he logo fakafiafia ʼaē neʼe logo kiai ia te foʼi fāmili fakatautēhina ʼi te mālamanei kātoa. “ ʼO kamata atu ʼi te ʼaho 1 ʼo Sānualio 2009, ʼe fai fakatahi anai ia te Ako Tohi ʼo Te Kōkelekāsio mo te Ako Fakateokalatike pea mo te Fono Gāue. ʼE fetogi anai ia te higoa ʼo te fono Ako Tohi ʼo Te Kōkelekāsio ʼo fakahigoaʼi ko te Ako Tohi-Tapu ʼo Te Kōkelekāsio.”
2 Te Polokalama ʼo Te Fono ʼo Te Vāhaʼa ʼAia: Ko te kātoa ʼo te hola ʼo te fono ʼaia ʼo kau kiai ia te ʼu kātiko pea mo te ʼu faikole, ʼe ko te hola kātoa pea mo minuta e 45. ʼE kamata anai te fono ʼaki te kātiko pea mo te faikole (5 min.), ʼo hoa atu kiai ia te Ako Tohi-Tapu ʼo Te Kōkelekāsio (25 min.). ʼOsi ʼaia pea hoa atu aipē kiai ia te Ako Fakateokalatike (30 min.). Hili ʼaia, pea ʼe hiva te kātiko (5 min.) moʼo kamata ʼaki te Fono Gāue (35 min.). ʼE fakaʼosi anai te fono ʼaki ia te kātiko pea mo te faikole (5 min.). Moʼo tokoni atu kiā koutou ʼo ʼuhiga mo te teuteuʼi ʼo te ʼu fono ʼaia, ko te polokalama ʼo te Ako Tohi-Tapu ʼo Te Kōkelekāsio, mo te Ako Fakateokalatike, pea mo te Fono Gāue ʼe tā anai ʼi te māhina fuli ʼi Te Minisitelio ʼo Te Puleʼaga.
3. ʼE feafeaʼi anai ia te takitaki ʼo te Ako Tohi-Tapu ʼo Te Kōkelekāsio?
3 Te Ako Tohi-Tapu ʼo Te Kōkelekāsio: Ko te fono ʼaia ʼe fai anai ohagē ko te fai ʼo te Ako ʼo Te Tule Leʼo. ʼE mole ʼaoga anai ke kamata ʼaki he fakamanatu ʼo te ako ʼo te vāhaʼa ʼaē kua ʼosi. Kae, ʼe tonu anai ke fai he ʼu ʼuluaki palalau fakanounou ʼi te fono ʼaia. ʼE feʼauga anai ia te temi ki te nofoʼaki kātoa ke natou foaki he ʼu tali fakanounou. ʼE vakavakaʼi anai e te taupau pelesitā ia te ʼu tagata ʼāfea ʼaē kā hinoʼi anai ke fefakahoahoaʼaki ki te takitaki ʼo te fono ʼaia, ʼo takitahi ia te tagata ʼāfea mo tona vāhaʼa.
4. Koteā anai ia te ʼu fetogi ʼo ʼuhiga mo te Fono Gāue?
4 Te Fono Gāue: Ko te Fono Gāue ʼe fai pē anai ohagē ko te agamāhani kae ʼe fakanounou anai ia te ʼu akonaki. ʼE tala anai ia te ʼu logo ohagē ko te agamāhani kae ʼe minuta nima anai. ʼE ko he temi feʼauga anai ki te tala ʼo te ʼu logo tāfito pea mo te lau ʼo ʼihi tohi mai te filiale. Ko te ʼu logo ohagē ko te ʼu fono fai fakamafola, mo te polokalama ʼo te fakamaʼa, mo te lau ʼo te falā pea mo te ʼu meʼa ʼofa, pea mo te ʼu tohi māhani mai te filiale, ʼe mole toe lau anai mai te faiakonakiʼaga, kae ʼe fakapipiki anai ʼi te panō ke feala hona lau e te ʼu tehina mo tuagaʼane. Ko nātou ʼaē kā hinoʼi anai ʼi te polokalama faiakonaki ʼaia ʼe tonu anai ke natou teuteu lelei pea mo mulimuli lelei ki te temi pea mo te ʼu fakatotonu ʼaē ʼe foaki age.
5. Lolotoga te vāhaʼa ʼaē ʼe ʼaʼahi ai e te taupau ʼo te silikō, koteā anai ia te polokalama ki te ʼu fono ʼo te kōkelekāsio?
5 Te ʼAʼahi ʼa Te Taupau ʼo Te Silikō: ʼE mole fetogi anai ia te polokalama ʼo te vāhaʼa ʼaē ʼe ʼaʼahi ai e te taupau ʼo te silikō. ʼI te Feliatolu, ko te Ako Fakateokalatike pea mo te Fono Gāue ʼe fai anai pea hoki hoa kiai he kātiko. Hili ʼaia, pea ʼe fai anai e te taupau ʼo te silikō ia he akonaki e minuta 30. Ohagē ko tona ʼu fai ʼo aʼu mai ki te temi nei ʼi te vāhaʼa ʼo tana ʼaʼahi, ʼe fai anai te Ako Tohi-Tapu ʼo Te Kōkelekāsio ʼi he tahi age afiafi, ʼo hoa kiai ia he kātiko pea ʼe hoko atu anai ʼaki ia te akonaki gāue ʼo te taupau ʼo te silikō. ʼE fakaʼosi anai ia te fono ʼaki ia te kātiko pea mo te faikole.
6. Koteā ia te gāue ʼa te taupau ki te kūtuga?
6 Te ʼu Fono Fai Fakamafola: Ko te ʼu taupau ʼe hinoʼi anai e te kolesi ʼo te kau tagata ʼāfea ke natou tōkakaga ki te gāue fai fakamafola ʼa te ʼu kūtuga pea mo leʼoleʼo ia nātou ʼaē kā kau anai ki te kiʼi kūtuga ʼaia. Kapau ʼe fakaʼaogaʼi he tehina faifekau fakaminisitelio ki te faʼahi ʼaia, ʼe tonu anai ke hinoʼi ia ia ko “he tagata faifekau ki te kūtuga.”
7. Koteā ʼaē ʼe feala ke tou fakaʼamu kiai ʼi te polokalama foʼou ʼo tatatou fono ʼo te kōkelekāsio?
7 Ohagē pē ko tona fakahāhā, ʼe tou maʼu anai ia te faigamālie ke tou fakafiafia, ko te fakalotomālohi ʼo te ʼu tala ʼaia ʼe tokoni mai anai kiā tātou ke mālohi ia tatatou ʼu felōgoi pea mo Sehova. ʼE tokoni mai anai kiā tātou ke tou liliu ko he kau fai fakamafola pea mo he kau faiako faiva, neʼe akoako ke tou fakatuputupu ke lahi age ia te minisitelio.—Efe. 4:13, 14; 2 Tim. 3:17.
8. Ko tatatou teuteu fakatomuʼa ʼe fua lelei feafeaʼi anai kiā tātou ʼo fēia ki ʼihi?
8 Ko te vakaʼi fakatomuʼa ʼo te ʼu fono ʼaia ʼe tokoni mai anai kiā tātou ke tou tokagaʼi lelei ia te ʼu puani tāfito ʼaē ʼe fakamaʼuhigaʼi ʼi te lolotoga ʼo te fonoʼaga fuli. ʼE tou maʼu fuli anai ia te fealagia ʼaē ke tou fai he ʼu tali, ʼo tou fefakalotomālohiʼaki ai. (Loma 1:11, 12; Hep. 10:24) ʼE tonu anai ke tou fakatuʼutuʼu ke ‘ ʼiloga tatatou ʼu faiga’ ʼo tou “fakaʼaogaʼi lelei te folafola ʼo te moʼoni.”—1 Tim. 4:15; 2 Tim. 2:15.
9. Koteā tatatou fakatuʼutuʼu pea koteā tona tupuʼaga?
9 ʼE tou fiafia ʼo ʼuhiga mo te ʼu fetogi maʼuhiga ʼaia ʼo tatatou ʼu fono ʼo te kōkelekāsio. ʼOfa pē ke tou haga fuli ʼo fakaʼaogaʼi ia te ʼu tokoni ʼaē ʼe foaki mai e “te tagata kaugana agatonu mo poto” pea mo tou nonofo ovi ki tatatou Tagata Tauhi Ovi Lahi ʼaē ʼe ina teuteuʼi tātou ki te “mamahi” lahi ʼaē kua ovi mai.—Mat. 24:21, 45; Hep. 13:20, 21; Fakh. 7:14.