Kapite 129

Neʼe Toe Hā Ia Sesu

E KEI lotomamahi aipe te kau tisipulo. ʼE mole kei nātou ʼiloʼi pe koteā he faʼahiga manatu ke nātou maʼu ʼo ʼuhiga mo te gaʼasi ʼo te falemaka, ohage pe ko tanatou mole tui ʼaē ki te fakamoʼoni ʼa te ʼu fafine. Pea, ki muli age ʼi te ʼahotapu ʼaia, neʼe mavae Keleopasi pea mo te tahi tisipulo ʼi Selusalemi ʼo nā ʼolo ki Emausi, ko te kolo ʼaia ʼe mamaʼo ia kilometa e 11.

ʼI tanā ʼolo ʼi te ala, pea ʼi te lolotoga ʼo tanā fai palalau ʼo ʼuhiga mo te ʼu meʼa ʼaē neʼe hoko ʼi te ʼaho ʼaia, neʼe fakatahi age kia nāua te tagata ʼe mole nā ʼiloʼi pe ko ai. “Koteā koa te ʼu meʼa ʼaē e koulua haʼele mo fai palalau kiai?” ko tana fehuʼi ʼaia.

Neʼe tutuʼu te ʼu tisipulo, mo tonā mata mamahi, pea tali e Keleopasi: “ ʼE ke hage koa, ko he matāpule, ʼo ke nofo mamaʼo ʼi Selusalemi, ʼaē ʼe mole ke ʼiloʼi ai te ʼu meʼa ʼaē neʼe hoko ʼi te ʼu ʼaho ʼaenī?”

“Ko te ʼu meʼa fea?” ko te fehuʼi ʼaia ʼa te tagata.

“Ko te ʼu meʼa ʼaē ʼo ʼuhiga mo Sesu te Nasalea”, ko tanā tali ʼaia. “Ko tomatou ʼu pelepitelo lahi pea mo tomatou ʼu pule neʼe nātou tuku age ia ia ki te fakatūʼa ke matehi pea nātou haʼi ia ia ki te pou. Ka, neʼe mātou falala foki ko te tagata ʼaia ʼe ko ia ʼaē ka ina fakamaʼuli ia Iselaele.”

Ko Keleopasi pea mo tona kaumeʼa neʼe nā fakamatala te ʼu meʼa fakaofoofo ʼaē neʼe hoko ʼi te ʼaho ʼaia — te hā ʼo te ʼu ʼaselo pea mo tanatou maʼu te falemaka ʼaē ʼe gaʼasi —, kae neʼe nā fakahā age e mole nā ʼiloʼi pe koteā te faka ʼuhiga ʼo te ʼu meʼa ʼaia. Neʼe fakatonutonuʼi nāua e te tagata ʼaia: “ ʼAē ʼu tagata vavale pea mo loto tuai ki te tui ki te ʼu meʼa fuli ʼaē neʼe tala e te kau polofeta! Neʼe mole tonu koa la ke kātakiʼi e Kilisito te ʼu mamahi ʼaia pea ke hū ai ki tona kolōlia?” Pea neʼe ina fakamahino age ai te ʼu vaega ʼo te Tohi-Tapu ʼo ʼuhiga mo Kilisito.

Pea ʼi tanatou fakaōvi atu ki Emausi, neʼe fai pe ia e te tagata ohage ʼe fia hoko atu pe tona fagona. ʼI te lahi ʼaē ʼo tanā fia logo, neʼe kolekole e te ʼu tisipulo ki ai: “Nofo mo māua, heʼe kua afiafi.” ʼO nofo ai te tagata mo nāua ki te kai. Neʼe ina fai te tapuaki, pea ina tofi te pane pea ina ʼavage kia nāua; pea neʼe hoki nā mahino ai leva pe ko ai ia ia: ko Sesu ʼi he sinoʼi tagata. Kae ʼi te temi pe ʼaia neʼe puli ai ia.

Kua hoki mahino leva kia nāua te tupuʼaga ʼo te lahi ʼo te ʼu meʼa ʼe ʼiloʼi e te tagata kehe ʼaia! “Ko totā loto, ko tanā ʼui ʼaia, neʼe mole vela koa la ʼi tana palalau mai ʼaē kia taua ʼi te ala, ʼi tana avahi katoa mai ʼaē kia taua te Tohi-Tapu?” Neʼe mole nā toe tuai, pea nā tutuʼu ake aipe ki ʼoluga pea nā toe liliu fakavilivili atu aipe ki Selusalemi, ʼonā maʼu atu ai te kau ʼapositolo pea mo nātou ʼaē ʼe fakatahitahi mo nātou. ʼI muʼa ʼo te palalau ʼa Keleopasi pea mo tona kaumeʼa, ko nātou ʼaē, ʼi tonatou fiafia, neʼe nātou fakahā age: “Kua fakatuʼu moʼoni ake te ʼAliki pea neʼe hā ia kia Simone!” ʼOsi ʼaia, pea fakamatala e te ʼu tagata ʼaia e lua pe neʼe feafeaʼi te hā age ʼa Sesu kia nāua. ʼI te ʼaho ʼaia kua tuʼa fā leva tana hā ki te ʼu tisipulo kehekehe.

Logope la te fakamaʼumaʼu ʼo te ʼu matapā koteʼuhi ko te matataku ʼa te kau tisipulo ki te kau Sutea, neʼe fokifā pe kua hā ia Sesu, ko tona tuʼa nima leva ʼaia. Neʼe hū ki loto, ʼo tuʼu ʼi te lotolotoiga ʼonatou pea ina ʼui age: “Ke ia koutou te tokalelei!” Neʼe matataku ʼaupito te kau tisipulo, he neʼe ʼui maʼa nātou ko te laumālie ʼaē ʼe nātou sisio ki ai. Koia, ʼi tana fakamahino age ʼaē kia nātou ʼe mole ko ia ko he laumālie, neʼe ʼui age e Sesu: “He koʼe ʼe koutou hoha, pea he koʼe ʼe tupu te ʼu mahalohalo ʼi tokotou loto? Koutou vakaʼi ʼoku nima pea mo ʼoku vaʼe: ʼe ko ʼau totonu pe, koutou fāfā mai kia te ʼau pea koutou vakaʼi ai, heʼe mole he laumālie ʼe ʼi ai hona kakano pe ko hona hui, ke hage ko takotou sisio mai ʼaē kia te ʼau ʼe ʼi ai toku kakano mo ʼoku hui.” Logope la te meʼa ʼaia, ʼe kei faigataʼa aipe tanatou tui.

Moʼo tokoni kia nātou ke nātou mahino ko ia totonu ko Sesu, neʼe ina fehuʼi age kia nātou: “ ʼE ʼi ai hakotou meʼa kai ʼi henī?” ʼI tana ʼosi toʼo te moʼi ika tunu neʼe ʼavage kia ia pea mo ina kai, neʼe ʼui maʼana. “ ʼE ko taku ʼu lea ʼaia, ʼaē neʼe ʼau tala atu ʼi te temi ʼaē neʼe kei ʼau nofo ai mo koutou [ʼi muʼa ʼo toku mate]: ʼaē ʼe tonu ke hoko te ʼu meʼa fuli neʼe tohi ʼo ʼuhiga mo ʼau ʼi te lao ʼa Moisese pea mo te kau Polofeta pea mo te ʼu Pesalemo.”

ʼO hoko atu tana palalau ʼaē neʼe hage ko he ako faka tohi-tapu, neʼe akoʼi age e Sesu kia nātou te meʼa ʼaenī: “Koia neʼe tohi ai ko Kilisito ʼe mamahi anai pea ʼe toe tuʼuake anai ʼi te mate ʼi te tolu ʼaho, pea ʼaki tona huafa ʼe faka mafola anai te fakahemala ʼo ʼuhiga mo te fakamolemole ʼo te ʼu agahala ʼi te ʼu puleʼaga fuli — ʼo kamata ʼi Selusalemi, ʼe tonu ke koutou liliu ko te kau fakamoʼoni ʼo te ʼu meʼa ʼaia.”

ʼE mole tou ʼiloʼi pe koteā te tupuʼaga ʼaē, ʼo te mole nofo ʼa Tomasi ʼi te ʼahotapu afiafi ʼaia ʼi te lolotoga ʼo te felāveʼi maʼuhiga ʼaia. Koia, ʼi te ʼu ʼaho ki muli age, neʼe ʼui age e te ʼu tisipulo ʼaē ki ai: “Neʼe mātou sisio ki te ʼAliki!”

Kae neʼe fakafisi age ia Tomasi: “Kailoa, ʼe mole ʼau tui anai, gata pe mokā ʼe ʼau sio ki te fakaʼiloga ʼo te ʼu faʼo ʼi tona ʼu nima, pea mo ʼai toku kauʼi tuhi ki te fakaʼiloga ʼaē ʼo te ʼu faʼo, pea mo ʼai toku nima ki tona faʼahi vakavaka.”

Pea, ʼi te ʼosi ʼo ʼaho e valu ki muli age, neʼe toe fakatahitahi te kau tisipulo ʼi te loto fale. ʼI te ʼaho ʼaia neʼe nofo ia Tomasi mo nātou. Logope la te fakamaʼumaʼu ʼo te ʼu matapā, neʼe toe hā ia Sesu, ʼo tuʼu ʼi te lotolotoiga ʼonatou pea ʼui maʼana: “Ke ia koutou te tokalelei!” ʼOsi ʼaia, pea maliu age kia Tomasi, ʼo ʼui maʼana ki ai: “ ʼAi tou kauʼi tuhi ki henī pea ke sio ki toku ʼu nima, pea ke toʼo tou nima pea ke ʼai ki toku faʼahi vakavaka; pea tuku tau tui gataʼa.”

“Ko toku ʼAliki mo toku ʼAtua!” ko te lea age ʼaia ʼa Tomasi.

“Kua ke tui he kua ke sio kia te ʼau? ko te fehuʼi age ʼaia ʼa Sesu. Manuʼia ia nātou ʼaē ʼe mole sisio kae nātou tui pe!” Luka 24:11, 13-48; Soane 20:19-29.

▪ Koteā te ʼu fehuʼi neʼe fai e te tagata kehe ki te ʼu tisipulo e toko lua ʼi te ala ʼo Emausi?

▪ Koteā te ʼu palalau ʼa te tagata kehe ʼaē neʼe tupu ai leva te vela ʼo te loto ʼo te ʼu tisipulo?

▪ Neʼe feafeaʼi te mahino ʼa te ʼu tisipulo pe ko ai ia te tagata kehe ʼaia?

▪ ʼI te liliu ʼa Keleopasi pea mo tona kaumeʼa ki Selusalemi, koteā te logo fakafiafia ʼaē neʼe nā logo kiai?

▪ Koteā te ʼu ʼaluʼaga ʼo te hā tuʼa nima ʼaē ʼa Sesu ki tana ʼu tisipulo, pea koteā ʼaē neʼe hoko ʼi te temi ʼaia?

▪ Koteā te meʼa ʼaē neʼe hoko ʼi te ʼosi ʼo ʼaho e valu ki te tuʼa nima ʼo te hā ʼa Sesu, pea koteā te meʼa ʼaē neʼe tui ai leva ia Tomasi kua fakatuʼuake ia Sesu?