Fakaʼaogaʼi Lelei Tou “Meʼa ʼOfa Fakalaumalie”

ʼE fakalotomalohi kia tatou moka tou fakatahi mo ʼotatou tehina mo tuagaʼane ʼo te kokelekasio. Kae ke tou fefakalotomalohiʼaki moʼoni, ʼe mole gata pe ki tatou fakatahi ʼaia. ʼI te Tohi-Tapu, ko te “meʼa ʼofa fakalaumalie” ʼae ʼe tou maʼu, ʼe fakaʼuhiga ki te fealagia ʼe tou maʼu ke tou fefakalotomalohiʼaki tatatou tui. (Loma 1:​11, 12) ʼE feafeaʼi hatatou fakaʼaogaʼi lelei te meʼa ʼofa ʼaia?

Fakalotomalohiʼi ʼihi ʼaki ʼau palalau. Ohage la, ʼi te ʼu fono, ka ke fai he ʼu tali, tokaga naʼa lahi fau tau fakaha tau ʼu manatu, peʼe ko tau fakamatala tou maʼuli. Kae ke ke fakaha pe kotea ʼae neʼe ke ako ʼo ʼuhiga mo Sehova, mo tana Folafola pea mo ʼana kaugana agatonu. Pea ʼi he faʼahi pe ʼe ke fakatahi ai mo ʼou tehina mo tuagaʼane, ʼe lelei ke tou palalau ki he ʼu manatu ʼe fakamalohiʼi ai te tui.

Fakalotomalohiʼi ʼihi ʼaki te ʼu tonu ʼae ʼe ke toʼo pea mo te ʼu gaue ʼae ʼe ke fai. Ohage la, ko ʼihi neʼe natou tau mo ni faigataʼaʼia, kae neʼe natou filifili ke hoko atu tanatou gaue temi katoa maʼa Sehova. Pea ko ʼihi ʼe natou kau tuʼumaʼu pe ki te ʼu fono ʼo te vahaʼa, logo la tonatou gaʼegaʼe hili tanatou gaue ʼaho katoa, peʼe natou tau mo ni mahaki faigataʼa.

ʼE fakalotomalohi koa ʼau palalau pea mo ʼau gaue ki te ʼu tehina mo tuagaʼane? Pea ʼe ke toe tokagaʼi koa te ʼu meʼa ʼofa fakalaumalie ʼae ʼe maʼu e ʼou tehina mo tuagaʼane? ʼE ke tuku koa ke natou toe fakalotomalohiʼi koe?