Ko Te Temi Fea ʼAē ʼe Tonu Ai Ke Pūlouʼi Te ʼUlu Pea Koteā Tona Tupuʼaga?

Ko te temi fea ʼaē ʼe tonu ai ke pūlouʼi e he fafine Kilisitiano tona ʼulu pea koteā tona tupuʼaga? Tou vakaʼi te manatu ʼaē neʼe tohi e te ʼapositolo ko Paulo ʼaki te takitaki ʼa te laumālie, ʼo ʼuhiga mo te faʼahi ʼaia. ʼE ina fakahā mai ia te ʼu tokoni ke feala ai ke tou fai ni ʼu tonu ʼe lelei pea mo natou fakakolōliaʼi ai te ʼAtua. (1 Kolonito 11:3-16) ʼE fakahā e Paulo ia te ʼu faʼahi e tolu ʼe tonu ke tou fakakaukauʼi: (1) te ʼu gāue ʼaē ʼe fakamaʼua ai ki te fafine ke ina pūlouʼi tona ʼulu, (2) te ʼu ʼaluʼaga ʼaē ʼe tonu ai ke ina fai te faʼahi ʼaia, pea (3) te ʼu tupuʼaga ʼo tana fakalogo ki te fakatotonu ʼaia.

Te ʼu gāue. ʼE fakahā e Paulo ia te ʼu gāue e lua: te faikole pea mo te fai fakakikite. (Vaega 4, 5) ʼE mahino ia, ko te faikole ʼe ko hatatou tauhi kiā Sehova. Iā ʼaho nei, ko te fai fakakikite ʼe fakaʼuhiga ki te akoʼi ʼo te hahaʼi ʼaki ia te Tohi-Tapu, te gāue ʼaē ʼe fai e he minisi Kilisitiano. Kae ʼe ʼui koa e Paulo ʼe tonu ke pūlouʼi e te fafine tona ʼulu ʼi te temi fuli pē ʼaē ʼe faikole ai peʼe ina akoʼi te ʼu moʼoni ʼo te Tohi-Tapu ki he tahi? Kailoa ia. ʼE fakalogo te pūlouʼi ʼo te ʼulu ʼo te fafine ki te ʼu ʼaluʼaga ʼaē kā ina fai ai te kole peʼe ko te ako.

Te ʼu ʼaluʼaga. ʼE fakahā ʼi te ʼu palalau ʼa Paulo ia ʼaluʼaga e lua, peʼe ko te ʼu potu ʼaē ʼe gāue ai te fafine Kilisitiano: ʼi te fāmili pea mo te kōkelekāsio. ʼE ina ʼui fēnei: “Ko te pule ʼo te fafine, ko te tagata. . . . Ko te fafine ʼaē ʼe faikole peʼe fai fakakikite kae mole ina pūlouʼi tona ʼulu ʼe fakaufiufi ki tona pule.” (Vaega 3, 5) ʼI te fakatuʼutuʼu fakafāmili, neʼe tuku e Sehova ki te tagata ʼohoana ia te tuʼulaga pule. Kapau ʼe mole tali e te fafine ke pule tona ʼohoana, pea ʼe fakatupu fakaufiufi anai ia te fafine ki tona ʼohoana mo kapau ʼe ina fai te ʼu maʼua ʼaē neʼe foaki e Sehova ki te tagata. Ohagē lā, kapau ʼe tonu ke ina takitaki he ako Tohi-Tapu ʼe kau kiai tona ʼohoana, ʼe ina fakahā anai tana ʼiloʼi ʼaē ko ia tona pule ʼaki tana pūlouʼi ʼo tona ʼulu. ʼE ina fai anai te faʼahi ʼaia tatau aipē pe kua papitema tona ʼohoana peʼe kailoa, heʼe ko ia te pule ʼo te fāmili.a Kapau ʼe tonu ke faikole peʼe faiako ʼo kau kiai hana tama kua papitema kae kei tamasiʼi, ʼe tonu anai ke ina pūlouʼi tona ʼulu, ʼo mole ina fai anai te faʼahi ʼaia heʼe ko tana tama te pule ʼo te fāmili, kae ʼe pūlou anai ia heʼe ko te tuʼulaga pule ʼe foaki ki te ʼu tagata ʼaē kua papitema ʼi te kōkelekāsio.

ʼE talanoa Paulo ki te ʼaluʼaga ʼo te kōkelekāsio, ʼo ina ʼui fēnei: “Kapau ʼe fia fakafifihi e he tahi he agaʼi fenua, ʼe mole he tahi age agaʼi fenua, ʼo fēia ʼi te ʼu kōkelekāsio ʼa te ʼAtua.” (Vaega 16) ʼI te kōkelekāsio Fakakilisitiano, ʼe foaki ia te tuʼulaga pule ki te ʼu tagata ʼaē kua papitema. (1 Timoteo 2:11-14; Hepeleo 13:17) ʼE ko te hahaʼi tagata pē ʼaē ʼe hinoʼi ke natou tagata ʼāfea pea mo faifekau fakaminisitelio, pea ko nātou ʼaē neʼe foaki ki ai e te ʼAtua ia te maʼua ʼaē ke natou tōkakaga ki te fagaovi ʼa te ʼAtua. (Gāue 20:28) Kae ʼi ʼihi temi, ʼe lagi tonu ki he tuagaʼane ke ina fai he gāue ʼe fai ʼi te agamāhani e te ʼu tehina. Ohagē lā, ʼe lagi tonu ke ina takitaki ia te fono fai fakamafola heʼe mole ʼi ai he tehina. Peʼe lagi ina fai he ako Tohi-Tapu ʼi he loto fale, kae ʼe kau ai he tehina. Ko te ʼu gāue ʼaia ʼe pipiki pē ki te ʼu gāue ʼo te kōkelekāsio, koia ʼe tonu ai ki te tuagaʼane ke pūlouʼi tona ʼulu moʼo fakamoʼoni ʼe ina fai te gāue ʼe tonu ke fai e he tehina.

Kae ʼe lahi te ʼu faʼahi ʼo te tauhi, ʼe mole fakamaʼua ai ki te fafine Kilisitiano ke pūlouʼi tona ʼulu. Ohagē lā, kā fai hana tali ʼi te ʼu fono pea ʼe mole fakamaʼua ki ai ke pūlou tona ʼulu, mokā fai fakamafola mo tona ʼohoana peʼe ko he tahi age tehina, peʼe mokā ako peʼe faikole mo hana fānau heʼeki papitema. ʼE mahino papau ia, ʼe feala ke lagaʼi ni ʼihi age fehuʼi, pea kapau ʼe lotolotolua he tuagaʼane ʼo ʼuhiga mo he faʼahi, ʼe feala ke ina fai hana tahi ʼu kumi.b Kapau ʼe mole heʼeki mahino kiai, pea kapau ʼe ina logoʼi ʼi tona leʼo ʼo loto ʼe tonu ke pūlouʼi tona ʼulu, pea ko he faʼahi ia ʼe mole kovi.

Te ʼu tupuʼaga. ʼI te vaega 10, ʼe tou maʼu ai te ʼu tupuʼaga e lua ʼo te fia fakalogo ʼa he tuagaʼane ia te fakatotonu ʼaia: “ ʼE tonu ki te fafine ʼohoana ke ina fai he fakaʼiloga ʼi tona ʼulu ʼo ʼuhiga mo te tuʼulaga pule, ʼuhi ko te kau ʼāselo.” ʼUluaki, kotou tokagaʼi ia te kupuʼi palalau ʼaē ko “he fakaʼiloga . . . ʼo ʼuhiga mo te tuʼulaga pule.” Ko te pūlouʼi e te fafine ʼo tona ʼulu, ʼe ina fakahā ai ia tana tali ʼaē ia te tuʼulaga pule, ʼaē neʼe tuku e Sehova ki te ʼu tagata ʼaē kua papitema ʼi te kōkelekāsio. Pea ʼe ina fakahā ai ia tona ʼofa pea mo tana agatonu ʼaē kiā Sehova ʼAtua. Lua tupuʼaga ʼo tana pūlouʼi ʼo tona ʼulu, “ ʼuhi ko te kau ʼāselo.” ʼAki te pūlouʼi e he fafine ʼo tona ʼulu, ʼe malave feafeaʼi te faʼahi ʼaia ki te kau ʼāselo mālolohi?

ʼE fua lelei ki te kau ʼāselo ʼi tanatou sisio ifo ʼe fakaʼapaʼapaʼi te pule fakaʼatua ʼi te kautahi ʼa Sehova, ʼi te lagi pea mo te kele. ʼE toe fua lelei kiā nātou ia te faʼifaʼitaki lelei ʼaē ʼe fakahā e te hahaʼi agahala ʼi te faʼahi ʼaia. Pea mo nātou pē foki, ʼe tonu ke natou fakalogo ki te fakatuʼutuʼu ʼa Sehova, pea ko he faʼahi neʼe mole lavaʼi e ʼihi ʼāselo. (Suta 6) ʼI te temi nei, ʼe feala ke tokogaʼi e te kau ʼāselo te ʼu faʼahi ʼaē ʼe faiva age ai he tuagaʼane, mo ʼatamai age, pea mo poto age ʼi he tehina ʼi te kōkelekāsio; kae logolā te ʼu faʼahi fuli ʼaia ʼe lotolelei aipē te tuagaʼane ke talagafua ki tona tuʼulaga pule. ʼI ʼihi ʼaluʼaga, ko te tuagaʼane ʼe ko he Kilisitiano fakanofo ʼe liliu anai ki muli age ʼo kaugā maʼu tofiʼa mo Kilisito. Ki muli age, ko te tuagaʼane ʼaia ʼe ina maʼu anai he tuʼulaga ʼe māʼoluga age ʼi te kau ʼāselo pea mo kaugā hau anai mo Kilisito ʼi selō. ʼE ko he faʼifaʼitaki lelei ʼaia ke sio kiai te kau ʼāselo ʼi te temi nei! ʼIo, ʼe ko he pilivilēsio ʼaia ʼe maʼu e te ʼu fafine Kilisitiano fuli moʼo fakahā ia tanatou fakalogo agavaivai ʼi tanatou agatonu pea mo talagafua kae mamata kiai ia te ʼu toko lauʼi miliona ʼāselo agatonu!