He Koʼē ʼe ʼi Ai Te Kautahi ʼa Te ʼAtua?

1. He koʼē neʼe fakatuʼutuʼu e te ʼAtua ia te Iselaele ʼo te temi muʼa?

Neʼe fakatuʼutuʼu e te ʼAtua ia te hākoga ʼo te pāteliaka ko Apalahamo ke liliu ko he puleʼaga pea neʼe ina foaki age kiā nātou ʼana lao. Neʼe ina fakahigoaʼi ia te puleʼaga ʼaia ko “Iselaele” pea mo fakatotonu kiā nātou ke natou puipui ia te tauhi moʼoni pea mo tana folafola. (Pesalemo 147:19, 20) Koia neʼe feala ai ke maʼu he ʼu lelei e te tagata fuli pē ʼuhi ko Iselaele.​—Lau ia Senesi 22:18.

Neʼe filifili e te ʼAtua ia te kau Iselaele ke natou liliu ko tana hahaʼi fakamoʼoni. Ko tonatou hisitolia ʼāfea e fakahā ai te ʼu lelei ʼe feala ke maʼu e te hahaʼi mokā ʼe natou fakalogo ki te ʼu lao ʼa te ʼAtua. (Tetelonome 4:6) Koia, neʼe feala ai ki ʼihi ke natou ʼiloʼi te ʼAtua moʼoni ʼaki tanatou sio ʼaē ki te kau Iselaele pea mo tanatou ako mai ia nātou.​—Lau ia Esaia 43:10, 12.

2. He koʼē ʼe fakatuʼutuʼu ia te kau Kilisitiano moʼoni?

ʼAki te temi, neʼe puli leva te ʼofa ʼo te ʼAtua ki te kau Iselaele, pea neʼe fetogi ai leva e Sehova ia te puleʼaga ʼaia ʼaki te kōkelekāsio Fakakilisitiano. (Mateo 21:43; 23:37, 38) Koia, ʼi te temi nei, kua fetogi te kau Iselaele e te kau Kilisitiano moʼoni ʼi tonatou ʼuhiga fakamoʼoni ʼa Sehova.​—Lau ia Gaue 15:14, 17.

Neʼe fakatuʼutuʼu e Sesu ʼana tisipulo ke natou fai fakamafola pea mo fai he ʼu tisipulo ʼi te ʼu fenua fuli. (Mateo 10:7, 11; 24:14; 28:19, 20) Ko te gāue ʼaia kua mālohi ʼosi tona fai ʼi te temi ʼaenī ʼo te fakaʼosi ʼo te tuʼu ʼo te ʼu faʼahiga meʼa ʼaenī. Talu mai te hisitolia ʼo te tagata, ko te hoki fakatahiʼi ʼaē e Sehova te toko lauʼi miliona hahaʼi mai te ʼu fenua fuli, ki te tauhi moʼoni. (Apokalipisi 7:9, 10) ʼE fakatahiʼi te kau Kilisitiano moʼoni ke natou fefakalotomālohiʼaki pea mo fetokoniʼaki. ʼI te kele kātoa ʼe natou fakaʼaoga te polokalama ako Fakatohi-tapu pē e tahi, ʼi ʼanatou fono.​—Lau ia Hepeleo 10:24, 25.

3. Neʼe kamata feafeaʼi ia te kautahi ʼa te kau Fakamoʼoni ʼa Sehova ʼo totatou temi?

ʼI te ʼu taʼu 1870 neʼe ako te Tohi-Tapu e te kiʼi kūtuga, pea neʼe natou toe maʼu te ʼu moʼoni Fakatohi-tapu neʼe mole kei ʼiloʼi e te hahaʼi. Neʼe natou mahino ko Sesu neʼe ina fakatuʼutuʼu ia te kōkelekāsio Fakakilisitiano ki te gāue fai fakamafola, koia lā ʼaē neʼe natou kamata fakamafola ai ia te Puleʼaga ʼi te ʼu fenua fuli. ʼI te taʼu 1931, neʼe natou fakatoʼo leva kiā nātou te higoa ʼaē ko te kau Fakamoʼoni ʼa Sehova.​—Lau ia Gaue 1:8; 2:1, 4; 5:42.

4. ʼE fakatuʼutuʼu feafeaʼi ia te kau Fakamoʼoni ʼa Sehova?

ʼI te temi ʼo te kau ʼapositolo, neʼe takitaki e he ʼu tagata fakapotopoto ʼi te faʼahi fakalaumālie ia te ʼu kōkelekāsio Fakakilisitiano fuli ʼo te ʼu fenua kehekehe. Pea ko te ʼu tagata ʼaia neʼe natou fakamoʼoni ko Sesu ʼe ko te Pule ʼo te kōkelekāsio. (Gaue 16:4, 5) ʼO toe fēia pē mo te temi nei, ko te kau Fakamoʼoni ʼa Sehova ʼi te kele kātoa ʼe taki ia nātou e te ʼu tagata ʼāfea fakapotopoto ʼi te faʼahi fakalaumālie, ʼaē ʼe natou faʼufaʼu te Kolesi Pule. ʼE natou takitaki te ʼu filiale ʼo te kau Fakamoʼoni ʼa Sehova, ʼaē ʼe fai ai te fakaliliu ki te ʼu lea e 600 tupu, mo te tā pea mo te tufa ʼo te ʼu tohi Fakatohi-tapu. Koia ʼe feala ai ki te Kolesi Pule ʼaia ke ina fai he fakalotomālohi Fakatohi-tapu pea mo he takitaki ki te ʼu kōkelekāsio ʼaē e lauʼi 100 000 tupu ʼi te kele kātoa. ʼI te ʼu kōkelekāsio takitahi ʼe ʼi ai te ʼu tagata fakapotopoto ʼi te faʼahi fakalaumālie ʼe natou gāue ohagē ko he kau tagata ʼāfea peʼe ko he ʼu tauhi ovi fakalaumālie. Ko te ʼu tagata ʼaia ʼe natou tōkakaga lelei ki te faga ovi ʼa te ʼAtua.​—Lau ia 1 Petelo 5:2, 3.

ʼE fakatuʼutuʼu e te kau Fakamoʼoni ʼa Sehova ke natou fakamafola te logo lelei pea mo fai ni ʼu tisipulo. Ohagē pē ko te fai ʼa te kau ʼapositolo, ʼe tou fai fakamafola ʼi te ʼu ʼapi. (Gaue 20:20) Pea ʼe tou fakaafe te hahaʼi ʼaē ʼe tauhi fakamālotoloto ke natou ako te Tohi-Tapu. Kae ko te kau Fakamoʼoni ʼa Sehova ʼe mole ko he kautahi pē. Kae ʼe ko te fāmili ʼe ʼi ai tona Tamai ʼofa mo te ʼu tehina pea mo te ʼu tuagaʼane ʼe natou fetokoniʼaki. (2 Tesalonika 1:3) Mai tona ʼaluʼaga ʼaē ʼe fakatuʼutuʼu ia te hahaʼi ʼa Sehova moʼo fakafiafiaʼi ʼo ia, pea mo tokoni ki ʼihi, ʼe feala ke tou ʼui ai ʼe ko he fāmili ʼe fiafia tokotahi ʼi te kele.​—Lau ia Pesalemo 33:12; Gaue 20:35.