Tou Tokoni Ki Te ’u Fanau ʼa “Te Kau Matapule”

1, 2. (1) Kotea te fihifihia ʼe tau mo te ʼu fanau matapule? (2) Kotea te ʼu fehuʼi ʼe tou tali anai ki ai ʼi te alatike ʼaeni?

ʼE UI fenei e Joshua: “Neʼe matou ʼomai mo ʼaku matuʼā ʼo maʼuʼuli ʼi te fenua ʼaeni. Talu mai taku kei veliveli, neʼe au palalau ʼi te lea ʼo ʼaku matuʼā, ʼi fale ʼo feia pe mo te kokelekasio. Pea ʼi taku alu leva ʼae ki te fale ako, neʼe kua au fia palalau pe leva au ʼi te lea ʼo te fenua. Hili pe ki ai ni taʼu, neʼe mole kei au palalau ʼi te lea ʼo ʼaku matuʼā. Neʼe mole kei au mahino ki te ʼu fono. Pea neʼe hage kia au, ʼe mole kei au maʼu te agaʼi fenua ʼo ʼaku matuʼā.” ʼE lahi te ʼu aluʼaga feia ʼe kua hoko ʼi temi nei.

² Ia ʼaho nei, ʼe lau ko te toko 240 miliona hahaʼi tupu ʼe natou maʼuʼuli nei ʼi he ʼu fenua matapule. Kapau ʼe kotou kau ia natou ʼaia, ʼe feafeaʼi anai hakotou tokoni ki ʼakotou fanau ke natou ʼoʼofa ia Sehova pea mo natou ‘haga mulimuli ki te ala ʼo te moʼoni?ʼ (3 Soane 4) ʼE lava tokoni feafeaʼi te kokelekasio kia natou ʼaia?

ʼU MATUʼĀ, KOTOU TUKU HE FAʼIFAʼITAKI LELEI

3, 4. (1) Kotea te faʼifaʼitaki lelei ʼe feala ke tuku e te ʼu matuʼā ki ʼanatou fanau? (2) Kotea ʼae ʼe mole tonu ke fakamaʼua e te ʼu matuʼā ki ʼanatou fanau?

³ ʼU matuʼā, kapau ʼe kotou loto ke tauhi ʼakotou fanau kia ­Sehova pea mo natou maʼuʼuli ʼo heʼe gata, ʼe tonu ke kotou tuku he faʼifaʼitaki lelei kia natou. Kapau ʼe tokagaʼi e ʼakotou fanau ʼe ‘kotou haga fakamuʼamuʼa ia te Puleʼaga,ʼ ʼe natou mahino ai pea ʼe natou tui papau anai, ʼe foaki age e Sehova te ʼu meʼa ʼae ʼe ʼaoga kia natou ʼi te ʼaho fuli. (Mateo 6:​33, 34) Kotou fakamaʼuhigaʼi takotou tauhi kia Sehova, kaʼe mole ko te kumi ʼae ke lahi ʼokotou koloa. Kotou maʼuli fakafeʼauga pea kotou faiga ke ʼaua naʼa kotou tuʼu maʼua ki he tahi. Kotou kumi te ʼu “koloa ʼi selo,” ko tona fakaʼuhiga, kotou fakafiafiaʼi te loto ʼo Sehova. Kaʼe ʼaua naʼa kotou kumi pe te paʼaga pea mo “te kololia ʼo te tagata.”​​—Lau ia Maleko 10:​21, 22; Soane 12:⁠43.

⁴ Kotou toʼo he temi ke kotou fakatahi ai mo ʼakotou fanau. Kotou fakaha age kia natou ʼe kotou fiafia moka natou fakamuʼamuʼa ia Sehova, kaʼe mole ko te ʼu koloa peʼe ko te logologona. ʼAua naʼa kotou ui ʼe ko te maʼua ʼo te ʼu fanau ke natou tokakaga ki te maʼuli fimalie ʼo ʼanatou matuʼā. Kotou manatuʼi “ ʼe mole ʼa te ʼu fanau te tanaki ʼo he ʼu koloa maʼa ʼanatou matuʼā kaʼe ko te ʼu matuʼā maʼa ʼanatou fanau.”​​—2 Kolonito 12:⁠14.

ʼU MATUʼĀ, KOTOU KUMI HE PULEʼAKI MO KAPAU ʼE FAIGATAʼA TE LEA

5. He koʼe ʼe tonu ke palalau tuʼumaʼu te ʼu matuʼā ki ʼanatou fanau ʼo ʼuhiga mo Sehova?

⁵ Ohage ko tona fakakikite ’i te Tohi-Tapu, ʼe ʼomai anai te hahaʼi “mai te u lea kehekehe fuli o te atu puleʼaga” ki te kautahi ʼa Sehova. (Sakalia 8:23) Kaʼe ʼe ʼi ai ʼihi fanau ʼe mole kei natou mahino lelei ki te lea ʼo ʼanatou matuʼā. Koia ʼe faigataʼa ai ki te ʼu matuʼā tanatou akoʼi age te moʼoni kia natou. Kaʼe ko ʼanatou ako Tohi-Tapu ʼae ʼe maʼuhiga tafito, ko ʼanatou fanau. Koia kapau ʼe kotou loto ke natou maʼu ia te maʼuli heʼe gata, ʼe tonu “ke natou ako ke natou iloʼi” ia Sehova. (Soane 17:⁠3) Koia ʼe tonu ai ke kotou palalau tuʼumaʼu mo natou, ke kotou akoʼi age kia natou te ʼu akonaki ʼae ʼe haʼu mai ia Sehova.​​—Lau ia Tetelonome 6:​6, 7.

6. He koʼe ʼe lelei ke ako e te ʼu fanau te lea ʼo ʼanatou matuʼā? (Vakaʼi te ʼuluaki pāki.)

⁶ ʼE mahino ia, ʼe ako anai ʼakotou fanau te lea ʼo te fenua ʼi te fale ako pea mo tanatou faipalalau mo te hahaʼi. Kaʼe kapau ʼe kotou faipalalau tuʼumaʼu mo natou, ʼe feala ai ke natou akoako takotou lea. Kapau ʼe palalau te fanau ʼi takotou lea, ʼe faigafua anai ki ai tana palalau atu kia koutou pea mo tana fakaha atu tana manatu. Kaʼe ʼe mole gata ai. He ʼe ka poto he fanau ʼi te palalau ki he tahi age lea, ʼe ina fakatuputupu ai ʼona fealagia fakakaukau, pea ʼe lava mahino ki te faʼahiga manatu ʼa ʼihi. Pea ʼe ina maʼu ai he ʼu fealagia ʼe ʼaoga ki te gaue faifakamafola. Ko Carolina mo ʼana matuʼā neʼe olo ki he kokelekasio matapule. Pea ʼe ina ui fenei: “ ʼE au fiafia ʼi te kau ki he kokelekasio ʼe lea matapule. ʼE au fiafia ʼi te alu ʼo tokoni ʼi te koga meʼa ʼae ʼe lahi ai te gaue.”

7. Kotea ʼe feala ke kotou fai mo kapau ʼe faigataʼa ki takotou fanau tana palalau ʼi takotou lea?

⁷ ʼE faiga e te ʼu fanau matapule ke natou ako te agaʼi fenua pea mo te lea ʼo te fenua ʼae ʼe natou maʼuʼuli ai. Koia ʼe ʼi ai ʼihi ia natou ʼe mole kei natou fia palalau peʼe mole natou lava felogoʼi mo ʼanatou matuʼā ʼi tanatou lea. ʼU matuʼā kapau ʼe feia ʼakotou fanau, ʼe feala koa ke kotou faiga ke kotou ako te lea ʼo te fenua? ʼE faigafua anai kia koutou hakotou akoʼi takotou fanau ʼi te moʼoni, mo kapau ʼe kotou mahino ki ʼana palalau, mo ʼana fakafiafia, mo ʼana meʼa ako pea mo kapau ʼe kotou lava faipalalau mo ʼana faiako. ʼE moʼoni ʼe mole faigafua te ako ʼo he lea, he ʼe ʼaoga ki ai he temi, mo he ʼu faiga, pea mo te agavaivai. Kaʼe ʼe maʼuhiga ke fai te faʼahi ʼaia. Ohage la, kapau ʼe liliu takotou fanau ʼo tuli, ʼe mole kotou faiga anai koa ke kotou ako te lea fakatuli, ke feala ai hakotou felogoʼi mo takotou fanau? ʼE mole tonu koa la ke kotou tokakaga ki ʼakotou fanau, tatau aipe pe ʼe palalau ʼi he tahi age lea?a​​—Vakaʼi te kiʼi nota.

8. ʼE feafeaʼi hakotou tokoni ki ʼakotou fanau, tatau aipe pe ʼe mole kotou palalau ʼi te lea ʼo te fenua?

⁸ ʼE lagi faigataʼa ki ʼihi matuʼā ia tanatou palalau ki te lea foʼou ʼae kua palalau ki ai ʼanatou fanau. Koia ʼe faigataʼa ai anai ki te ʼu matuʼā tanatou tokoni ki ʼanatou fanau ke natou mahino ki “te ʼu Tohi Taputapu.” (2 Timoteo 3:15) Kapau ko ia, ʼe feala pe ke kotou tokoni ki ʼakotou fanau ke natou iloʼi ia Sehova pea mo ʼoʼofa ai. ʼE ui fenei e te tagata ʼafeā ʼe higoa ko Shan: “Neʼe mole mahino lelei tama faʼe ki te lea ʼae ʼe au palalauʼi mo toku kiʼi tokolua. Pea neʼe mole ma popoto lelei ʼi te palalau ʼi te lea ʼo tama faʼe. Kaʼe neʼe ma tokagaʼi tana ako te Tohi-Tapu, mo tana faikole, pea mo tana faiga ʼae ke ina takitaki tamatou ako fakafamili ʼi te vahaʼa fuli. ʼAki te ʼu faʼahi ʼaia, neʼe ma mahino ai ki te maʼuhiga ʼae ke ma ako ke ma iloʼi ia Sehova.”

9. ʼE lava tokoni feafeaʼi te ʼu matuʼā ki ʼanatou fanau ke natou ako te Tohi-Tapu ʼi te ʼu lea ʼe lua?

⁹ ʼE ’i ai ʼihi fanau ʼe tonu ke natou ako te Tohi-Tapu ʼi te ʼu lea ʼe lua. Kotea tona tupuʼaga? Koteʼuhi ʼe mole tatau te lea ʼae ʼe palalauʼi ʼi te fale ako pea mo te lea ʼae ʼi tonatou ʼapi. Koia ʼe fakaʼaogaʼi ai e ʼihi matuʼā te ʼu tohi, peʼe ko te ʼu lautohi neʼe puke, peʼe ko te ʼu ʼata viteo ʼi te ʼu lea ʼaia ʼe lua. ʼE mahino ia, ʼe tonu ki te ʼu matuʼā ke natou faiga malohi ke natou tokoni ki ʼanatou fanau ke natou fakaovi kia Sehova.

KO TE KOKELEKASIO FEA ʼAE ʼE KOTOU FILIFILI ANAI?

10. (1) Ko ai ʼae ʼe tonu ke ina toʼo te tonu ʼo ʼuhiga mo te kokelekasio ʼae ʼe kau anai ki ai te famili? (2) Kotea ʼae ʼe tonu ke fai e te ʼu pule famili ʼi muʼa ʼo hanatou toʼo he tonu?

¹⁰ ʼE ʼi ai ʼihi “matapule” ʼe natou maʼuli mamaʼo mai ʼonatou tehina mo tuagaʼane ʼae ʼe palalau ʼi tanatou lea. Kaʼe ʼe maʼua ke natou fakatahi mo te kokelekasio ʼae ʼe palalau ʼi te lea ʼo te fenua ʼae ʼe natou maʼuʼuli ai. (Pesalemo 146:⁠9) Kaʼe kapau ʼe ʼi ai he kokelekasio ʼe palalau ʼi tanatou lea ʼe tuʼu ovi kio natou, ʼe ko te pule famili ʼae ʼe ina toʼo anai te tonu pe ʼe ko te kokelekasio fea ʼae ʼe lelei anai ki tona kiʼi famili. ʼI muʼa ʼo tana toʼo te tonu, ʼe tonu foki ke ina fakakaukauʼi lelei te faʼahi ʼaia pea mo faikole kia Sehova. ʼE tonu anai ke felogoʼi mo tona ʼohoana pea mo ʼanā fanau. (1 Kolonito 11:⁠3) Kotea anai ʼae ka ina ­fakakaukauʼi? Kotea la te ʼu pelesepeto Fakatohi-tapu ʼe tokoni anai ki ai ke ina toʼo he tonu?

11, 12. (1) He koʼe ʼe maʼuhiga ke mahino te ʼu fanau ki te ʼu fono? (2) He koʼe ʼe mole fia ako e ʼihi fanau ia te lea ʼo ʼanatou matuʼā?

¹¹ ʼE tonu ke vakavakaʼi fakalelei e te ʼu matuʼā pe ʼe kotea ʼae ʼe ʼaoga moʼoni ki ʼanatou fanau, he ʼe tonu ke mahino lelei te ʼu fanau ki te ʼu moʼoni Fakatohi-tapu. Koia ʼe lagi mole feʼauga pe anai ia te ʼu kiʼi hola ʼae ʼe natou fakalogo ai ki te ʼu akonaki ʼi te ʼu fono, ʼi te vahaʼa fuli. Kotou fakakaukauʼi age muʼa te faʼahi ʼaeni: Ka kau he fanau ki he fono ʼe fai ʼi te lea ʼae ʼe mahino lelei ki ai, ʼe fua lelei anai ia kia ia, pea ʼe lagi lahi anai te ʼu ako ʼe mahino ki ai, ʼi te ʼu ako ia ʼae ʼe feala ke fakamahino age e ʼana matuʼā. Kaʼe kapau ʼe natou kau ki he fono ʼe fai ʼi he lea ʼe mole natou mahino lelei ki ai, ʼe mole lahi anai te ʼu faʼahi ʼe natou ako. (Lau ia 1 Kolonito 14:​9, 11.) Pea ko te lea ʼae neʼe palalauʼi e te fanau ʼi tana kei veliveli, ki muli age, ʼe lagi mole ko te lea ʼaia ʼae ʼe malave anai ki tona loto pea mo mahino lelei ki ai. ʼE ʼi ai ʼihi fanau ʼe natou fai tali, peʼe natou fai hanatou kiʼi faipalalau peʼe ko hanatou akonaki ʼi te lea ʼo ʼanatou matuʼā, kaʼe ʼe faigataʼa tanatou palalau faʼifaʼitaliha. Koia ʼe faigataʼa ai tanatou fakaha ʼanatou manatu pea mo te ʼu faʼahi ʼae ʼe natou logoʼi.

¹² Pea tahi, ʼe mole ko te lea pe ʼae ʼe feala ke malave ki te loto ʼo he fanau. Ko te aluʼaga ʼaia neʼe hoko kia Joshua. ʼE ui fenei e tona kiʼi tokolua ko Esther: “Ki te manatu ʼa te ʼu fanau liliki, ʼe pipiki tahi te lea, mo te agaʼi fenua pea mo te lotu.” Kapau ʼe logoʼi e te ʼu fanau ʼe mole kei natou maʼu te agaʼi fenua ʼo ʼanatou matuʼā, ʼe lagi mole kei natou fia ako te lea ʼo ʼanatou matuʼā pea mo tanatou lotu. Kotea ʼae ʼe feala ke fai e te ʼu matuʼā?

13, 14. (1) He koʼe neʼe olo te kiʼi famili ki te kokelekasio ʼe palalau ʼi te lea ʼo te fenua? (2) Neʼe taupau feafeaʼi e te ʼu matuʼā ʼanatou felogoʼi mo Sehova ke malohi?

¹³ ʼE fakamuʼamuʼa e te ʼu matuʼā Kilisitiano ʼanatou fanau, kaʼe mole ko natou totonu. (1 Kolonito 10:24) ʼE ui fenei e Samuel, ia te tamai ʼa Joshua pea mo Esther: “Neʼe au fakakaukauʼi mo toku ʼohoana pe ko te lea fea ʼae ʼe feala ke tuputupu ai ʼama fanau ʼi te faʼahi fakalaumalie. Pea neʼe ma faikole kia Sehova ke ina tuku mai te poto. Neʼe tali e Sehova tama kole, kaʼe neʼe mole ko te faʼahi ʼaia neʼe ma fakaʼamu ki ai. Kaʼe ʼi tama tokagaʼi ʼae ʼe mole mahino ʼama fanau ki te ʼu fono ʼuhi ko te lea, neʼe ma fakatotonu ai ke matou olo ki he kokelekasio ʼe palalau ʼi te lea ʼo te fenua. ʼE matou kau ki te ʼu fono pea mo te faifakamafola. Pea ʼe matou fakaafe ʼomatou kaumeʼa ke matou kai meʼa kai peʼe ke matou olo ʼo haʼele. Ko te ʼu faʼahi fuli ʼaia ʼe tokoni ki ʼama fanau ke natou feiloʼiʼaki mo te ʼu tehina mo tuagaʼane pea ke natou iloʼi ia Sehova, tonatou ʼAtua mo Tamai pea mo Kaumeʼa. Kia maua, neʼe maʼuhiga age te faʼahi ʼaia, ʼi tanatou popoto ʼi te palalau ʼi tama lea.”

¹⁴ ʼE toe ui fenei e Samuel: “Neʼe toe ʼaoga foki ke ma malolohi tokolua ʼi te faʼahi fakalaumalie. Koia neʼe kei au alu pe mo toku ʼohoana ki te ʼu fono ʼi tama lea. Neʼe ma maʼumaʼua ʼosi pea neʼe ma gaʼegagaʼe. Kaʼe ʼe ma fakafetaʼi kia Sehova, he neʼe ina tapuakiʼi ʼama faiga pea mo ʼama sakilifisio. Kua kau nei ʼama fanau ʼe toko tolu ʼi te selevisi temi katoa.”

KOTEA ʼAE ʼE FEALA KE FAI E TE KAU TUPULAGA?

15. He koʼe neʼe manatu e Kristina, ʼe lagi lelei ke alu ʼo kau ki he kokelekasio ʼe palalau ʼi te lea ʼo te fenua?

¹⁵ Ka lahilahi ake te ’u fanau, ʼe lagi natou manatu ʼe lelei age ke natou olo ki he kokelekasio ʼe palalau ʼi te lea ʼae ʼe natou mahino lelei ki ai. Kapau ko ia, ʼe mole tonu ke ui e te ʼu matuʼā, kua liʼakina natou e ʼanatou fanau. ʼE ui fenei e Kristina: “ ʼE au mahino moka palalau mai ʼaku matuʼā. Kaʼe ʼe mole au mahino ki te ʼu akonaki ʼae ʼe fai ʼi te ʼu fono. ʼI toku taʼu 12, neʼe au kau ki he fakatahi neʼe fai ʼi te lea ʼo te fenua. Neʼe ko taku hoki mahino ʼae ki te moʼoni. Ko te tahi aluʼaga neʼe hoko, neʼe ko taku kamata faikole ʼi te lea ʼo te fenua. Neʼe kua feala leva ke au palalau kia Sehova mo toku loto katoa.” (Gaue 2:​11, 41) ʼI tona taʼu 18, neʼe faipalalau leva ia Kristina mo ʼana matuʼā ʼo ʼuhiga mo te faʼahi ʼaia, pea neʼe ina fakatotonu ai leva ke alu ʼo kau ki he kokelekasio ʼe palalau ʼi te lea ʼae ʼe mahino lelei ki ai. ʼE ina ui fenei: “Neʼe au ako ʼo ʼuhiga mo Sehova ʼi te lea ʼae neʼe au palalauʼi ʼi te fale ako, pea neʼe malave ki toku loto.” Mole faʼa fualoa ki ai, neʼe liliu leva ia Kristina ko he pionie katoa pea ʼe ina logoʼi hona fiafia lahi.

16. He koʼe ʼe fiafia ia Nadia ʼi tana nofo ʼi te kokelekasio ʼo ʼana matuʼā?

¹⁶ ʼU fanau, ʼe kotou fia kau koa ki he kokelekasio ʼe palalau ʼi te lea ʼo te fenua? Kapau ko ia, kotou fakakaukauʼi pe ʼe kotea tona tupuʼaga. ʼE kotou fia olo koa ki he tahi kokelekasio, he ʼe tuputupu ai anai tokotou ʼofa kia Sehova? (Sakopo 4:⁠8) Peʼe mole kotou loto ke iloʼi e ʼakotou matuʼā te ʼu meʼa ʼae ʼe kotou fai, peʼe kotou fia fakafifimalie pe koutou? ʼE ui fenei e te tuagaʼane ʼo te Petele ʼe higoa ko Nadia: “ ʼI tamatou kua lalahi, ko au mo ʼoku kiʼi tehina, neʼe matou fia olo ki he kokelekasio ʼe palalau ʼi te lea ʼo te fenua.” Kaʼe neʼe iloʼi e ʼanatou matuʼā, ʼe mole fua lelei anai ki tonatou maʼuli fakalaumalie. ʼE ina toe hoko atu fenei: “ ʼE matou fakafetaʼi ki ʼamatou matuʼā, he neʼe nā faiga malohi ke nā akoʼi matou ki tanā lea pea ke matou nonofo ʼi tomatou kokelekasio. Neʼe fua lelei ki ʼomatou maʼuli pea neʼe lahi te ʼu faigamalie neʼe matou maʼu ke matou tokoni ai ki niʼihi ke natou iloʼi ia Sehova.”

ʼE LAVA TOKONI FEAFEAʼI TE KOKELEKASIO?

17. (1) Ko ai ʼae neʼe tuku ki ai e Sehova te maʼua ʼae ke ina akoʼi te ʼu fanau? (2) ʼE lava maʼu feafeaʼi e te ʼu matuʼā ia he tokoni, ke natou akoʼi te moʼoni ki ʼanatou fanau?

¹⁷ Neʼe tuku e Sehova ki te ʼu matuʼā ia te maʼua ʼae ke natou akoʼi ki ʼanatou fanau ia te moʼoni. Neʼe mole ina tuku te maʼua ʼaia ki te ʼu kui peʼe ko he tahi age. (Lau ia Taaga Lea 1:8; 31:​10, 27, 28.) Kaʼe kapau ʼe mole popoto te ʼu matuʼā ʼi te palalau ʼi te lea ʼo te fenua, ʼe ʼaoga kia natou he tokoni ke malave te moʼoni ki te loto ʼo ʼanatou fanau. ʼE feala pe ke kole e te ʼu matuʼā ke tokoni age niʼihi. Kaʼe ʼe mole fakaʼuhiga leva ʼe mole natou fia fakahoko tonatou maʼua ʼae ke akoʼi ʼanatou fanau. ʼE lagi ko he faʼahiga tokoni ʼaia ki te ʼu matuʼā ke natou “akonakiʼi pea mo akoʼi natou ʼo mulimuli ki te meʼa ʼae ʼe ui e Sehova.” (Efeso 6:⁠4) Ohage la, ʼe feala ke kumi tokoni te ʼu matuʼā ki te kau tagata ʼafeā, ki te faʼahiga takitaki ʼo te ako fakafamili, peʼe ke maʼu e ʼanatou fanau honatou ʼu kaumeʼa lelei.

18, 19. (1) ʼE lava tokoni feafeaʼi ʼihi ʼo te kokelekasio ki te ʼu fanau? (2) Kotea ʼae ʼe tonu ke manatuʼi e te ʼu matuʼā?

¹⁸ Kapau ʼe fia tokoni te ʼu matuʼā ki ʼanatou fanau, ʼe feala pe ʼi ʼihi temi, ke natou fakaafe ʼihi atu ʼu famili ke natou kau ki tanatou ako fakafamili. ʼE lahi te ʼu ako ʼe feala ke maʼu e te kau tupulaga mai te ʼu tehina mo tuagaʼane, peʼe ʼi te faifakamafola peʼe ʼi he tahi age gaue. (Taʼaga Lea 27:​17, MN ) ʼE ui fenei e Shan ʼae neʼe kua tou palalau ki ai: “ ʼE au manatuʼi te ʼu tehina ʼae neʼe tokakaga lelei kia au. Neʼe lahi te ʼu ako neʼe au maʼu ʼi tanatou tokoni mai ke au teuteuʼi taku akonaki ki te fono. Pea neʼe au leleiʼia moka matou fakafiafia fakatahi.”

¹⁹ ʼE filifili pe anai e te ʼu matuʼā ia natou ʼae ka tokoni ki ʼanatou fanau. Pea ʼe tonu anai kia natou ʼae ʼe tokoni, ke natou fakalotomalohiʼi tuʼumaʼu te ʼu fanau ke natou fakaʼapaʼapa ki ʼanatou matuʼā. ʼE mole tonu anai ke natou fatufatuʼi ʼanatou matuʼā peʼe ke natou toʼo tonatou tuʼulaga. ʼE natou tokakaga anai ki tanatou aga ke ʼaua naʼa tukia he tahi ʼo te kokelekasio peʼe ko he tahi ʼe mole ʼi te moʼoni. (1 Petelo 2:12) ʼE feala pe ke kole e te ʼu matuʼā ki he tehina peʼe ko he tuagaʼane ke tokoni age ki te akoʼi ʼo ʼanatou fanau. Kaʼe ʼe tonu ke natou manatuʼi ko tonatou maʼua ke natou akoʼi ʼanatou fanau. Pea ʼe tonu ke fakalogo te ʼu tehina ʼae ʼe tokoni ki tanatou takitaki.

20. ʼE lava tokoni feafeaʼi te ʼu matuʼā ki ʼanatou fanau ke natou tauhi agatonu kia Sehova?

²⁰ ’U matuʼā, kotou faikole kia Sehova ke tokoni atu, pea mo kotou faiga malohi ke kotou akoʼi ʼakotou fanau. (Lau ia 2 Koloniko 15:⁠7.) Kotou faiga fakamalotoloto ke ʼoʼofa ʼakotou fanau ia Sehova. Kotou faiga malohi ke malave te Folafola ʼa te ʼAtua ki ʼonatou loto. ʼAua naʼa kotou manatu ʼi he temi ʼe mole tauhi anai ʼakotou fanau kia Sehova. Kaʼe kotou faiga ke mulimuli ʼakotou fanau ki te Folafola ʼa te ʼAtua pea mo te faʼifaʼitaki lelei ʼae ʼe kotou tuku kia natou. He ʼe kapau ʼe natou fai feia, ʼe kotou logoʼi anai te faʼahi ʼae neʼe logoʼi e te apositolo ko Soane ʼi tana ui fenei ʼo ʼuhiga mo ʼana fanau fakalaumalie: “ ʼE lahi ʼaupito toku fiafia moka au logo ʼe haga mulimuli ʼaku fanau ki te ala ʼo te moʼoni.”​​—3 Soane 4.