Ako 14
ʼE Fakaʼaluʼalu Feafeaʼi Te Gāue ʼa Te Kau Fakamoʼoni ʼa Sehova
Neʼe kamata ʼanafea te hisitolia ʼo te kau Fakamoʼoni ʼa Sehova ʼo totatou temi? (1)
ʼE fakaʼaluʼalu feafeaʼi te ʼu fono ʼa te kau Fakamoʼoni ʼa Sehova? (2)
ʼE nātou totogi feafeaʼi te ʼu meʼa kehekehe ʼaē ʼe ʼaoga ki tonatou ʼu fale fono? (3)
Ko ai ia nātou ʼaē ʼe nātou takitaki te ʼu kokelekasio? (4)
Koteā te ʼu fakatahi lalahi ʼaē ʼe fai ʼi te taʼu fuli? (5)
Koteā te ʼu gāue ʼaē ʼe fai ʼi tonatou nofoʼaga faka malamanei pea mo te ʼu filiale? (6)
1. ʼI totatou temi, neʼe kamata te hisitolia ʼo te kau Fakamoʼoni ʼa Sehova, ʼi te taʼu 1870. Neʼe ʼuluaki fakahigoaʼi nātou ko te kau Ako ʼo te Tohi-Tapu. Kae ʼi te taʼu 1931 neʼe nātou toʼo te higoa faka Tohi-Tapu ʼaē ko te kau Fakamoʼoni ʼa Sehova. (Isaia 43:10) ʼI te kamata neʼe tokosiʼi te kautahi pea neʼe tuputupu ʼo aʼu ki te toko lauʼi miliona kau Fakamoʼoni, ʼe nātou maʼumaʼua ʼi te fai faka mafola ʼi te ʼu fenua e 230 tupu.
2. Tokolahi te ʼu kokelekasio ʼa te kau Fakamoʼoni ʼa Sehova ʼe nātou fono tuʼa tolu ʼi te vāhaʼa fuli. ʼE fakaafe koutou ke koutou kau ki te ʼu fono ʼaia. (Hepeleo 10:24, 25) Ko tanatou ʼu akonaki ʼe fakatafito ki te Tohi-Tapu. ʼE kamata pea mo fakaʼosi te ʼu fono ʼaki he faikole. Tahi ʼaē meʼa, ʼe hivaʼi ʼi te ʼu fono te ʼu “hiva fakalaumālie.” (Efesi 5:18, 19) ʼE mole totogi te kau ki te ʼu fono ʼaia, pea ʼe mole fai he tae falā.—Mateo 10:8.
3. ʼE lahi te ʼatu kokelekasio ʼe nātou fai tanatou ʼu fono ʼi te ʼu Fale ʼo te Puleʼaga. ʼI te agamāhani, ʼe laga te ʼu fale faigafua ʼaia e te kau Fakamoʼoni ʼaē ʼe nātou gāue ʼi tonatou lotolelei. ʼE mole koutou sisio anai ki he ʼu paki, he ʼu koluse, peʼe ko he ʼu meʼa feiā ʼi te ʼu Fale ʼo te Puleʼaga. Ko te paʼaga ʼaē neʼe fakaʼaogaʼi moʼo totogi ʼo te ʼu meʼa ʼaia, ko he paʼaga ia neʼe foaki fakaʼofa. Kia nātou ʼaē ʼe nātou fia fai he meʼa ʼofa, ʼe ʼi ai te ʼu kesi tukuʼaga meʼa ʼofa.—2 Kolonito 9:7.
4. ʼI te ʼu kokelekasio takitokotahi, ʼe ʼi ai te ʼu tagata ʼāfea, pe ko te ʼu tagata taupau. ʼE nātou takitaki te ʼu akonaki ʼi te kokelekasio. (1 Timoteo 3:1-7; 5:17) ʼE tokoni kia nātou te kau tagata faifekau faka minisitelio. (1 Timoteo 3:8-10, 12, 13) Ko te kau tagata ʼāfea ʼaia ʼe mole nātou māʼoluga age nātou ʼi te hahaʼi fuli ʼo te kokelekasio. (2 Kolonito 1:24) ʼE mole foaki age kia nātou he ʼu higoa faka tuʼulaga. (Mateo 23:8-10) ʼE mole nātou kehe ʼi tonatou faʼahiga teu mo nātou ʼaē ʼo te kokelekasio. ʼE mole totogi ia nātou ki te gāue ʼaē ʼe nātou fai. Ko te kau tagata ʼāfea ʼe nātou tokakaga ʼaki he lotolelei ki te ʼu meʼa ʼaē ʼe ʼaoga ki te faʼahi fakalaumālie ʼo te kokelekasio. ʼE feala ke nātou foaki he fakaloto fīmālie pea mo he takitaki ʼi te ʼu temi faigataʼa.—Sake 5:14-16; 1 Petelo 5:2, 3.
5. ʼE toe fai foki e te kau Fakamoʼoni ʼa Sehova te ʼu fakatahi lalahi ʼi te taʼu fuli. ʼI te ʼu lakaga ʼaia, ʼe fakatahi ai te ʼu kokelekasio e tokolahi ki he polokalama makehe ʼo te ako ʼo te Tohi-Tapu. Ko te papitemaʼi ʼo te ʼu tisipulo foʼou ʼe ko he faʼahi ʼe fai tuʼumaʼu ʼi te polokalama ʼo te ʼu fakatahi fuli.—Mateo 3:13-17; 28:19, 20.
6. Ko te nofoʼaga faka malamanei ʼo te kau Fakamoʼoni ʼa Sehova ʼe tuʼu ʼi New York. ʼE nofo ai te Kolesi Pule, ko he kūtuga ʼe faʼufaʼu e te kau tagata ʼāfea popoto, pea ʼe nātou takitaki te ʼu kokelekasio ʼo te malamanei katoa. ʼE toe ʼi ai foki mo te ʼu filiale e 100 tupu ʼi te malamanei. ʼI te ʼu potu ʼaia, ko te ʼu tēhina mo tuagaʼane ʼe nātou foaki tonatou temi ki te tā pea mo te fetuku ʼo te ʼu tohi faka Tohi-Tapu. Tahi ʼaē meʼa, ʼe nātou takitaki te fakaʼaluʼalu ʼo te gāue fai faka mafola. He koʼe ʼe mole koutou fakatuʼutuʼu ke koutou ʼolo ʼo mamata ki te filiale ʼaē ʼe tuʼu ōvi mai kio koutou?