Te Tali Ki ʼAkotou Fehuʼi

◼ ʼE tonu koa ke pulouʼi e he fafine Kilisitiano tona ʼulu moka kaugā olo mo he tagata Kilisitiano ʼo fai he ako Tohi-Tapu ʼi te muʼa matapa?

Kapau ʼe fai e he fafine Kilisitiano he ako Tohi-Tapu kaʼe ʼe hoa mo he tagata Kilisitiano, pea ʼe tonu anai ke ina pulouʼi tona ʼulu. (1 Ko. 11:3-10) ʼE fakamahino fenei ʼi Te Tule Leʼo ʼo te ʼaho 15 ʼo Sulio 2002, ʼi te pasina 27: “Ko te koga ʼaenī ʼe ko he fakatuʼutuʼu ʼo te faiako pea ʼi te agamāhani ko ia ʼaē ʼe ina fai te ako ʼe ko ia ʼaē ʼe ina takitaki te ako. ʼI te ʼu taʼi ʼaluʼaga ʼaia, ko te taʼi ako ʼaia ʼe ko he fakaloaloa atu ʼo te kokelekasio. Koia ka fai he ako feiā e te fafine Fakamoʼoni kua papitema kae ʼe kau ai he tēhina Fakamoʼoni, ʼe lelei ki te fafine ke ina pūlouʼi tona ʼulu,” tatau ai pe peʼe fai te ako ʼi te loto fale, ʼi te muʼa matapa peʼe ʼi he tahi age faʼahi.

Kaʼe ʼe mole ʼaoga anai ke pulouʼi e te fafine Kilisitiano tona ʼulu mo kapau ʼe kaugā olo mo he tagata Kilisitiano ʼo fai tana ʼaʼahi pea ina fakaha ai pe ʼe feafeaʼi te fai ʼo te ako Tohi-Tapu peʼe ina kamata te ako. Kaʼe ʼe ʼaoga anai ke pulouʼi tona ʼulu mo kapau ʼe kaugā olo mo he tagata Kilisitiano ʼo fai tana ako Tohi-Tapu ʼi te muʼa matapa, ko he ako kua ʼosi ina lau ko he ako Tohi-Tapu pea ʼe ina hoko atu.