Te ʼu Fehuʼi ʼa Te Kau Lautohi

ʼE faka ʼuhiga koa ia Apokalipesi 20:8 ʼe kaugamālie anai te hahaʼi ka fakahēʼi e Satana ʼi te ʼahiʼahi fakamuli?

ʼE fakamatala ia Apokalipesi 20:8 (MN), te ʼohofi fakamuli e Satana ia te hahaʼi ʼaē ʼe maʼuʼuli ʼi te kele ʼi te fakaʼosi ʼo te ʼu taʼu e afe ʼi te pule ʼa te Puleʼaga faka Mesianike. ʼO ʼuhiga mo Satana, ʼe ʼui fēnei e te vaega: “ ʼE hū anai ki tuʼa moʼo fakahēʼi te ʼu puleʼaga ʼaē ʼe nonofo ʼi te agele e fā ʼo te kele, ia Koke mo Makoke, moʼo fakamāʼopoʼopo ia nātou ki te tau. Ko tonatou kaugamālie ʼe hage ko te ʼone ʼo te tai.”

Logope te ʼu puleʼaki ʼo te poto fakatagata pea mo tana ʼu meʼa gāue, kae ʼe mole heʼeki ʼiloʼi te lahi ʼo “te ʼone ʼo te tai.” Koia ʼe feala ai ke ʼui ko te palalau ʼaia ʼe faka ʼuhiga ki he meʼa ʼe mole ʼiloʼi tona lahi, tona kaugamālie. Kae ʼe faka ʼuhiga koa ki he meʼa ʼe mole malau ʼi tona lahi ʼaupito, peʼe faka ʼuhiga pe koa ki he meʼa ʼe lahi kae ʼe mole pe ʼiloʼi ia peʼe feafeaʼi tona lahi peʼe tokofia tona kaugamālie?

ʼI te Tohi-Tapu, ʼe lahi te ʼu faʼahiga fakaʼaogaʼi ʼo te kupuʼi palalau “ohage ko te ʼone ʼo te tai.” Ohage foki la ia Senesi 41:49, ʼe tou lau fēnei: “Neʼe tānaki fakalahi e Sosefo ia te fulumeto, ohage ko te ʼone ʼo te tai, ʼo aʼu ki tona mole kei malau, koteʼuhi neʼe kua lahi ʼaupito.” ʼI henī ʼe faka maʼuhigaʼi te palalau ʼaia ki tona mole malau. ʼO feiā mo Sehova neʼe ina ʼui fēnei: “Ohage pe ko tatatou mole malau ʼo te kautau ʼo te lagi pea mo fakafuafua te ʼone ʼo te tai, ʼo toe feiā pe ʼe ʼau fakatuputupu anai te hōloga ʼo Tavite, taku tagata kaugana.” ʼE tou ʼiloʼi papau ʼe mole malau te ʼu fetuʼu ʼo te lagi pea mo te ʼone ʼo te tai, ʼe toe feiā mo tatatou ʼiloʼi papau ʼe tonu ke fakahoko e Sehova tana fakapapau kia Tavite.—Selemia 33:22.

ʼE tau faka ʼuhiga te kupuʼi palalau “te ʼone ʼo te tai” ki he meʼa ʼe lahi ʼaupito peʼe kaugamālie. Neʼe ʼōposi te kau Iselaele e te solia Filisitini ʼaē neʼe maʼopoʼopo ʼi Mikemasi, ʼaē neʼe nātou “kaugamālie ohage ko te ʼu fisiʼi ʼone ʼaē ʼe ʼi te matatai.” (1 Samuele 13:5, 6; Kau Fakamāu 7:12) Pea “neʼe foaki e te ʼAtua kia Salomone ia he poto mo he loto fakakaukau ʼe lahi ʼaupito, mo he toe loto manavaʼofa, ohage ko te ʼone ʼaē ʼe ʼi te matatai.” (1 Hau 4:29) Logope neʼe palalau ki he ʼu meʼa ʼe lahi ʼaupito, kae neʼe ʼi ai tona ʼu tuʼakoi.

ʼE feala pe ke faka ʼuhiga “te ʼone ʼo te tai” ki he meʼa ʼe lahi, kae mole faka ʼuhiga ki he meʼa ʼe lahi ke feafeaʼi. Neʼe ʼui fēnei e Sehova kia Apalahamo: “ ʼE ʼau fakahahaʼi moʼoni anai tou hāko ke hage ko te ʼu fetuʼu ʼo te lagi pea ke hage ko te ʼu fisiʼi ʼone ʼaē ʼe ʼi te matatai.” (Senesi 22:17) ʼI tana toe palalau ʼo ʼuhiga mo te fakapapau ʼaia kia Sakopo, te mokopuna ʼo Apalahamo, neʼe fakaʼaogaʼi e Sehova ia te kupuʼi palalau “te efu ʼo te kele,” ʼaē neʼe toe ʼui e Sakopo ʼe ko “te ʼu fisiʼi ʼone ʼo te tai.” (Senesi 28:14; 32:12) ʼAki te hoko ʼo te ʼu meʼa, kae tuku keheʼi ia Sesu Kilisito, neʼe liliu te hāko ʼo Apalahamo ko te toko 144 000, ʼaē neʼe fakahigoaʼi e Sesu ko te “kiʼi fagaovi.”—Luka 12:32; Kalate 3:16, 29; Apokalipesi 7:4; 14:1, 3.

Koteā ʼaē ʼe tou ako mai te ʼu faʼifaʼitaki ʼaia? Ko te palalau ʼaē “ohage ko te ʼone ʼo te tai” ʼe mole faka ʼuhiga tuʼumaʼu ki he meʼa ʼe lahi ʼaupito, peʼe ki he meʼa ʼe mole malau. ʼE tautau faka ʼuhiga ki he meʼa ʼe mole ʼiloʼi tona lahi, kae ʼe malau. Koia ʼe lagi fakapotopoto hatatou tui, ko te hahaʼi agatuʼu ʼaē ka lagolago anai kia Satana ʼi tana ʼohofi fakaʼosi te hahaʼi ʼa te ʼAtua, ʼe mole nātou kaugamālie ʼo ʼui ʼe mole feala honatou malau, kae ʼe kaugamālie koteʼuhi ʼe feala anai ke nātou fakatupu tuʼutāmaki. Kae ʼe mole heʼeki ʼiloʼi nei peʼe nātou tokofia.