ʼE Ke Fakalogo Koa “ ʼAki He Lotolelei”?

1. He koe ʼe faigataʼa ʼi ʼihi temi hatatou fakalogo?

ʼI ʼIHI temi ʼe faigataʼa koa kia koe hau fakalogo? Neʼe toe feia pe mo te Hau ko Tavite. Koia, neʼe ina kole fenei ai ki te ʼAtua: “Fakatupu ia au te fia fakalogo kia te koe.” (Pes. 51:12) Logo la neʼe ʼofa Tavite ia Sehova, kae neʼe faigataʼa ʼi ʼihi temi hana fakalogo. Pea ʼe tou mahino fuli ki ai. Kotea tona tupuʼaga? ʼUluaki, he neʼe tou tutupu ake ʼaki te mole fia fakalogo. Lua, ʼe fakaneke tuʼumaʼu tatou e Satana ke tou agatuʼu kia Sehova, ohage pe ko ia. (2 Ko. 11:3) Pea tolu ʼi te temi nei, ʼe tou sio ki te agatuʼu ʼa te hahaʼi tokolahi, pea “ko te faʼahiga manatu ʼaia ʼe gaue ʼi te temi nei ʼi te ʼu foha ʼo te talagataʼa.” (Efe. 2:2) Koia ʼe tonu ai ke tou tauʼi malohi totatou ʼuhiga agahala pea mo tekeʼi te ʼu fakaneke ʼo tatou e Satana mo tona malama ke tou talagataʼa. ʼE maʼua ai ke tou faiga fakamalotoloto ke tou fakalogo kia Sehova pea mo natou ʼae neʼe ina foaki ki ai te pule.

2. Kotea te fakaʼuhiga ʼo “te fakalogo ʼaki he lotolelei”? (Sakopo 3:17)

² Lau ia Sakopo 3:17. ʼAki te takitaki ʼa te laumalie maʼoniʼoni, neʼe tohi e Sakopo ko natou ʼae ʼe natou maʼu te poto ʼe “fakalogo ʼaki he lotolelei.” Kotea tona fakaʼuhiga? ʼE tonu ke tou fia fakalogo kia natou ʼae neʼe foaki age e Sehova te pule. ʼE mahino ia, ʼe mole kole mai e Sehova ke tou fakalogo ki he tahi ʼe ina fakatotonu mai ke tou fai he meʼa ʼe fakafeagai ki Tana lao.​—Gaue 4:18-20.

3. He koʼe ʼe maʼuhiga kia Sehova tatatou fakalogo kia natou ʼae ʼe pule kia tatou?

³ ʼE lagi faigafua age kia tatou hatatou fakalogo kia Sehova ʼi te fakalogo ki te tagata. ʼE moʼoni heʼe ko te ʼu lao ʼa Sehova ʼe haohaoa. (Pes. 19:7) ʼE mole tatau ia mo te ʼu lao ʼa te tagata. Logo la te faʼahi ʼaia, kae neʼe foaki e tatatou Tamai ʼae ʼi selo te pule ki te ʼu matuʼā, mo te kau pule taki ʼo te puleʼaga pea mo te ʼu tagata ʼafea. (Taag. 6:20; 1 Tes. 5:12; 1 Pet. 2:13, 14) Ka tou fakalogo kia natou, pea ʼi tona ʼuhiga moʼoni, ʼe tou fakalogo kia Sehova. Tou vakaʼi pe ʼe feafeaʼi hatatou fakalogo kia natou ʼaia neʼe foaki age e Sehova te pule, tatau aipe pe ʼe faigataʼa ʼi ʼihi temi hatatou fakalogo ki ʼanatou fakatotonu.

FAKALOGO KI ʼAU MATUʼĀ

4. He koʼe ʼe lahi te ʼu fanau ʼe natou talagataʼa ki ʼanatou matuʼā?

⁴ ʼI te malama ʼaeni, tokolahi te kau tupulaga ʼe natou “talagataʼa ki ʼanatou matuʼā.” (2 Tim. 3:1, 2) Kotea tona tupuʼaga? ʼE manatu ʼihi tupulaga ʼe malualoi ʼanatou matuʼā he ʼe natou foaki age he ʼu tokoni kae mole natou maʼuliʼi. Pea ʼe ui leva e ʼihi tupulaga ʼe mole kei he ʼaoga ʼo te ʼu tokoni ʼo ʼanatou matuʼā ʼi te temi ʼaeni peʼe fefeka fau. Tupulaga, ʼe lagi ke manatu feia mo koe. ʼE faigataʼa ki te tokolahi hanatou mulimuli ki te fakatotonu ʼaeni ʼa Sehova: “Kotou fakalogo ki ʼakotou matuʼā ʼo mulimuli ki te finegalo ʼo te ʼAliki, he ʼe ko te faʼahi ʼaia ʼe faitotonu.” (Efe. 6:1) Kotea ʼae ʼe feala ke tokoni atu ke ke fakalogo?

5. He koʼe ko he faʼifaʼitaki lelei ki te kau tupulaga ia te fakalogo ʼa Sesu ki ʼana matuʼā? (Luka 2:46-52)

⁵ ʼE feala ke ke ako te fakalogo ʼi tau vakaʼi te faʼifaʼitaki lelei ʼa Sesu. (1 Pet. 2:21-24) Neʼe mole agahala, kae neʼe agahala ʼana matuʼā. Logo la te faʼahi ʼaia, kae neʼe fakaʼapaʼapa tuʼumaʼu pe kia naua, maʼia moka ʼi ʼihi temi neʼe nā faihala pe neʼe mole nā mahino kia ia. (Eke. 20:12) Tou vakaʼi te meʼa ʼae neʼe hoko ʼi te taʼu 12 ʼa Sesu. (Lau ia Luka 2:46-52.) ʼI te ʼosi ʼo te Pasikate, neʼe mavae leva ʼana matuʼā mai Selusalemi kae neʼe mole nā tokagaʼi tana puli. ʼI muʼa ʼo tanatou mavae, neʼe tonu foki ke nā vakaʼi pe ʼe katoa ʼanā tamaliki. ʼI tanā maʼu ia ia, neʼe ui age e Malia neʼe nā hoha ʼuhi ko te meʼa ʼae neʼe ina fai. Neʼe feala pe ke tali age e Sesu ki ʼana matuʼā neʼe hala ʼanā palalau. Kae neʼe mole ko te meʼa ʼaia neʼe ina ui age. Neʼe tali fakaʼapaʼapa age pe kia naua. Pea maʼia te mole mahino ʼa Sosefo mo Malia ki ʼana palalau, kae neʼe ‘hoko atu pe te talagafua ʼa Sesu kia naua.’

6-7. Kotea ʼae ka tokoni anai ki te kau tupulaga ke natou fakalogo ki ʼanatou matuʼā?

⁶ ʼU tupulaga,ʼe faigataʼa koa hakotou fakalogo ki ʼakotou matuʼā moka natou faihala peʼe mole natou mahino kia koutou? Kotea ʼae ʼe feala ke tokoni atu? ʼUluaki, kotou manatuʼi pe ʼe kotea ʼae ʼe logoʼi e Sehova. ʼE ui ʼi te Tohi-Tapu, ka kotou fakalogo ki ʼakotou matuʼā, “ ʼe ko te meʼa ʼaia ʼe lelei ki te ʼAliki.” (Kol. 3:20) Kapau ʼe mole natou mahino lelei ki te ʼu meʼa ʼae ʼe kotou ui, peʼe natou fakatuʼu ʼi ʼihi temi he ʼu lekula ʼe faigataʼa, ʼe iloʼi e Sehova. Pea logo te ʼu aluʼaga ʼaia, kae kapau ʼe kotou fakalogo aipe ki ʼakotou matuʼā, ʼe fiafia ai ia Sehova.

⁷ Lua, kotou manatuʼi te ʼu meʼa ʼae ʼe logoʼi e ʼakotou matuʼā. Ka kotou fakalogo, ʼe natou fiafia ai pea ʼe lahi age anai tanatou falala ʼae kia koutou. (Taag. 23:22-25) Pea ʼe toe lelei age anai ʼakotou felogoi. ʼE ui e te tehina ko Alexandre mai Belgique: “ ʼI taku kamata fakalogo ʼae ki ʼaku matuʼā neʼe fetogi ai ʼamatou felogoi. Neʼe lelei age pea matou fiafia.”b Pea tolu, kotou manatuʼi ka kotou ako nei te fakalogo ʼae ki ʼakotou matuʼā, ʼe ʼaoga anai kia kotou ʼi te ka haʼu. ʼE ui e Paulo ʼae ʼe maʼuli ʼi Pelesile: “Ko taku ako ʼae ke au fakalogo ki ʼaku matuʼā ʼe tokoni mai ke au fakalogo kia Sehova pea kia natou ʼae neʼe ina foaki age te pule.” ʼE fakaha ʼi te Folafola ʼa te ʼAtua he tupuʼaga lelei ke kotou fakalogo ai ki ʼakotou matuʼā. ʼE ui fenei: “Ke fua lelei ai kia koe pea ke ke maʼuli fualoa ai ʼi te kele.”​—Efe. 6:2, 3.

8. He koʼe ʼe filifili ʼihi tupulaga ke natou fakalogo ki ʼanatou matuʼā?

⁸ Tokolahi te kau tupulaga neʼe natou tokagaʼi neʼe fua lelei kia natou tanatou fakalogo ki ʼanatou matuʼā. Ko Luiza mai Pelesile, neʼe mole mahino pe koʼe neʼe mole tali e ʼana matuʼā ke ʼi ai hana telefoni. Ko te ʼu tupulaga ʼae neʼe taʼu tahi mo ia neʼe natou takitahi mo tana telefoni. Kae ki muli age, neʼe mahino leva ia Luiza neʼe fia puipui ia ia e ʼana matuʼā. ʼE mahino ʼi te temi nei, ko tana fakalogo ki ʼana matuʼā ʼe mole faigataʼa he ʼe ko te ʼu tokoni ʼae ʼe nā foaki age ʼe ko te meʼa pe ʼaia ʼe ʼaoga kia ia. Ko te tuagaʼane tupulaga ko Elizabeth ʼe maʼuli ʼi Amelika, ʼe kei faigataʼa tana fakalogo ki ʼana matuʼā. ʼE ina fakamahino fenei: “Ka au manatu ʼe mole ʼaoga te lekula ʼae ʼe fai e ʼaku matuʼā, ʼe au toe manatuʼi ai neʼe puipui au e te ʼu lekula ʼae neʼe nā fai ki muʼa atu.” ʼE ui e Monica, ʼae ʼe maʼuli ʼi Arménie ʼe fua lelei tuʼumaʼu pe kia ia moka fakalogo ki ʼana matuʼā.

FAKALOGO KI “TE ʼU PULE MAʼOLUGA”

9. Kotea te manatu ʼa te tokolahi ʼo ʼuhiga mo te fakalogo ʼae ki te ʼu lao?

⁹ Tokolahi te hahaʼi ʼe natou iloʼi ʼe ʼaoga ke ʼi ai he ʼu puleʼaga pea ʼe tonu ke natou fakalogo ki ʼihi lao ʼe fakatuʼu e “te ʼu pule maʼoluga” ʼaia. (Loma 13:1) Kae ka mole natou leleiʼia he lao peʼe fefeka fau kia natou, pea ʼe mole kovi kia natou te talagataʼa ki ai. Ohage la ko te totogi ʼo te ʼu tukuhau. ʼI te fenua ʼi Eulopa, ʼe tokolahi te hahaʼi ʼe mole natou totogi te ʼu tukuhau he ʼe kia natou ʼe heʼe faitotonu. ʼE mole tou punamaʼuli ai ki te mole totogi e te hahaʼi ia te ʼu tukuhau fuli ʼae ʼe fakamaʼua age e te ʼu puleʼaga.

10. He koʼe ʼe tou fakalogo ki he lao tatau aipe peʼe mole tou leleiʼia?

¹⁰ ʼE fakaha lelei ʼi te Tohi-Tapu, ʼe fakatupu e te ʼu puleʼaga fakatagata he ʼu mamahi, ʼe takitaki natou e Satana pea kua vave pe tonatou fakaʼauha. (Pes. 110:5, 6; Ekl. 8:9; Luka 4:5, 6) Kae ʼe toe ui mai ai: “Ko ʼae ʼe fakafeagai ki te ʼu pule ʼaia ʼe fakafeagai ia ki te fakatuʼutuʼu ʼa te ʼAtua.” ʼE moʼoni ko te ʼu pule maʼoluga ʼe ko he fakatuʼutuʼu fakatemi pe ia ʼe fakagafua e te ʼAtua pea ʼe ʼaoga moʼo taupau te tokalelei. Koia ʼe tonu ai ke tou ‘foaki ki te hahaʼi fuli te ʼu meʼa ʼae ʼe tonu ke tou foaki age kia natou’ pea ʼe kau ki ai te ʼu tukuhau, te fakaʼapaʼapa mo te fakalogo. (Loma 13:1-7) ʼE lagi tou manatu ʼe mole he ʼaoga ʼo he lao, peʼe mole faitotonu peʼe fefeka fau. Kae ʼe tou fakalogo kia Sehova, pea ʼe ina kole mai ke tou fakalogo ki te ʼu pule, gata pe moka natou fakamaʼua mai ke tou fai he meʼa ʼe fakafeagai ki te ʼu fakatotonu ʼa te ʼAtua.​—Gaue 5:29.

11-12. ʼO mulimuli kia Luka 2:1-6, kotea ʼae neʼe tonu ke fai e Malia mo Sosefo ke nā fakalogo ki te lao ʼa Sesale, pea neʼe kotea ʼona fua? (Vakaʼi mo te ʼu pāki.)

¹¹ ʼE feala ke tou maʼu he ʼu ako mai te faʼifaʼitaki ʼa Sosefo mo Malia. Neʼe nā lotolelei ke nā fakalogo ki te ʼu pule maʼoluga logo la neʼe faigataʼa. (Lau ia Luka 2:1-6.) ʼI te mahina hiva ʼo te faitama ʼa Malia, neʼe fakamaʼua age ke nā fai he meʼa neʼe faigataʼa ʼaupito. Neʼe fakatotonu e te kovana Loma ko ʼAukusito ke olo te hahaʼi ʼo tohi ʼonatou higoa ʼi te ʼu kolo ʼae neʼe natou tutupu ai. Koia neʼe tonu ai kia Sosefo mo Malia ke nā olo ki Petelehemi. Neʼe tonu ke nā faifagona ia kilometa ʼe 150,ʼo nā hake mo hifo ʼi te ʼu moʼuga. ʼE faigataʼa anai tanā olo ʼaia tafito la kia Malia. Neʼe lagi nā tuʼania ki te maʼuli malolo ʼo Malia ʼo feia mo te kiʼi fanau ʼae ka tupu mai. Kotea anai ka hoko moka fanau ia Malia ʼi tanā faifagona ʼaia? Neʼe ina fuafatuʼi ia ia ʼae ka liliu ko te Mesia. Neʼe ko he ʼu tupuʼaga lelei koa ʼaia ke nā talagataʼa ai ki te fakatotonu ʼaia mai te puleʼaga?

¹² Neʼe mole tuku e Malia mo Sosefo ʼonā tuʼania ʼaia ke nā talagataʼa ai ki te lao ʼa Sesale. Neʼe tapuakinaʼi e Sehova tanā fakalogo. Neʼe kaku haohaoa ia Malia ki Petelehemi, neʼe fanau ai pea neʼe maʼuli malolo pe te kiʼi tamasiʼi. Neʼe toe fakahoko ai mo te ʼu lea fakapolofeta.​—Mik. 5:2.

13. Ka tou fakalogo ki he lao, he koʼe ʼe toe fua lelei ai ki ʼotatou tehina mo tuagaʼane?

¹³ Ka tou fakalogo ki te ʼu pule maʼoluga, ʼe fua lelei kia tatou ʼo feia mo ʼotatou tehina mo tuagaʼane. Kotea tona tupuʼaga? ʼE mole fakatuʼā tatou e te puleʼaga. (Loma 13:4) Pea ʼaki tatatou fakalogo ki te ʼu pule maʼoluga, ʼe feala pe ke natou maʼu ni manatu lelei ʼo ʼuhiga mo te kau Fakamoʼoni ʼa Sehova. Ohage la, kua hili ki ai ni taʼu, ʼi Nigéria, neʼe hufi te Fale Fono e te kau solia kae lolotoga fono te ʼu tehina mo tuagaʼane. Neʼe natou kumi te hahaʼi agatuʼu ʼae neʼe mole natou fia totogi te ʼu tukuhau. Kae neʼe ui e te pule ki te kau solia ke natou mavae ʼi te Fale Fono. Neʼe ina ui fenei: “Ko te kau Fakamoʼoni ʼa Sehova ʼe natou totogi tuʼumaʼu pe tanatou ʼu tukuhau.” Ka ke talagafua ki he lao, ʼe matagafua lelei ai te hahaʼi ʼa Sehova, pea ʼe feala anai ʼi he ʼaho ke puipui ai ʼou tehina mo tuagaʼane.​—Mat. 5:16.

14. Kotea ʼae neʼe tokoni kia Joanna ke lotolelei ʼo fakalogo ki te ʼu pule maʼoluga?

¹⁴ Kae ʼi ʼihi temi ʼe lagi mole tou fia fakalogo ki te ʼu pule maʼoluga. ʼE ui e te tuagaʼane ʼi Amelika ko Joanna: “Neʼe faigataʼa ʼaupito kia au taku fakalogo ki te ʼu pule maʼoluga. Neʼe tupu he neʼe natou fakamamahiʼi ʼihi ʼo toku famili kae neʼe mole natou fai he aga ʼe kovi.” Kae neʼe faiga ia Joanna ke ina fetogi tana faʼahiga manatu. ʼUluaki, neʼe ina fakagata tana lau ʼi Neti te ʼu alatike ʼae neʼe palalau kovi ki te ʼu puleʼaga taki. (Taag. 20:3) Lua, neʼe ina kole kia Sehova ke tokoni age ke falala kia te ia kae mole ki he fetogi puleʼaga. (Pes. 9:9, 10) Tolu, neʼe ina lau he ʼu alatike ʼi ʼatatou tohi ʼo ʼuhiga mo te mole kau ʼae ki te politike. (Soa. 17:16) ʼI te temi nei, kua fakaʼapaʼapa ia Joanna ki te ʼu pule maʼoluga pea mo fakalogo kia natou, ʼo ina maʼu ai te tokalelei mo te fiafia.

FAKALOGO KI TE KAUTAHI ʼA SEHOVA

15. He koʼe ʼe lagi faigataʼa ʼi ʼihi temi hatatou fakalogo ki te kautahi ʼa Sehova?

¹⁵ ʼE kole mai e Sehova ke tou ‘fakalogo kia natou ʼae ʼe natou takitaki tatou’ ʼi te kokelekasio. (Hep. 13:17) Ko Sesu totatou Pule ʼe haohaoa. Kae ko te ʼu tagata ʼae ʼe ina fakaʼaogaʼi moʼo takitaki ʼo tatou ʼe natou heʼe haohaoa. Koia, ʼi ʼihi temi ʼe lagi faigataʼa hatatou fakalogo kia natou, tafito la moka natou kole mai ke tou fai he meʼa kae mole tou loto ki ai. Neʼe hoko te aluʼaga ʼaia ki te apositolo ko Petelo. Neʼe fakatotonu age ke ina fai he meʼa neʼe mole loto ki ai ʼi te kamata. Neʼe ui age e he ʼaselo ke ina kai he ʼu manu neʼe heʼe maʼa ʼi te Lao ʼa Moisese. Kae neʼe fakafisi ki ai ia Petelo. Neʼe mole fakafisi tuʼa tahi pe, kae neʼe tuʼa tolu! (Gaue 10:9-16) Kotea tona tupuʼaga? Neʼe mata faikehe kia ia te fakatotonu ʼa te ʼaselo. Neʼe heʼeki ina fai he meʼa feia ʼi tona maʼuli. Kapau neʼe faigataʼa te fakalogo ʼa Petelo ki te fakatotonu ʼa he ʼaselo haohaoa, ʼe mole tou punamaʼuli ai moka faigataʼa ʼi ʼihi temi hatatou fakalogo ki he ʼu tagata heʼe haohaoa.

16. Kotea ʼae neʼe fai e Paulo logo la neʼe hage kia ia neʼe mole fakapotopoto te meʼa ʼae neʼe fakatotonu age ke ina fai? (Gaue 21:23, 24, 26)

¹⁶ Ko te apositolo ko Paulo neʼe lotolelei ʼo fakalogo maʼia pe neʼe hage kia ia neʼe mole fakapotopoto te ʼu meʼa ʼae neʼe fakatotonu age ke ina fai. Neʼe maʼu logo te ʼu Kilisitiano Sutea neʼe uga e Paulo te kau Sutea fuli “ke natou liakī te Lao ʼa Moisese” pea neʼe mole fakaʼapaʼapa ki ai. (Gaue 21:21) ʼI Selusalemi, neʼe kole age e te ʼu tagata ʼafea ke ʼave e Paulo te ʼu tagata ʼe toko fa ki te fale lotu, pea ke fakamaʼa ia ia mo te ʼu tagata ʼaia ʼo mulimuli ki te Lao. Kae neʼe iloʼi e Paulo neʼe mole kei tonu ke fakalogo te kau Kilisitiano ki te Lao. Pea neʼe mole moʼoni te ʼu logo ʼae neʼe feʼaveʼaki ʼo ʼuhiga mo ia. Kae neʼe fakalogo atu aipe ia Paulo. “ ʼI te ʼaho ake, neʼe [ina] toʼo leva . . . te ʼu tagata ʼaia ʼo natou fakamaʼa ʼo mulimuli ki te Lao.” (Lau ia Gaue 21:23, 24, 26.) Ko te fakalogo ʼaia ʼa Paulo neʼe tokoni ai ki te logo tahi ʼa te ʼu tehina.​—Loma 14:19, 21.

17. Kotea te ako ʼe ke taʼofi mai te faʼifaʼitaki ʼa Stéphanie?

¹⁷ Tou vakaʼi te faʼifaʼitaki ʼa te tuagaʼane ko Stéphanie. Neʼe faigataʼa kia ia tana fakalogo ki te tonu neʼe fai e te ʼu tehina ʼae neʼe tokakaga ki te faifakamafola. Ko ia mo tona ʼohoana neʼe nā kau ki he kiʼi kutuga lea matapule. Neʼe nā fiafia ai. Neʼe fakatotonu leva ke fakagata te kiʼi kutuga ʼaia. Neʼe hinoʼi naua ke nā kau ki he kokelekasio ʼi tanā lea. ʼE ui fenei e Stéphanie: “Neʼe mole au fiafia. Neʼe mole au tui au ʼe ʼaoga lahi he tokoni ki te kokelekasio ʼi taku lea.” Kae logo la te faʼahi ʼaia, neʼe fakalogo pe. ʼE ina hoko atu fenei: “ ʼAki te temi, neʼe au mahino leva neʼe ko he tonu fakapotopoto ʼae neʼe fai e te ʼu tehina. ʼI tamā kokelekasio foʼou, tokolahi neʼe mole honatou famili ʼi te moʼoni. Kua ma liliu ko tonatou famili pea ʼe ma fakalotomalohiʼi natou. ʼE au tokoni ki he kiʼi tehina neʼe fakamamaʼo mai te kokelekasio. Pea kua lahi toku temi ke au fai ai taku ako tokotahi. Kua au maʼu he leʼo ʼo loto ʼe lelei ʼuhi ʼae neʼe au faiga fakamalotoloto ke au fakalogo.”

18. Kotea te ʼu lelei ʼe tou maʼu moka ʼe tou fakalogo?

¹⁸ ʼE feala ke tou ako te fakalogo. Ko Sesu “neʼe ina ako te fakalogo ʼaki te ʼu meʼa ʼae neʼe ina ʼutakiʼi.” (Hep. 5:8) Ohage ko Sesu, ʼe tou ako te fakalogo ʼi he ʼu aluʼaga faigataʼa ʼe tou tau mo ia. Ohage la, ʼi te kamata ʼo te taʼi mahaki COVID-19 neʼe kole mai ke mole tou toe fakatahi ʼi te ʼu Fale Fono pea ke mole tou toe olo ʼo faifakamafola ʼi te ʼu ʼapi. Neʼe faigataʼa koa hau fakalogo? Kua lagi ke mahino, ʼi tau fakalogo neʼe puipui ai koe, mo taupau ai te logo tahi ʼo te kokelekasio pea neʼe fiafia ai ia Sehova. Kua feala ai kia tatou fuli ke tou fakalogo ki te ʼu tuʼutuʼuni ʼae ka foaki mai anai lolotoga te mamahi lahi. ʼE fakalogo anai totatou haofaki ki tatatou fakalogo.​—Sopo 36:11.

19. Kotea te tupuʼaga ʼo tau fia fakalogo?

¹⁹ Neʼe tou vakaʼi ʼi te alatike ʼaeni ʼe lahi te ʼu tapuakina ʼe tou maʼu moka ʼe tou fakalogo. Kae ʼe tou fakalogo kia Sehova tafito he ʼe tou ʼoʼofa ia te ia pea ʼe tou fia fakafiafiaʼi tona loto. (1 Soa. 5:3) ʼE mole feala anai ke tou liufaki age te ʼu meʼa fuli ʼae neʼe ina fai maʼa tatou. (Pes. 116:12) Kae ʼe feala ke tou fakalogo kia te ia pea mo natou ʼae neʼe ina foaki ki ai he faʼahiga pule. Kapau ʼe tou fakalogo, ʼe tou fakaha ai ʼe tou aga fakapotopoto. Pea ka tou aga fakapotopoto, ʼe tou fakafiafiaʼi ai te loto ʼo Sehova.​—Taag. 27:11.