Ke Ke Faʼifaʼitakiʼi Te ʼu ʼAselo Agatonu

1-2. (1) Kotea te ʼu fahaʼi ʼe tou kehekehe ai mo te kau ʼaselo? (2) Kotea te ʼu fahaʼi ʼe tou tatau ai mo te kau ʼaselo?

NEʼE taki mai koe e Sehova ki te moʼoni, koia ʼae neʼe ina fakaafe koe ke ke kau ki tona famili ʼofaina, ʼae ʼe tauhi age kia te ia. ʼE kau ai ʼotatou tehina mo tuagaʼane mai te ʼu fenua kehekehe pea ʼe ʼi ai mo te toko lauʼi miliona ʼaselo. (Tan. 7:9, 10) Ka tou manatu ki te ʼu ʼaselo pea ʼe tou ui ʼe natou kehekehe ʼosi mo tatou. Pea ʼe moʼoni te fahaʼi ʼaia. Koia, neʼe ʼuluaki fakatupu natou ʼi te tagata. (Sopo 38:4, 7) ʼE natou malolohi ʼaupito age ia tatou. ʼE mole tou kakusia tonatou ʼuhiga maʼoniʼoni mo faitotonu koteʼuhi ʼe tou agahala.—Luka 9:26.

² Logo la te ʼu fahaʼi ʼae ʼe tou kehekehe ai mo te ʼu ʼaselo, kae ʼe toe lahi pe te ʼu faʼahi ʼe tou tatau ai. Ohage la, ʼe feala ke tou faʼifaʼitakiʼi te ʼu kalitate ʼo Sehova, ohage pe ko te kau ʼaselo. ʼE tou maʼu te loto faʼitaliha ohage pe ko natou. ʼE natou takitahi tona higoa mo tona ʼuluagaaga, pea ʼe natou tahi fai pe te gaue ʼae neʼe foaki age e Sehova, ohage pe ko tatou. Pea ohage ko te kau ʼaselo, neʼe fakatupu tatou mo te fealagia ʼae ke tou atolasio ki totatou Tupuʼaga.—1 Pet. 1:12.

3. Kotea ʼae ʼe tou ako mai te kau ʼaselo agatonu?

³ ʼE lahi te ʼu fahaʼi ʼe tou tatau ai mo te kau ʼaselo, koia ʼe feala ke tou maʼu he ʼu fakalotomalohi mai tanatou faʼifaʼitaki pea mo lahi he ʼu ako mai ia natou. ʼI te alatike ʼaeni, ʼe tou maʼu anai he ʼu ako mai tanatou faʼifaʼitaki. ʼE tou vakaʼi anai pe ʼe feafeaʼi hatatou faʼifaʼitakiʼi tanatou agavaivai, mo tonatou ʼoʼofa ki te hahaʼi, mo tanatou faʼa kataki pea mo tanatou faiga malohi ʼo taupau ke maʼa te kokelekasio.

ʼE AGAVAIVAI TE KAU ʼASELO

4. (1) ʼE fakaha feafeaʼi e te kau ʼaselo tanatou agavaivai? (2) He koʼe ʼe agavaivai te kau ʼaselo? (Pesalemo 89:7)

⁴ ʼE agavaivai te kau ʼaselo agatonu. Logo la ʼe lahi te ʼu aluʼaga kua natou mahino ki ai, mo natou malolohi ʼaupito pea mo popoto kae ʼe natou fakalogo pe ki te ʼu fakatotonu ʼa Sehova. (Pes. 103:20) Ka natou fai te ʼu gaue ʼae neʼe foaki age e Sehova kia natou, ʼe mole natou fia fakaha neʼe ko natou ʼae neʼe natou fakahoko, pea ʼe mole natou fakaʼaogaʼi tonatou malohi ke tokagaʼi ai ia natou. ʼE natou fiafia ʼi te fakahoko te ʼu gaue ʼa Sehova logo la ʼe mole fakaha ʼonatou higoa.a (Sen. 32:24, 29; 2 Hau 19:35) ʼE mole natou fia tali te kololia ʼae ʼe tonu pe ke foaki kia Sehova. He koʼe ʼe agavaivai feia te kau ʼaselo? Koteʼuhi ʼe natou ʼoʼofa kia Sehova mo fakaʼapaʼapa lahi kia te ia.—Lau ia Pesalemo 89:7.

5. Neʼe fakaha feafeaʼi e te ʼaselo ia tana agavaivai ʼi tana fakatonutonuʼi te apositolo ko Soane? (Vakaʼi mo te pāki.)

⁵ Tou vakaʼi he fakamatala ʼi te Tohi-Tapu, ʼe ha ai te agavaivai ʼa te kau ʼaselo. ʼI te taʼu 96 H.T.S. neʼe fakaha e te ʼaselo ki te apositolo ko Soane he aluʼaga fakaofoofo, pea ʼe mole tou iloʼi te higoa ʼo te ʼaselo ʼaia. (Fkha. 1:1) Neʼe punamaʼuli ʼosi ʼi te meʼa ʼae neʼe sio ki ai, koia neʼe fia atolasio ai ki te ʼaselo. Kae neʼe foimo taʼofi atu aipe e te ʼaselo, ʼo ina ui age ki ai: “Tokaga! ʼAua naʼa ke fai te meʼa ʼaia! Koteʼuhi ko au ko he kaugana ohage pe ko koe pea mo ʼou tehina . . . Ke ke atolasio ki te ʼAtua!” (Fkha. 19:10) Neʼe ha ʼi te ʼu palalau ʼa te ʼaselo ia tana agavaivai. Neʼe mole ina tali ke fakakololiaʼi peʼe vikiʼi ia ia. Neʼe ina ui age kia Soane ke atolasio kia Sehova ʼAtua. Pea tahi, neʼe mole fia fakaha age e te ʼaselo ʼe maʼoluga age ia ʼi te apositolo. Logo la neʼe kua fualoa tana tauhi kia Sehova ia Soane, pea mo malohi age ia ia, kae neʼe agavaivai ʼo ina ui ‘ko ia ko he kaugana ohage ko ia.’ Logo la neʼe fakatonutonuʼi e te ʼaselo ia Soane, kae neʼe mole ina munaʼi ia te apositolo. Neʼe palalau kia ia ʼaki he agalelei. Neʼe lagi mahino kia ia, neʼe tuʼutuli ifo la ia te apositolo ʼaia kua matuʼa, he neʼe manavahe ʼi te meʼa ʼae neʼe sio ki ai.

6. ʼE feafeaʼi hatatou faʼifaʼitakiʼi te agavaivai ʼa te kau ʼaselo?

⁶ ʼE feafeaʼi hatatou faʼifaʼitakiʼi te agavaivai ʼa te kau ʼaselo? Ohage pe ko te kau ʼaselo, ʼe tou lava fai he ʼu gaue ʼe tuku mai, kae ʼe mole tou laupisiʼi mo vikiʼi pe ia tatou ʼuhi ko te ʼu gaue neʼe tuku mai. (1 Ko. 4:7) Pea tahi, kapau ʼe kua fualoa tatatou tauhi kia Sehova ʼi ʼihi peʼe kua tou maʼu he ʼu pilivilesio, ʼaua naʼa tou manatu ʼe tou maʼoluga age ia natou. Koia, ka tuku mai he ʼu gaue, pea ʼe toe maʼuhiga age ke tou fakaʼuhiga ia tatou ohage ko natou ‘ ʼae ʼe veliveli.’ (Luka 9:48) Ohage ko te kau ʼaselo, ʼe tou fia tauhi ʼotatou tehina mo tuagaʼane kae ʼe mole tou loto ke tou fakamaʼuhigaʼi ia tatou.

7. ʼE tou fakaha feafeaʼi te agavaivai moka tou tokoniʼi peʼe fakatonutonuʼi he tahi?

⁷ ʼE tou toe fakaha te agavaivai moka tou tokoniʼi peʼe fakatonutonuʼi he tehina, pe ko he tuagaʼane peʼe ko hakita fanau. ʼI ʼihi temi, ka tou foaki he tokoni ʼe tonu ke tou ʼave fakahagatonu. Kae ʼe feala ke tou fai te fahaʼi ʼaia ʼaki he agalelei ke ʼaua naʼa lotovaivai. Ka tou fai feia, ʼe tou faʼifaʼitakiʼi ai te ʼaselo, ʼae neʼe ina fakatonutonuʼi ia Soane ʼaki he agalelei. Koia, kapau ʼe tou manatu ʼe mole tou maʼoluga age ʼi ʼihi, ʼe tou foaki anai he ʼu tokoni ʼe fakatafito ki te Tohi-Tapu. Pea ʼe tou fai ʼaki anai he fakaʼapaʼapa mo he manavaʼofa.—Kol. 4:6.

ʼE ʼOʼOFA TE KAU ʼASELO ʼI TE HAHAʼI

8. (1) Ka tou lau ia Luka 15:10, ʼe fakaha feafeaʼi e te kau ʼaselo tonatou ʼoʼofa ki te hahaʼi? (2) Kotea te gaue ʼe fai e te kau ʼaselo moka ʼe tou faifakamafola? (Vakaʼi mo te pāki.)

⁸ ʼE tokagaʼi e te kau ʼaselo te ʼu aluʼaga ʼae ʼe hoko ki te hahaʼi. ʼE ʼoʼofa ia natou. ʼE natou fiafia moka fakahemala he tahi neʼe agahala, ko tona fakaʼuhiga moka toe liliu mai kia Sehova he ovi neʼe hehe. ʼE natou toe fiafia moka fai e he tahi he ʼu fetogi ʼi tona maʼuli pea mo tauhi kia Sehova. (Lau ia Luka 15:10.) Pea tahi, ʼe toe tokoni mai te kau ʼaselo moka ʼe tou faifakamafola. (Fkha. 14:6) Logo la ʼe mole natou palalau fakahagatonu mo te hahaʼi, kae ʼe feala ke natou taki tatou ki he tahi ʼe ina fia iloʼi ia Sehova. ʼE mahino ia, ʼe mole ko te kau ʼaselo pe ʼae ʼe natou taki tatou ki te hahaʼi. ʼE toe fakaʼaogaʼi e Sehova he tahi age aluʼaga, ohage la, ko tona laumalie maʼoniʼoni moʼo tokoni ki te hahaʼi peʼe taki ʼana kaugana kia natou ʼaia. (Gaue 16:6, 7) Kae ʼe lahi age pe te ʼu lakaga ʼae ʼe ina fakaʼaogaʼi ai te kau ʼaselo. Koia ʼe tou tui papau ai, ʼe tou gaue fakatahi mo te kau ʼaselo moka ʼe tou fakamafola te logo lelei.—Vakaʼi te ʼa takai “Neʼe Tali Ki ʼAnatou Faikole.”b

9. ʼE feafeaʼi hatatou faʼifaʼitakiʼi te ʼofa ʼo te kau ʼaselo ki te hahaʼi?

⁹ ʼE feafeaʼi hatatou faʼifaʼitakiʼi te ʼofa ʼo te kau ʼaselo ki te hahaʼi? Ka tala ifo ʼi hatatou fono kua toe liliu mai he tahi kia Sehova, pea ʼe tou fiafia ohage pe ko te kau ʼaselo. Tou olo ʼo fakafiafia mo ia pea mo fakaha ki ai ʼe tou ʼoʼofa ai. (Luka 15:4-7; 2 Ko. 2:6-8) ʼE tou toe faʼifaʼitakiʼi te kau ʼaselo moka ʼe tou fai ia meʼa fuli ʼe tou lavaʼi ʼi te faifakamafola. (Ekl. 11:6) Pea ʼe tou iloʼi ʼe tokoni mai te kau ʼaselo moka ʼe tou tala ia te logo lelei. Koia tou kumi he ʼu aluʼaga ke tou tokoni ki ʼotatou tehina mo tuagaʼane ʼi tanatou faifakamafola. Ohage la, ʼe feala ke tou fakatuʼutuʼu ke tou faifakamafola fakatahi mo te ʼu kauga fagona foʼou. ʼE feala ke tou toe tokoni ki te ʼu tehina mo tuagaʼane matutuʼa, peʼe ko natou ʼae ʼe tau mo ni mahaki ke tou gaue fakatahi.

10. Kotea ʼae ʼe tou ako mai te aluʼaga ʼae neʼe hoko kia Sara?

¹⁰ Kae ʼe feafeaʼi moka ʼe tou tau mo he aluʼaga mole kei feala ai hatatou gaue lahi maʼa Sehova? ʼE feala pe ke tou maʼu he ʼu puleʼaki ke tou gaue fakatahi ai mo te kau ʼaselo ʼi te faifakamafola. Tou vakaʼi te meʼa ʼae neʼe hoko ki te tuagaʼane mai Initia ko Sara.c Hili ki ai taʼu ʼe 20 ʼi tana gaue pionie, neʼe mahaki leva. Neʼe mole kei lava haʼele pea neʼe takoto pe ʼi tona palepale. Neʼe lotomamahi ʼaupito ai. Kae ʼaki te tokoni ʼofa ʼo ʼona tehina mo tuagaʼane pea mo tana lau tuʼumaʼu ia te Tohi-Tapu, neʼe ina toe maʼu ai tona fiafia. Neʼe ina fetogi tana faʼahiga faifakamafola ʼo mulimuli ki tona aluʼaga. Neʼe mole kei feala pe la hana heka ki he hekaʼaga ke feala ai hana faitohi. Ko te meʼa ʼae neʼe kei feala ke ina fai ko te faifakamafola ʼi te telefoni. Neʼe ina fai ai tana ʼu ʼaʼahi ʼaki te telefoni pea neʼe natou ui age ki ai, ʼe ʼi ai ʼihi hahaʼi ʼe natou fia ako te Tohi-Tapu. Kotea ʼae neʼe hoko? Hili ki ai ni mahina, neʼe ko ako Tohi-Tapu ʼe 70 ʼa Sara. Kae neʼe mole feala ke ina fai fuli, koia neʼe ina foaki ai ʼihi ako ki he ʼu tehina mo tuagaʼane ʼo tana kokelekasio. Pea ʼi te temi nei, tokolahi te kau ako kua natou kau ʼi te ʼu fono. ʼE mahino ia, neʼe fiafia lahi ai te kau ʼaselo ʼi tanatou gaue fakatahi mo te ʼu tehina mo tuagaʼane ohage ko Sara. Kotea tona tupuʼaga? He neʼe natou fai ia meʼa fuli ʼe natou lavaʼi ʼi te faifakamafola.

ʼE FAʼA KATAKI TE KAU ʼASELO

11. Neʼe fakaha feafeaʼi e te kau ʼaselo agatonu te faʼa kataki?

¹¹ ʼE tuku mai e te kau ʼaselo he faʼifaʼitaki lelei ʼo ʼuhiga mo te faʼa kataki. Talu mai taʼu ʼe lauʼi afe mo tanatou katakiʼi te heʼe faitotonu pea mo te agakovi. Neʼe natou sisio ki te agatuʼu ʼa Satana mo ʼihi ʼaselo kia Sehova. Kae ʼi muʼa atu neʼe natou tauhi fakatahi kia Sehova. (Sen. 3:1; 6:1, 2; Suta 6) ʼE fakaha mai ʼi te Tohi-Tapu neʼe fehokosi ia he ʼaselo agatonu mo he temonio malohi. (Tan. 10:13) Pea talu mai te temi ʼo Atama mo Eva, neʼe sisio te kau ʼaselo ʼe mole kaugamalie te hahaʼi ʼae ʼe natou filifili ke natou tauhi kia Sehova. Logo la te ʼu faʼahi ʼaia, kae ʼe hoko atu pe e te kau ʼaselo agatonu tanatou tauhi kia Sehova ʼaki te fiafia mo te faʼafai. ʼE natou iloʼi kua fakatuʼutuʼu e te ʼAtua he temi ke ina pulihi ai te kau heʼe faitotonu.

12. Kotea ʼae ʼe tokoni mai ke tou faʼa kataki?

¹² ʼE feafeaʼi hatatou faʼifaʼitakiʼi te faʼa kataki ʼa te kau ʼaselo? Ohage ko te kau ʼaselo, ʼe lagi tou sisio mata ki he ʼu aga heʼe faitotonu peʼe tou katakiʼi te fakafeagai. Kae ohage pe ko natou, ʼe tou iloʼi kua fakatuʼutuʼu e te ʼAtua he temi ke ina pulihi ai te agakovi. Koia, tou faʼifaʼitakiʼi te kau ʼaselo agatonu, “ ʼaua naʼa tou tuku te fai ʼo te meʼa ʼae ʼe lelei.” (Kal. 6:9) Pea ʼe fakapapauʼi mai e Sehova ʼe tokoni mai anai ke tou faʼa kataki. (1 Ko. 10:13) Koia, tou kole kia Sehova ke ina foaki mai tona laumalie ke tou maʼu te kataki fualoa mo te fiafia. (Kal. 5:22; Kol. 1:11) Kotea ʼae ʼe tonu ke tou fai moka hoko mai te fakafeagai? Tou falala katoa kia Sehova pea ʼaua naʼa tou matataku. ʼE tokoni tuʼumaʼu mai anai ia te ʼAtua moʼo fakamalohiʼi tatou.—Hep. 13:6.

ʼE TOKAKAGA TE KAU ʼASELO KE MAʼA TE KOKELEKASIO

13. Kotea te gaue maʼuhiga ʼe fai e te ʼu ʼaselo ʼi te ʼu ʼaho fakaʼosi ʼaeni? (Mateo 13:47-49)

¹³ ʼI te ʼu ʼaho fakaʼosi ʼaeni, ʼe foaki e Sehova ki te kau ʼaselo he gaue maʼuhiga. (Lau ia Mateo 13:47-49.) Ka tou faifakamafola, ko te toko lauʼi miliona hahaʼi mai te ʼu fenua kehekehe ʼe natou fia logo ki te logo lelei. ʼE ʼi ai ʼihi ia natou ʼe liliu ko he ʼu tisipulo ʼa Sesu kae mole feia ʼihi. Neʼe foaki age ki te kau ʼaselo te gaue ʼae ke natou “toʼo kehe te hahaʼi agakovi mai te hahaʼi faitotonu.” Koia, ʼe tonu ai ke natou taupau ke maʼa te kokelekasio. Kae ʼe mole tou ui leva ʼe mole feala anai ke hoko ni fihifihia ʼi te kokelekasio, pea ʼe mole feala leva ke toe liliu mai he tahi neʼe toʼo ʼi te kokelekasio. Kae ʼe feala ke tou tui papau, ʼe tokaga te kau ʼaselo ki te taupau ke maʼa ʼo te kokelekasio.

14-15. ʼE feafeaʼi hatatou faʼifaʼitakiʼi te kau ʼaselo ʼi tanatou taupau ʼae ke maʼa ia te kokelekasio? (Vakaʼi mo te ʼu pāki.)

¹⁴ ʼE feafeaʼi hatatou faʼifaʼitakiʼi te faiga ʼa te kau ʼaselo ke taupau ke maʼa ia te kokelekasio? ʼAki hatatou fai e tatou takitokotahi ia meʼa fuli moʼo taupau ke maʼa te kokelekasio ʼi te faʼahi fakalaumalie pea mo te aga. Tou faiga muʼa ke tou puipui totatou loto. ʼO feafeaʼi? ʼAki hatatou filifili hotatou ʼu kaumeʼa lelei, pea mo siʼaki ia meʼa fuli ʼae ʼe ina maumauʼi ai ʼatatou felogoi lelei mo Sehova. (Pes. 101:3) ʼE toe feala foki ke tou tokoni ki ʼotatou tehina mo tuagaʼane ke natou nonofo agatonu kia Sehova. Ohage la, ka tou iloʼi neʼe fai e he tehina peʼe ko he tuagaʼane he agahala mamafa, kotea ʼae ʼe tonu ke tou fai? ʼI totatou ʼofa ki ai, ʼe tou ui age anai ke alu ʼo fakaha ki te ʼu tagata ʼafeā. Kapau leva ʼe mole ina fai te fahaʼi ʼaia, ʼe tou fakaha anai tatou ki te ʼu tagata ʼafea. ʼE tou loto ke maʼu fakavilivili e totatou tehina peʼe tuagaʼane ʼae kua vaivai ʼi te faʼahi fakalaumalie ia he tokoni.—Sakp. 5:14, 15.

¹⁵ Kae neʼe fai e ʼihi ni agahala mamafa pea neʼe tonu ke toʼo ʼi te kokelekasio. Ka hoko te fahaʼi ʼaia, ʼe tou ‘tuku anai tatatou fakatahi mo natou.’d (1 Ko. 5:9-13) Ko te fakatuʼutuʼu ʼaia, ʼe ina taupau ai te maʼa ʼo te kokelekasio. Pea ka tou fakagata tatatou fakatahi mo natou ʼae kua toʼo ʼi te kokelekasio, ʼe tou fakaha ai ʼe tou agalelei kia natou. ʼI tatatou fakalogo ʼae kia Sehova, ʼe tou tokoni ai kia natou ke natou mahino ʼe tonu ke natou toe liliu mai kia Sehova. Pea ka natou toe liliu mai, ʼe tou fakafiafia anai fakatahi mo Sehova mo te kau ʼaselo.—Luka 15:7.

16. Kotea te ʼu kalitate ʼo te ʼu ʼaselo ʼe ke fia faʼifaʼitakiʼi?

¹⁶ Ko he toe pilivilesio lahi te fakafealagia mai e Sehova ke tou iloʼi te kau ʼaselo pea ke tou gaue fakatahi mo natou. Koia, tou faʼifaʼitakiʼi ʼonatou kalitate. Ohage la, ko tanatou agavaivai, mo tonatou ʼofa ki te hahaʼi, mo tanatou faʼa kataki pea mo tanatou faiga malohi ʼae ke natou taupau ke maʼa ia te kokelekasio ʼi te faʼahi fakalaumalie pea mo te aga. Kapau ʼe tou faʼifaʼitakiʼi te kau ʼaselo agatonu, pea ʼe tou kau anai ki te famili ʼo Sehova ki te heʼe gata.