Ke Tologa Takotou Fakakaumeʼa, ʼe Tonu Ke Koutou Aga Fakakaumeʼa

Ko te aga fakakaumeʼa ʼe fakatafito ki te ʼofa. Kapau ʼe lahi te ʼu meʼa ʼaē ʼe koutou ako ʼo ʼuhiga mo Sehova, pea ʼe toe lahi anai mo takotou ʼofa kia te ia. ʼI te tuputupu ʼo takotou ʼofa ki te ʼAtua, ʼe toe tuputupu anai mo takotou holi ʼaē ke koutou tauhi kia te ia. Ko takotou holi ʼaia ʼe ina uga anai koutou ke koutou liliu ko he tisipulo ʼa Sesu Kilisito. (Mateo 28:19) Kapau ʼe koutou fakatahi mo te foʼi famili fiafia ʼo te kau Fakamoʼoni ʼa Sehova, pea ʼe koutou kaumeʼa anai mo te ʼAtua ʼo talu ai. Koteā ʼaē ʼe tonu ke koutou fai?

ʼE tonu ke koutou fakahā takotou ʼofa ki te ʼAtua, ʼo koutou fakalogo ki tana ʼu lao. “Ko te ofa aeni o te Atua: ke tou taupau tana u fekau, pea e mole mamafa tana u fekau.”—1 Soane 5:3.

Koutou maʼuliʼi te ʼu meʼa ʼaē ʼe koutou ako. Neʼe fai e Sesu te lea fakatātā ʼo ʼuhiga mo te faʼahi ʼaia. Ko te tagata poto neʼe ina fakatuʼu tona ʼapi ʼi te fuga maka. Ko te tagata vale neʼe ina fakatuʼu tona ʼapi ʼi te ʼone. Neʼe tō te afā lahi, pea neʼe mole holo te ʼapi ʼaē neʼe laga ʼi te fuga maka, kae neʼe holo te ʼapi ʼaē neʼe laga ʼi te ʼone. Neʼe ʼui e Sesu ko nātou ʼaē ʼe fakalogo ki tana ʼu akonaki pea mo nātou maʼuliʼi, ʼe nātou hage ko te tagata poto ʼaē neʼe ina fakatuʼu tona ʼapi ʼi te fuga maka. Kae ko nātou ʼaē ʼe logo ki tana ʼu akonaki, ka mole nātou maʼuliʼi, ʼe nātou hage ko te tagata vale ʼaē neʼe ina fakatuʼu tona ʼapi ʼi te ʼone. ʼE koutou fia hage ko te tagata fea?—Mateo 7:24-27.

Te foaki ʼo tokotou maʼuli. Ko tona faka ʼuhiga, ʼe koutou faikole kia Sehova ʼo fakahā age kia te ia ʼe koutou fia fai tona finegalo ʼo talu ai. Ko te fai ʼo te finegalo ʼo te ʼAtua, ʼe ina fakahā ai ko koutou ko he ʼu tisipulo ʼa Sesu Kilisito.—Mateo 11:29.

Te papitema. “Tuuake o tali te papitema mo te fakamolemole o au agahala i tau pauiʼi tona huafa.”—Gaue 22:16.

Koutou tauhi katoa ki te ʼAtua. “Ko he mea’pe e koutou fai, koutou fai mo te lotolelei, o hage e koutou gaue ki te Aliki, kae e mole koutou gaue ki te tagata.”—Kolose 3:23.