Kau Tupulaga, Kotou Haga Tuputupu Hili Takotou Papitema

1. Kotea te fakatuʼutuʼu neʼe kua fakahoko e te tokolahi ʼo te kau tupulaga? Neʼe natou lava fakahoko feafeaʼi te faʼahi ʼaia?

ʼI TE taʼu fuli, ʼe papitema te toko lauʼi afe kau tupulaga. Neʼe kua ke fakahoko koa te faʼahi ʼaia? Kapau koia, ʼe fiafia ʼou tehina mo tuagaʼane ʼo te kokelekasio ʼo ʼuhiga mo koe. Pea ʼe toe fiafia mo Sehova. (Taag. 27:11) Fakakaukauʼi age muʼa ia te ʼu faiga fuli neʼe ke fai moʼo fakahoko te fakatuʼutuʼu ʼaia. ʼE lagi neʼe ke ako fakamalotoloto te Tohi-Tapu lolotoga ni taʼu. Pea neʼe ke tui ko te Tohi-Tapu ʼe ko te Folafola ʼa te ʼAtua. Kae ko te faʼahi ʼae neʼe maʼuhiga age ʼe ko tau iloʼi mo ʼofa kia ia ʼae neʼe Ina tohi te Tohi-Tapu. Neʼe malohi ai tou ʼofa kia Sehova ʼo ke foaki ai tou maʼuli kia te ia pea mo papitema. Pea neʼe ko he tonu lelei ʼaia neʼe ke fai.

2. Kotea ka tou vakaʼi ʼi te alatike ʼaeni?

² ʼE mahino ia, neʼe ʼahiʼahiʼi tau tui ia aluʼaga kehekehe ʼi muʼa ʼo tau papitema. Kae ʼi tau liliu leva ʼae ʼo lahi, ʼe ke tau anai mo he tahi ʼu ʼahiʼahi. ʼE faiga anai ia Satana ke mole ke ʼofa kia Sehova pea ke tuku tau tauhi kia te Ia. (Efe. 4:14) ʼAua naʼa ke tuku ke hoko te faʼahi ʼaia. Kotea ʼae ka tokoni atu ke ke nofo agatonu kia Sehova pea mo ke fakahoko tuʼumaʼu tau fakapapau ʼae neʼe ke fai kia te ia? ʼE ko tau haga tuputupu peʼe “haga faiga malohi” ke ke liliu ʼo fotufotuʼa ʼi te faʼahi fakalaumalie. (Hep. 6:1) ʼO feafeaʼi? ʼE ko te aluʼaga ʼaia ka tou vakaʼi ʼi te alatike ʼaeni.

ʼE FEAFEAʼI HAU LILIU ʼO FOTUFOTUʼA ʼI TE FAʼAHI FAKALAUMALIE?

3. Kotea ʼae ʼe tonu ke haga fai e te kau Kilisitiano fuli hili tanatou papitema?

³ Hili te papitema ʼa te kau Kilisitiano fuli, ʼe tonu ke natou mulimuli ki te tokoni ʼae neʼe foaki e te apositolo ko Paulo ki ʼona tehina mo tuagaʼane ʼi Efeso. Neʼe ina fakalotomalohiʼi natou ke natou liliu “ko he ʼu tagata kua fotufotuʼa” ʼi te faʼahi fakalaumalie. (Efe. 4:13) Ko tona fakaʼuhiga ke natou ‘Haga tuputupu.’ Neʼe ina fakatatau ia te tuputupu fakalaumalie ʼa he tehina ki te faʼahiga tuputupu ʼa he kiʼi toe. ʼE fiafia te ʼu matuʼā moka maʼu hanā kiʼi fanau. Kae ʼe mole nofo veliveli pe anai te kiʼi toe ʼi tona maʼuli katoa. ʼAki te temi, ʼe ina liʼaki anai “ia te ʼu agaaga ʼo he tamasiʼi.” (1 Ko. 13:11) Pea ʼe toe feia pe ki te kau Kilisitiano. ʼE tonu ke tou haga tuputupu ʼi te faʼahi fakalaumalie hili tatatou papitema. Tou vakaʼi he ʼu manatu ʼe tokoni mai anai ke tou fakahoko te faʼahi ʼaia.

4. Ka ke lau ia Filipe 1:9, kotea te kalitate ʼe tokoni atu anai ke ke tuputupu ʼi te faʼahi fakalaumalie? Fakamahino.

⁴ Fakamalohiʼi tou ʼofa kia Sehova. ʼE kua ke ʼofa mamahi ia Sehova. Kae ʼe feala ke ke toe fakatuputupu ia tou ʼofa ʼae kia te ia. ʼO feafeaʼi? Ia Filipe 1:9 (lau), ʼe tou maʼu ai he faʼahiga fai ʼo te faʼahi ʼaia. Neʼe faikole ia Paulo “ke haga tuputupu” te ʼofa ʼa te kau Filipe. Ko tona fakaʼuhiga ʼe feala ke tou fakatuputupu totatou ʼofa. Pea ʼe feala ke hoko te faʼahi ʼaia mo kapau ʼe tou maʼu ia “te ʼatamai malama totonu pea mo te fakasiosio tonu katoa.” Ka lahi tatatou ako ke tou iloʼi ia Sehova, pea ʼe toe lahi age totatou ʼofa kia te ia pea mo leleiʼia ʼona kalitate mo ʼana gaue. ʼE toe ʼasili age anai tatatou fia fakafiafiaʼi tona loto pea ke ʼaua natou fai he meʼa ke mamahi ai. Pea ʼe tou faiga malohi anai ke tou iloʼi pe kotea ʼe ina loto ke tou fai pea mo tona faʼahiga maʼuliʼi.

5-6. ʼE feafeaʼi hau fakamalohiʼi tou ʼofa kia Sehova?

⁵ ʼE tou lava fakamalohiʼi totatou ʼofa kia Sehova ʼaki hatatou ako ke tou iloʼi lelei ia tona ʼAlo he ʼe ina faʼifaʼitakiʼi lelei ʼona kalitate. (Hep. 1:3) Pea kapau ʼe tou fia iloʼi lelei ia ia, ʼe lelei ke tou ako ia te ʼu Evaselio ʼae ʼe fa. Kapau ʼe mole ko hau agamahani te lau ʼo te Tohi-Tapu ʼi te ʼaho fuli, he koʼe ʼe mole ke kamata atu ʼi te temi nei? Ka ke lau te ʼu hisitolia ʼo te maʼuli ʼo Sesu, ke ke tokagaʼi ʼona kalitate. Neʼe fia fakatahi pea mo faipalalau te hahaʼi mo ia pea neʼe tali kaiga. Ohage la, neʼe faʼufua ki te ʼu kiʼi tamaliki. (Mko. 10:13-16) Pea neʼe agalelei mo aga fakakaumeʼa ia Sesu. Ohage la, neʼe mole matataku ʼana tisipulo ʼi te fakaha age kia ia ʼanatou manatu. (Mat. 16:22) ʼE tou iloʼi neʼe faʼifaʼitakiʼi e Sesu tana Tamai. Koia, ko Sehova ʼe ko he ʼAtua ʼe feala ke tou faipalalau faʼifaʼitaliha mo ia. ʼE feala ke tou haga kia te ia ʼi te faikole. Pea ka tou faikole kia te ia, ʼe feala ke tou fakaha age te ʼu meʼa ʼae ʼi ʼotatou loto. ʼE tou iloʼi ʼe mole ina fakamauʼi anai tatou. ʼE ʼofa mo tokaga kia tatou.​—1 Pet. 5:7.

⁶ Neʼe manavaʼofa ia Sesu ki te hahaʼi. Neʼe ui fenei e te apositolo ko Mateo ʼo ʼuhiga mo ia: “ ʼI tana sio ki te hahaʼi kaugā malie, neʼe ʼofa mamahi ia natou, koteʼuhi neʼe natou ogosia pea mo mavetevete ohage ko he ʼu ovi ʼe mole honatou tauhi ovi.” (Mat. 9:36) Kae kotea ʼae ʼe logoʼi e Sehova ʼo ʼuhiga mo te hahaʼi? Neʼe ui fenei e Sesu: “ ʼE mole loto e taku Tamai ʼae ʼe ʼi selo ke mate he tahi ia natou liliki ʼaeni.” (Mat. 18:14) ʼI manatu fakalotofimalie leva. Koia, ka tou ako ke tou iloʼi lelei ia Sesu, pea ʼe tuputupu anai totatou ʼofa kia Sehova.

7. Kotea te ʼu lelei ʼe ke maʼu anai moka ke fakatahi tuʼumaʼu mo te ʼu tehina ʼae kua fakapotopoto?

⁷ ʼE feala ke toe lahi age tou ʼofa kia Sehova pea mo tau tuputupu ʼi te faʼahi fakalaumalie ʼaki hau fakatahi tuʼumaʼu mo ni tehina mo tuagaʼane kua fakapotopoto. ʼE feala hau tokagaʼi ia tonatou fiafia. ʼE mole natou fakahemala ʼi tanatou filifili ʼae ke natou tauhi kia Sehova. Kole age ke natou fakamatala atu te ʼu aluʼaga neʼe hoko kia natou ʼi tanatou tauhi kia Sehova. Pea ka tonu ke ke fai he tonu maʼuhiga, ke ke kole tokoni kia natou. Ke ke manatuʼi “ ʼe fua lelei anai mo kapau ʼe kaugamalie te kau faitokoni.”​—Taag. 11:14.

8. Kotea ʼae ʼe feala ke ke fai moka ke lotolotolua ʼo ʼuhiga mo te meʼa ʼae ʼe ui ʼi te Tohi-Tapu?

⁸ ʼAua naʼa ke lotolotolua. Neʼe tou vakaʼi ʼi te palakalafe 2 ʼe faiga anai ia Satana ke mole ke tuputupu ʼi te faʼahi fakalaumalie. Koia, ʼe faiga anai ke ke lotolotolua ʼo ʼuhiga mo ʼihi akonaki Fakatohi-tapu. Ohage la, ʼe uga anai koe e ʼihi ke ke tui neʼe mole fakatupu tatou e te ʼAtua kae ʼe tou maʼuʼuli la ʼuhi ko te evolisio. ʼE lagi ʼi tau kei veliveli neʼe mole ke tuʼu ʼi te manatu ʼaia. Kae ʼi tau kua lahi leva, ʼe kua akoʼi atu kia koe te evolisio ʼi te fale ako. ʼE lagi hage mai ʼe moʼoni kia koe te ʼu meʼa ʼae ʼe ui atu e ʼau faiako. Kae lagi neʼe heʼeki vakavakaʼi fakalelei e ʼau faiako he ʼu fakamoʼoni ʼe maʼuli moʼoni ia ia ʼae neʼe ina fakatupu ia meʼa fuli. Ke ke manatuʼi ia te pelesepeto ʼaeni ia Taʼaga Lea 18:17: “Ko ia ʼae ʼe ina ʼuluaki fakaha tana manatu ki he aluʼaga ʼe hage mai ia ʼe moʼoni, ʼo kaku ki te hoki ʼomai ʼa te kau fakafeagai ʼo kole age ke ina fakamoʼoni ʼana palalau.” ʼE lelei age ke ke ako fakalelei te meʼa ʼae ʼe ui ʼi te Tohi-Tapu ʼi hau hoko tui ki te ʼu meʼa fuli ʼae ʼe akoʼi atu ʼi te fale ako. Ke ke fai he ʼu fekumi ʼi ʼatatou tohi. Ke ke faipalalau mo he ʼu tehina mo tuagaʼane neʼe tui ki te evolisio ʼi te temi muʼa. Ke ke fakalavelave age pe kotea ʼae neʼe natou tui ai ʼe maʼuli moʼoni he Tupuʼaga ʼofa. Ka tou faipalalau ki he ʼu manatu ʼe fakamoʼoni ai ʼe maʼuli moʼoni te ʼAtua pea ʼe tou fiafia ai.

9. Kotea ʼae ʼe ke ako mai te faʼifaʼitaki ʼa Melissa?

⁹ Neʼe fai e te tuagaʼane ko Melissab he ʼu fekumi ʼo ʼuhiga mo te ʼu meʼa ʼae neʼe fakatupu pea neʼe ʼaoga moʼoni kia ia. ʼE ina ui fenei: “ ʼI te fale ako, ʼe akoʼi ai ko te evolisio ʼe ko he aluʼaga ia ʼe moʼoni. ʼI te kamata, neʼe mole au fia fai he ʼu fekumi he neʼe au mataku naʼa au iloʼi ko te manatu ʼo ʼuhiga mo te evolisio ʼe moʼoni. Kae neʼe au fakakaukauʼi mo feuiʼaki ʼe loto e Sehova ke ʼi ai he ʼu tupuʼaga lelei ʼo tatatou tauhi age kia te ia. Koia, neʼe au fai ai he ʼu fekumi. Neʼe au lau te tohi ʼaeni Y a-t-il un Créateur qui se soucie de vous ? ʼo feia mo te ʼu kaupepa ʼaeni La vie a-t-elle été créée ? mo te Cinq questions à se poser sur l’origine de la vie. Neʼe ko te aluʼaga ʼaia neʼe ʼaoga kia au. Ka na au lave la au, neʼe au foimo fai tautonu pe.”

10-11. Ka ke lau ia 1 Tesalonika 4:3, 4, kotea ʼae ka tokoni atu ke ke maʼa ʼi te aga ʼae ʼe tonu ke fai?

¹⁰ Ke ke liʼaki ia te ʼu aga heʼe ʼaoga fuli pe. ʼE feala ke liliu ʼo malohi ia te holi ki te ʼu felaveʼi fakasino ʼi te temi tupulaga. Pea ʼe lagi uga koe e ʼihi tupulaga ke ke fai te aga ʼaia. ʼE loto e Satana ke ke fakahoko ʼou holi ʼaia. Kae kotea ʼae ʼe tokoni atu ke ke maʼa ʼi te aga ʼae ʼe tonu ke fai? (Lau ia 1 Tesalonika 4:3, 4.) Ka ke faikole kia Sehova, fakaha kia te ia te ʼu meʼa ʼae ʼe ke logoʼi pea mo kole kia te ia ke ina foaki atu te malohi ke ke tekeʼi te ʼu fakahala. (Mat. 6:13) Ke ke manatuʼi ʼe fia tokoni atu pea ʼe mole ina fakamauʼi anai koe. (Pes. 103:13, 14) ʼE feala pe ke toe tokoni atu ia te Folafola ʼa te ʼAtua. ʼE mahino ia, neʼe ʼaoga ke tauʼi e Melissa, ʼae neʼe tou talanoa ki ai, ia he ʼu manatu heʼe ʼaoga. ʼE ina ui fenei: “Ko te faʼahi ʼae neʼe tokoni mai ke au tauʼi ʼoku holi ʼe kovi, ʼe ko te lau ʼo te Tohi-Tapu ʼi te ʼaho fuli. ʼE fakamanatuʼi mai ai kia au ko au ʼa Sehova pea neʼe au fakatotonu ke au tauhi kia te ia ʼi toku maʼuli katoa.”​—Pes. 119:9.

¹¹ ʼAua naʼa ke faiga ke ke fakatokatoka e koe tokotahi tou fihifihia. Ke ke fakaha ki ʼau matuʼā. ʼE moʼoni, ʼe mole faigafua takita palalau ki he ʼu meʼa ʼo ʼuhiga mo kita kae ʼe maʼuhiga takita fai te faʼahi ʼaia. ʼE ui fenei e Melissa: “Neʼe au kole kia Sehova ke ina foaki mai te lototoʼa, pea neʼe au fakaha leva ki taku tamai. Neʼe au logoʼi ai hoku fimalie ʼi taku ʼosi fai te faʼahi ʼaia. Neʼe au iloʼi e fiafia ia Sehova ʼo ʼuhiga mo au.”

12. Kotea ʼae ʼe tokoni atu anai ke ke toʼo he ʼu tonu ʼe lelei?

¹² Tuku ke takitaki koe e te ʼu pelesepeto Fakatohi-tapu. ʼAki te temi, ʼe tuku anai e ʼau matuʼā ke ke fai pe e koe totonu ʼau tonu. Kae ʼe ʼi ai ʼihi aluʼaga ʼe heʼeki ke iloʼi. Kotea ʼe tonu ke ke fai ke mole ke fai he lakahala ʼe fua kovi anai ki ʼau felogoi mo Sehova? (Taag. 22:3) ʼE fakamahino e te tuagaʼane ʼaeni ko Kari pe kotea ʼae neʼe tokoni ki ai ke ina toʼo he ʼu tonu ʼe lelei. Neʼe mahino kia ia ʼe mole ʼaoga ki te ʼu tehina mo tuagaʼane ʼae kua fakapotopoto ke ʼi ai tuʼumaʼu pe he lekula ia aluʼaga fuli. ʼE ina ui fenei: “Neʼe tonu ke au ako ke au iloʼi te ʼu pelesepeto Fakatohi-tapu kae mole gata pe ki te maʼuliʼi ʼo he lekula.” Ka ke lau te Tohi-Tapu, fai te ʼu fehuʼi ʼaeni: ‘Kotea ʼe au ako ʼi te vaega ʼaeni ʼo ʼuhiga mo te manatu ʼa Sehova? ʼE maʼu ai koa he ʼu pelesepeto ʼe tokoni mai ke au iloʼi te meʼa ʼae ʼe tonu ke au fai moʼona fakafiafiaʼi? Kapau ʼe au maʼuliʼi te ʼu pelesepeto ʼaia, kotea te ʼu fua lelei ka au maʼu anai?’ (Pes. 19:7; Esa. 48:17, 18) Ke ke lau te Tohi-Tapu mo metitasio ki te ʼu pelesepeto ʼae ʼe maʼu ai. ʼE faigafua anai kia koe hau toʼo he ʼu tonu ʼe leleiʼia ia e Sehova. Ka ke haga tuputupu ʼi te faʼahi fakalaumalie, ʼe ke tokagaʼi ai anai ʼe mole ʼaoga kei ʼi ai he lekula ia aluʼaga fuli he ʼe ke mahino anai ki te manatu ʼa Sehova.

13. Ka ke lau ia Taʼaga Lea 13:20, kotea ʼae ʼe hoko moka ke fakatahi mo hou ʼu kaumeʼa lelei?

¹³ Ke ke filifili hou ʼu kaumeʼa ʼe ʼoʼofa ia Sehova. Ohage ko tatatou kua vakaʼi ʼi te palakalafe 7, ka ke filifili hou ʼu kaumeʼa pea ʼe tokoni atu anai ke ke liliu ko he tahi kua fakapotopoto. (Lau ia Taʼaga Lea 13:20.) Neʼe kua puli ia te fiafia ʼa te tuagaʼane ʼaeni ko Sara. Kae neʼe hoko he aluʼaga ke ina toe maʼu ai te fiafia. ʼE ina fakamatala fenei: “Neʼe au maʼu leva hoku ʼu kaumeʼa lelei ʼi tona temi totonu. ʼI te vahaʼa fuli, neʼe au fai Te Tule Leʼo mo he kiʼi tehina. Pea ʼaki te tokoni ʼa te tahi kiʼi tehina, neʼe au faitali ai leva ʼi te ʼu fono. ʼI taku filifili ʼoku kaumeʼa ʼaia, neʼe ʼi ai ʼona fua lelei kia au. Neʼe natou fakalotomalohiʼi ai au ke au fai haku ako tokotahi pea ke au toʼo fakamalotoloto te faikole. Neʼe malohi ai ʼaku felogoi lelei mo Sehova pea mo au toe maʼu ai toku fiafia.”

14. Neʼe maʼu feafeaʼi e Julien hona ʼu kaumeʼa lelei?

¹⁴ E feafeaʼi hau maʼu hou kaumeʼa ʼe tokoni atu kia koe? ʼE ui fenei e Julien, ʼae kua tagata ʼafeā ia ʼaho nei: “ ʼI taku kei tupulaga, neʼe au maʼu hoku ʼu kaumeʼa ʼi taku faifakamafola mo te ʼu tehina mo tuagaʼane ʼo te kokelekasio. Neʼe natou faʼafai pea ʼaki ʼanatou faʼifaʼitaki, neʼe au tokagaʼi ai ʼe tou fiafia lahi moka tou faifakamafola. Pea neʼe tupu ai taku fia pionie katoa. Neʼe au toe mahino ai pe koʼe neʼe mole lahi hoku ʼu kaumeʼa lelei koteʼuhi neʼe au faiga pe au ke au kaumeʼa mo natou ʼo toku taʼiake. Ki muli age, neʼe au maʼu leva hoku ʼu kaumeʼa ʼi te Petele. Neʼe tokoni mai ʼanatou faʼifaʼitaki ke au filifili leleiʼi ʼaku fakafiafia pea ke au fakaovi ai kia Sehova.”

15. Ka tou lau ia 2 Timoteo 2:20-22, kotea ia te tokoni neʼe foaki e Paulo kia Timoteo?

¹⁵ Kotea ʼe ke fai moka ke sio ʼe ʼi ai he tahi ʼi te kokelekasio ʼe mole ko he fakakaugā lelei? Neʼe iloʼi e Paulo neʼe ʼi ai ʼihi ʼo te kokelekasio ʼo te ʼuluaki sekulo neʼe mole natou maʼu tuʼumaʼu te manatu ʼa Sehova. Koia ʼae neʼe ina tokoniʼi ai ia Timoteo ke tokaga kia natou ʼaia. (Lau ia 2 Timoteo 2:20-22.) ʼE maʼuhiga ʼaupito ʼatatou felogoi mo Sehova. Neʼe tou faiga malohi ʼo taupau te ʼu felogoi ʼaia. Koia, ʼaua naʼa tou tuku he tahi ke ina maumauʼi ʼatatou felogoi mo te ʼAtua.​—Pes. 26:4.

FAI HAU ʼU FAKATUʼUTUʼU FAKALAUMALIE

16. Kotea he ʼu fakatuʼutuʼu ʼe tonu ke ke fai?

¹⁶ Fai he ʼu fakatuʼutuʼu ʼe fua lelei kia koe. Fai he ʼu fakatuʼutuʼu ʼe fakamalohiʼi ai tau tui pea ʼe tokoni atu ke ke liliu ko he tahi kua fakapotopoto. (Efe. 3:16) Ohage la, ʼe feala ke ke hikihiki ia te fai ʼo tau ako tokotahi pea mo tau lau te Tohi-Tapu. (Pes. 1:2, 3) ʼE feala ke ke toe faiga ke ke faikole tuʼumaʼu ʼaki tou loto katoa. Peʼe ke tokaga ʼo filifili leleiʼi ʼau fakafiafia pea mo fakaʼaogaʼi lelei tou temi. (Efe. 5:15, 16) Koia, ʼe fiafia anai ia Sehova moka sio ki ʼau faiga malohi ʼae ke ke haga tuputupu ʼi te faʼahi fakalaumalie.

17. Kotea ia te ʼu fua lelei ʼe ke maʼu anai moka ke tokoni ki ʼihi?

¹⁷ Kapau ʼe ke fia tuputupu ʼi te faʼahi fakalaumalie, ʼe maʼuhiga ke ke tokoni ki ʼihi. Neʼe ui fenei e Sesu: “ ʼE lahi age te fiafia moka kita foaki, ʼi takita tali.” (Gaue 20:35) ʼE lahi anai te ʼu fua lelei ka ke maʼu mo kapau ʼe ke fakaʼaogaʼi tou temi mo tou malohi moʼo tokoni ki ʼihi. Ohage la, ʼe feala ke ke fai te fakatuʼutuʼu ʼae ke ke tokoni ki he ʼu tehina mo tuagaʼane kua vaivavai peʼe maʼimoa. Ke ke fai te ʼu fehuʼi ʼaeni: ʼE ʼaoga koa kia natou ke tou fai hanatou ʼu fakatau peʼe ke tou fakaha age pe ʼe feafeaʼi te fakaʼaogaʼi ʼo ʼanatou kiʼi masini? Kapau ko koe ko he tehina, fai hau fakatuʼutuʼu ke ke liliu ko he tagata faifekau fakaminisitelio. ʼE feala anai ke lahi age tau tokoni ki ʼou tehina mo tuagaʼane. (Flp. 2:4) Pea tahi, ʼe ke fakaha anai tou ʼofa ki te hahaʼi ʼaki tau tala kia natou te logo lelei ʼo te Puleʼaga. (Mat. 9:36, 37) Pea kapau ʼe feala, faiga ke ke toʼo te selevisi pionie katoa.

18. Kotea ʼae ʼe hoko moka ke pionie katoa?

¹⁸ Ka ke pionie katoa, ʼe lahi anai te ʼu faigamalie ʼe ke maʼu ke ke tuputupu ai. Ohage la, ka ke pionie katoa ʼe feala tau kau ki te Ako ʼo Te Kau Faifakamafola ʼo Te Pule’aga, mo gaue ʼi te Petele peʼe kau ki te ʼu laga fale. ʼE ui fenei e Kaitlyn, ʼae ko he finemui ʼe pionie: “Ko te aluʼaga ʼae neʼe tokoni lahi mai ke au tuputupu ʼi te faʼahi fakalaumalie hili taku papitema, ʼe ko taku faifakamafola tuʼumaʼu mo te ʼu tehina mo tuagaʼane faiva. ʼI taku tokagaʼi ʼanatou faʼifaʼitaki, neʼe au loto ai ke lahi age taku ako te Tohi-Tapu, pea mo liliu ko he fafine faiako faiva.”

19. Kotea te ʼu fua lelei ʼe ke maʼu anai mo kapau ʼe ke haga tuputupu ʼi te faʼahi fakalaumalie?

¹⁹ Kapau ʼe ke haga tuputupu ʼi te faʼahi fakalaumalie, pea ʼe lahi anai te ʼu fua lelei ʼe ke maʼu. ʼE mole ke fakaʼaogaʼi kovi anai tou temi tupulaga ʼo ke fai ni fakatuʼutuʼu ʼe mole hona ʼuhiga. (1 Soa. 2:17) ʼE mole ke tali mamahi anai ʼuhi ko he ʼu tonu ʼe kovi neʼe ke fai. ʼE lava lelei anai tou maʼuli pea mo ke fiafia anai. (Taag. 16:3) ʼE ke fakalotomalohiʼi anai ʼou tehina mo tuagaʼane ʼaki tau faʼifaʼitaki lelei, tatau aipe pe ʼe natou tupulaga peʼe vaivavai. (1 Tim. 4:12) Pea ʼe ke maʼu anai te tokalelei ʼo te loto pea mo he toe fiafia lahi he ʼe ke iloʼi ʼe ke fakafiafiaʼi te loto ʼo Sehova pea ʼe ke kaumeʼa mo ia.​—Taag. 23:15, 16.