KAPITE HOGOFULU-MA-ONO
Koutou Foaki Ki Tokotou Famili He Ka Haʼu Heʼegata
1. Neʼe koteā te fakatuʼutuʼu ʼa Sehova ʼo ʼuhiga mo te famili?
ʼI TE temi ʼaē neʼe fakatapuʼi ai e Sehova ia Atama mo Eva, neʼe fakahā e Atama tona fiafia ʼo ina fai te ʼu ʼuluaki palalau fakatuketuke faka Hepeleo ʼaē ʼe tohi ʼi te Tohi-Tapu. (Senesi 2:22, 23) Kae neʼe mole loto pe e te Tupuʼaga ke fiafia tana fānau. Neʼe ina loto ia ke fai e te ʼu taumatuʼa pea mo te ʼu famili tona finegalo. Neʼe ina ʼui fēnei ki te ʼuluaki taumatuʼa: “Koulua fanaunau, pea koulua liliu ʼo hahaʼi, pea koulua fakafonu te kele, pea koulua puleʼi, pea koulua pule ki te ʼu ika ʼo te tai, pea mo te ʼu manulele ʼo te lagi, pea mo te meʼa maʼuli fuli pe ʼe gaūgaūe ʼi te fuga kele.” (Senesi 1:28) Neʼe ko he gāue lahi pea neʼe fakafiafia. ʼI meʼa fakafiafia leva kia Atama mo Eva pea mo tanā ʼu fānau mo kanapaula neʼe nā fai te finegalo ʼo Sehova, ʼo nā fakalogo katoa kia te ia!
2, 3. ʼI te temi ʼaenī, ʼe lava maʼu feafeaʼi e te ʼu famili te fiafia lahi?
2 ʼO toe feiā ia ʼaho nei, ʼe fiafia te ʼu famili mokā nātou fakahoko fakatahi te finegalo ʼo te ʼAtua. Neʼe tohi fēnei e te ʼapositolo ko Paulo: “Ko te pipiki ʼaē ki te ʼAtua ʼe ʼaoga ia kia meʼa fuli, koteʼuhi ʼe ina maʼu te fakapapau ʼo te maʼuli ʼaenī pea mo te maʼuli ʼaē ka haʼu.” (1 Timoteo 4:8) Ko te famili ʼaē ʼe pipiki ki te ʼAtua ʼi tonatou maʼuli, pea mo mulimuli ki te ʼu tokoni ʼa Sehova ʼaē ʼe tuʼu ʼi te Tohi-Tapu, ʼe maʼuli fiafia anai ʼi “te maʼuli ʼaenī.” (Pesalemo 1:1-3; 119:105; 2 Timoteo 3:16) ʼE lelei age te maʼuli ʼo te famili, tatau aipe peʼe ko he tokotahi ʼaē ʼe ina fakaʼaogaʼi te ʼu pelesepeto ʼo te Tohi-Tapu.
3 Neʼe talanoa te tohi ʼaenī ki te ʼu tuʼuga pelesepeto ʼo te Tohi-Tapu ʼaē ʼe tokoni ki te manuʼia faka famili. Neʼe lagi koutou fakatokagaʼi, ʼe ʼi ai te tahi ʼu pelesepeto neʼe tou talanoa liuliuga kiai ʼi te tohi ʼaenī. Koteā tona tupuʼaga? Heʼe ko te ʼu moʼoni mālohi ʼaia ʼe ʼaoga kia tatou fuli, ʼi te ʼu faʼahi kehekehe ʼo te maʼuli faka famili. Ko te famili ʼaē ʼe ina faigaʼi ke ina fakaʼaogaʼi te ʼu pelesepeto ʼaia ʼo te Tohi-Tapu, ʼe ina fakatokagaʼi ai ‘ ʼe ina maʼu te fakapapau ʼo te maʼuli ʼaenī,’ mokā ʼe pipiki ki te ʼAtua. Tou toe vakaʼi he ʼu pelesepeto maʼuhiga e fā ʼi te ʼu pelesepeto ʼaia.
TE MAʼUHIGA ʼO TE LOTO LOLOMI
4. He koʼe ʼe maʼuhiga te loto lolomi ʼi te nofo ʼohoana?
4 Neʼe ʼui fēnei e te Hau ko Salomone: “Ohage ko he kolo kua holo, ʼe mole hona kaupā, ʼe toe feiā aipe mo te tagata ʼaē ʼe mole ina lolomi tona loto.” (Tāʼaga Lea 25:28; 29:11) Ko te ‘lolomi ʼo tokita loto,’ peʼe ko te maʼuliʼi ʼo te loto lolomi, ʼe maʼuhiga ʼaupito kia nātou ʼaē ʼe nātou loto ke fiafia tanatou nofo ʼohoana. Ko te mulimuli ki te ʼu meʼa kovi ʼo totatou loto, ohage ko te ʼita peʼe ko te ʼu holi heʼeʼaoga, ʼe tupu ʼaki ai he ʼu fihifihia ʼe loaloaga anai tona fakatokatoka—mo kapau foki ʼe kei feala ke fakatokatoka.
5. ʼE lava feafeaʼi ki he tagata agahala ke ina gāueʼi te loto lolomi, pea koteā tona ʼu fua lelei?
5 ʼE mahino papau ia, ʼe mole he tahi ʼi te hākoga ʼo Atama ʼe feala ke ina lolomi katoa tona kakano agahala. (Loma 7:21, 22) Kae ko te loto lolomi ʼe ko he fua ʼo te laumālie. (Kalate 5:22, 23) Koia, ʼe fakatupu anai e te laumālie ʼo te ʼAtua te loto lolomi ia tatou, mo kapau ʼe tou faikole ki te ʼAtua ke tou maʼu te kalitate ʼaia, mo fakaʼaogaʼi te ʼu tokoni lelei ʼa te Tohi-Tapu, pea mo tou fakatahitahi mo nātou ʼaē ʼe nātou maʼu te kalitate ʼaia kae ke tou fakamamaʼo mai ia nātou ʼaē ʼe mole nātou fakaʼaogaʼi. (Pesalemo 119:100, 101, 130; Tāʼaga Lea 13:20; 1 Petelo 4:7) Kapau ʼe tou fai te ʼu meʼa ʼaia, pea ʼe feala anai ke tou “hola mai te folonikasio,” māʼiape la mo te temi ʼaē ʼe fakahalaʼi ai tatou. (1 Kolonito 6:18) ʼE tou līaki anai te agamālohi pea mo tou tekeʼi te ʼinu kava tuʼumaʼu. Pea ʼe tou agamālū anai mo kapau ʼe laga he kē peʼe tou tau mo he ʼu faigataʼaʼia. Tou fakaʼamu ke tou maʼuliʼi fuli—ʼo feiā mo tatatou ʼu tamaliki—te kalitate maʼuhiga ʼaia ʼo te laumālie maʼoniʼoni.—Pesalemo 119:1, 2.
TE MANATU ʼAĒ ʼE TOTONU ʼO ʼUHIGA MO TE TUʼULAGA PULE
6. (a) Koteā te fakatuʼutuʼu ʼaē neʼe fai e te ʼAtua ʼo ʼuhiga mo te pule? (b) Koteā ʼaē ʼe tonu ke manatuʼi e he tagata mo kapau ʼe loto ke maʼuli fiafia tona famili?
6 Ko te lua pelesepeto ʼaē ʼe maʼuhiga, ʼe ko te mahino lelei ki te ʼuhiga pule. Neʼe fakahā e Paulo peʼe feafeaʼi te fakatuʼutuʼu ʼaia: “ ʼE ʼau loto ke koutou ʼiloʼi ko te pule ʼo te tagata fuli pe, ʼe ko Kilisito; ko te pule ʼo te fafine, ʼe ko te tagata; ko te pule ʼo Kilisito, ʼe ko te ʼAtua.” (1 Kolonito 11:3) Ko tona faka ʼuhiga, ʼe pule te tagata ʼi te famili, ʼe lagolago lelei tona ʼohoana kia ia, pea ʼe fakalogo te fānau ki tanatou ʼu mātuʼa. (Efesi 5:22-25, 28-33; 6:1-4) Kae ʼe koutou fakatokagaʼi, ʼe hoki maʼu te fiafia mo kapau ʼe fakahoko fakalelei te tuʼulaga pule ʼaia. ʼE ʼiloʼi e te ʼu tagata ʼohoana ʼaē ʼe pipiki ki te ʼAtua, ko tonatou ʼuhiga pule ʼe mole tonu ke fakahoko ʼaki he aga fefeka. ʼE nātou mulimuli ki te faʼifaʼitaki ʼa Sesu, tonatou Pule. Logope la “neʼe fakanofo [ia Sesu] ke pule kia meʼa fuli,” kae “neʼe mole haʼu ke tauhi ia ia, kae ke ina tauhi.” (Efesi 1:22; Mateo 20:28) ʼO toe feiā aipe, ʼe fakahoko e he tagata Kilisitiano tona ʼuhiga pule ke mole fua lelei pe kia ia, kae ke toe fua lelei foki ki tona ʼohoana pea mo tanā fānau.—1 Kolonito 13:4, 5.
7. Koteā te ʼu pelesepeto faka Tohi-Tapu ʼaē ʼe tokoni anai ki te fafine ʼohoana ke ina fakahoko tona tuʼulaga ʼaē neʼe fakatuʼutuʼu e te ʼAtua kia ia ʼi te famili?
7 Ko te fafine ʼaē ʼe pipiki ki te ʼAtua ʼe mole faiga anai ke fakalaka ake ʼi tona ʼohoana peʼe ina fia puleʼi anai. ʼE ko he fakafiafia kia ia hana lagolago ki ai pea mo gāue tahi mo ia. ʼI ʼihi temi, ʼe ʼui e te Tohi-Tapu ko te tagata ʼe ina maʼu te fafine ohage ko “he meʼa ʼaʼana,” ʼo hā ʼaki mai ʼe pule te tagata kia ia. (Senesi 20:3) Ka ʼohoana te fafine, pea ʼe fakalogo ki “te lao ʼo tona ʼohoana.” (Loma 7:2) ʼE toe fakahigoaʼi e te Tohi-Tapu te fafine ʼohoana, ko he “tokoni” pea mo he “fakakatoa” ʼo tona ʼohoana. (Senesi 2:20) ʼE ina maʼu te ʼu kalitate pea mo te ʼu fealagia ʼaē ʼe mole lagi maʼu e tona ʼohoana, pea ʼe tokoni ki tona ʼohoana ʼi te ʼu ʼaluʼaga ʼaē ʼe ʼaoga ki ai. (Tāʼaga Lea 31:10-31) ʼE toe ʼui foki e te Tohi-Tapu, ko te fafine ʼohoana ʼe ko he “kaumeʼa,” ʼe gāue fakatahi mo tona ʼohoana. (Malakia 2:14) ʼE tokoni te ʼu pelesepeto faka Tohi-Tapu ʼaia ke mahino ki te tagata ʼohoana pea mo te fafine ʼohoana pe koteā tonā ʼu tuʼulaga, pea ke nā fefakaʼapaʼapaʼaki mo fefakamaʼuhigaʼaki.
‘KOUTOU VAVE ʼI TE FAGONO’
8, 9. Koutou fakamahino he ʼu pelesepeto ʼe tokoni anai ki te famili ke hikihiki tanatou ʼu felogoi.
8 ʼI te tohi ʼaenī, neʼe lahi tatatou talanoa ʼo ʼuhiga mo te felogoi ʼa he famili. Koteā tona tupuʼaga? Heʼe faigafua anai te fakatokatoka ʼo te ʼu fihifihia mokā felogoi te famili pea mo nātou fefagonoʼaki. Neʼe fakahā liuliuga ʼi te tohi ʼaenī, ko te felogoi ʼaia ʼe ko he fefaipalalauʼaki. Neʼe fakahā fēnei mai e te tisipulo ko Sake ia te faʼahi ʼaia: “ ʼE tonu ki te tagata fuli pe, ke vave ʼi te fagono, ke tuai ʼi te palalau, mo tuai ʼi te ʼita.”—Sake 1:19.
9 ʼE toe maʼuhiga foki ke tou tokakaga ki tatatou ʼu faʼahiga palalau. ʼE mole feala anai ke lelei te felogoi, mo kapau ʼe tou fai he ʼu palalau neʼe mole fakakaukauʼi, mo agatuʼu pea mo he ʼu palalau fatufatu. (Tāʼaga Lea 15:1; 21:9; 29:11, 20) Tatau aipe peʼe moʼoni te ʼu meʼa ʼaē ʼe tou ʼui, kae kapau ʼe tou fai fakaʼita, ʼaki he loto fialahi, pea mo fai he ʼu palalau fefeka, pea ʼe mahino ia ʼe fakatupu mamahi anai. ʼE tonu ke lave lelei tatatou ʼu palalau, “ke konakonaʼi ʼaki te māsima.” (Kolose 4:6) ʼE tonu ke hage tatatou ʼu palalau ko “he ʼu foʼi ʼapo aulo ʼi he pa siliva neʼe togi.” (Tāʼaga Lea 25:11) Ko te ʼu famili ʼaē ʼe nātou faiga ke nātou fefelogoiʼaki, ʼe ko he fakatuʼutuʼu lahi ʼaia ki tonatou maʼuli fiafia.
TE MAʼUHIGA ʼO TE ʼOFA
10. Koteā te faʼahiga ʼofa ʼaē ʼe maʼuhiga ʼi te nofo ʼohoana?
10 ʼE lahi te fakaʼaogaʼi ʼo te kupu “ ʼofa” ʼi te tohi ʼaenī. ʼE kei koutou manatuʼi koa pe koteā tāfito te faʼahiga ʼofa ʼaē ʼe talanoa kiai? ʼE moʼoni, ʼe maʼuhiga te femanakoʼaki (ʼi te faka Keleka, eʹros) ʼa he taumatuʼa, pea kapau ʼe lava lelei tonā vāhaʼa faka taumatuʼa, pea ʼe tuputupu tanā feʼofani pea mo tanā fakakaumeʼa (ʼi te faka Keleka, phi·liʹa). Kae ko te ʼofa ʼaē ʼe maʼuhiga tāfito ʼe ko te ʼofa ʼaē ʼe faka ʼuhiga kiai te kupu faka Keleka, a·gaʹpe. ʼE ko te ʼofa ʼaia ʼaē ʼe tonu ke tou fakahā kia Sehova, mo Sesu, pea mo totatou kāiga. (Mateo 22:37-39) ʼE ko te ʼofa ʼaia ʼaē ʼe fakahā e Sehova ki te malamanei. (Soane 3:16) ʼE ko he meʼa lelei mokā tou fakahā te faʼahiga ʼofa ʼaia ki totatou ʼohoana pea mo tatatou ʼu fānau!—1 Soane 4:19.
11. ʼE tokoni feafeaʼi te ʼofa ki te nofo ʼohoana?
11 ʼE moʼoni, ʼi te nofo ʼohoana, ko te ʼofa maʼuhiga ʼaia ʼe ko “he noʼo haohaoa ki te logo tahi.” (Kolose 3:14) ʼE ina fakatahiʼi te taumatuʼa, pea mo ina uga nāua ke nā feagaleleiʼaki pea mo nā agalelei ki tanā ʼu fānau. ʼE tokoni te ʼofa ki te ʼu famili, ke nātou tauʼi tonatou ʼu faigataʼaʼia ʼi te logo tahi. Ka fakahaʼuhaʼu te temi matuʼa ʼa he taumatuʼa, pea ʼe tokoni te ʼofa kia nāua ke nā fekātakiʼaki pea mo feʼofaʼofani. “Ko te ʼofa . . . ʼe mole ina kumi pe te ʼu meʼa ʼaē ʼe ʼaoga kia te ia. . . . ʼE ina ʼamo ia meʼa fuli, ʼe tui kia meʼa fuli, ʼe falala kia meʼa fuli, ʼe ina kātakiʼi ia meʼa fuli. Ko te ʼofa ʼe mole puli ia ʼi he lakaga.”—1 Kolonito 13:4-8.
12. ʼO ʼuhiga mo he taumatuʼa, he koʼe ko tanā ʼofa ʼaē ki te ʼAtua ʼe ina fakamālohiʼi tanā nofo ʼohoana?
12 ʼE mālohi tāfito te ʼu noʼo ʼo te nofo ʼohoana mo kapau ʼe feʼofaʼofani te taumatuʼa, kae tāfito mo kapau ʼe nā ʼofa kia Sehova. (Tagata Tānaki 4:9-12) Koteā tona tupuʼaga? Neʼe tohi fēnei e te ʼapositolo ko Soane: “Koʼeni te faka ʼuhiga ʼo te ʼofa ʼaē ki te ʼAtua: ke tou mulimuli ki tana ʼu fakatotonu.” (1 Soane 5:3) Koia, ʼe tonu ki he ʼu mātuʼa ke nā akoʼi ki tanā fānau ke nātou pipiki ki te ʼAtua, ʼo mole nā fai pe ʼuhi ko tanā ʼofa mālohi kia nātou, kae ʼe nā fai heʼe ko te fakatotonu ʼaia ʼa Sehova. (Teutalonome 6:6, 7) ʼE nā tekeʼi anai te ʼu aga heʼeʼaoga koteʼuhi heʼe nā feʼofaʼofani, kae tāfito heʼe nā ʼofa kia Sehova, ʼaē ʼe ina “fakamāuʼi anai . . . te kau fai folonikasio pea mo te kau tono.” (Hepeleo 13:4) Tatau aipe peʼe fakatupu e he tahi ʼi te taumatuʼa he ʼu fihifihia mamafa, kae ko tonā ʼaē ʼofa kia Sehova, ʼe ina uga anai nāua ke nā mulimuli tuʼumaʼu ki te ʼu pelesepeto ʼo te Tohi-Tapu. Ei, ʼe maʼuli fiafia te ʼu famili ʼaē ʼe fakatafito tanatou feʼofani ki te ʼofa ʼaē kia Sehova!
TE FAMILI ʼAĒ ʼE INA FAI TE FINEGALO ʼO TE ʼATUA
13. Kapau ʼe tou faiga mālohi ke tou fai te finegalo ʼo te ʼAtua, pea ʼe tokoni feafeaʼi anai te faʼahi ʼaia ke tou fakamuʼamuʼa te ʼu meʼa ʼaē ʼe maʼuhiga tāfito?
13 ʼE fakaʼaogaʼi e te Kilisitiano tona maʼuli katoa moʼo fai ia te finegalo ʼo te ʼAtua. (Pesalemo 143:10) ʼE ko te faka ʼuhiga moʼoni ʼaia ʼo te pipiki ki te ʼAtua. Ko te fai ʼo te finegalo ʼo te ʼAtua ʼe tokoni anai ki te ʼu famili ke nātou fakamuʼamuʼa te ʼu meʼa ʼaē ʼe maʼuhiga tāfito. (Filipe 1:9, 10) Ohage la, neʼe fai e Sesu te fakatokaga ʼaenī: “Neʼe ʼau haʼu ʼo fakatupu te mavaevae, ʼe fakafeagai anai te tagata ki tana tāmai, te taʼahine ki tana faʼe, te fafine ʼohoana kei finemui ki te faʼe ʼo tona ʼohoana. ʼIo, ko te ʼu fili anai ʼo te tagata ʼe ko nātou totonu pe ʼaē ʼo tona loto fale.” (Mateo 10:35, 36) ʼE moʼoni te fakatokaga ʼaia ʼa Sesu, heʼe ko te tokolahi ʼo tana kau tisipulo neʼe fakatagaʼi e tonatou ʼu famili. ʼE ko he meʼa fakaloto mamahi! Kae ʼe mole tonu ke maʼuhiga age totatou famili ʼi totatou ʼofa ʼaē kia Sehova ʼAtua pea mo Sesu Kilisito. (Mateo 10:37-39) Kapau ʼe faʼa kātaki he tahi logope la tona fakatagaʼi e tona famili, pea ʼe feala ke fetogi tanatou aga ʼi tanatou sio ʼaē ki te ʼu fua lelei ʼo tana pipiki ki te ʼAtua. (1 Kolonito 7:12-16; 1 Petelo 3:1, 2) Tatau aipe peʼe mole hoko te faʼahi ʼaia, kae ʼe mole koutou maʼu anai he ʼu fua lelei mo kapau ʼe koutou fakagata takotou tauhi ki te ʼAtua ʼuhi ko te ʼu fakafeagai.
14. Kapau ʼe fia fai e te ʼu mātuʼa ia te finegalo ʼo te ʼAtua, pea koteā te meʼa ʼaē ka nātou akoʼi anai ki tanatou ʼu fānau?
14 Ko te fai ʼo te finegalo ʼo te ʼAtua ʼe tokoni anai ki te ʼu mātuʼa ke nātou fai he ʼu tonu ʼe lelei. Ohage la, ʼi ʼihi fenua, ʼe manatu te ʼu mātuʼa ʼe tonu ke foaki age e tanatou fānau hanatou falā pea mo taupau nātou mokā nātou matutuʼa. Logope la ʼe ko he maʼua ʼo te fānau ʼaē kua lalahi ke nātou taupau tanatou ʼu mātuʼa ʼaē kua matutuʼa, kae ʼe mole tonu leva ki te ʼu mātuʼa ke nātou uga tanatou fānau ke nātou faiga ke nātou maʼu koloā. ʼE mole fua lelei anai ki te ʼu fānau, mo kapau ʼe uga nātou e tanatou ʼu mātuʼa ke nātou faka maʼuhigaʼi te ʼu koloā, ka mole ko te ʼu meʼa fakalaumālie.—1 Timoteo 6:9.
15. Neʼe koteā te faʼifaʼitaki lelei ʼaē neʼe tuku mai e Enise, te faʼe ʼa Timoteo, ʼo ʼuhiga mo te fai ʼo te finegalo ʼo te ʼAtua?
15 Ko Enise, te faʼe ʼa Timoteo te kaumeʼa ʼo Paulo, neʼe ko he faʼifaʼitaki lelei ʼi te faʼahi ʼaia. (2 Timoteo 1:5) Logope la ko tona ʼohoana neʼe mole tui kia Sehova, kae ko Enise pea mo Loise te kui ʼa Timoteo, neʼe nā ako fakalelei ia Timoteo ke pipiki ki te ʼAtua. (2 Timoteo 3:14, 15) ʼI te lahi ake ʼa Timoteo, neʼe tuku ia ia e Enise ke ʼalu ʼo gāue faka misionea mo Paulo, moʼo faka mafola te Puleʼaga. (Gāue 16:1-5) Neʼe lagi fiafia ʼaupito ʼi te liliu ʼo tana tama ko he misionea faiva! Ko tana pipiki ʼaē ki te ʼAtua ʼi tana kua lahi ake, neʼe hā lelei ai te ako ʼaē neʼe fai age kia ia ʼi tana kei veliveli. ʼE mahino papau ia, neʼe fiafia ia Enise ʼi tana logo ʼaē ki te ʼu fakamatala ʼo te gāue agatonu ʼa Timoteo ʼi tona minisitelio, logope la neʼe lotomamahi ʼi tana kua puli.—Filipe 2:19, 20.
TE FAMILI PEA MO TOKOTOU KA HAʼU
16. ʼI tona ʼuhiga tama, neʼe tokaga feafeaʼi ia Sesu ki tana faʼe, kae neʼe koteā te fakatuʼutuʼu tāfito ʼo tona maʼuli?
16 Neʼe lahilahi ake ia Sesu ʼi he famili neʼe pipiki ki te ʼAtua pea ʼi tana kua tagata, neʼe ko he tama neʼe tokaga lelei ki tana faʼe. (Luka 2:51, 52; Soane 19:26) Kae ko te fakatuʼutuʼu tāfito ʼa Sesu, neʼe ko tana fakahoko te finegalo ʼo te ʼAtua, pea kia ia neʼe faka ʼuhiga te faʼahi ʼaia ke ina faiga ke maʼu e te hahaʼi te maʼuli heʼegata. Neʼe ina fakahoko te faʼahi ʼaia ʼo ina foaki tona maʼuli haohaoa moʼo totogi ʼaki te hahaʼi agahala.—Maleko 10:45; Soane 5:28, 29.
17. ʼAki te nofo agatonu ʼa Sesu, koteā te ʼu ʼamanaki taulekaleka ʼaē ʼe feala ke maʼu e nātou ʼaē ʼe nātou fai te finegalo ʼo te ʼAtua?
17 ʼI te ʼosi mate ʼa Sesu, neʼe fakatuʼuake ia ia e Sehova ki te maʼuli ʼi selo pea neʼe ina foaki age kia te ia te pule lahi, ʼo ina fakanofo ke Hau ʼi te Puleʼaga ʼo selo. (Mateo 28:18; Loma 14:9; Fakahā 11:15) Neʼe faka fealagia e te sakilifisio ʼa Sesu ke filifili ni ʼu hahaʼi ke nātou hau mo ia ʼi te Puleʼaga ʼaia. Neʼe toe faka fealagia e te sakilifisio ʼaia ke maʼu e te hahaʼi ʼaē ʼe loto agatonu te maʼuli haohaoa ʼi he kele ka liliu anai ko he palatiso. (Fakahā 5:9, 10; 14:1, 4; 21:3-5; 22:1-4) ʼI te temi ʼaenī, ko he pilivilesio lahi ke tou tala te logo lelei faka kolōlia ʼaia ki te hahaʼi.—Mateo 24:14.
18. Koteā te fakamanatu pea mo te fakaloto mālohi ʼaē ʼe fai ki te ʼu famili pea mo tatou takitokotahi?
18 Ohage ko te meʼa ʼaē neʼe fakahā e te ʼapositolo ko Paulo, ʼe maʼu ʼe nātou ʼaē ʼe pipiki ki te ʼAtua te ʼu fakapapau ʼo te ʼu tapuakina ʼaia ʼo te maʼuli “ka haʼu.” ʼE mahino papau ia ʼe mole he tahi age meʼa ke tou maʼuli fiafia ai! Koutou manatuʼi, “ ʼe mole te malamanei pea mo tona loto, kae ko ʼaē ʼe ina fai te finegalo ʼo te ʼAtua ʼe nofo maʼu ia ʼo talu ai.” (1 Soane 2:17) Koia, peʼe kei koutou veliveli pe kua koutou maʼu fānau, pe kua koutou ʼohoana, peʼe koutou taupau tokotahi takotou ʼu fānau peʼe mole hakotou fānau, kae ʼe koutou faiga anai ke koutou fai te finegalo ʼo te ʼAtua. Tatau aipe pe fakatagaʼi koutou peʼe koutou tau mo he ʼu faigataʼa lahi, koutou manatuʼi ʼe koutou kaugana ki te ʼAtua maʼuli. Koia, tou fakaʼamu ke koutou fai te ʼu meʼa ʼaē ʼe fakafiafia ai te loto ʼo Sehova. (Tāʼaga Lea 27:11) Pea ʼofa pe ke koutou fai te aga ʼaē ka ina faka fealagia anai kia koutou ke koutou maʼuli fiafia ʼi te temi ʼaenī, pea mo te maʼuli heʼegata ʼi te malamanei foʼou ʼaē ka hoko mai!