Te ʼu Fehuʼi ʼa Te Kau Lautohi

Kotea te “fakatuʼutuʼu” kua vave ʼai pe e Sehova ki te loto ʼo te ʼu puleʼaga?

ʼE tou lau fenei ia Fakaha 17:​16, 17 ʼo ʼuhiga mo te kamata ʼo te mamahi lahi: “Ko te ʼu tala ʼe hogofulu ʼae neʼe ke sio ki ai pea mo te manu fekai, ʼe natou fehihiʼa anai ʼi te fafine paomutu, pea ʼe natou toʼo anai ʼana meʼa fuli pea mo tuku telefua ia ia, pea ʼe natou kai anai tona kakano pea mo tutu katoa ia ia ʼaki te afi. Koteʼuhi neʼe ʼai e te ʼAtua ki ʼonatou loto te manatu ʼae ke natou fakahoko tana fakatuʼutuʼu, ʼei, ke natou fakahoko tanatou fakatuʼutuʼu ʼaki tanatou foaki tanatou pule fakahau ki te manu fekai.” ʼI muʼa atu, neʼe ui ʼi ʼatatou tohi ko te “fakatuʼutuʼu” ka ʼai e Sehova ki te loto ʼo te ʼu puleʼaga, ʼe ko te maumauʼi ʼo te ʼu lotu hala.

Kae neʼe tonu ke toe vakaʼi te fakamahino ʼaia. Ko te “fakatuʼutuʼu” ʼae ka ʼai e Sehova ki te loto ʼo te ʼu puleʼaga, ʼe fakaʼuhiga ia ki tanatou foaki “tanatou pule fakahau ki te manu fekai.” ʼE tou tali anai ki te ʼu fehuʼi ʼaeni ke tou mahino pe ʼe hoko feafeaʼi anai te lea fakapolofeta ʼaia.

Ko ai ʼae ʼe talanoa ki ai ʼi te lea fakapolofeta ʼaia? Ko “te fafine paomutu” ʼae ʼe toe higoa ko “Papiloni Lahi,” ʼe ina fakata te kautahi fakamalamanei ʼo te ʼu lotu hala. Ko “te manu fekai lanu kula” ʼe ina fakata te Kautahi ʼo Te ʼu Puleʼaga (te ONU). Neʼe fakatuʼu te kautahi ʼaia ʼi te 1919 moʼo taupau te tokalelei ʼi te malamanei. Pea neʼe higoa ʼi te temi ʼaia ko te Sosiete ʼo Te ʼu Puleʼaga. (Fkha. 17:​3-5) ʼE fakata e “te ʼu tala ʼe hogofulu” te ʼu puleʼaga fuli ʼae ʼe natou lagolago ki te manu fekai.

ʼE felogoi feafeaʼi te fafine paomutu pea mo te manu fekai lanu kula? “ ʼE heka” te fafine paomutu ʼi te manu fekai. Ko tona fakaʼuhiga ʼe lagolago ki te manu fekai, pea ʼe toe faiga pe la ke fai e te manu fekai te ʼu meʼa ʼae ʼe loto ki ai.

Kotea ʼae ka hoko ki te fafine paomutu? Ko te manu fekai pea mo te ʼu tala ʼe hogofulu ʼae ʼe natou lagolago ki ai, ʼe natou fehihiʼa anai ʼi te fafine paomutu. ʼI te lahi ʼo tanatou fehihiʼa ʼi ai, ʼe natou toʼo anai ʼana meʼa fuli pea mo fakaha ki te hahaʼi tana ʼu aga ʼae ʼe kovi. ʼE natou maumauʼi katoa anai te fafine paomutu. Pea ka natou fai anai te faʼahi ʼaia, ʼe natou fakahoko ai te fakamau ʼa te ʼAtua. (Fkha. 17:1; 18:8) ʼE pulihi katoa anai te ʼu lotu hala. Kae ʼi muʼa ʼo te hoko ʼo te faʼahi ʼaia, ʼe uga anai e Sehova ia te ʼu puleʼaga ke natou fai he meʼa heʼeki hoko ʼi muʼa atu.

ʼE uga anai e Sehova te ʼu puleʼaga ke natou fai tea? ʼE ina ʼai anai ki te loto ʼo te ʼu puleʼaga “tana fakatuʼutuʼu” ʼae ke natou foaki tanatou pule fakahau ki te manu fekai lanu kula, ʼae ko te Kautahi ʼo Te ʼu Puleʼaga. (Fkha. 17:13) Ko tona fakaʼuhiga, ʼe mole ko he manatu ia ʼa te ʼu puleʼaga ke natou foaki tanatou pule ki te manu fekai. ʼE ui ʼi te lea fakapolofeta, ʼe ko Sehova ʼae ka ina uga anai natou ke natou fai te faʼahi ʼaia. (Taag. 21:1; vakaʼi mo Esaia 44:28) ʼE mole hoko mamalie anai te fetogi ʼaia. Kae ʼe hoko fakapunamaʼuli anai. Pea ʼi te maʼu pe e te manu fekai ia te pule ʼaia ʼe ina fakahoko anai te fakamau ʼa Sehova ki te ʼu lotu hala. ʼE ina pulihi anai natou ʼo talu ai.

Koia kotea anai ka hoko? ʼAua naʼa tou ʼamanaki ʼe tou sisio anai ʼi te ʼu tala logo ʼe fakatoʼo mamalie e te ʼu puleʼaga tanatou pule ki te Kautahi ʼo Te ʼu Puleʼaga. Koʼeni te aluʼaga ʼe tou ʼamanaki anai ki ai: ʼE ʼai fakapunamaʼuli anai e Sehova ki te loto ʼo te ʼu puleʼaga ke natou foaki tanatou pule ki te manu fekai. ʼI te lakaga ʼaia, ʼe tou iloʼi ai anai kua ovi mai te mamahi lahi. Koia ʼi tatatou fakatalitali ki ai, “tou nonofo ʼalaʼala pea mo tou fakaʼaogaʼi ʼotatou fealagia fakakaukau,” he ʼe kua vave hoko mai pe he ʼu fetogi fakapunamaʼuli!​—1 Tes. 5:6.