ʼE ʼAoga Koa Te Tohi-Tapu Kia Koe?

ʼE tou fia iloʼi fuli pe koʼe ʼe tou mamahi, mo mamate, pea mo totatou ka haʼu. Pea ʼe tou toe tuʼania pe ʼe tou tokaga feafeaʼi ki totatou kiʼi famili pea ke natou fiafia. Neʼe tokagaʼi e te tokolahi ʼe maʼu te tali ki te ʼu fehuʼi ʼaia ʼi te Tohi-Tapu, pea ʼe tokoni ia te Tohi-Tapu kia natou. ʼE ke manatu koa ʼe ʼaoga te Tohi-Tapu kia koe?

1. Kotea te ʼu fehuʼi ʼe tali ki ai te Tohi-Tapu?

ʼE tali ki te ʼu fehuʼi ʼaeni: Neʼe kamata feafeaʼi te maʼuli? Kotea te ʼuhiga ʼo totatou maʼuli? He koʼe ʼe mamahi te hahaʼi agalelei? ʼE tou olo kifea moka tou mamate? He koʼe ʼe fetauʼaki te hahaʼi, kae natou fia maʼuli tokalelei? Kotea ka hoko ki te kele? Ko te toko lauʼi miliona ʼe natou fai ia te ʼu fehuʼi ʼaia pea neʼe natou fiafia ʼi te maʼu ʼona tali ʼi te Tohi-Tapu.

2. ’E ʼaoga koa te Tohi-Tapu kia koe?

’E tou ma’u ʼi te Tohi-Tapu he ’u tokoni ʼaoga ki te maʼuli fiafia ’o te famili, moka tou lotohoha, pe’e ke tou fa’a kataki ’i te gaue. ʼI te tohi ʼaeni, ʼe ke maʼu ai anai te manatu ʼa te Tohi-Tapu ʼo ʼuhiga mo te ʼu faʼahi ʼaia pea mo ʼihi atu aluʼaga. Pea ʼe ke tokagaʼi anai, ‘ko meʼa fuli ʼae ʼe tohi ʼi te ʼu Tohi Taputapu, ʼe ʼaoga kia koe.’​—2 Timoteo 3:16.

TA FAKALOLOTO

Ta vakaʼi pe neʼe ʼaoga feafeaʼi te Tohi-Tapu ki te hahaʼi, kotea ʼe tonu ke ke fai ke ke fia lau te Tohi-Tapu, pea he koʼe ʼe tonu ke tokoni atu he tahi.

3. ʼE feala ke tokoni mai te Tohi-Tapu

ʼE hage te Tohi-Tapu ko he malama taki. ʼE tokoni mai ke ta toʼo he ʼu tonu ʼe lelei pea ke ta iloʼi ia te ka haʼu.

Lau ia Pesalemo 119:​105, pea fai te ʼu fehuʼi ʼaeni:

• Kotea neʼe ui e te tagata faipesalemo ʼo ʼuhiga mo te Tohi-Tapu?

• Kae ʼe feafeaʼi kia koe?

4. ʼE tali te Tohi-Tapu kia fehuʼi fuli

ʼATA VITEO: ʼAua Naʼa Puli Takotou Falala (1:48)

• Kotea la ʼae neʼe feuiʼaki e te fafine ʼaia?

• Kotea ʼae neʼe hoko ʼi tana ako te Tohi-Tapu?

ʼE lelei ke tou faifehuʼi, he ʼe ko te meʼa ʼaia ʼe ui mai ʼi te Tohi-Tapu. Lau ia Mateo 7:7, pea fai te fehuʼi ʼaeni:

• Kotea la he ʼu fehuʼi neʼe ke fai?

5. Ko he meʼa fakafiafia te lau ʼo te Tohi-Tapu

ʼATA VITEO: Lau ʼo Te Tohi-Tapu (2:05)

• ʼI te ʼata ʼaeni, ʼe fia lautohi koa te kau tupulaga?

• Kae he koʼe ʼe natou fia lau ia te Tohi-Tapu?

ʼE tou maʼu he ʼamanaki mo he fakafimalie ʼi te Tohi-Tapu. Lau ia Loma 15:4, pea fai te fehuʼi ʼaeni:

• ʼE mole ke fia iloʼi la ia te ʼamanaki mo te fakafimalie ʼae ʼe talanoa ki ai te Tohi-Tapu?

6. ʼE ta mahino lelei ki te Tohi-Tapu moka tokoni mai he tahi

Tokolahi ʼe natou fia lau te Tohi-Tapu kae ʼe natou toe loto ke tokoni age he tahi ke natou mahino. Lau ia Gaue 8:26-31, pea fai te fehuʼi ʼaeni:

• ʼE feafeaʼi hatatou mahino ki te ʼu manatu ʼae ʼi te Tohi-Tapu? ​—Vakaʼi te ʼu vaega 30 mo 31.

MANATU TAFITO

ʼE tou maʼu ʼi te Tohi-Tapu he ʼu tokoni ʼaoga ki totatou maʼuli. ʼE tali kia fehuʼi fuli ʼe tou fai. Pea ʼe tou maʼu ai he fakafimalie mo he ʼamanaki.

Fehuʼi Fakamanatu

• Kotea te ʼu tokoni ʼe tou maʼu ʼi te Tohi-Tapu?

• Kotea ʼihi fehuʼi ʼe tali ki ai te Tohi-Tapu?

• Kotea te tahi ʼu manatu ʼe ke fia iloʼi ʼi te Tohi-Tapu?

TE TAHI ʼU MANATU

ʼE kei ʼaoga te ʼu tokoni ʼo te Tohi-Tapu ia ʼaho nei.

“Te ʼu Akonaki Fakatohi-tapu—Ko He ʼu Tokoni Ki Te ʼu Temi Fuli” (Ko Te Tule Leʼo N° 1 2018)

Neʼe tokoni te Tohi-Tapu ki he tagata neʼe ina maʼu he ʼu manatu fakalotovaivai talu tana kei veliveli.

Neʼe Au Fiafia Leva (2:53)

He ʼu tokoni ʼaoga ʼi te Tohi-Tapu ki te ʼu famili.

“Tokoni ʼe 12 Ki Te Maʼuli Fiafia ʼo Te Famili” (Kotou ʼAʼala! N° 2 2018)

ʼE fakaha lelei ʼi te Tohi-Tapu pe ko ai ʼae ʼe ina puleʼi te malama ʼaeni.

He Koʼe ʼe Lelei Ke Ke Ako Te Tohi-Tapu?—Katoa (3:14)