Ako 15

Ke Nātou Fai Te Finegalo ʼo Te ʼAtua

He koʼe ʼe tonu ke koutou fakahā ki te hahaʼi te ʼu meʼa ʼaē ʼe koutou ako? (1)

Ko ai ʼaē ʼe feala ke koutou tala ki ai te logo lelei? (2)

He koʼe ʼe tonu ke lelei takotou aga? (2)

Ko te temi fea ʼaē ʼe feala ai ke koutou fai faka mafola mo te kokelekasio? (3)

1. ʼI te temi nei, kua lahi te ʼu meʼa lelei ʼaē kua koutou ako ʼi te Tohi-Tapu. Ko te ʼatamai mālama ʼaia ʼe tonu ke ina taki koutou ke koutou maʼu te ʼulugaaga tagata faka Kilisitiano. (Efesi 4:​22-24) Ko te taʼi ʼatamai mālama ʼaia ʼe maʼuhiga ʼaupito ke koutou maʼu ai te maʼuli heʼegata. (Soane 17:⁠3) Kae, ʼe toe ʼaoga foki ki te hahaʼi ke nātou fagono ki te logo lelei ke toe hāo foki mo nātou. Ko te kau Kilisitiano moʼoni fuli ʼe tonu ke nātou faka mafola ki te hahaʼi. ʼE ko he meʼa neʼe fakatotonu e te ʼAtua.​—​Loma 10:10; 1 Kolonito 9:16; 1 Timoteo 4:⁠16.

2. ʼE feala ke koutou kamata vaevae te ʼu manatu lelei ʼaē ʼe koutou lolotoga ako mo nātou ʼaē ʼe feōvi mo koutou. Koutou fakahā te ʼu meʼa ʼaia ki tokotou famili, mo tokotou ʼu kaumeʼa, mo tokotou ʼu kaugā ako, pea mo tokotou ʼu kaugā gāue. Ka koutou fakahā te ʼu manatu ʼaia, ʼe tonu ke koutou agalelei pea mo faʼa kātaki. (2 Timoteo 2:​24, 25) Koutou manatuʼi, ʼi te agamāhani, ʼe lahi age te tokagaʼi e te hahaʼi te aga ʼa he tahi, ʼi tanatou fakalogo ki te meʼa ʼaē ʼe ina ʼui age kia nātou. Koia, kapau ʼe lelei takotou aga pea ʼe feala ke ina uga te hahaʼi ke nātou fagono ki te logo ʼaē ʼe koutou tala age kia nātou.​—⁠Mateo 5:16; 1 Petelo 3:​1, 2, 16.

3. ʼAki te temi, kua lagi feala leva ke koutou kamata fai faka mafola mo te kau Fakamoʼoni ʼa Sehova ʼo tokotou kokelekasio. ʼE ko he faʼahi maʼuhiga ʼi takotou tuputupu. (Mateo 24:14) Ko he toe fiafia ʼe koutou maʼu anai mo kapau neʼe feala hakotou tokoni ki he tahi, ke liliu ko he kaugana ʼa Sehova pea mo ina maʼu te maʼuli heʼegata!​—⁠1 Tesalonika 2:​19, 20.