Kotea Te Puleʼaga ʼo Te ʼAtua?

Ko te logo maʼuhiga ʼae ʼe talanoa ki ai te Tohi-Tapu ʼe ko te Puleʼaga ʼo te ʼAtua. ʼE fakaʼaogaʼi anai e Sehova te Puleʼaga ʼaia moʼo fakahoko tana fakatuʼutuʼu ʼi te kamata ʼo ʼuhiga mo te kele. Kotea te Puleʼaga? ʼE tou iloʼi feafeaʼi ʼe lolotoga pule nei? Kotea ʼae kua ina fakahoko? Pea kotea ka ina fai ʼi te ka haʼu? ʼE ke maʼu anai ʼona tali ʼi te kapite ʼaeni mo te ʼu kapite ʼe lua ʼae ʼe hoa mai.

1. Kotea te Puleʼaga ʼo te ʼAtua? Ko ai ʼe Hau ai?

ʼE ko he puleʼaga neʼe fakatuʼu e Sehova. Pea ko Sesu Kilisito ʼae ʼe hau ʼi te Puleʼaga ʼaia pea ʼe pule mai te lagi. (Mateo 4:17; Soane 18:36) ʼE ui ʼi te Tohi-Tapu ‘ʼe hau anai ia Sesu ʼo talu ai.’ (Luka 1:32, 33) ʼE ina fakahoko anai tana pule fakahau ki te hahaʼi fuli ʼi te kele.

2. Ko ai ʼe kaugā hau mo Sesu?

ʼE mole ko Sesu pe ʼae ʼe pule ʼi te Puleʼaga. ʼE ui ʼi te Tohi-Tapu ʼe ʼi ai “he hahaʼi mai te ʼu telepi fuli, mo te ʼu lea fuli, mo te ʼu lanu fuli pea mo te ʼu fenua fuli, . . . ʼe tonu ke natou hau ki te kele.” (Apokalipesi 5:9, 10) ʼE natou toko fia? Talu pe te hifo mai ʼa Sesu ki te kele mo te liliu ʼa te toko lauʼi miliona hahaʼi ko ʼana tisipulo. Kae ʼe mole natou olo fuli ki selo ʼo kaugā hau mo ia. ʼE ko te toko 144000 pe ʼae ka kaugā hau mo Sesu. (Lau ia Apokalipesi 14:1-4.) ʼE maʼuʼuli anai te kau tisipulo fuli ʼae ʼi te kele ʼo fakalogo ki te Puleʼaga ʼo te ʼAtua.—Pesalemo 37:29.

3. He koʼe ʼe lelei age te Puleʼaga ʼo te ʼAtua ʼi te ʼu puleʼaga fakatagata?

Loga la ʼe faiga te kau taki ke natou fai ni gaue lelei, kae ʼe mole natou lava fakahoko ʼanatou fakatuʼutuʼu. ʼAki te temi, ʼe fetogi leva natou e ʼihi kau taki. Pea ko natou ʼaia ʼe lagi natou manatu pe leva kia natou totonu pea ʼe mole natou fia tokoni ki te hahaʼi. Kae ʼe mole fetogi anai ʼi he temi ia ia ʼae ʼe hau ʼi te Puleʼaga ʼo te ʼAtua. Neʼe fakatuʼu e te ʼAtua ‘he puleʼaga ʼe mole pulihi anai ʼi he temi.’ (Taniela 2:44) ʼE pule anai ia Sesu ʼi te kele katoa pea ʼe mole fakapalatahi anai. Ko he pule ʼe ʼofa, mo agalelei pea mo faitotonu. Pea ʼe ina akoʼi anai ki te hahaʼi ke natou toe fakaha te ʼu kalitate ʼaia.—Lau ia Esaia 11:9.

4. He puleʼaga malohi ka pule ki te kele katoa

ʼE malohi age Sesu Kilisito ia ʼi he tahi ʼe pule ia ʼaho nei peʼe ʼi muʼa atu. Lau ia Mateo 28:18, pea fai te fehuʼi ʼaeni:

• Kotea ʼae ʼe kehekehe ai te pule ʼa Sesu mo ʼae ʼa te kau taki?

ʼE fetogi tuʼumaʼu te ʼu puleʼaga fakatagata pea ʼe natou tahi puleʼi pe he koga ʼo te kele. Kae ʼe feafeaʼi ki te Puleʼaga ʼo te ʼAtua? Lau ia Taniela 7:14, pea fai te ʼu fehuʼi ʼaeni:

• ʼI tau manatu la, he koʼe ʼe lelei ke ‘mole gata’ tana pule?

• ʼI tau manatu la, he koʼe ʼe lelei ke ina puleʼi te kele katoa?

5. ʼE tonu ke fetogi te pule ʼa te tagata

He koʼe ʼe tonu ke fetogi e te Puleʼaga ʼo te ʼAtua ia te ʼu puleʼaga fakatagata? Vakaʼi te ʼATA VITEO, pea fai te fehuʼi ʼae ʼe hoa mai.

ʼATA VITEO: Kotea Te Puleʼaga ʼo Te ʼAtua?—Kogaʼi ʼAta (1:41)

• Neʼe kotea te ʼu fua ʼo te pule ʼa te tagata?

Lau ia Ekelesiasi 8:9, pea fai te ʼu fehuʼi ʼaeni:

• Kia koe la, he koʼe ʼe tonu ke fetogi e te Puleʼaga ʼo te ʼAtua ia te ʼu puleʼaga fakatagata?

6. He kau taki ʼe lotomahino

Neʼe maʼuli ia Sesu, te Hau ʼo te Puleʼaga, ʼi te kele ohage pe ko te tagata fuli. Koia ʼe feala ke “lotomahino ki ʼotatou vaivaiʼaga.” (Hepeleo 4:15) Neʼe filifili e Sehova he toko 144000 ke kaugā hau mo Sesu. Pea ʼe ko ni hahaʼi tagata mo fafine ʼe omai “mai te ʼu telepi fuli, mo te ʼu lea fuli, mo te ʼu lanu fuli pea mo te ʼu fenua fuli.”—Apokalipesi 5:9.

• Kotea ʼe ke logoʼi ʼi tau iloʼi ʼae ʼe mahino ia Sesu mo te toko 144000 ki te ʼu meʼa ʼae ʼe ke logoʼi mo ʼou fihifihia?

7. He ʼu lao ʼe fua lelei kia tatou

ʼE fakatuʼu e te ʼu puleʼaga ni lao ke fua lelei ki te hahaʼi. Pea ʼe toe feia pe mo te Puleʼaga ʼo te ʼAtua, ʼe ina fakatuʼu ni lao ki tana hahaʼi. Lau ia 1 Kolonito 6:9-11 pea fai te ʼu fehuʼi ʼaeni:

• Kia koe la, ʼe feafeaʼi anai te malamanei moka fakalogo te hahaʼi fuli ki te ʼu lao ʼa te ʼAtua?a

• ʼI tau manatu la, neʼe tonu ke fakatuʼu e Sehova te ʼu lao ʼaia pea ke fakalogo ki ai te hahaʼi? Kotea tona tupuʼaga?

• ʼE feala koa kia natou ʼae neʼe mole fakalogo ki te ʼu lao ʼaia ke natou fetogi? He koʼe ʼe ke ui te faʼahi ʼaia?—Vakaʼi te vaega 11.

MANATU TAFITO

Ko te Puleʼaga ʼo te ʼAtua ʼe ko he puleʼaga moʼoni ʼe tuʼu ʼi selo. Pea kua ina vave puleʼi pe te kele katoa.

Fehuʼi Fakamanatu

• Ko ai ia natou ka hau ʼi te Puleʼaga ʼo te ʼAtua?

• He koʼe ʼe lelei age te Puleʼaga ʼo te ʼAtua ʼi te ʼu puleʼaga fakatagata fuli?

• Kotea la te ʼu lao ʼae ʼe loto e Sehova ke fakalogo ki ai tana hahaʼi?

TE TAHI ʼU MANATU

Neʼe akoʼi koa e Sesu ʼe nofo te Puleʼaga ia tatou takitokotahi?

“ʼE Nofo Koa Te Puleʼaga ʼo Te ʼAtua ʼi Tou Loto?” (Alatike ʼi te jw.org)

He koʼe ʼe filifili e te kau Fakamoʼoni ʼa Sehova ke natou agatonu ki te Puleʼaga ʼo te ʼAtua kae mole ki te pule ʼa te tagata?

Neʼe Agatonu Ki Te Puleʼaga (1:43)

Te ʼu manatu ʼe fakaha ʼi te Tohi-Tapu ʼo ʼuhiga mo te toko 144000 ʼae neʼe filifili e Sehova ke kaugā hau mo Sesu.

“Ko Ai ʼe Alu Ki Selo?” (Alatike ʼi te jw.org)

Neʼe tauʼi e he fafine te heʼe faitotonu pea neʼe tui papau ʼe ko te ʼAtua pe ʼe feala ke ina fakatuʼu te faitotonu ʼi te malamanei.

“J’ai découvert la solution à l’injustice” (Réveillez-vous !, novembre 2011)